Hem Laekem Tumas Law Bilong Jehovah

ALBERT D. SCHROEDER, wanfala member bilong Governing Body bilong Olketa Jehovah’s Witness, hem dae long Wednesday, March 8, 2006. Hem 94 year and hem iusim winim 73 year insaed full-taem ministry.

Brata Schroeder hem born long year 1911, long Saginaw, Michigan, U.S.A.a Taem hem pikinini, hem lanem plande samting abaotem Bible from granmami bilong hem, wea helpem hem tu for lovem wei for readim Word bilong Jehovah. Hem studyim Latin and German languis, and electrical engineering long University of Michigan. Bat taem hem minim plande moa samting insaed long Bible, hem lusim skul mekem hem savve join insaed long full-taem waka for preachim Kingdom. Long 1932, hem kamap member bilong Bethel famili long Brooklyn, New York.

Long 1937, taem hem 26 year, Brata Schroeder kasem appointment for lukaftarem waka bilong Olketa Jehovah’s Witness long Britain. Wei wea hem strong for duim preaching waka encouragem staka brata and sista long there for join insaed long full-taem service. Wanfala young man wea hem waka witim long London Bethel hem John E. Barr. Bihaen, tufala serve tugeta for plande year long Governing Body.

Gavman luksavve long waka wea Brata Schroeder duim for Olketa Jehovah’s Witness taem World War II hem gohed. Long August 1942, gavman raosem hem from Britain. Bihaen hem akrosim Atlantic Ocean wea hem danger tumas from war hem gohed, hem kasem bak Brooklyn long September, 1942.

Long datfala taem, olketa servant bilong Jehovah luksavve hao olketa bae need for duim bigfala waka bihaen World War II hem finis. Brata Schroeder hem sapraes and hapi for kasem nextfala assignment​—for help redyim course bilong Watchtower Bible Skul Bilong Gilead. From 1943 go kasem 1960, hem serve olsem wanfala Gilead instructor wea hem help for trainim olketa missionary. Olketa student wea hem teachim long Gilead and bihaen long Kingdom Ministry Skul rememberim olketa gudfala samting wea hem teachim olketa. Hem laekem tumas for helpem olketa student bilong hem for lovem olketa law bilong God and hem strongim hao hem important for fren gud witim Jehovah.

Long 1956, Brata Schroeder maritim Charlotte Bowin, and long 1958, waef bilong hem bornem wanfala son wea nem bilong hem Judah Ben. Brata Schroeder hem wanfala gud Christian hasband and dadi. Long 1974 hem start for serve olsem wanfala member bilong Governing Body, and olketa tinghae long bigfala help wea hem givim and savve wea hem garem. Hem wanfala kaen and hambol man wea evritaem laek for mekhae long nambawan nem bilong God. Iumi sure Brata Schroeder kasem reward bilong hem long heven from hem wanfala anointed Christian wea barava “laekem tumas law bilong Jehovah.”​—Psalm 1:⁠2.

[Footnotes]