“Iufala Mas Hapi Fogud”

‘Iufala bae celebratem festival long Jehovah, and iufala mas hapi fogud.’ —DEUTERONOMY 16:15.

1. (a) Wanem tufala kwestin nao Satan mekem kamap? (b) Bihaen Adam and Eve bighed, wanem profesi nao Jehovah talem?

TAEM Satan muvim Adam and Eve for bighed againstim Creator bilong tufala, hem mekem kamap tufala barava important kwestin. First samting, hem kwestinim sapos Jehovah talem tru samting and sapos wei wea Jehovah rul hem stret or nomoa. Nara samting, Satan tingse only reason olketa man bae servem God hem for kasem gudfala samting for olketa seleva nomoa. Hem talem stret diswan long taem bilong Job. (Genesis 3:1-6; Job 1:9, 10; 2:4, 5) Nomata olsem, Jehovah kwiktaem for duim samting. Jehovah talem firstaem hao hem bae stretem diswan, nomata taem Adam and Eve stap yet long garden bilong Eden. Hem profesi abaotem wanfala “seed” wea bae kam wea Satan bae killim long leg, bat seed hia bae killim Satan long hed and hem bae dae.—Genesis 3:15.

2. Wanem nao samfala samting moa wea Jehovah talem abaotem profesi long Genesis 3:15?

² Gogo, Jehovah talem samfala samting moa abaotem datfala profesi wea diswan showimaot hem bae fulfill evribit. Olsem example, God talem Abraham hao datfala “seed” bae kam from laen bilong hem. (Genesis 22:15-18) Granson bilong Abraham, Jacob, hem dadi bilong 12-fala tribe bilong Israel. Long 1513 B.C.E., taem olketa tribe hia kamap wanfala nation, Jehovah givim olketa datfala Law wea garem olketa difren festival wea kamap evri year. Aposol Paul sei olketa festival hia “piksarem olketa samting wea bae kamap.” (Colossians 2:16, 17; Hebrews 10:1) Olketa samting long olketa festival showimaot hao plan bilong Jehovah for datfala Seed bae fulfill. Olketa Israelite barava hapi tumas taem olketa celebratem olketa festival. Wei for storyim lelebet olketa festival hia bae strongim faith bilong iumi hao iumi fit for trustim olketa promis bilong Jehovah.

Seed Hem Showaot

3. Hu nao Seed wea God promis for sendem kam, and hao nao hem kasem kill long leg bilong hem?

³ Winim 4,000 year bihaen Jehovah talem datfala profesi, Seed wea hem promis for sendem hem showaot. Hem nao Jesus. (Galatians 3:16) Jesus wea perfect showimaot faithful fasin go kasem taem hem dae. Long wei olsem, hem pruvim hao olketa samting wea Satan talem hem no tru. And tu, from Jesus no garem sin, dae bilong hem olsem sakrifaes hem barava spesol. Thru long datwan, Jesus mekem wei for olketa wea faithful wea kam from laen bilong Adam and Eve for kamap free from sin and dae. Taem Jesus dae long post, datfala taem nao Seed wea God promis for sendem kam hem kasem ‘kill long leg.’—Hebrews 9:11-14.

4. Wanem nao piksarem sakrifaes bilong Jesus?

⁴ Long Nisan 14, 33 C.E., Jesus hem dae.a Long Israel, Nisan 14 hem hapi day for olketa celebratem Passover. Evri year long datfala day each famili kaikaim wanfala healthy pikinini sheepsheep. Taem olketa duim datwan, olketa rememberim samting wea blood bilong pikinini sheepsheep duim for sevem olketa firstborn pikinini bilong Israel taem angel killim dae firstborn pikinini bilong olketa long Egypt long Nisan 14, 1513 B.C.E. (Exodus 12:1-14) Datfala Passover sheepsheep piksarem Jesus, wea aposol Paul storyim hem olsem: “God sakrifaesim finis Christ, wea hem nao passover bilong iumi.” (1 Corinthians 5:7) Olsem blood bilong Passover sheepsheep, blood bilong Jesus wea hem pourimaot sevem plande pipol.—John 3:16, 36.

‘Olketa Firstfrut Bilong Olketa wea Dae’

5, 6. (a) Wanem taem nao Jesus resurrect, and wanem samting long Law nao piksarem diswan? (b) Hao nao resurrection bilong Jesus hem mekem wei for Genesis 3:15 hem fulfill?

⁵ Long mek-thri day, Jesus laef bak mekem hem savve givim perfect laef bilong hem wea hem sakrifaesim long Dadi bilong hem. (Hebrews 9:24) Narafala festival piksarem resurrection bilong hem. Nisan 15 hem start bilong Festival bilong Olketa Cake wea No Garem Yeast. Long Nisan 16, olketa Israelite tekem kam wanfala bandol bilong firstfrut bilong barley, wea hem firstfala harvest long Israel, for priest givim long Jehovah. (Leviticus 23:6-14) Hem barava fitim hao long datfala sem day long year 33 C.E., Jehovah stopem nogud plan bilong Satan for finisim for olowe datfala “faithful and tru witness” bilong hem! Long Nisan 16, 33 C.E., Jehovah resurrectim Jesus for kamap wanfala spirit wea kanduit dae.—Revelation 3:14; 1 Peter 3:18.

⁶ Jesus hem “olketa firstfrut bilong olketa wea sleep long dae.” (1 Corinthians 15:20) Jesus no dae moa olsem olketa wea resurrect bifor, bat hem go long heven for stap long raet saed bilong Jehovah, and hem weit go kasem taem Jehovah mekem hem King long Kingdom bilong Jehovah long heven. (Psalm 110:1; Acts 2:32, 33; Hebrews 10:12, 13) Taem Jesus kamap King, hem fit nao for killim long hed datfala barava nogud enemy, Satan, and finisim hem and seed bilong hem evribit.—Revelation 11:15, 18; 20:1-3, 10.

Samfala Moa Long Seed Bilong Abraham

7. Wanem nao Festival bilong Olketa Week?

⁷ Jesus nao Seed wea Jehovah profesi abaotem long Eden, and Jehovah bae iusim datfala Seed for “finisim olketa waka bilong Devil.” (1 John 3:8) Bat taem Jehovah story long Abraham, Hem talem hao “seed” bilong Abraham bae staka. Hem bae “olsem olketa star long skae and olsem olketa sandbis long saedsea.” (Genesis 22:17) Narafala hapi festival hem piksarem hao samfala moa long datfala “seed” bae kamap. Fifti day bihaen Nisan 16, Israel celebratem Festival bilong Olketa Week. Law sei olsem abaotem diswan: “Iufala mas kaontem fifti day go kasem day bihaen long mek-seven sabbath, and iufala mas givim wanfala sakrifaes bilong niu grain long Jehovah. Iufala shud tekem kam from haos bilong iufala, tufala bred for priest givim long Jehovah, olsem sakrifaes. Iufala shud divaedem wanfala ephah bilong best flour bilong iufala long tenfala part and iusim tufala part for wakem tufala bred hia. Iufala shud beikem witim yeast, from olketa nao olketa first raep frut for Jehovah.”b—Leviticus 23:16, 17, 20.

8. Wanem nambawan samting nao happen long Pentecost 33 C.E.?

⁸ Taem Jesus stap long earth, nem wea pipol iusim for Festival bilong Olketa Week hem Pentecost (wea kam from wanfala Greek word wea minim “mek-fifti”). Long Pentecost 33 C.E., bigfala Hae Priest, Jesus Christ wea resurrect finis, hem givim holy spirit long smol grup bilong 120 disaepol wea hipap long Jerusalem. Long datfala taem nao olketa disaepol hia kamap olketa anointed son bilong God and olketa brata bilong Jesus Christ. (Romans 8:15-17) Olketa kamap wanfala niu nation wea hem nao “Israel bilong God.” (Galatians 6:16) Firstaem samfala nomoa insaed datfala nation, bat gogo, bae nation hia hem garem 144,000.—Revelation 7:1-4.

9, 10. Hao nao samting wea happen long taem bilong Pentecost hem piksarem kongregeson bilong olketa anointed Christian?

⁹ Tufala bred wea garem yeast wea priest givim long Jehovah evri year long Pentecost hem piksarem kongregeson bilong olketa anointed Christian. Bred wea garem yeast hem showim hao olketa anointed Christian garem yet sin from Adam. Nomata olsem, olketa savve kam long Jehovah from ransom sakrifaes bilong Jesus. (Romans 5:1, 2) Why nao olketa iusim tufala bred? Maet diswan hem bikos gogo, olketa anointed son bilong God bae kam from tufala grup—firstaem from olketa Jew and bihaen from olketa wea no Jew.—Galatians 3:26-29; Ephesians 2:13-18.

¹⁰ Tufala bred wea priest givim long Jehovah long Pentecost olketa wakem from olketa firstfrut bilong wheat harvest. Long sem wei tu, olketa Christian wea spirit anointim nao “olketa firstfrut bilong olketa samting wea [God] creatim.” (James 1:18) Olketa nao first wan for kasem forgiveness for sin bilong olketa from blood bilong Jesus, and datwan mekem olketa savve kasem laef long heven wea olketa kanduit dae and for rul witim Jesus long Kingdom bilong hem. (1 Corinthians 15:53; Philippians 3:20, 21; Revelation 20:6) Klosap nao olketa hia wea stap long heven bae “shepherdim [olketa nation] witim iron stik” and lukim God ‘pisisim Satan anda long leg bilong olketa.’ (Revelation 2:26, 27; Romans 16:20) Aposol John hem sei: “Olketa nao olketa wea followim datfala Pikinini Sheepsheep long evri ples wea hem go long hem. Hem baem olketa from midolwan long olketa man olsem olketa firstfala frut for God and for datfala Pikinini Sheepsheep.”—Revelation 14:4.

Day wea Mekhae Long Salvation

11, 12. (a) Wanem nao happen long Day bilong Atonement? (b) Olketa wanem gud samting nao olketa Israelite kasem taem hae priest sakrifaesim buluka and tufala goat?

¹¹ Long mek-ten day bilong Ethanim (wea bihaen olketa kolem Tishri),c Israel celebratem wanfala festival wea piksarem olketa gud samting olketa man bae kasem from ransom sakrifaes bilong Jesus. Long datfala day evriwan long Israel hipap tugeta for Day bilong Atonement and olketa priest givim sakrifaes for sin bilong datfala full nation.—Leviticus 16:29, 30.

¹² Long Day bilong Atonement, hae priest busarem wanfala young buluka and hem putim lelebet blood bilong datfala buluka sevenfala taem front long kava bilong Ark insaed long Most Holy, wea piksarem wei for givim blood hia long Jehovah. Datwan hem for sin bilong hae priest and olketa long “haos bilong hem,” wea minim olketa nara priest and olketa Levite. Then hae priest tekem kam tufala goat. Wanfala wea hem busarem hem for sakrifaes for sin bilong “olketa pipol.” Hem tekem samfala blood bilong datfala goat tu and putim lelebet long kava bilong Ark insaed long Most Holy. Bihaen, hae priest putim tufala hand bilong hem antap long hed bilong mek-tu goat and hem talemaot sin bilong olketa son bilong Israel. Then hem sendem goat hia go long wilderness for tekem sin bilong Israel go farawe long tokpiksa wei.—Leviticus 16:3-16, 21, 22.

13. Hao nao olketa samting wea happen long Day bilong Atonement piksarem samting wea Jesus duim?

¹³ Olketa samting hia piksarem hao bigfala Hae Priest, Jesus, iusim ransom sakrifaes bilong hem for forgivim olketa sin. Firstaem, datfala “spiritual haos” wea hem nao 144,000 anointed Christian kasem gud samting from datfala sakrifaes, and diswan mekem Jehovah ting long olketa olsem klin and raeteous. (1 Peter 2:5; 1 Corinthians 6:11) Buluka wea priest sakrifaesim hem piksarem diswan. From datwan, olketa garem chance for laef long heven. Mek-tu samting, sakrifaes bilong goat piksarem sakrifaes bilong Jesus for plande million pipol wea showimaot faith long Christ. Olketa hia bae kasem laef olowe long disfala earth wea Adam and Eve lusim. (Psalm 37:10, 11) From blood wea Jesus pourimaot, Jesus tekem awe sin bilong olketa man olsem datfala mek-tu goat long tokpiksa wei tekem sin bilong olketa Israelite go long wilderness.—Isaiah 53:4, 5.

Hapi Front Long Jehovah

14, 15. Wanem nao happen long taem bilong Festival bilong Olketa Smol Leaf Haos, and diswan mekem olketa Israelite tingim wanem samting?

¹⁴ Bihaen long Day bilong Atonement, olketa Israelite celebratem Festival bilong Olketa Smol Leaf Haos, wea datwan hem taem bilong hapi wea winim olketa nara festival long year bilong olketa Jew. (Leviticus 23:34-43) Datfala festival start long namba 15 go kasem namba 21 bilong Ethanim and hem finis witim holy assembly long namba 22 bilong datfala month. Datwan hem end bilong taem for hipimap harvest and taem for thankiu for plande gud samting God givim long olketa. Dastawe, Jehovah talem olketa Israelite olsem: “God bilong iufala, Jehovah, bae blessim evri samting wea iufala plantim and evri waka wea hand bilong iufala duim, and iufala mas hapi fogud.” (Deuteronomy 16:15) Masbi hem taem wea evriwan barava hapi!

¹⁵ Long taem bilong datfala festival, olketa Israelite stap insaed olketa smol leaf haos for sevenfala day. Diswan mekem olketa tingim hao wanfala taem bifor olketa stap insaed olketa smol haos long wilderness. Festival hia hem mekem olketa barava ting raonem wei wea Jehovah kea olsem wanfala dadi. (Deuteronomy 8:15, 16) And from man wea rich or poor stap insaed semkaen haos, diswan mekem olketa Israelite tingim hao long taem bilong festival evriwan semsem nomoa.—Nehemiah 8:14-16.

16. Wanem nao Festival bilong Olketa Smol Leaf Haos hem piksarem?

¹⁶ Festival bilong Olketa Smol Leaf Haos hem festival bilong harvest. Hem wanfala hapi celebration for hipimap harvest and hem piksarem taem for hapi for hipimap olketa wea showimaot faith long Jesus Christ. Diswan start long Pentecost 33 C.E., taem God anointim 120 disaepol bilong Jesus for kamap part long “wanfala sekson bilong olketa holy priest.” Olsem olketa Israelite stap insaed olketa smol leaf haos for samfala day nomoa, olketa anointed savve hao olketa “stap for lelebet taem” nomoa long world wea no obeyim God. Olketa garem hope for go long heven. (1 Peter 2:5, 11) Wei for hipimap olketa anointed Christian hem bae finis long “olketa last day” wea iumi stap insaed, taem God hipimap olketa last wan bilong 144,000.—2 Timothy 3:1.

17, 18. (a) Wanem nao showimaot olketa narawan tu kasem gud samting from sakrifaes bilong Jesus? (b) Hu nao kasem gud samting distaem from tokpiksa Festival bilong Olketa Smol Leaf Haos, and wanem taem nao datfala hapi festival bae hem finis?

¹⁷ Wanfala interesting samting long taem bilong datfala festival long bifor nao olketa sakrifaesim 70-fala buluka. (Numbers 29:12-34) Datfala namba 70 hem 7 taems 10. Long Bible olketa namba hia minim samting wea perfect long heven and long earth. So olketa wea faithful from 70 famili wea kam from laen bilong Noah bae kasem gud samting from sakrifaes bilong Jesus. (Genesis 10:1-29) For mekem datwan kamap, distaem bigfala waka kamap for hipimap pipol from evri nation wea showimaot faith long Jesus and wea garem hope for stap long paradaes earth.

¹⁸ Aposol John lukim vision abaotem wei for hipimap pipol distaem. First samting, hem herem voice wea sei waka for hipimap olketa last wan bilong 144,000 hem finis nao. Then hem lukim “wanfala big crowd, wea no eni man savve kaontem,” wea standap front long Jehovah and Jesus, and olketa “holem olketa branch bilong palm tree.” Olketa hia “kamaot from datfala big trabol” and go insaed niu world. Olketa tu stap for lelebet taem long disfala world, and olketa trustim and luk forward long taem wea “Pikinini Sheepsheep . . . bae shepherdim olketa, and bae leadim olketa go long spring wata bilong laef.” Long datfala taem, “God bae aotem krae from eye bilong olketa.” (Revelation 7:1-10, 14-17) Tokpiksa Festival bilong Olketa Smol Leaf Haos bae finis long end bilong Thousand Year Rul bilong Christ taem big crowd and olketa wea faithful wea resurrect kasem laef olowe.—Revelation 20:5.

19. Wanem gud samting nao iumi kasem from wei for ting raonem olketa festival long Israel?

¹⁹ Iumi tu savve “hapi fogud” taem iumi ting raonem mining bilong olketa festival bilong olketa Jew bifor. Hem nambawan samting for lukim hao Jehovah provaedem olketa samting wea showimaot hao profesi wea hem talem long Eden bae fulfill and for lukim hao hem fulfill long isisi wei. Distaem, iumi savve Seed hem showaot finis and hem kasem kill long leg. Hem King long heven distaem. And tu, klosap evriwan long 144,000 pruvim finis hao olketa faithful go kasem taem olketa dae. Wanem samting moa bae happen? Wanem taem nao datfala profesi bae fulfill evribit? Iumi bae storyim diswan long next article.

[Olketa Footnote]

Waswe, Iu Savve Explainim?

• Wanem nao Passover sheepsheep hem piksarem?

• Hao nao datfala Festival bilong Pentecost hem piksarem wei for hipimap pipol?

• Olketa wanem samting long Day bilong Atonement nao point go long wei wea ransom sakrifaes bilong Jesus helpem pipol?

• Hao nao Festival bilong Olketa Smol Leaf Haos piksarem wei for hipimap olketa Christian?

[Chart long page 24]

(For fully formatted text, see publication)

Passover

Nisan 14

Samting wea Happen:

Busarem Passover sheepsheep

Samting wea Hem Piksarem:

Jesus hem dae

Festival bilong Olketa Cake wea No Garem Yeast (Nisan 15-21)

Nisan 15

Samting wea Happen:

Sabbath

Nisan 16

Samting wea Happen:

Givim barley

Samting wea Hem Piksarem:

Jesus hem resurrect

50-fala day

Festival bilong Olketa Week (Pentecost)

Sivan 6

Samting wea Happen:

Givim tufala bred

Samting wea Hem Piksarem:

Jesus givim long Jehovah olketa anointed brata bilong hem

Day bilong Atonement

Tishri 10

Samting wea Happen:

Givim wanfala buluka and tufala goat

Samting wea Hem Piksarem:

Jesus givim blood bilong hem for evri man

Festival bilong Olketa Smol Leaf Haos (Hipimap, Olketa Tabernacle)

Tishri 15-21

Samting wea Happen:

Olketa Israelite hapi for stap insaed olketa smol leaf haos and hapi long harvest, givim 70-fala buluka

Samting wea Hem Piksarem:

Hipimap olketa anointed and “big crowd”

[Piksa long page 23]

Olsem blood bilong Passover sheepsheep, blood bilong Jesus sevem staka pipol

[Piksa long page 24]

Olketa firstfrut bilong barley harvest long Nisan 16 piksarem resurrection bilong Jesus

[Piksa long page 25]

Tufala bred long Pentecost piksarem kongregeson bilong olketa anointed Christian

[Piksa long page 26]

Festival bilong Olketa Smol Leaf Haos piksarem hapi wei for hipimap olketa anointed and “big crowd” from evri nation