No Stop for Mekem Wei wea Iu Tinghae Kamap Moa Big
“Olketa tingting bilong iu barava spesol long mi! O God, olketa hia kamap staka tumas!”—PSALM 139:17.
1, 2. Why nao iumi shud tinghae long Word bilong God, and hao nao man wea raetem psalm hem talemaot wei wea hem tinghae long diswan?
TAEM olketa repairim temple bilong Jehovah long Jerusalem, Hae Priest Hilkiah hem faendem “datfala buk bilong law bilong Jehovah wea Moses hem raetem” samting olsem 800 year go finis. Disfala samting wea olketa faendem hem barava spesol! Tingim bigfala hapi bilong King Josiah taem olketa showim datfala buk long hem. Tru nao, King Josiah barava tinghae long datwan and stretawe hem askem secretary bilong hem, Shaphan, for readim big.—2 Chronicles 34:14-18.
2 Distaem, full Bible or samfala part bilong hem stap long languis bilong plande billion pipol. Bat waswe, from hem isi tumas for kasem Bible, datwan minim hem no spesol or no important nao? Barava nomoa nao! Olketa tingting bilong Olmaeti nao stap insaed, wea datwan hem for helpem iumi. (2 Timothy 3:16) David wea raetem psalm hem talemaot olketa feeling bilong hem abaotem Word bilong God taem hem raet olsem: “Olketa tingting bilong iu barava spesol long mi! O God, olketa hia kamap staka tumas!”—Psalm 139:17.
3. Wanem nao showaot David hem man wea barava minim olketa samting wea insaed wei for fren witim God?
3 No enitaem wei wea David tinghae long Jehovah, Word bilong hem, and arrangement bilong hem for tru worship, hem katdaon. Staka barava naesfala psalm wea David raetem hem showimaot feeling bilong hem. Olsem example, long Psalm 27:4 hem raet olsem: “Wanfala samting nao mi askem from Jehovah, hem nao samting wea mi bae lukaotem, for mi savve stap insaed long haos bilong Jehovah for full laef bilong mi, for lukim olketa naesfala fasin bilong Jehovah and for lukluk witim fasin for tinghae long temple bilong hem.” Long Hebrew languis wea olketa raetem long disfala verse, disfala toktok “lukluk witim fasin for tinghae” hem minim for gohed ting raonem samting, lukluk gud, and enjoyim wei for lukluk long datwan. Tru tumas, David hem man wea barava minim olketa samting wea insaed wei for fren witim God. Hem tinghae tumas long evri samting wea Jehovah provaedem for strongim faith bilong hem and hem barava enjoyim evri spiritual kaikai hia. Hem fitim for iumi followim example bilong hem for barava tinghae.—Psalm 19:7-11.
Tinghae Long Privilege for Savve Long Truth Insaed Bible
4. Wanem nao mekem Jesus for “kamap hapi tumas from holy spirit”?
4 For minim Word bilong God, man no need for garem bigfala savve or education bilong world, wea savve mekem man praod. Bat, diswan hem depend long kaenfala fasin bilong Jehovah wea iumi no fit for kasem, wea hem givim long pipol wea hambol and honest, and wea luksavve long spiritual need bilong olketa. (Matthew 5:3; 1 John 5:20) Taem Jesus ting raonem hao God raetem nem bilong samfala man wea no perfect long heven, “hem kamap hapi tumas from holy spirit and sei: ‘Mi praisem iu long pablik, Dadi, Lord bilong heven and earth, bikos iu haedem olketa samting hia from olketa wea wise and kleva, and showimaot long olketa wea olsem smolfala pikinini.’ ”—Luke 10:17-21.
5. Why nao olketa disaepol bilong Jesus mas no ting nating long information abaotem Kingdom wea olketa kasem?
5 Bihaen Jesus talem datfala prea wea kam from heart, hem sei olsem long olketa disaepol bilong hem: “Hapi nao olketa man wea lukim olketa samting wea iufala lukim. From mi talem iufala, Plande profet and king laekem tumas for lukim olketa samting wea iufala lukim bat olketa no lukim, and for herem olketa samting wea iufala herem, bat olketa no herem.” Tru nao, Jesus encouragem olketa follower bilong hem wea faithful for no ting nating long nambawan information abaotem Kingdom wea olketa kasem. Olketa servant bilong God wea laef bifor taem wea Jesus kam long earth no savve long information hia, and olketa wea “wise and kleva” long taem bilong Jesus no kasem information hia tu!—Luke 10:23, 24.
6, 7. (a) Why nao iumi shud tinghae long information wea kam from God? (b) Hao nao tru religion hem difren tumas from false religion?
6 Long distaem iumi garem plande nara reason for tinghae long information wea Jehovah givim kam, bikos thru long “datfala faithful and wise slave” hem givim savve wea moa big abaotem Bible for pipol bilong hem. (Matthew 24:45; Daniel 12:10) Profet Daniel hem raet olsem abaotem taem bilong end: “Plande bae muv raon and trufala savve bae kamap staka.” (Daniel 12:4) Tru nao, savve bilong olketa servant bilong Jehovah distaem hem “kamap staka” and olketa servant bilong Jehovah garem plande spiritual kaikai!
7 Bigfala savve abaotem God and plan bilong hem wea pipol bilong hem garem hem difren tumas from wei wea olketa religion bilong Bigfala Babylon barava konfius! Samting wea kamaot from diswan nao, plande pipol wea feel nogud and barava heitim false religion olketa go long tru worship. Olketa hia wea olsem sheepsheep “no laek for join witim [Bigfala Babylon] long olketa sin bilong hem” or “kasem trabol wea hem bae kasem.” Jehovah and olketa servant bilong hem invaetem evriwan olsem for kam insaed long trufala Christian kongregeson.—Revelation 18:2-4; 22:17.
Olketa wea Garem Fasin for Tinghae Kam Long God
8, 9. Hao nao toktok long Haggai 2:7 hem fulfill distaem?
8 Jehovah sei olsem abaotem tokpiksa temple bilong hem: “Mi bae sekem evri nation, and olketa barava spesol samting bilong evri nation mas kam insaed; and mi bae fulimap disfala haos witim glory.” (Haggai 2:7) Disfala spesol profesi hem fulfill firstaem long taem bilong Haggai taem wanfala smol sekson bilong pipol bilong God buildim temple moa long Jerusalem. Distaem, toktok bilong Haggai fulfill moa saed long bigfala spiritual temple bilong Jehovah.
9 Plande million pipol kam finis long disfala tokpiksa temple for worshipim God “witim spirit and truth,” and evri year winim 200,000 pipol wea olketa nao “olketa barava spesol samting bilong evri nation” gohed for kam. (John 4:23, 24) Olsem example, report bilong 2006 service year hem talem 248,327 nao baptaes for showimaot olketa dedicate long Jehovah. Datwan minim samting olsem 680 niu wan baptaes evriday! Love wea olketa garem for truth and wei wea olketa laek for servem Jehovah long wei for preach abaotem Kingdom hem pruvim hao God nao pullim olketa kam insaed organization bilong hem.—John 6:44, 65.
10, 11. Talem wanfala experience wea showimaot hao pipol start for tinghae long olketa tru teaching insaed Bible.
10 Staka hia wea garem gudfala heart interest long truth bikos olketa luksavve hao ‘raeteous man hem difren from wicked man, and man wea servem God hem difren from man wea no servem hem.’ (Malachi 3:18) Tingim experience bilong Wayne and Virginia, wanfala hasband and waef wea lotu long Protestant church bat no faendem ansa for plande kwestin wea tufala garem saed long religion. Tufala heitim war and feel nogud and konfius taem olketa lukim olketa bigman bilong religion blessim olketa soldia and olketa samting for faet. Gogo, nomata Virginia teachim Sunday skul for plande year, olketa narawan long church nating interest long tufala. Tufala sei: “No eniwan visitim mifala or interest long spiritual saed bilong mifala. Samting church interest long hem nomoa, hem selen bilong mifala. Evri samting hia mekem mitufala barava feel nogud long church.” Tufala barava konfius go moa taem church bilong olketa sei homosexual fasin hem olraet nomoa.
11 Long olketa year hia, gele bilong dota bilong tufala hem kamap wanfala Jehovah’s Witness, and gogo, dota bilong tufala tu. Nomata long firstaem Wayne and Virginia feel nogud abaotem diswan, tufala changem tingting bilong tufala and acceptim wanfala Bible study. Wayne hem sei: “Insaed thrifala month nomoa, mifala lanem moa samting abaotem Bible winim wanem mifala lanem insaed 70 year wea go pas! Mifala nating savve hao nem bilong God hem Jehovah, and mifala no savve long eni samting abaotem Kingdom and Paradaes long earth.” No longtaem bihaen, tufala start for attendim olketa kongregeson meeting bilong Olketa Jehovah’s Witness long area wea olketa stap, and tu, olketa join insaed long ministry. Virginia hem sei: “Mifala laek for talem evriwan abaotem truth.” Tufala evriwan winim 80 year taem tufala baptaes long year 2005. Tufala sei: “Mifala faendem grup bilong olketa tru Christian wea mifala hapi for worship witim olketa.”
Tinghae Long Wei wea Iumi “Redi for Duim Evri Gudfala Waka”
12. Wanem nao Jehovah evritaem provaedem for olketa servant bilong hem, and wanem nao iumi mas duim for kasem gudfala samting from datwan?
12 Evritaem Jehovah helpem olketa servant bilong hem for duim will bilong hem. Olsem example, Noah kasem kliafala instruction long hao for buildim ark, wea datwan hem wanfala waka wea olketa mas duim barava followim samting wea Jehovah talem! And hem nao samting wea olketa duim. Why nao olsem? Bikos Noah “duim evri samting wea God komandim hem for duim. Hem barava duim olsem.” (Genesis 6:14-22) Distaem tu, Jehovah barava redyim olketa servant bilong hem for duim will bilong hem. Hem tru, main waka bilong iumi hem for preachim gud nius abaotem Kingdom bilong God wea start for rul finis and helpem olketa wea fit for kamap disaepol bilong Jesus Christ. And olsem Noah, wei wea iumi win long diswan hem depend long wei for obey. Iumi mas obeyim direction wea Jehovah provaedem thru long Word and organization bilong hem.—Matthew 24:14; 28:19, 20.
13. Hao nao Jehovah trainim iumi?
13 For duim datfala waka, iumi mas lane for ‘iusim long stretfala wei’ datfala main tul bilong iumi, Word bilong God, wea “gud for teachim man, for givim kaonsel, for stretem evri samting, and for givim discipline long raeteous wei, mekem man bilong God hem fit evribit, barava redi for duim evri gudfala waka.” (2 Timothy 2:15; 3:16, 17) Jehovah givim iumi gudfala training thru long Christian kongregeson, olsem hem duim long first century. Distaem, long 99,770 kongregeson raonem world, Theocratic Ministry Skul and Service Meeting kamap evri week for trainim iumi for duim ministry. Waswe, iu showimaot iu tinghae long olketa important meeting hia long wei wea iu evritaem attendim and followim olketa samting wea iu lanem?—Hebrews 10:24, 25.
14. Hao nao olketa servant bilong Jehovah showimaot olketa tinghae long privilege for servem God?
14 Plande million pipol bilong God raonem world showimaot olketa tinghae long training wea olketa kasem long wei for barava waka hard insaed long ministry. Olsem example, long 2006 service year, 6,741,444 Kingdom pablisa iusim 1,333,966,199 hour for duim evri difren part bilong datfala waka, wea insaed diswan hem for conductim 6,286,618 Bible study. Hem nao samfala point wea encouragem iumi from datfala report abaotem waka wea gohed evriwea long world. Plis lukluk gud long disfala report and kasem encouragement from hem, olsem wei wea olketa brata bilong iumi long first century kasem gud samting from olketa report bilong preaching waka wea kamap moa big long taem bilong olketa.—Acts 1:15; 2:5-11, 41, 47; 4:4; 6:7.
15. Why nao man shud no feel nogud abaotem service wea hem savve givim long Jehovah witim full soul?
15 Bigfala praise wea Jehovah kasem evri year hem showimaot olketa servant bilong hem barava tinghae long privilege wea olketa garem for savve long Jehovah and for witness abaotem hem. (Isaiah 43:10) Tru nao, sakrifaes bilong praise wea samfala brata and sista bilong iumi wea olo and sik givim hem semsem olsem contribution wea datfala widow woman givim long temple. Bat iumi mas no forgetim hao Jehovah and Son bilong hem barava tinghae long evriwan wea servem God witim full soul, taem olketa duim evri samting wea olketa fit for duim.—Luke 21:1-4; Galatians 6:4.
16. Wanem nao olketa tul for teach wea God provaedem long olketa year wea go pas?
16 Thru long organization bilong hem, Jehovah trainim iumi for duim ministry, and tu, hem givim iumi olketa nambawan tul for teach. Insaed olketa year wea go pas, olketa buk hia nao Truth Where Bringim man Long Life All-the-Way, You Savvy Stop All-the-Way Long Paradise Long Earth, Savvy wea Lead Go Long Laef Olawe and datfala niu buk What Does the Bible Really Teach? Olketa wea barava tinghae long olketa buk hia bae iusim olketa long gudfala wei insaed long ministry.
Iusim Gud Bible Teach Buk
17, 18. Wanem nao wanfala circuit overseer hem talem abaotem datfala Bible Teach buk?
17 Datfala buk What Does the Bible Really Teach? wea garem 19-fala chapter, appendix, and wea olketa raetem long klia and simpol wei hem wanfala nambawan present for ministry. Olsem example, chapter 12 storyim subject “Living in a Way That Pleases God.” Disfala chapter hem explainim hao for kamap fren bilong God, wea staka pipol tingse olketa no fit for duim datwan. (James 2:23) Wanem nao tingting bilong pipol abaotem disfala buk for studyim Bible?
18 Wanfala circuit overseer long Australia sei datfala Bible Teach buk hem “buk wea pipol barava interest long hem and hem mekem chance kamap for savve story gud witim pipol.” Hem sei datfala buk hem isi tumas for iusim dastawe “plande brata and sista strong moa for duim ministry and kasem hapi.” Then hem talem tu hao hem no sapraes taem samfala sei disfala buk hem spesol olsem gold!
19-21. Storyim samfala experience wea showimaot wei wea Bible Teach buk hem barava helpem pipol.
19 Wanfala woman long Guyana hem sei olsem long wanfala pioneer: “Masbi God nao sendem iu kam.” Man wea woman hia stap witim hem lusim hem and tufala smol pikinini bilong tufala. Datfala pioneer hem openem Bible Teach buk go long chapter 1 and readim paragraf 11, anda long smol heding “How Does God Feel About Injustices We Face?” Pioneer hia hem sei: “Olketa point hia barava affectim hem. Bihaen mi readim, hem getap, hem go bihaen long stoa bilong hem, and hem krae fogud.” Disfala woman agree for studyim Bible witim wanfala sista long area bilong hem and hem gohed for muv ahed.
20 Waef bilong José wea stap long Spain hem dae long wanfala accident. Hem lukaotem comfort long wei for iusim olketa drug, and tu, hem go lukim olketa doctor wea savve helpem man saed long feeling. Nomata olsem, olketa doctor hia no savve ansarem disfala main kwestin wea José hem garem: “Why nao God letem waef bilong mi for dae?” Wanday, José hem meetim Francesc, wea tufala waka long sem company. Francesc sei for tufala storyim chapter 11 bilong Bible Teach buk wea garem title “Why Does God Allow Suffering?” Ansa wea diswan givim from Bible and tokpiksa abaotem teacher and student hem barava muvim José. Hem start for study and barava ting strong long datwan, hem attendim wanfala circuit assembly, and distaem hem attendim olketa meeting long Kingdom Hall long ples wea hem stap.
21 For full laef bilong hem, Roman, wanfala bisnisman from Poland wea 40 year, hem respectim Word bilong God. Bat from hem busy tumas long waka bilong hem, hem no muv ahed gud long Bible study bilong hem. Nomata olsem, hem attendim wanfala distrik convention and tekem wanfala copy bilong Bible Teach buk. Bihaen hem readim, tingting bilong hem change. Hem sei olsem: “Disfala buk hem explainim olketa main teaching bilong Bible long wei wea hem mekem full plan bilong God hem klia fogud.” Distaem Roman hem studyim Bible evri week and hem muv ahed gud.
Gohed for Mekem Wei for Tinghae Kamap Moa Big
22, 23. Hao nao iumi savve gohed for showimaot iumi tinghae long hope wea iumi garem?
22 Long “Salvation Hem Klosap!” Distrik Convention, iumi herem hao olketa tru Christian barava luk forward for “sev for olowe,” wea God promisim and wea blood bilong Jesus Christ nao mekem wei for iumi savve kasem datwan. Best wei for showimaot iumi barava tinghae long diswan hem for gohed kamap klin “from olketa waka wea iusles mekem iumi savve givim holy service long datfala God wea laef.”—Hebrews 9:12, 14.
23 Tru nao, winim six million pipol gohed faithful for talemaot gud nius abaotem Kingdom. Diswan hem barava spesol taem iumi tingim hao wei bilong pipol distaem hem for selfish and tingim seleva nomoa. Diswan pruvim tu hao olketa servant bilong Jehovah tinghae tumas long privilege for servem God, from olketa savve olketa “no hard waka nating long saed bilong Lord.” No stop for mekem wei wea iumi tinghae kamap moa big!—1 Corinthians 15:58; Psalm 110:3.
Hao Nao Bae Iu Ansa?
• Wanem nao man wea raetem psalm hem teachim iumi abaotem wei for tinghae long God and olketa spiritual samting wea hem provaedem?
• Hao nao toktok long Haggai 2:7 hem fulfill distaem?
• Hao nao Jehovah redyim olketa servant bilong hem for servem hem long gudfala wei?
• Wanem nao iu savve duim for showimaot iu tinghae long gudfala fasin bilong Jehovah?
[Piksa long page 28]
Jehovah barava redyim iumi for duim will bilong hem