Samting Olketa Angel Duim for Olketa Man

“Bihaen long evri samting hia mi lukim narafala angel kam daon from heven, wea garem bigfala paoa . . . And hem singaot witim strongfala voice olsem: ‘Hem foldaon finis! Bigfala Babylon hem foldaon nao!’”—REVELATION 18:1, 2.

1, 2. Wanem nao showimaot Jehovah hem iusim olketa angel for duim will bilong hem?

TAEM aposol John hem olo and stap olsem prisoner long Patmos Island, God showim hem olketa vision abaotem samting wea bae kamap long future. Hem lukim olketa barava interesting samting taem “spirit” mekem hem stap long “day bilong Lord.” Datfala day hem start taem Jesus Christ kamap king long 1914 and hem gohed go kasem end bilong datfala Wan Thousand Year Rul bilong hem.​—Revelation 1:​10.

² Jehovah God showim diswan for John thru long samwan. Revelation 1:1 hem sei: “Wanfala revelation from Jesus Christ, wea God givim long hem, for showim olketa slave bilong hem evri samting wea bae klosap for happen. And hem sendem go angel bilong hem for showim [diswan] thru long olketa saen long slave bilong hem John.” Thru long Jesus, Jehovah iusim wanfala angel for talem long John olketa nambawan samting abaotem datfala “day bilong Lord.” Long wanfala part bilong datfala vision, John lukim tu “narafala angel kam daon from heven, wea garem bigfala paoa.” Wanem nao assignment bilong disfala angel? “Hem singaot witim strongfala voice olsem: ‘Hem foldaon finis! Bigfala Babylon hem foldaon nao!’” (Revelation 18:1, 2) Disfala angel wea garem bigfala paoa hem kasem privilege for talemaot wei wea Bigfala Babylon hem foldaon, wea hem nao evri false religion. So hem showaot klia hao Jehovah iusim olketa angel long barava important wei for duim will bilong hem. Bifor iumi storyim waka bilong olketa angel insaed plan bilong God and samting olketa duim for iumi, bae iumi storyim wea nao olketa angel hia kam from.

Wea Nao Olketa Angel Kam From?

3. Wanem rong tingting nao plande pipol garem abaotem olketa angel?

³ Plande million pipol distaem biliv olketa angel really stap. Bat staka garem rong tingting abaotem wea nao olketa kam from. Olsem example, long tingting bilong samfala pipol wea biliv long God, taem wanfala famili member or gudfala fren hem dae, God tekem hem for kamap wanfala angel long heven. Waswe, datwan nao samting wea Bible teachim abaotem wea nao olketa angel kam from, and waka bilong olketa?

4. Wanem nao Bible talem abaotem wea olketa angel kam from?

⁴ Nem bilong chief angel wea garem bigfala paoa winim evri narawan, hem Michael. (Jude 9) Diswan hem Jesus Christ nao. (1 Thessalonians 4:​16) Long bifor kam, taem Jehovah disaed for creatim samting, first samting hem wakem nao hem disfala Son bilong hem. (Revelation 3:​14) Bihaen, Jehovah and datfala firstborn Son bilong hem creatim evri narafala angel. (Colossians 1:​15-​17) Jehovah talem hao olketa angel hia olketa son bilong hem taem Hem askem Job olsem: “Wea nao iu stap taem mi wakem earth? Talem mi, sapos iu savve wei for minim samting. . . . Hu nao putim faondeson bilong hem, taem olketa morning star hapi and singaot tugeta, and evri son bilong God singaot for givim praise?” (Job 38:4, 6, 7) Tru tumas, God nao wakem olketa angel, and hem duim datwan longtaem bifor hem wakem olketa man.

5. Long wanem wei nao Jehovah organizem olketa angel?

⁵ Long 1 Corinthians 14:33 hem sei: “God hem wanfala God wea no duim samting olobaot, bat hem God bilong peace.” For mekem olketa organize gud hem divaedem olketa long thrifala grup: (1) olketa seraph, wea waka long throne bilong God, talemaot wei wea hem holy, and keepim pipol bilong hem klin long spiritual wei, (2) olketa cherub, wea mekhae long haefala rul bilong Jehovah, and (3) olketa narafala angel wea duim will bilong hem. (Psalm 103:20; Isaiah 6:​1-3; Ezekiel 10:​3-5; Daniel 7:​10) Wanem nao samfala samting wea olketa angel hia duim for olketa man?​—Revelation 5:​11.

Wanem Nao Waka Bilong Olketa Angel?

6. Long garden bilong Eden, Jehovah iusim olketa cherub for duim wanem?

⁶ Firstaem wea Bible story abaotem olketa angel nao hem long Genesis 3:​24, wea sei olsem: “[Jehovah] hem aotem datfala man from garden bilong Eden and putim olketa cherub long east saed bilong garden, and sword wea fire and wea tatane raon hem satem road wea go for tree bilong laef.” Olketa cherub hia stopem Adam and Eve for go bak insaed long datfala garden. Datwan hem happen no longtaem bihaen God wakem olketa man. Start kam long datfala taem, wanem nao olketa angel duim?

7. Wanem nao mining bilong word “angel” long Hebrew and Greek languis hem showimaot abaotem wanfala waka bilong olketa angel?

⁷ Klosap 400 taem nao Bible hem storyim olketa angel. Hebrew and Greek word for “angel” hem minim “man for talem message.” So God hem iusim olketa angel for talem message bilong hem long olketa man. Olsem tufala first paragraf bilong disfala article talem, Jehovah iusim wanfala angel for talem message bilong hem long aposol John.

8, 9. (a) Hao nao wei wea wanfala angel visitim Manoah and waef bilong hem affectim tufala? (b) Wanem nao parents savve lanem from taem wea angel bilong God visitim Manoah?

⁸ God iusim olketa angel tu for sapotim and encouragem olketa servant bilong hem long earth. Olsem example, long taem wea olketa Judge stap long Israel, Manoah and waef bilong hem laekem tumas for garem pikinini bat tufala no savve garem eni pikinini. Jehovah sendem angel bilong hem for talem waef bilong Manoah hao hem bae bornem wanfala pikinini boy. Bible hem sei: “Bae iu babule, and bae iu bornem wanfala boy, and no eniwan shud katem hair bilong hem, bikos hem bae kamap wanfala Nazarite bilong God bihaen hem born, and hem bae lead for sevem olketa Israelite from olketa Philistine.”—Judges 13:1-5.

⁹ Gogo waef bilong Manoah bornem wanfala son, Samson, wea hem wanfala man long Bible wea staka pipol savve long hem. (Judges 13:24) Bifor datfala pikinini hem born, Manoah askem datfala angel for kam bak and talem nao wanem olketa mas duim for trainim datfala boy. Manoah hem ask olsem: “Wanem kaen waka nao pikinini hia bae duim and hao nao bae mifala trainim hem?” So datfala angel bilong Jehovah talem moa instruction wea hem talem finis long waef bilong Manoah. (Judges 13:​6-​14) Masbi datwan barava encouragem Manoah! Long distaem, olketa angel no visitim olketa man wanwan long wei olsem, bat parents savve olsem Manoah long wei for lukaotem instruction from Jehovah taem olketa trainim olketa pikinini.​—Ephesians 6:4.

10, 11. (a) Hao nao Elisha and servant bilong hem feel taem army bilong Syria kam for kasholem tufala? (b) Wanem gudfala samting nao iumi savve kasem taem iumi ting raonem disfala story?

¹⁰ Wanfala nambawan example bilong sapot wea olketa angel givim hem long taem bilong profet Elisha. Elisha hem stap long Dothan, wanfala taon long Israel. Wanday taem servant bilong Elisha hem wekap early long morning and luk aotsaed, hem lukim staka horse and war chariot olketa raonem datfala taon. King bilong Syria hem sendem strongfala army for kasholem Elisha. Wanem nao servant bilong Elisha duim? Hem barava fraet fogud and singaot olsem: “Sorre tumas masta bilong mi! Wanem nao bae iumi duim?” Long tingting bilong hem, tufala no wei nao. Bat Elisha sei olsem: “No fraet, bikos plande moa stap witim iumi winim namba wea stap witim olketa.” Wanem nao hem minim?​—2 Kings 6:​11-​16.

¹¹ Elisha hem savve staka angel stap for sapotim hem. Bat servant bilong hem no lukim olketa. So “Elisha start for prea and sei olsem: ‘Jehovah, plis openem eye bilong hem mekem hem savve lukluk.’ Semtaem nomoa Jehovah openem eye bilong datfala servant, and hem lukim staka horse and olketa war chariot wea fire kamaot from olketa long olketa maunten raonem Elisha.” (2 Kings 6:​17) Long datfala taem nao datfala servant savve lukim olketa angel. From iumi garem spiritual wei for luksavve long samting, iumi tu luksavve hao olketa angel wea stap anda long Jehovah and Christ, helpem and protectim pipol bilong Jehovah.

Help wea Olketa Angel Givim Long Taem Bilong Christ

12. Wanem help nao Mary kasem from datfala angel Gabriel?

¹² Tingim help wea datfala young Jew gele Mary kasem taem hem herem disfala nius: “Iu bae garem pikinini insaed bele bilong iu and bornem wanfala son, and iu mas kolem nem bilong hem Jesus.” Bifor angel Gabriel talem disfala message from God wea Mary seke long hem, hem sei olsem long hem: “Iu no fraet, Mary, from God hem hapi long iu.” (Luke 1:​26, 27, 30, 31) Masbi samting wea angel talem hem encouragem and strongim Mary, and mekem hem feel sure God hem hapi long hem!

13. Hao nao olketa angel helpem Jesus?

¹³ Narafala taem wea angel givim help hem bihaen Jesus againstim thrifala test from Satan long wilderness. Bible talem hao long end bilong olketa test hia, “Devil lusim hem, and olketa angel kam and start for strongim hem.” (Matthew 4:​1-​11) Semkaen samting hem happen long naet bifor Jesus hem dae. Jesus barava wari and hem nildaon and start for prea olsem: “ ‘Dadi, sapos iu laekem, no letem diswan for kasem mi. Nomata olsem, no followim will bilong mi, bat followim will bilong iu.’ Then wanfala angel from heven hem kam long hem and strongim hem.” (Luke 22:42, 43) Bat wanem kaen help nao olketa angel givim long iumi distaem?

Help wea Olketa Angel Givim Long Taem Bilong Iumi

14. Wanem persecution nao Olketa Jehovah’s Witness kasem long taem bilong iumi, and wanem nao kamaot from datwan?

¹⁴ Taem iumi tingim history bilong preaching waka wea Olketa Jehovah’s Witness duim long taem bilong iumi, iumi barava lukim wei wea olketa angel givim help! Olsem example, pipol bilong Jehovah fit for stand strong nomata Nazi rul long Germany and Western Europe againstim olketa bifor long World War II, and long taem datfala war gohed (1939-​45). Persecution from olketa Catholic Fascist gavman long Italy, Spain, and Portugal, gohed for longfala taem winim persecution anda long olketa Nazi. And for staka year olketa kasem persecution from Soviet Union and olketa kantri wea stap anda long hem long datfala taem. Narafala example hem persecution wea olketa Witness long samfala kantri long Africa kasem.a No longtaem go nomoa, olketa servant bilong Jehovah kasem barava raf persecution long Georgia. Satan hem duim evri samting hem fit for duim for stopem waka bilong Olketa Jehovah’s Witness. Nomata olsem, Satan no win long diswan and organization bilong Jehovah gohed gud. Wanfala reason for diswan hem from olketa angel protectim pipol bilong God.​—Psalm 34:7; Daniel 3:​28; 6:​22.

15, 16. Hao nao olketa angel sapotim Olketa Jehovah’s Witness long preaching wea olketa duim evriwea long world?

¹⁵ Olketa Jehovah’s Witness barava ting strong long assignment bilong olketa for preachim gud nius abaotem Kingdom bilong God evriwea long earth and mekem pipol kamap disaepol, long wei for teachim truth from Bible long olketa. (Matthew 28:19, 20) Nomata olsem, olketa barava luksavve tu hao olketa no savve duim disfala assignment sapos olketa angel no helpem olketa. Dastawe toktok long Revelation 14:​6, 7 hem evritaem encouragem olketa. Hem sei olsem: “Mi [aposol John] lukim narafala angel flae long skae, and hem garem gud nius for olowe for talemaot olsem hapi nius for olketa wea stap long earth, and long evri nation and tribe and languis and pipol, and hem sei long laodfala voice: ‘Fraet long God and givim glory long hem, from hour bilong judgment bilong hem kam finis nao, and so worshipim Datwan wea mekem skae and earth and sea and evri wata.’ ”

¹⁶ Toktok hia showimaot klia hao olketa angel sapotim and leadim bigfala preaching waka bilong Olketa Jehovah’s Witness evriwea long world. Jehovah hem iusim olketa angel bilong hem for leadim pipol go long olketa Witness bilong hem. And tu, olketa angel leadim olketa Witness go long pipol wea garem gudfala heart. Dastawe staka taem nao wanfala Witness bilong Jehovah meetim samwan long barava taem wea hem kasem problem and needim spiritual help.

Klosap Nao Olketa Bae Duim Bigfala Samting

17. Wanem nao happen long olketa soldia bilong Assyria taem wanfala angel nomoa attakim olketa?

¹⁷ So olketa angel duim waka for talemaot olketa message and strongim olketa narawan, bat olketa duim narafala waka tu. Long bifor, olketa distroem pipol wea God judgem olketa for dae. Olsem example, long mek-eit century B.C.E., wanfala big sekson bilong olketa soldia bilong Assyria redi for attakim Jerusalem. Wanem nao Jehovah duim? Hem sei: “Mi bae protectim disfala taon for saed bilong mi and for saed bilong servant bilong mi David.” Bible hem sei olsem: “Long datfala naet angel bilong Jehovah hem go and killim dae wan handred and eiti-faev thousand long camp bilong olketa bilong Assyria. Taem pipol wekap early long morning, evri dead body nomoa olketa lukim.” (2 Kings 19:34, 35) Olketa army bilong man no fit taem iumi markem olketa witim strong bilong wanfala angel nomoa!

18, 19. Wanem bigfala samting nao olketa angel klosap for duim, and hao nao diswan bae affectim olketa man?

¹⁸ Olketa angel bae distroem pipol wea God judgem olketa for dae. Klosap nao Jesus bae kam “witim olketa strongfala angel bilong hem insaed wanfala big fire.” Goal bilong olketa hem for “pei bak long olketa wea no savve long God and olketa wea no obeyim gud nius abaotem Lord bilong iumi Jesus.” (2 Thessalonians 1:​7, 8) Diswan bae barava changem laef bilong evri man! Olketa wea no laek for obeyim gud nius abaotem Kingdom bilong God, wea distaem evriwan long earth herem, bae dae. Olketa wea lukaotem Jehovah, raeteous fasin, and kwaet fasin nomoa bae “haed long day bilong kros bilong Jehovah” and no dae.​—Zephaniah 2:3.

¹⁹ Iumi tinghae tumas long wei wea Jehovah iusim olketa strongfala angel bilong hem for helpem and strongim pipol wea worshipim hem long earth. Wei for minim waka wea olketa angel duim insaed plan bilong God hem barava comfortim iumi bikos samfala angel followim Satan and bighed againstim Jehovah. Nextfala article bae storyim olketa samting wea olketa tru Christian savve duim for protectim olketa seleva from strongfala wei wea Satan and olketa demon bilong hem savve affectim pipol.

[Footnote]

Wanem Nao Iu Lanem?

• Wea nao olketa angel kam from?

• Long taem bilong Bible, wanem nao waka bilong olketa angel?

• Wanem nao Revelation 14:​6, 7 showimaot abaotem waka wea olketa angel duim long taem bilong iumi?

• Wanem bigfala samting nao olketa angel klosap for duim?

[Piksa long page 13]

Wanfala angel encouragem Manoah and waef bilong hem

[Piksa long page 14]

“Plande moa stap witim iumi winim namba wea stap witim olketa”