Hao Nao Iumi Savve Againstim Olketa Demon?
“[God] baondem olketa angel wea no tinghae long waka wea olketa garem firstaem and lusim ples wea olketa shud stap. Hem baondem olketa hia for olowe long bigfala darkness for weitim datfala judgment day.”—JUDE 6.
1, 2. Wanem nao olketa kwestin wea kamap abaotem Satan and olketa demon?
APOSOL Peter hem talem disfala warning: “Garem gudfala tingting, lukaot gud. Enemy bilong iufala, Devil, hem wakabaot olsem wanfala lion wea singaot strong, and lukaotem samwan for kaikaim.” (1 Peter 5:8) Aposol Paul hem sei olsem abaotem olketa demon: “Mi no laekem iufala for share witim olketa demon. Iufala kanduit drink from kap bilong Jehovah and kap bilong olketa demon; iufala kanduit kaikai long ‘tebol bilong Jehovah’ and tebol bilong olketa demon.”—1 Corinthians 10:20, 21.
2 Bat, hu nao Satan and olketa demon? Hao and long wanem taem nao olketa start? Waswe, God nao creatim olketa? Haomas paoa nao olketa garem ovarem olketa man? Wanem nao savve protectim iumi from olketa demon?
Satan and Olketa Demon Kam From Wea?
3. Hao nao wanfala angel bilong God kamap Satan?
3 No longtaem bihaen God creatim olketa man and putim olketa long garden bilong Eden, wanfala angel bilong God kamap bighed. Why nao olsem? From hem no satisfae long waka wea hem garem insaed organization bilong Jehovah long heven. Disfala angel hem lukim chance for mekem Adam and Eve no obeyim and worshipim God, bat obeyim and worship hem. Taem disfala angel againstim God and switim firstfala man and woman for duim sin, hem mekem hemseleva kamap Satan. Gogo olketa nara angel tu join insaed long diswan. Long wanem wei?—Genesis 3:1-6; Romans 5:12; Revelation 12:9.
4. Wanem nao samfala bighed angel duim bifor Flood long taem bilong Noah?
4 Bible talem hao bifor bigfala Flood long taem bilong Noah, samfala angel start for lukluk difren long olketa woman long earth. Hem sei: “Olketa son bilong tru God start for lukluk long olketa dota bilong man and tingim hao olketa luk naes tumas; and olketa maritim olketa hia, evriwan wea olketa chusim.” Kaen marit olsem hem no stret, and olketa garem pikinini wea haf man and haf spirit, wea Bible kolem olketa hia Nephilim. (Genesis 6:2-4) Olketa angel wea no obeyim God sapotim Satan for againstim Jehovah nao.
5. Wanem nao happen long olketa bighed angel taem Jehovah distroem wicked pipol long datfala big Flood?
5 Taem Jehovah iusim Flood for distroem olketa man, olketa Nephilim and mami bilong olketa long earth dae nao. Flood hem forcem olketa bighed angel for go aot from body wea olketa garem long earth and go bak long ples bilong olketa spirit. Bat olketa no savve duim moa “waka wea olketa garem firstaem” witim God. Hem putim olketa long “bigfala [spiritual] darkness,” wea garem nem Tartarus.—Jude 6; 2 Peter 2:4.
6. Hao nao olketa demon giamanim pipol?
6 Start kam long taem wea olketa wicked angel lusim “waka wea olketa garem firstaem,” olketa kamap olketa demon bilong Satan and duim olketa nogud samting wea hem laekem. Start long datfala taem, olketa demon no savve garem body olsem man nao. Bat olketa savve switim olketa man and woman for duim enikaen barava nogud dirty fasin. And tu, olketa demon giamanim olketa man thru long spiritism, wea samfala example nao hem for mekem kastom long man, and story witim olketa spirit thru long wanfala kastom man. (Deuteronomy 18:10-13; 2 Chronicles 33:6) Jehovah bae duim long olketa wicked angel hia sem samting wea hem bae duim long Devil—hem bae distroem olketa for olowe. (Matthew 25:41; Revelation 20:10) Bat go kasem datfala taem, iumi need for stand strong and againstim olketa. Iumi wise sapos iumi tingim bigfala paoa wea Satan garem and wanem for duim mekem iumi win againstim hem and olketa demon bilong hem.
Haomas Paoa Nao Satan Garem?
7. Wanem kaen paoa nao Satan garem ovarem world?
7 Kam kasem distaem, Satan gohed for talem olketa laea samting for spoelem Jehovah. (Proverbs 27:11) And hem affectim staka man. Long 1 John 5:19 hem sei: “Full world hem stap anda long paoa bilong wicked wan.” Dastawe Devil hem fit for testim Jesus taem hem sei bae hem givim hem paoa for rulim “evri kingdom bilong full earth.” (Luke 4:5-7) Aposol Paul hem sei olsem abaotem Satan: “So sapos samting hem kavarem disfala gud nius wea iumi talemaot mekem hem stap haed, really, hem haed from olketa wea bae finis evribit, from olketa wea no biliv wea god bilong disfala world hem blindim mind bilong olketa for mekem laet bilong nambawan gud nius abaotem Christ, wea hem nao image bilong God, for no showaot.” (2 Corinthians 4:3, 4) Satan hem “man for tok laea and dadi bilong laea fasin,” bat hem duim olketa samting for mekem pipol tingse hem “wanfala angel bilong laet.” (John 8:44; 2 Corinthians 11:14) Hem garem paoa and savve for blindim olketa ruler bilong world and pipol wea olketa rulim tu. Satan iusim olketa laea story and giaman teaching bilong religion for trikim olketa man.
8. Wanem nao Bible showimaot abaotem paoa wea Satan garem?
8 Paoa wea Satan garem hem showaot klia long taem bilong profet Daniel, long samting olsem faev handred year bifor Christ hem born. Taem Jehovah sendem wanfala angel for encouragem Daniel, “[spirit] prince bilong kingdom bilong Persia” hem trae for stopem angel hia. For 21 day, datfala faithful angel hem no savve kasem Daniel, bat then “Michael, wanfala long olketa prince wea garem hae position” hem kam for helpem hem. Narafala spirit wea insaed datfala story tu hem “[demon] prince bilong Greece.” (Daniel 10:12, 13, 20) And Revelation 13:1, 2 hem storyim Satan olsem “dragon” wea givim datfala wild animal, wea minim olketa bilong politik, strong, throne, and bigfala paoa wea datfala animal hem garem.
9. Olketa Christian faet againstim hu long distaem?
9 Dastawe aposol Paul hem raet olsem: “Iumi insaed wanfala faet, wea iumi no faetem man, bat iumi faetem olketa gavman, olketa wea garem paoa, olketa world ruler bilong disfala darkness, and olketa wicked spirit wea stap long ples bilong olketa.” (Ephesians 6:12) Distaem tu, olketa demon wea stap anda long Satan kontrolem olketa ruler and olketa man and muvim olketa for duim olketa barava nogud samting olsem wei for killim dae full tribe, and terrorism. Distaem iumi bae storyim hao for win againstim olketa strongfala demon hia.
Wanem Nao Savve Protectim Iumi?
10, 11. Hao nao iumi savve againstim Satan and olketa wicked angel bilong hem?
10 Iumiseleva no garem strong wea fitim, saed long body or tingting, for againstim Satan and olketa wicked angel bilong hem. Paul talem disfala kaonsel: “Gohed for kasem strong from Lord and from bigfala strong bilong hem.” Iumi needim God for protectim iumi. Paul hem sei tu: “Werem evri samting for faet wea kam from God mekem iufala savve stand strong againstim evri trik bilong Devil . . . Werem evri samting for faet wea kam from God, mekem iufala savve strong long datfala wicked day and, bihaen iufala duim evribit evri samting hia, iufala stand strong.”—Ephesians 6:10, 11, 13.
11 Tufala taem nao Paul encouragem olketa Christian for werem “evri samting for faet wea kam from God.” Datfala word “evri” showimaot hao sapos iumi hafhaf nomoa, iumi bae no win againstim olketa demon. So wanem nao olketa important samting for faet wea olketa Christian mas barava ting strong for werem mekem olketa savve againstim olketa demon?
Hao Nao Iumi Savve “Stand Strong”?
12. Hao nao olketa Christian savve werem truth olsem waedfala belt raonem bele bilong olketa?
12 Paul hem sei: “Dastawe, stand strong, werem waedfala belt bilong truth raonem bele bilong iufala, and werem samting for kavarem chest wea hem nao raeteous fasin.” (Ephesians 6:14) Tufala samting for faet wea disfala verse storyim hem waedfala belt, and samting for kavarem chest. Soldia mas taetem gud waedfala belt bilong hem for protectim bele bilong hem go kasem hip, and datfala belt tu samting wea hem hangem sword long hem. Olsem tu, long tokpiksa wei, truth insaed Bible mas olsem wanfala belt wea iumi taetem gud raonem iumi for iumi savve live followim datwan. Waswe, iumi garem schedule for readim Bible evriday? Waswe, full famili nao duim diswan tugeta? Waswe, iumi garem schedule for famili storyim text bilong each day? And tu, waswe, iumi mek sure iumi minim olketa niu samting wea “datfala faithful and wise slave” explainim insaed olketa pablikeson? (Matthew 24:45) Wei for duim olsem showimaot iumi traem best for followim kaonsel bilong Paul. Iumi garem tu olketa video and DVD wea provaedem gudfala help from Bible. Wei for hol strong long truth savve helpem iumi for disaedem samting long wisefala wei and protectim iumi from wei for duim samting wea no stret.
13. Long wanem wei nao iumi savve protectim tokpiksa heart bilong iumi?
13 Datfala samting for kavarem chest hem protectim chest, heart, and olketa nara important part long body bilong soldia. Christian savve protectim tokpiksa heart bilong hem, wea minim trufala fasin bilong hem, long wei for mekem love for raeteous fasin bilong God kamap moa big and followim olketa raeteous standard bilong Jehovah. Datfala tokpiksa kava for chest hem protectim iumi from kaen wei for ting smol long samting wea Word bilong God talem. Taem iumi “heitim nogud samting, and lovem gud samting,” datwan bae stopem iumi for wakabaot followim ‘evri nogud wei.’—Amos 5:15; Psalm 119:101.
14. Wanem nao hem minim for iumi “werem sandol bilong gud nius bilong peace”?
14 From olketa soldia bilong Rome mas march for plande handred kilometer, plande taem olketa werem strongfala sandol. So, wanem nao disfala toktok “leg bilong iufala mas werem sandol bilong gud nius bilong peace” hem minim for olketa Christian? (Ephesians 6:15) Hem minim iumi redi for duim samting. Iumi redi for talemaot gud nius abaotem Kingdom bilong God long enitaem wea fitim for duim datwan. (Romans 10:13-15) Wei wea iumi busy for duim Christian ministry hem protectim iumi from olketa “trik” bilong Satan.—Ephesians 6:11; footnote.
15. (a) Wanem nao showimaot bigfala shield bilong faith hem important tumas? (b) Wanem nao “olketa arrow bilong fire” wea savve barava spoelem faith bilong iumi?
15 Paul hem gohed for sei moa: “Winim evri samting, karem bigfala shield bilong faith mekem iufala savve stopem olketa arrow bilong fire bilong wicked wan.” (Ephesians 6:16) Taem Paul advaesem iumi for karem bigfala shield bilong faith, hem startim datfala toktok long wei for sei “winim evri samting,” wea datwan showimaot disfala samting for faet hem barava important. Iumi mas mek sure faith bilong iumi hem strong. Olsem wanfala big shield, faith bilong iumi savve protectim iumi from “olketa arrow” bilong Satan. Wanem nao maet olketa arrow hia distaem? Maet olketa hia olketa laea toktok and story wea mekem iumi feel nogud tumas wea olketa enemy and apostate talem for trae mekem faith bilong iumi wik. “Olketa arrow” hia maet olketa temptation for lovem tumas material samting, wea mekem iumi barava busy for baem staka samting, and tu, maet iumi laek winim nara pipol wea garem staka material samting. Maet olketa peim or wakem haos wea moabeta or garem niu trak, olketa niu stael kaleko, or show-off witim material samting wea olketa garem. Nomata wanem nara pipol duim, iumi mas garem strongfala faith for missim “olketa arrow bilong fire” hia. Hao nao iumi savve buildim and keepim strongfala faith?—1 Peter 3:3-5; 1 John 2:15-17.
16. Wanem nao savve helpem iumi for mekem faith bilong iumi strong?
16 Iumi savve fren gud witim God thru long wei for evritaem studyim Bible seleva and story gud witim Jehovah long prea wea kam from heart. Iumi savve askem Jehovah for helpem iumi garem strongfala faith and then duim samting followim wanem iumi prea for hem. Olsem example, waswe, iumi preparem gud Wastaoa Study bilong evri week and garem goal for givim koment? Faith bilong iumi bae strong sapos iumi studyim Bible and olketa Bible pablikeson.—Hebrews 10:38, 39; 11:6.
17. Hao nao iumi savve “acceptim helmet bilong salvation”?
17 Paul hem finisim story bilong hem abaotem olketa samting hia for protectim iumi long spiritual faet taem hem talem disfala kaonsel: “Acceptim helmet bilong salvation, and sword bilong spirit, wea hem nao, Word bilong God.” (Ephesians 6:17) Helmet hem protectim hed and brain bilong soldia, wea hem nao man iusim for tingting and disaedem samting. Olsem tu, Christian hope bilong iumi protectim tingting bilong iumi. (1 Thessalonians 5:8) Iumi shud no tingim olketa goal bilong world and olketa material samting, bat iumi shud olsem Jesus long wei for tingim nomoa hope wea God givim.—Hebrews 12:2.
18. Why nao iumi shud no missim wei for readim Bible evritaem?
18 Last samting wea protectim iumi from Satan and olketa demon bilong hem nao message bilong God insaed long Bible. Diswan hem narafala reason why hem important tumas for iumi mas readim Bible evritaem. Wei for kasem stretfala savve from Word bilong God protectim iumi from olketa barava nogud toktok, story, and buk bilong olketa apostate wea showimaot bigfala kros and feel nogud bilong olketa.
“Gohed Evritaem for Prea”
19, 20. (a) Wanem nao bae happen long Satan and olketa demon bilong hem? (b) Wanem nao savve strongim iumi long spiritual wei?
19 Klosap nao disfala wicked world bae finis and Jesus bae aotem Satan and olketa demon bilong hem from earth. Satan savve hem garem “shortfala taem nomoa.” Hem kros and faet witim olketa wea “obeyim olketa komandment bilong God and wea garem waka for witness abaotem Jesus.” (Revelation 12:12, 17) Hem important tumas for iumi againstim Satan and olketa demon bilong hem.
20 Iumi tinghae tumas long kaonsel for werem evri samting for faet wea kam from God! Paul finisim disfala kaonsel olsem: “Gohed evritaem for prea long God thru long spirit for askem and talem olketa difren samting, witim tu, wei for prea strong from heart. And for mekem iufala savve duim datwan, gohed for wekap, no wikdaon, and prea strong from heart for olketa holy wan.” (Ephesians 6:18) Prea savve strongim iumi long spiritual wei and helpem iumi for gohed wekap. Iumi mas barava followim toktok bilong Paul and gohed for prea evritaem, bikos diswan bae helpem iumi for againstim Satan and olketa demon bilong hem.
Wanem Nao Iu Lanem?
• Satan and olketa demon bilong hem kam from wea?
• Hao strong nao Devil?
• Wanem nao savve protectim iumi from Satan and olketa demon bilong hem?
• Hao nao iumi savve werem full samting for faet wea kam from God?
[Piksa long page 17]
“Olketa son bilong tru God start for lukluk long olketa dota bilong man”
[Piksa long page 19]
Wanem nao sixfala spiritual samting wea iumi savve werem for faet?
[Piksa long page 21]
Hao nao wei for duim olketa samting hia hem protectim iumi againstim Satan and olketa demon bilong hem?