Why Evri Wei for Safa Klosap for Finis
“Hem nao datfala Ston, and evri samting wea hem duim hem perfect.”—DEUTERONOMY 32:4.
1, 2. (a) Why nao iu tinghae long datfala hope for laef olowe? (b) Why nao plande pipol no biliv long datfala God wea promisim olketa nambawan samting for future?
WASWE, iu laek for tingim laef insaed long Paradaes? Maet iu ting raonem hao wanday iu bae lukim olketa difren ples long disfala earth and lane abaotem plande samting wea laef. Or maet iu ting raonem hao iu bae waka tugeta witim olketa narawan for lukaftarem disfala earth and mekem full earth kamap paradaes, and hao datwan bae mekem iu feel satisfae. Or maet iu ting raonem hao iu savve lane hao for wakem haos, duim art, lanem music, or for duim olketa nara samting wea iu no fit for duim distaem from laef hem busy tumas. Bat main samting nao, iu tinghae long datfala hope for kasem datfala laef wea Bible kolem “really laef,” hem nao laef olowe wea Jehovah laekem iumi for garem firstaem.—1 Timothy 6:19.
2 Iumi barava hapi and tinghae long privilege wea iumi garem for sharem datfala hope from Bible witim olketa nara pipol! Bat plande pipol no acceptim datwan. Olketa tingse hem wanfala dream nomoa for pipol wea willing for bilivim eni samting. Maet olketa faendem hem hard for biliv long datfala God wea promisim laef olowe long Paradaes. Why nao olsem? Samfala pipol feel nogud from wicked fasin hem gohed. Olketa tingse sapos God hem stap and hem garem bigfala paoa and love, hem hard tumas for disfala world fulap witim wicked fasin and wei for safa wea iumi lukim distaem. Olketa sei no eni God wea letem wicked fasin for gohed hem stap, or sapos hem stap, hem no garem bigfala paoa and hem no interest long iumi. Samfala pipol tingse diskaen tingting hem here stret. Satan hem barava savve tumas for blindim mind bilong olketa man.—2 Corinthians 4:4.
3. Wanem kwestin nao iumi savve helpem pipol for kasem ansa long hem, and why nao iumi olketa best wan for duim datwan?
3 Iumi Olketa Jehovah’s Witness nao olketa best wan for helpem pipol wea Satan and wisdom bilong disfala world giamanim olketa. (1 Corinthians 1:20; 3:19) Iumi minim why nao plande pipol no bilivim olketa promis insaed long Bible. Hem from olketa no savve long Jehovah. Maet olketa no savve long nem bilong hem or mining bilong datwan, and maet olketa no really savve long olketa fasin bilong hem or wei wea hem fulfillim olketa promis bilong hem. Hem spesol privilege for iumi garem datfala savve. Samfala taem hem gud for iumi ting raonem wei wea iumi savve helpem pipol wea “tingting bilong olketa stap long darkness” for kasem ansa for disfala kwestin wea no isi for ansarem, “Why nao God letem wicked fasin and wei for safa gohed?” (Ephesians 4:18) Firstaem, bae iumi storyim best wei for iumi ansarem datfala kwestin. Then, bae iumi storyim hao olketa fasin bilong Jehovah showaot long wei wea hem deal witim wicked fasin.
Tingim Best Wei for Ansarem Datfala Kwestin
4, 5. Taem samwan askem why nao God letem wei for safa gohed, wanem nao maet iumi need for duim firstaem? Explainim diswan.
4 Taem samwan askem why nao God letem wei for safa gohed, hao nao iumi ansa? Maet iumi stretawe laek for talem staka information abaotem diswan, start kam from samting wea happen long garden bilong Eden. Maet samfala taem hem fitim for iumi duim olsem. Bat iumi need for tingting gud. Maet iumi need for helpem man for minim narafala samting firstaem bifor iumi ansarem kwestin bilong hem. (Proverbs 25:11; Colossians 4:6) Bae iumi storyim thrifala point wea helpem iumi firstaem bifor iumi givim ansa long man wea askem datfala kwestin.
5 First samting, sapos iumi luksavve man hem barava wari abaotem wei wea wicked fasin hem kamap big tumas long world distaem, maet hem bikos barava nogud samting kasem hem or samwan insaed famili bilong hem. Sapos olsem, hem gud for showimaot iumi tingim feeling bilong hem. Aposol Paul kaonselem olketa Christian for “krae witim pipol wea krae.” (Romans 12:15) Wei for showimaot iumi “minim feeling bilong narawan” savve muvim datfala man. (1 Peter 3:8) Sapos hem luksavve iumi interest long hem, bae hem moa willing for lisin long iumi.
6, 7. Why nao hem stret for praisem man wea askem wanfala kwestin wea join witim Bible wea hem tingting evritaem abaotem?
6 Mek-tu samting, iumi savve praisem man for wei wea hem askem datfala kwestin. Samfala pipol tingse wei wea olketa tingting evritaem abaotem olketa kwestin olsem hem showimaot olketa no garem faith or respectim God. Maet wanfala bigman long church tu talem olsem long olketa. Bat wei for askem olketa kwestin olsem no minim man no garem faith. For tok stret, olketa faithful pipol insaed long Bible tu askem semkaen kwestin. Olsem example, David wea raetem psalm hem ask olsem: “Jehovah, why nao iu stap farawe? Why nao iu gohed haed taem bigfala trabol kamap?” (Psalm 10:1) Datfala profet Habakkuk hem ask olsem tu: “Jehovah, hao long nao mi mas singaot for help and iu no herem? Hao long nao mi mas askem iu for help from raf fasin and iu no sevem mi? Why nao iu mekem mi for lukim samting wea spoelem man, and iu gohed for lukluk long trabol? And why nao wei for barava spoelem samting and raf fasin hem stap front long mi, and why nao wei for argue hem kamap, and raoa hem gohed?”—Habakkuk 1:2, 3.
7 Olketa faithful man hia barava respectim God. Waswe, God hotem olketa from olketa askem kaen kwestin olsem? Nomoa, bat Jehovah muvim olketa faithful man hia for recordim olketa kwestin bilong olketa insaed long Word bilong hem. Distaem, maet wei wea wanfala man wari tumas hao wicked fasin hem gohed savve showimaot hem hangre long spiritual wei, wea minim hem lukaotem ansa for olketa kwestin wea Bible nomoa savve explainim. No forgetim hao Jesus praisem olketa wea hangre long spiritual wei, from olketa “luksavve long spiritual need bilong olketa.” (Matthew 5:3) Hem nambawan privilege for helpem olketa for kasem datfala hapi wea Jesus promisim!
8. Wanem nao olketa teaching wea mekem pipol konfius and tingse God nao mekem pipol safa, and hao nao iumi savve helpem olketa?
8 Mek-thri samting, maet iumi need for helpem man luksavve hao hem no God wea mekem wicked fasin kamap big tumas long world. Plande religion teachim pipol hao God nao rulim disfala world, hao God disaedem firstaem evri samting wea bae happen long laef bilong pipol, and hao hem garem olketa reason wea iumi man hard for minim why hem mekem olketa man for safa. Bat olketa teaching hia hem false and hem no honorim God. Olketa teaching hia mekem pipol tingse God nao mekem wicked fasin and wei for safa kamap long world. So maet iumi need for iusim Word bilong God for stretem datwan. (2 Timothy 3:16) Satan nao rulim disfala wicked world, no Jehovah. (1 John 5:19) Jehovah no disaedem firstaem samting wea bae happen long laef bilong pipol, bat hem givim freedom for man seleva chusim samting wea gud and nogud, and samting wea stret and no stret. (Deuteronomy 30:19) And Jehovah nating mekem wicked fasin kamap long firstaem, bat hem heitim wicked fasin and hem barava interest long olketa man wea safa.—Job 34:10; Proverbs 6:16-19; 1 Peter 5:7.
9. Wanem nao samfala pablikeson wea “faithful and wise slave” provaedem for helpem pipol minim why nao Jehovah God letem wei for safa gohed?
9 Taem iu explainim finis olketa samting hia, maet man hem moa willing for lisin and lanem why nao God hem letem wei for safa gohed. “Faithful and wise slave” provaedem staka pablikeson for helpem iu explainim diswan. (Matthew 24:45-47) Olsem example, long datfala “Obeyim God” Distrik Convention long 2005, iumi kasem wanfala tract wea garem title, Wei for Safa Klosap Finis Nao! Mifala encouragem iu for readim moa disfala tract mekem iu savve gud long hem. And tu, wanfala full chapter insaed datfala buk What Does the Bible Really Teach?, wea distaem hem stap long 157 languis, hem story abaotem datfala important kwestin. Hem gud for barava mekius long olketa pablikeson hia. Olketa savve explainim klia olketa scripture long Bible wea storyim olketa samting wea happen long Eden wea mekem datfala kwestin kamap abaotem hu nao garem right for rulim universe and hao nao Jehovah deal witim datwan and why nao olsem. Tingim tu hao wei for storyim diswan long man bae helpem hem for kasem savve long samting wea moa important winim eni nara samting wea man savve lanem. Hem nao savve abaotem Jehovah and olketa nambawan fasin bilong hem.
Mekhae Long Olketa Fasin Bilong Jehovah
10. Why nao hem no isi for plande pipol minim why God letem olketa man for safa, and wanem savve nao maet helpem olketa?
10 Trae for mekhae long olketa nambawan fasin bilong Jehovah taem iu helpem pipol minim why Jehovah letem olketa man rulim olketa seleva anda long paoa bilong Satan. Plande pipol savve hao God hem garem bigfala paoa from olketa herem nara pipol kolem hem Olmaeti God. Bat maet hem no isi for olketa minim why nao God no iusim bigfala paoa bilong hem for stretawe finisim wei for safa and evri samting wea no stret. Maet olketa no savve gud long olketa nara fasin bilong Jehovah olsem wei wea hem holy, wise, evritaem duim stret samting, and garem love. Jehovah hem showimaot olketa fasin hia long perfect and balance wei. Dastawe Bible hem sei: “Evri samting wea hem duim hem perfect.” (Deuteronomy 32:4) Hao nao iu savve mekhae long olketa fasin hia taem iu ansarem olketa kwestin wea join witim diswan? Bae iumi storyim samfala example.
11, 12. (a) Why nao Jehovah no forgivim Adam and Eve taem tufala sin? (b) Why nao Jehovah bae no letem sin gohed for olowe?
11 Why nao Jehovah no forgivim Adam and Eve? Hem hard for Jehovah forgivim Adam and Eve from tufala perfect and min for rejectim wei wea Jehovah garem right for rul and tufala chus for followim Satan. Tufala nating repent. Bat taem pipol askem why nao Jehovah no forgivim tufala, maet olketa really laek for savve why nao Jehovah no leavim go nomoa olketa hae standard bilong hem and acceptim sin and wei for bighed. Ansa for diswan hem join witim wanfala main fasin bilong Jehovah, wea hem nao holy fasin bilong hem.—Exodus 28:36; 39:30.
12 Staka taem Bible hem mekhae long holy fasin bilong Jehovah. Bat sorre nao, staka pipol long disfala nogud world no minim datfala fasin. Jehovah hem klin and hem no garem eni sin. (Isaiah 6:3; 59:2) Hem mekem wei for forgivim sin bilong olketa man, bat hem bae no letem sin gohed for olowe. Sapos Jehovah letem datwan gohed for olowe, bae iumi no garem eni hope for future. (Proverbs 14:12) Long taem wea Jehovah markem, hem bae mekem evri creation kamap holy moa. Datwan bae barava happen, from hem nao will bilong Datwan wea holy.
13, 14. Why nao Jehovah disaed for no distroem olketa wea bighed long Eden?
13 Why nao Jehovah no distroem olketa wea bighed long Eden and creatim wanfala niu man and woman? Hem barava garem paoa for duim datwan, and klosap nao hem bae iusim datfala paoa for distroem evriwan wea wicked. Bat maet samfala garem disfala tingting, ‘Why nao God no distroem olketa taem thrifala sinner nomoa stap long full universe? Datwan nao bae stopem sin and evri sorre samting wea happen long world for kamap!’ Why nao Jehovah disaed for no duim datwan? Deuteronomy 32:4 hem sei: “Hem evritaem duim samting wea stret.” Jehovah barava tinghae long wei for garem fasin olsem. For tok stret, “Jehovah hem laekem tumas for duim samting wea stret.” (Psalm 37:28) From Jehovah garem disfala fasin, hem no distroem olketa wea bighed long Eden. Why nao olsem?
14 Wei wea Satan bighed againstim Jehovah hem mekem wanfala kwestin kamap abaotem right bilong God for rulim universe. From Jehovah hem laek for duim stret samting, hem mas ansarem datfala kwestin bilong Satan long best wei. Nomata hem fitim for Jehovah distroem olketa hia wea bighed, wei for duim olsem bae no stretem datfala problem. Hem bae showimaot paoa bilong Jehovah nomoa, bat Satan no kwestinim paoa bilong hem. And tu, Jehovah talem finis plan bilong hem long Adam and Eve. Tufala mas garem olketa pikinini for fulimap earth, lukaftarem gud disfala earth, and for evri creation long earth mas stap anda long olketa. (Genesis 1:28) Sapos Jehovah distroem Adam and Eve, plan bilong hem for olketa man bae nomoa nao. Bat from Jehovah hem evritaem duim samting wea stret and plan bilong hem mas fulfill evritaem, hem hard for hem duim datwan.—Isaiah 55:10, 11.
15, 16. Taem pipol talem tingting bilong olketa seleva abaotem best wei for stretem datfala problem long Eden, hao nao iumi savve helpem olketa?
15 Waswe, eniwan long full universe fit for deal witim olketa hia wea bighed long barava wisefala wei winim Jehovah? Maet samfala pipol talem tingting bilong olketa seleva long hao for stretem datfala problem long Eden. Bat wei for duim olsem showimaot olketa tingse olketa nao savve hao for stretem datwan long best wei. Maet olketa no min for duim olsem, bat olketa duim datwan from olketa no savve long Jehovah and wei wea hem wise winim evriwan long universe. Taem aposol Paul hem raet long olketa Christian long Rome, hem barava story abaotem wei wea Jehovah hem wise, and tu, datfala “holy secret” saed long plan bilong Jehovah for iusim Kingdom bilong Messiah for mekem olketa faithful man free from sin and for mekhae long holy nem bilong Hem. Wanem nao tingting bilong Paul abaotem wisdom bilong datfala God wea planim diswan? Lastfala samting wea Paul talem insaed leta bilong hem, hem olsem: “God nomoa hem wise, and iumi mas givim glory long hem thru long Jesus Christ for olowe. Amen.”—Romans 11:25; 16:25-27.
16 Paul luksavve hao Jehovah “nomoa hem wise,” wea minim no eniwan long full universe wise olsem hem. Olketa man wea no perfect no fit for stretem eni problem long wei wea moabeta winim Jehovah, and olketa barava no savve hao for stretem datfala kwestin wea Satan mekem kamap abaotem right bilong God for rulim universe! So iumi need for helpem pipol for garem sem feeling olsem iumi for tinghae long datfala God wea “heart bilong hem wise.” (Job 9:4) Taem iumi minim gud wisdom bilong Jehovah, bae iumi barava trustim hao hem deal witim olketa difren samting long best wei.—Proverbs 3:5, 6.
Minim Gud Main Fasin Bilong Jehovah
17. Hao nao wei for barava minim love bilong Jehovah savve helpem olketa wea wari tumas abaotem wei wea God letem wei for safa gohed?
17 “God hem love.” (1 John 4:8) Long hia, Bible barava talem stret main fasin bilong Jehovah. Hem nao fasin wea iumi barava laekem winim olketa nara fasin bilong hem and wea barava comfortim olketa wea wari tumas abaotem wei wea wicked fasin gohed long world distaem. Long evri samting wea Jehovah duim for deal witim wei wea sin spoelem creation bilong hem, hem showimaot love. Love muvim Jehovah for givim hope long olketa pikinini bilong Adam and Eve wea olketa tu garem sin. (Genesis 3:15) God mekem wei for olketa savve story witim hem long prea and fren gud witim hem. Love muvim God for provaedem wanfala ransom for mekem wei for olketa man savve kasem forgiveness for olketa sin and for kasem perfect laef for olowe long future. (John 3:16) And tu, love muvim hem for showimaot patient fasin long olketa man, wea savve givim chance long staka moa pipol for chusim Jehovah olsem Most Hae Ruler bilong olketa and rejectim Satan.—2 Peter 3:9.
18. Iumi hapi for savve abaotem wanem samting, and wanem nao bae iumi storyim long next article?
18 Taem wanfala bigman bilong religion story long olketa man wea hipap for anniversary bilong wanfala barava nogud terrorist attak, hem sei olsem: “Iumi no savve why nao God letem wicked fasin and wei for safa gohed.” Datwan hem barava sorre samting! Iumi hapi tumas for minim diswan! (Deuteronomy 29:29) And from Jehovah hem wise, duim stret samting evritaem, and showimaot love, iumi savve hao klosap nao hem bae finisim evri wei for safa. For tok stret, hem promis for duim datwan. (Revelation 21:3, 4) Bat waswe long evriwan wea dae finis? Waswe, wei wea Jehovah deal witim datfala kwestin wea kamap long Eden hem mekem olketa no garem hope nao? Nomoa. Love muvim hem for givim hope bilong resurrection long olketa. Datwan nao bae iumi storyim long next article.
Hao Nao Bae Iu Ansa?
• Wanem nao iumi savve talem long man wea askem why nao God letem wei for safa gohed?
• Hao nao wei wea Jehovah deal witim olketa wea bighed long Eden showimaot hem duim stret samting evritaem and hem holy?
• Why nao iumi shud helpem pipol for barava minim love bilong Jehovah?
[Piksa long page 13]
Trae for helpem olketa wea wari tumas abaotem why nao wei for safa gohed long world
[Piksa long page 15]
David and Habakkuk wea faithful askem olketa kwestin long God