Kwestin From Reader
Waswe, hem rong for Jacob act olsem Esau olsem Genesis 27:18, 19 showimaot?
Maet iu savve long disfala story. Taem Isaac hem olo hem talem Esau for go hunting for samfala animal mekem hem kaikaim meat, and hem sei: “Givim mi for kaikaim, mekem soul bilong mi savve blessim iu bifor mi dae.” Taem Rebekah herem samting wea hasband bilong hem talem, hem redyim wanfala naes kaikai and sei long Jacob: “Iu tekem [kaikai] go long dadi bilong iu for hem kaikaim, mekem hem savve blessim iu bifor hem dae.” Then Jacob werem kaleko bilong Esau and putim skin bilong olketa young goat long nek and hand bilong hem, and tekem go datfala naes kaikai for dadi bilong hem. Taem Isaac askem hem, “Son bilong mi, iu Esau or Jacob?” Jacob hem sei: “Mi Esau firstborn bilong iu.” Isaac bilivim hem and givim blessing long hem.—Genesis 27:1-29.
Bible no talem why Rebekah and Jacob duim disfala samting, bat hem luk olsem tufala seknomoa lukim chance wea kamap for duim datfala samting. Hem gud for tingim hao Word bilong God no appruvim and no judgem tu samting wea Rebekah and Jacob duim. So disfala story hem no showimaot hem olraet for laea and giamanim narawan. Nomata olsem, Bible givim samfala information abaotem diswan.
First samting, datfala story talem klia hao Jacob fit for kasem blessing from dadi bilong hem and no Esau. Bifor diswan, Jacob hem peim right for firstborn from twin brata bilong hem wea nating tinghae long olketa spiritual samting and salem datfala right for kaikai nomoa. Esau hem “ting nating long right bilong firstborn.” (Genesis 25:29-34) So taem Jacob go for lukim dadi bilong hem, hem go for kasem blessing wea hem garem right for kasem.
Nara samting tu, taem Isaac hem luksavve hem givim blessing long Jacob finis, hem no trae for duim eni samting for changem datwan. Maet hem rememberim disfala samting wea Jehovah talem long Rebekah bifor tufala twin born: “Datwan wea first bae servem datwan wea young winim hem.” (Genesis 25:23) Interesting samting tu hem hao taem Jacob redi for go long Haran, Isaac givim samfala moa blessing long hem.—Genesis 28:1-4.
Last samting, iumi mas tingim hao Jehovah hem savve and hem interest long evri samting wea happen. Blessing wea Isaac givim hem join witim promis wea God talem long Abraham. (Genesis 12:2, 3) Sapos God no laekem Jacob for kasem datfala blessing hem fit for duim samting for stopem datwan. Bat Jehovah hem hapi long datwan and sei long Jacob: “Thru long seed bilong iu evri famili long earth bae barava blessim olketa seleva.”—Genesis 28:10-15.