Rul Bilong Jehovah and Kingdom Bilong God

“Jehovah, wei for nambawan, maeti, luk naes, and bigfala glory and honor hem bilong iu . . . Datfala kingdom hem bilong iu, Jehovah.”​—1 CHRONICLES 29:11.

1. Why nao Jehovah garem right for rul ovarem evri samting?

“JEHOVAH hem putim throne bilong hem long heven; and hem king ovarem evri samting.” (Psalm 103:19) Toktok bilong man hia wea raetem psalm hem showimaot Jehovah God hem garem right for rulim evri samting from hem creatim evri samting.

2. Wanem nao Daniel lukim long heven?

² Man hem no savve rul sapos hem no garem eniwan for rul ovarem. Olketa first wan wea Jehovah rul ovarem hem olketa spirit wea stap long heven, wea first wan hem Son bilong hem wea hemseleva nao wakem, and then olketa angel. (Colossians 1:​15-​17) Barava longfala taem bihaen, profet Daniel hem lukim rul bilong Jehovah long heven. Hem sei olsem: “Mi gohed for lukluk go kasem taem olketa putim olketa throne and Datwan from taem bifor kam hem sidaon. . . . Plande thousand gohed for servem hem, and ten thousand taems ten thousand gohed for standap front long hem.” (Daniel 7:​9, 10) For plande million year, Jehovah, “Datwan from taem bifor kam,” hem rul ovarem barava big famili bilong olketa spirit son bilong hem wea garem wan mind, wea serve olsem “olketa minister” for duim will bilong hem.​—Psalm 103:20, 21.

3. Long wanem wei nao, gogo Jehovah rul ovarem evri samting long universe?

³ Gogo, Jehovah wakem disfala universe wea barava big and spesol, wea earth tu insaed diswan, and hem rul ovarem datwan tu. (Job 38:4, 7) Taem man luk go ap long skae long naet and lukim gogo bilong olketa star and olketa planet, luk olsem olketa samting hia no needim eniwan for kontrolem olketa. Bat man wea raetem psalm hem sei: “[Jehovah] givim komand and olketa kamap. And hem mekem olketa stap for olowe. Hem givim wanfala komand wea bae no finis.” (Psalm 148:​5, 6) Start kam long taem Jehovah wakem evri samting, hem showimaot rul bilong hem long wei for directim and kontrolem evri samting wea olketa angel duim and evri samting long universe.​—Nehemiah 9:6.

4. Long wanem wei nao Jehovah rulim olketa man?

⁴ God showimaot rul bilong hem long narafala wei moa taem hem wakem first man and woman. Jehovah provaedem evri samting wea olketa man needim for garem gud and hapi laef wea mekem olketa satisfae, and tu, hem givim paoa long olketa for rul ovarem olketa animal. (Genesis 1:​26-​28; 2:8, 9) So diswan showimaot klia hao rul bilong God hem givim gud samting long evriwan, bat nara samting tu, hem respectim and honorim olketa wea stap anda long rul bilong hem. Long firstaem, Adam and Eve garem chance for laef olowe long paradaes long earth, bat datwan hem only sapos olketa gohed for stap anda long rul bilong Jehovah.​—Genesis 2:​15-​17.

5. Long wanem wei nao Jehovah rul ovarem evri samting?

⁵ Wanem nao iumi savve lanem from evri samting hia? Jehovah hem rul ovarem evri creation bilong hem start kam long taem hem creatim first samting. Nara samting, rul bilong God hem respectim, honorim, and givim gudfala samting long olketa wea stap anda long hem. And last samting, iumi bae kasem blessing for olowe sapos iumi obeyim and sapotim rul bilong God. So iumi minim nao why King David hem sei: “Jehovah, wei for nambawan, maeti, luk naes, and bigfala glory and honor hem bilong iu; from evri samting long skae and long earth hem bilong iu. Datfala kingdom hem bilong iu, Jehovah, wea iu nao liftim iuseleva hae olsem hed ovarem evri samting.”​—1 Chronicles 29:11.

Why Nao God Mas Garem Datfala Kingdom Bilong Hem?

6. Sapos Jehovah hem ruler bilong universe, why nao hem disaed for garem datfala Kingdom?

⁶ Start kam long taem Jehovah creatim first samting, hem showimaot paoa bilong hem for rul ovarem evri creation bilong hem. Sapos olsem, why nao hem disaed for garem datfala Kingdom bilong hem? Plande taem wanfala ruler hem rul thru long wanfala arrangement. So Kingdom bilong God hem samting wea Jehovah iusim for showimaot rul bilong hem ovarem evri creation bilong hem.

7. Why nao Jehovah startim wanfala niu wei for showimaot rul bilong hem?

⁷ Long samfala difren taem bifor, Jehovah showimaot rul bilong hem long olketa difren wei. Long sem wei tu, hem iusim Kingdom bilong hem for showimaot rul bilong hem long wanfala niu wei, bikos long niufala samting wea kamap. Diswan happen taem wanfala bighed angel bilong God, Satan, hem switim Adam and Eve for againstim rul bilong Jehovah. Taem olketa duim datwan, olketa againstim nao rul bilong God. Long wanem wei? Taem Satan talem Eve hao hem ‘bae no dae’ sapos hem kaikaim datfala frut wea tambu, hem laekem Eve for tingse Jehovah no talem tru samting and man no fit for trustim hem. Satan hem sei long Eve: “God hem savve hao long day wea iu kaikaim datwan, eye bilong iu bae open and iu bae olsem God, long wei for savve long gud samting and nogud samting.” Long tingting bilong Satan, samting wea bae mekem Adam and Eve for stap gud nao hem sapos olketa no obeyim God and for tufala followim tingting bilong olketa seleva nomoa. (Genesis 3:​1-6) Wei for talem datwan hem barava kwestinim sapos God hem fit for rul or nomoa. Wanem nao bae Jehovah duim?

8, 9. (a) Wanem nao wanfala ruler bae duim sapos olketa wea hem rul ovarem againstim hem? (b) Wanem nao Jehovah duim for stretem wei wea olketa bighed againstim hem long Eden?

⁸ Wanem nao wanfala ruler bae duim sapos olketa wea stap anda long hem no laek for obeyim hem? Olketa wea savve long history savve tingim samfala example. Plande taem, nomata ruler wea laek for kaen long pipol bilong hem tu, bat hem mas judgem pipol wea no faithful for sapotim hem. Then datfala ruler savve givim paoa long wanfala man for faetem olketa wea no faithful for obeyim hem and mekem kantri bilong hem garem peace moa. Long sem wei tu, Jehovah showimaot wei wea hem kontrolem evri samting taem hem stretawe judgem olketa wea bighed againstim hem. Hem talemaot wei wea Adam and Eve no fit for kasem laef olowe, and Hem aotem tufala from garden bilong Eden.​—Genesis 3:​16-​19, 22-​24.

⁹ Taem Jehovah talemaot judgment bilong hem againstim Satan, hem showimaot wanfala niu samting wea hem bae iusim for showimaot rul bilong hem, wea hem bae iusim datwan for mekem peace kamap moa long full universe. God sei olsem long Satan: “Mi bae mekem feeling for heit kamap midolwan long iu and datfala woman and midolwan long seed bilong iu and seed bilong hem. Hem bae killim iu long hed and iu bae killim hem long leg.” (Genesis 3:​15) So Jehovah showimaot hao hem plan bilong hem for givim paoa long wanfala “seed” for finisim Satan and army bilong hem and for pruvim hao Hem nomoa fit for rul.​—Psalm 2:​7-9; 110:​1, 2.

10. (a) Gogo, hu nao datfala “seed”? (b) Wanem nao Paul talem abaotem wei wea datfala first profesi bae fulfill?

¹⁰ Datfala “seed” nao hem Jesus Christ witim wanfala sekson wea bae rul witim hem. Olketa hia kamap datfala Messiah Kingdom bilong God. (Daniel 7:​13, 14, 27; Matthew 19:28; Luke 12:32; 22:28-​30) Bat olketa servant bilong God no stretawe minim evri samting hia. Tru nao, wei wea datfala first profesi bae fulfill hem stap olsem wanfala “holy secret wea mining bilong hem haed for longfala taem.” (Romans 16:25) For plande handred year, olketa faithful servant bilong God barava luk forward for taem wea mining bilong “datfala holy secret” bae showaot klia and long taem wea datfala first profesi hem fulfill, wea datwan bae showimaot klia Jehovah nomoa fit for ruler bilong universe.​—Romans 8:​19-​21.

“Datfala Holy Secret” Isisi Showaot

11. Wanem nao Jehovah talem long Abraham?

¹¹ Long olketa year wea go pas, Jehovah hem isisi givim information abaotem datfala “holy secret abaotem kingdom bilong God.” (Mark 4:​11) Wanfala long olketa man wea Jehovah givim information long hem, hem Abraham, wea Bible kolem hem “fren bilong Jehovah.” (James 2:​23) Jehovah promisim Abraham hao Hem bae “mekem wanfala big nation” kamaot from hem. Bihaen, God sei long Abraham: “Bae olketa king kamaot from laen bilong iu,” and “from seed bilong iu evri nation bilong earth bae barava blessim olketa seleva.”​—Genesis 12:​2, 3; 17:6; 22:17, 18.

12. Long wanem wei nao seed bilong Satan hem showaot klia bihaen long Flood?

¹² Go kasem taem bilong Abraham, plande trae for rulim olketa seleva and for garem paoa ovarem nara pipol. Olsem example, Bible sei olsem abaotem Nimrod wea hem granson bilong Noah: “Hem startim wei for bossim olketa narawan. Hem mekem hemseleva kamap wanfala maeti man for hunting wea againstim Jehovah.” (Genesis 10:​8, 9) Hem klia hao Satan nao kontrolem Nimrod and olketa narawan wea mekem olketa seleva kamap ruler. Olketa hia and pipol wea sapotim olketa, kamap part bilong seed bilong Satan.​—1 John 5:​19.

13. Wanem nao Jehovah sei bae kamap thru long Jacob?

¹³ Jehovah gohed for fulfillim plan bilong hem nomata Satan trae for mekem olketa man for rul. Jehovah hem sei olsem long Jacob, wea hem grani bilong Abraham: “Datfala iron stik bae no lusim Judah, and datfala stik bilong komanda bae gohed stap midol long tufala leg bilong hem go kasem taem Shiloh hem kam; and olketa pipol bae obeyim hem.” (Genesis 49:10) Datfala word “Shiloh” hem minim “Datwan wea Garem Right.” So profesi toktok hia showimaot hao, gogo, man bae kam wea garem right for kasem “datfala iron stik” and “datfala stik bilong komanda,” wea minim hem bae rul ovarem olketa man. Hu nao disfala man?

“Go Kasem Taem Shiloh Hem Kam”

14. Wanem covenant nao Jehovah mekem witim David?

¹⁴ First wan long laen bilong Judah wea Jehovah chusim for kamap king ovarem pipol bilong hem nao hem datfala shepherd David, wea hem son bilong Jesse.a (1 Samuel 16:​1-​13) Nomata David hem sin and duim samfala mistek, Jehovah blessim hem bikos hem faithful for stap anda long rul bilong Jehovah. Covenant wea Jehovah mekem witim David hem givim samfala information moa abaotem datfala profesi long Eden. Hem sei olsem: “Bae mi mas mekem seed bilong iu kamap bihaen long iu, wea bae kam from insaed long iu; and for sure, mi bae mekem kingdom bilong hem strong.” Taem hem sei “kingdom bilong hem,” hem no minim son bilong hem Solomon nomoa, bikos profesi hem sei olsem: “Mi bae mekem throne bilong kingdom bilong hem stap for olowe.” Datfala covenant wea Jehovah mekem witim David hem showimaot klia hao datfala “seed” bilong Kingdom wea God promisim bae kamaot from laen bilong David.​—2 Samuel 7:​12, 13.

15. Why nao iumi savve sei kingdom bilong Judah hem stand for Kingdom bilong God?

¹⁵ David hem first wan long olketa wea bae kamap king long laen bilong hem wea hae priest anointim witim holy oil. So hem fitim for kolem olketa king hia, olketa wea anointed, wea minim olketa messiah. (1 Samuel 16:13; 2 Samuel 2:4; 5:3; 1 Kings 1:​39) Hem olsem olketa sidaon long throne bilong Jehovah and olketa rul olsem olketa king for Jehovah long Jerusalem. (2 Chronicles 9:8) So iumi savve sei kingdom bilong Judah hem stand for Kingdom bilong God, wea datwan hem showimaot rul bilong Jehovah.

16. Wanem nao kamaot from rul bilong olketa king bilong Judah?

¹⁶ Taem king and olketa pipol stap anda long rul bilong Jehovah, hem protectim and blessim olketa. Anda long rul bilong Solomon pipol barava hapi and garem laef wea mekem olketa satisfae. Datwan showimaot gud samting wea Kingdom bilong God bae duim bihaen Jesus hem finisim Satan and olketa samting wea hem duim, wea long datfala taem hem bae klia hao Jehovah nomoa fit for ruler long universe. (1 Kings 4:​20, 25) Nogud samting nao hem wei wea plande long olketa king wea kam from laen bilong David olketa no followim olketa mark bilong Jehovah, and pipol worshipim idol and duim dirty fasin. Gogo, long 607 B.C.E., Jehovah letem army bilong Babylon for finisim datfala kingdom. Luk olsem Satan hem win long wei wea hem trae for showimaot hao rul bilong Jehovah hem nogud.

17. Wanem nao showimaot hao Jehovah gohed for kontrolem evri samting nomata olketa finisim kingdom bilong David?

¹⁷ Wei wea kingdom bilong David and datfala ten-tribe kingdom bilong Israel long north hem finis, no minim rul bilong Jehovah hem fail or hem no fit, bat hem showimaot nogud samting wea happen taem Satan kontrolem pipol, and taem olketa independent from God. (Proverbs 16:25; Jeremiah 10:23) Jehovah iusim profet Ezekiel for showimaot hao hem nao rulim evri samting. Hem sei: “Aotem turban, and tekaotem crown. . . . Bae mi spoelem datwan evribit. And bae no eniwan werem diswan go kasem taem wea man wea garem right hem kam, and mi mas givim diswan long hem.” (Ezekiel 21:26, 27) Olketa toktok hia showimaot hao datfala “seed” wea God promis for sendem, wea hem nao Datwan wea “garem right,” hem no kam yet.

18. Wanem nao angel Gabriel talemaot long Mary?

¹⁸ Staka year bihaen datwan, God sendem angel Gabriel long Mary, wea hem wanfala virgin gele long Nazareth, wea hem wanfala taon long Galilee wea stap long north Palestine. Hem sei long Mary: “Bae iu babule and bae iu bornem wanfala son, and iu mas nemim hem Jesus. And hem bae kamap nambawan and olketa bae kolem hem Son bilong Most Hae; and Jehovah God bae givim hem throne bilong dadi bilong hem, David, and hem bae rul olsem king ovarem laen bilong Jacob for olowe, and kingdom bilong hem bae no savve finis.”​—Luke 1:​31-​33.

19. Long first century hem taem for olketa wanem nambawan samting for happen?

¹⁹ Taem for showimaot full mining bilong “datfala holy secret” hem klosap nao. Datfala main Wan long datfala “seed” wea God promis for sendem, hem klosap for showaot long datfala taem. (Galatians 4:4; 1 Timothy 3:​16) Satan bae killim hem long leg. Bat datfala “seed” bae killim Satan long hed, wea datwan bae finisim evri wei wea Satan and olketa wea saedem hem savve pullim pipol for duim nogud samting. Hem bae pruvim tu hao thru long Kingdom bilong God, hem bae stretem bak evri nogud samting wea Satan hem duim, and tu, hao Jehovah nomoa fit for rul. (Hebrews 2:​14; 1 John 3:8) Hao nao bae Jesus duim diswan? Wanem example nao hem leavim for iumi followim? Iumi bae kasem ansa long next article.

[Footnote]

Waswe, Iu Savve Explainim?

• Why nao Jehovah garem right for rul ovarem universe?

• Why nao Jehovah plan for garem Kingdom?

• Long wanem wei nao Jehovah isisi showimaot mining bilong datfala “holy secret”?

• Wanem nao showimaot Jehovah gohed for kontrolem evri samting nomata kingdom bilong David hem finis?

[Piksa long page 24]

Jehovah givim wanem information thru long Abraham?

[Piksa long page 26]

Why nao hem no stret for sei wei wea olketa finisim kingdom bilong David hem pruvim hao rul bilong Jehovah hem fail?