“Hu Long Iufala Nao Hem Garem Gudfala Savve and Minim Samting?”
“Hu long iufala nao hem garem gudfala savve and minim samting? Hem mas showimaot diswan long olketa gudfala samting wea hem duim long wei for kwaet wea kam from bigfala savve.”—JAS. 3:13.
1, 2. Wanem nao iumi savve talem abaotem staka wea pipol tingse olketa garem gudfala savve?
LONG tingting bilong iu, hu nao garem gudfala savve? Maet hem dadi and mami bilong iu, wanfala man wea olo, or maet wanfala skul teacher? Maet ples wea iu big kam long hem nao mekem iu garem tingting bilong iuseleva abaotem hu nao garem gudfala savve. Bat for pipol bilong God, olketa laekem tumas for savve wanem nao tingting bilong God saed long diswan.
2 God hem no tinghae long savve bilong pipol wea olketa man tingse olketa garem gudfala savve. Wanfala story wea showimaot diswan hem taem wea Job story witim olketa man wea tingse samting wea olketa storyim hem followim gudfala savve, bat Job tok olsem long olketa: “No eniwan long iufala garem gudfala savve.” (Job 17:10) Aposol Paul tok olsem abaotem samfala wea les long savve bilong God: “Nomata olketa tingse olketa garem gudfala savve, olketa krangge nomoa.” (Rom. 1:22) Profet Isaiah talem disfala strong toktok bilong Jehovah: “Trabol for olketa wea olketa seleva tingse olketa garem gudfala savve.”—Isa. 5:21.
3, 4. Wanem nao man mas duim for showimaot hem garem gudfala savve?
3 Tru tumas, iumi need for savve wanem nao mekem man for garem gudfala savve mekem God hapi long hem. Proverbs 9:10 talem iumi diswan: “Wei for fraet long Jehovah hem start bilong bigfala savve, and for savve abaotem Datwan wea Barava Holy nao hem wei for minim samting.” Olketa wea garem gudfala savve mas fraet long God and tinghae long olketa samting wea God laekem. Bat hem no inaf for iumi savve nomoa hao God hem stap and hao hem markem samting wea stret and samting wea no stret. Disaepol James hem helpem iumi for ting raonem diswan. (Readim James 3:13.) Hem talem olsem: “[Man] mas showimaot diswan long olketa gudfala samting wea hem duim.” Gudfala savve wea iu garem mas showaot evritaem long toktok and olketa samting wea iu duim.
4 Man wea garem bigfala savve wea tru bae iusim gudfala tingting and savve and wei for minim samting long gudfala wei. Wanem samting wea iumi duim nao bae showimaot iumi garem bigfala savve? James storyim samfala samting wea man wea garem gudfala savve bae duim.a Wanem nao hem talem wea savve helpem iumi for fren gud witim olketa brata and sista and nara pipol wea no stap long kongregeson?
Samting Man Duim Savve Showimaot Hem Garem Gudfala Savve
5. Wanem nao olketa wei bilong man wea showimaot hem garem gudfala savve?
5 Hem gud for iumi talem moa hao James storyim wei wea bigfala savve hem join witim wei for duim gudfala samting. From wei for fraet long Jehovah hem start bilong bigfala savve, man wea garem bigfala savve bae trae for duim samting followim olketa wei bilong God. Iumi no born kam witim bigfala savve wea God laekem. Bat iumi savve kasem sapos iumi evritaem studyim and ting raonem Bible. Taem iumi duim olsem, diswan bae helpem iumi for duim wanem Ephesians 5:1 talem: “Iufala followim olketa wei bilong [God].” Sapos iumi evritaem trae for followim Jehovah, iumi bae showimaot long samting wea iumi duim hao iumi garem bigfala savve. Olketa wei bilong Jehovah hem barava winim olketa wei bilong man. (Isa. 55:8, 9) Taem iumi followim hao Jehovah duim samting, narafala pipol bae lukim hao wei bilong iumi hem difren.
6. Why nao wei for kwaet showimaot man hem followim God, and hao nao hem savve garem diswan?
6 James storyim hao wanfala wei for olsem Jehovah, hem “wei for kwaet wea kam from bigfala savve.” Wanfala Christian wea showimaot wei for kwaet mas kaen, bat long semtaem hem mas strong for obeyim samting wea Bible talem, and diswan bae helpem hem for no duim samting wea ova tumas. From God hem garem wei for kwaet, iumi no fraet for fren witim hem nomata hem garem bigfala paoa. Son bilong God hem showimaot hem garem wei for kwaet olsem Dadi bilong hem dastawe hem talem diswan: “Kam long mi, iufala evriwan wea waka hard and karem bigfala hevi, and mi bae strongim iufala. Waka witim mi and lane from mi, from wei bilong mi hem kwaet and mi no tinghae long miseleva, and iufala bae kasem gudfala samting for strongim iufala.”—Matt. 11:28, 29; Phil. 2:5-8.
7. Why nao hem gud for iumi followim wei bilong Moses for kwaet?
7 Bible storyim samfala narawan wea barava showimaot wei for kwaet. Wanfala nao hem Moses. Hem garem bigfala waka for duim, bat Bible talem hao hem “kwaet winim evri nara man wea stap long earth.” (Num. 11:29; 12:3) And tingim hao Jehovah strongim Moses for duim samting wea Hem laekem hem for duim. Jehovah laekem olketa wea garem wei for kwaet for duim samting wea hem planim.
8. Long wanem wei nao pipol wea sin savve showimaot “wei for kwaet wea kam from bigfala savve”?
8 Diswan showimaot hao man wea sin savve garem “wei for kwaet wea kam from bigfala savve.” Waswe long iumi? Hao nao iumi savve kamap gud long wei for showimaot diswan? Wanfala frut bilong holy spirit bilong Jehovah nao hem wei for kwaet. (Gal. 5:22, 23) Iumi savve prea for spirit bilong God and waka hard for showimaot disfala wei for kwaet, and trustim God for helpem iumi for kamap gud long diswan. Man wea raetem psalm talem samting wea savve muvim iumi for duim diswan: “[God] bae lanem olketa wea kwaet for savve long hem.”—Ps. 25:9.
9, 10. Wanem nao iumi mas waka hard for duim mekem iumi showimaot wei for kwaet wea God laekem, and why nao olsem?
9 Nomata olsem, man mas barava waka hard for kamap gud long wei for kwaet. From kastom long ples wea iumi big kam long hem, maet hem no isi for samfala long iumi for kwaet. And tu, maet pipol talem iumi for garem difren wei olsem for raf long pipol wea raf long iumi. Bat waswe, datwan hem showimaot gudfala savve? Sapos fire start for bonem haos bilong iu, waswe, bae iu iusim kerosene or wata for killim dae fire? Sapos iu iusim kerosene iu bae mekem fire for laet big go moa, bat sapos iu iusim wata fire bae dae nao. Long sem wei tu, Bible talem iumi olsem: “Toktok wea showimaot wei for kwaet hem stopem kros, bat toktok wea no showimaot diswan hem mekem kros kamap.” (Prov. 15:1, 18) Taem iumi garem problem witim brata or sista or nara pipol, waswe, iumi savve showimaot iumi garem bigfala savve wea tru taem iumi showimaot wei for kwaet for stretem datfala problem?—2 Tim. 2:24.
10 Olsem iumi storyim finis, staka wea followim wei bilong world olketa no laek showimaot wei for kwaet long nara pipol, olketa laek for raoa nomoa. Dastawe iumi lukim staka pipol raf and bighed. James luksavve long diswan, and hem warnim olketa long kongregeson for no followim wei bilong world olsem. Waswe, iumi savve lanem eni nara samting from datfala toktok bilong James?
Wei Bilong Pipol wea No Garem Gudfala Savve
11. Wanem nao olketa wei wea barava difren from bigfala savve wea God laekem?
11 James storyim stret olketa wei wea barava difren from bigfala savve wea God laekem. (Readim James 3:14.) Wei for jealous and wei for raoa olowe hem no kam from God, bat hem followim nomoa savve bilong man. Tingim samting wea savve kamap taem pipol followim savve bilong man. Long Jerusalem, sixfala grup bilong pipol wea sei olketa Christian lukaftarem datfala Church of the Holy Sepulchre. Olketa tingse disfala church hem stap antap long ples wea Jesus dae long hem. Olketa grup hia gohed for raoa olowe nomoa. Long 2006, Time magasin hem storyim wanfala taem wea samfala priest bilong olketa “faet gogo . . . olketa killim narawan witim olketa bigfala samting for putim kandol long hem.” From olketa barava no trustim narawan olketa mas givim key bilong datfala church for wanfala Muslim man nao for lukaftarem.
12. Wanem nao savve kamap taem iumi no garem bigfala savve?
12 Diskaen wei for raoa olsem mas no stap long Christian kongregeson. Bat from iumi garem sin, diswan mekem samfala for laek followim nomoa tingting bilong olketa seleva. Datkaen wei savve end ap long raoa. Aposol Paul lukim diswan long kongregeson long Corinth, and hem tok olsem: “Taem iufala jealous and raoa, diswan minim iufala followim tingting bilong man and iufala followim nomoa wei bilong olketa man.” (1 Cor. 3:3) Long datfala kongregeson long bifor, disfala problem hem stap for lelebet taem. Dastawe iumi mas keakea for no letem kaen samting olsem for kamap long eni kongregeson distaem.
13, 14. Storyim samfala wei wea showimaot tingting bilong man.
13 Hao nao wei olsem savve isisi spoelem kongregeson? Hem savve start from olketa sismol samting nomoa. Tingim diswan, taem iumi buildim wanfala Kingdom Hall samfala savve garem difren tingting abaotem hao for duim samting. Maet wanfala brata hem kros from olketa no followim tingting bilong hem, and gogo maet hem talemaot hao hem no hapi long samting wea olketa laek for duim. Maet hem les nao for duim eni waka for buildim datfala Kingdom Hall! Luk olsem man hia mekhae long hao for duim samting winim wei wea kongregeson waka gud tugeta. Jehovah bae hapi long wei for kwaet and no wei for raoa.—1 Tim. 6:4, 5.
14 Nara samting for tingim, olketa elder long wanfala kongregeson maet lukim hao wanfala wea elder for longfala taem hem no kasem nao olketa mark from Bible. Taem circuit overseer hem visit kam hem luksavve olketa nara elder trae for helpem disfala brata staka taem finis bat brata hia nating laek for followim, so circuit overseer tu talem for brata hia finis for elder. Hao nao brata hia bae ting long datwan? Waswe, bae hem hambol and kwaet for followim wanem olketa elder talem and help wea olketa givim hem from Bible mekem hem kasem moa olketa mark from Bible for hem kamap elder? Or waswe, bae hem gohed for kros and jealous bikos hem no elder nao? Why nao wanfala brata bae laek for elder nomata hem nating kasem mark wea fitim elder? Hem bae gud tumas for garem gudfala savve for showimaot wei for hambol and for minim samting!
15. Long tingting bilong iu, why nao toktok long James 3:15, 16 wea kam from God hem barava important?
15 Samfala nara samting tu savve mekem man for garem kaen tingting olsem. Bat nomata wanem samting kamap, iumi mas waka hard for no garem kaen tingting olsem. (Readim James 3:15, 16.) Disaepol James talem hao olketa kaen wei olsem hem “bilong disfala world” bikos hem nating kam from God. Taem olketa man followim nomoa olketa nogud samting wea man laekem olketa “followim animal” wea no garem gudfala tingting. Olketa wei olsem hem “followim demon,” wea datwan nao hem wei bilong olketa enemy bilong God. Hem barava no fitim for olketa Christian garem kaen wei olsem!
16. Wanem nao samfala wei wea iumi mas aotem, and hao nao iumi savve duim diswan?
16 Evriwan long kongregeson mas ting raonem sapos hem garem eni wei olsem and hem mas waka hard for aotem. Olketa overseer wea teach long kongregeson mas waka hard for no garem olketa nogud wei hia. Hem no isi for aotem olketa wei hia, from iumi garem sin and world pullim iumi for duim nogud samting. For aotem olketa wei hia hem olsem iumi trae for klaem hill wea mud and slippery. Sapos iumi no hol strong long eni samting iumi savve foldaon. Bat wei for hol strong long toktok long Bible and help wea iumi kasem from kongregeson bilong God evriwea long world, bae helpem iumi for no foldaon.—Ps. 73:23, 24.
Olketa wea Garem Gudfala Savve Showimaot Olketa Gudfala Wei
17. Taem olketa wea garem gudfala savve kasem test for duim rabis samting, wanem nao olketa duim?
17 Readim James 3:17. Iumi savve kasem staka gudfala samting taem iumi ting raonem olketa wei wea kamaot from “bigfala savve from antap.” For iumi klin long olketa wei bilong iumi hem minim olketa samting wea iumi duim and samting wea muvim iumi for duim datwan hem mas klin tu. Iumi mas semtaem lusim eni rabis samting. Hem no samting for iumi ting raonem firstaem bat iumi kwiktaem duim. Diswan hem olsem taem samting hem flae kam for eye bilong wanfala man. Kwiktaem nomoa eye bilong hem sat nao. Hem no samting for hem ting raonem firstaem bat hem duim nomoa. Iumi mas olsem tu taem iumi kasem test for duim rabis samting. Tingting wea followim wanem Bible talem and wei wea iumi klin long olketa wei bilong iumi bae helpem iumi for no ting raonem firstaem bat duim nomoa samting wea hem stret. (Rom. 12:9) Joseph and Jesus nao tufala wea Bible storyim wea duim diswan.—Gen. 39:7-9; Matt. 4:8-10.
18. (a) Wanem nao iumi mas duim for stap gud witim olketa nara pipol? (b) Hao nao iumi savve kamap man for stopem raoa?
18 For garem gudfala savve wea God laekem hem minim iumi mas stap gud witim olketa nara pipol. Diswan minim for iumi no raf, no tok kros and for no duim eni samting for mekem raoa kamap. James storyim samfala nara samting moa abaotem diswan taem hem tok olsem: “Wei for raeteous bae kamap long ples wea peace hem stap for olketa wea mekem peace kamap.” (Jas. 3:18) Lukim datfala toktok “mekem peace kamap.” Waswe, olketa long kongregeson savve long iumi olsem man for raoa or man for stopem raoa? Waswe, iumi evritaem no hapi long samting olketa narawan duim, kwiktaem feel nogud or mekem olketa narawan for feel nogud? Waswe, iumi forcem olketa narawan for laekem wei bilong iumi, or iumi hambol for aotem olketa wei bilong iumi wea mekem olketa narawan feel nogud? Waswe, pipol savve long iumi olsem man wea no laek raoa, kwiktaem forgive and no tingim moa olketa rong bilong narawan? Wei for ting raonem wanem iumi mas duim savve helpem iumi for kamap gud long wei for showimaot gudfala savve wea God laekem.
19. Hao nao pipol bae savve long iumi olsem man wea no ova tumas?
19 James storyim tu hao man wea garem bigfala savve from antap bae hem no ova tumas. Waswe, pipol savve long iumi olsem man wea willing for followim tingting bilong olketa narawan sapos datwan no brekem eni Bible principle, or pipol savve long iumi olsem man wea laek mekem olketa narawan followim samting wea iumiseleva nomoa laekem? Waswe, pipol savve long iumi olsem man wea showimaot wei for kwaet and pipol no fraet for story witim iumi? Olketa kaen wei olsem showimaot iumi lane hao for no ova tumas.
20. Wanem gud samting nao iumi savve kasem taem iumi showimaot olketa wei bilong God wea iumi storyim finis?
20 Taem olketa brata and sista long kongregeson waka hard for showimaot olketa wei bilong God wea James storyim, kongregeson savve stap gud and hapi! (Ps. 133:1-3) Iumi showimaot iumi garem “bigfala savve from antap,” taem iumi showimaot wei for kwaet, no raoa, and no ova tumas. Diswan bae mekem wei wea iumi fren witim olketa narawan kamap gud. Nextfala study bae helpem iumi for showimaot olketa wei olsem taem iumi lane hao for tingim narawan long sem wei olsem Jehovah.
[Footnote]
a Luk olsem James storyim olketa “teacher” long kongregeson. (Jas. 3:1) Olketa man hia mas showimaot olketa garem bigfala savve wea God laekem, bat iumi evriwan savve lanem gudfala samting from toktok bilong hem.
Wanem Nao Ansa Bilong Iu?
• Wanem nao bae showimaot wanfala Christian garem gudfala savve wea tru?
• Wanem nao iumi savve duim mekem iumi kamap gud for showimaot bigfala savve wea God laekem?
• Olketa wanem wei nao pipol wea no garem “bigfala savve from antap” showimaot?
• Olketa wanem wei nao iu barava laek for kamap gud long hem?
[Piksa long page 23]
Hao nao problem savve isisi kamap distaem?
[Piksa long page 24]
Waswe, iu kwiktaem les for duim rabis samting?