Marit and Wei for Garem Pikinini Long Disfala Taem wea World Klosap Finis
“Lelebet taem nomoa hem stap.”—1 COR. 7:29.
1. (a) Wanem nao olketa “nogud samting” wea kamap distaem? (b) Why nao iumi warim olketa samting wea kasem olketa famili distaem?
WORD bilong God talem hao long “taem bilong end” olketa war, earthquake, bigfala hangre, and olketa nogud sik bae kamap. (Dan. 8:17, 19; Luke 21:10, 11) Bible talem tu hao long disfala taem, tingting and living bilong pipol bae barava change. Wanfala “nogud samting” wea bae kamap long “olketa last day” nao hem famili bae kasem olketa problem. (2 Tim. 3:1-4) Why nao iumi warim olketa samting olsem? From olketa problem hia kamap big tumas and spoelem plande pipol finis, olketa savve spoelem tu tingting bilong olketa Christian abaotem marit and for garem pikinini. Long wanem wei?
2. Wanem nao tingting bilong pipol long world long marit and divorce?
2 Distaem hem isi nomoa for man divorce, and long plande kantri namba bilong pipol wea divorce hem big tumas. Nomata olsem, iumi mas tingim hao tingting bilong Jehovah God long marit and divorce hem barava difren from tingting bilong pipol long world. So wanem nao tingting bilong Jehovah?
3. Wanem nao tingting bilong Jehovah and Jesus Christ long marit?
3 Jehovah God hem talem hao tufala wea marit mas faithful long tufala. Taem first man and woman marit, Jehovah talem hao “man . . . mas stap witim waef bilong hem and tufala mas kamap wanfala body.” Jesus Christ hem talem datfala sem toktok tu and then hem sei: “Dastawe no eni man mas aotem samting wea God joinim finis.” Jesus sei tu: “Eniwan wea lusim waef bilong hem and maritim narawan nomata waef hem no durong witim eniwan, datwan hem adultery.” (Gen. 2:24; Matt. 19:3-6, 9) Dastawe long tingting bilong Jehovah and Jesus, marit hem for olowe, and hem savve finis nomoa taem wanfala long tufala hem dae. (1 Cor. 7:39) From God nao startim marit, iumi mas no ting long divorce olsem smol samting nomoa. For tok stret, Jehovah heitim wei for divorce wea no fitim samting wea Bible talem.a—Readim Malachi 2:13-16; 3:6.
Marit Hem Big Samting
4. Why nao samfala young Christian sorre from olketa marit kwiktaem?
4 Pipol long world distaem tingim sex olowe. Evriday television hem mekhae long diswan. Diswan hem savve spoelem tingting bilong iumi, and hem savve barava spoelem tingting bilong olketa young wan long kongregeson. Wanem nao olketa young Christian mas duim taem olketa feisim kaen samting olsem wea savve mekem olketa garem feeling for laek duim sex? Samfala disaed for marit taem olketa young tumas bikos olketa tingse diswan bae stopem olketa for durong. Bat samfala long olketa sorre nao from olketa marit kwiktaem. Why nao olsem? Bikos no longtaem bihaen tufala marit, olketa luksavve tingting bilong olketa hem difren long plande samting. Hasband and waef wea olsem feisim bigfala problem nao.
5. Wanem nao bae helpem tufala wea marit for faithful? (Lukim footnote tu.)
5 Sapos iu maritim wanfala wea nomata hem Witness tu bat wei bilong hem difren tumas from wanem iu tingim firstaem, datwan savve mekem problem kamap long marit bilong iutufala. (1 Cor. 7:28) Bat olketa tru Christian savve nomata olketa garem problem and no hapi long marit bilong olketa, hem no fitim for olketa divorce for stretem datwan. Dastawe iumi long Christian kongregeson mas respectim and helpem olketa olsem wea waka hard for strongim marit bilong olketa bikos tufala laek faithful long tufala.b
6. Wanem tingting nao olketa Christian mas garem long marit?
6 Waswe, iu wanfala young wan wea no marit? Sapos olsem, wanem tingting nao iu mas garem long marit? Bae iu no sorre sapos iu weit go kasem taem iu mature long tingting and long spiritual saed bifor iu frenim wanfala Christian. Hem tru, Bible no talem haomas year nao man mas kasem bifor hem fit for marit.c Bat Bible showimaot hem gud for iu weit firstaem go kasem taem feeling for laek duim sex hem no strong olsem taem iu young. (1 Cor. 7:36) Why nao olsem? Bikos taem feeling for laek duim sex hem strong tumas, hem savve mekem man no tingting gud and duim samting wea bae mekem hem sorre bihaen. Plis tingim, samting wea Jehovah talem long Bible abaotem marit hem for helpem iu and for mekem iu hapi.—Readim Isaiah 48:17, 18.
For Garem Pikinini Hem Big Samting
7. Wanem nao kasem samfala young wan wea marit? Hao nao diswan savve mekem hevi kamap long marit bilong olketa?
7 Samfala wea marit taem olketa young tumas olketa kwiktaem nomoa garem pikinini. Tufala no savve gud long each other nomoa then baby hem born nao. From mami nao savve lukaftarem baby olowe, maet diswan mekem hasband hem feel jealous lelebet. Taem dadi and mami no sleep gud long naet from tufala mas lukaftarem baby, diswan savve mekem hevi kamap and tufala feel nogud long narawan. Tufala luksavve distaem olketa no free olsem bifor. Distaem tufala no savve gogo tumas long olketa ples and duim samting wea olketa savve duim bifor olketa garem pikinini. So wanem tingting nao tufala mas garem distaem?
8. Hao nao man mas ting long wei for garem pikinini, and why nao olsem?
8 Marit hem wanfala big samting, and for garem pikinini tu hem wanfala privilege and bigfala waka wea God givim long dadi and mami. Nomata tufala mas changem samfala samting long laef bilong tufala taem baby hem born, tufala mas garem gudfala tingting long datwan. From Jehovah nao mekem dadi and mami fit for garem pikinini, tufala mas ting long baby bilong olketa olsem hem “present from Jehovah.” (Ps. 127:3) Christian dadi and mami bae traem best for duim waka bilong olketa followim “tingting bilong Lord.”—Eph. 6:1.
9. (a) For lanem pikinini, dadi and mami mas duim wanem? (b) Wanem nao hasband savve duim for helpem waef for gohed fren gud witim God?
9 For lanem pikinini, dadi and mami mas waka hard for plande year and givim staka taem and strong bilong olketa for lukaftarem pikinini. Taem pikinini smol yet, Christian hasband mas luksavve hao waef bilong hem bae busy for lukaftarem pikinini long taem bilong olketa meeting, and maet waef no garem staka taem for study seleva and ting raonem Bible. Diswan maet mekem waef no savve fren gud witim God olsem bifor. Dastawe hem gud for hasband duim best bilong hem for helpem waef for lukaftarem pikinini. Taem waef lukaftarem pikinini maet hem no herem evri samting long olketa meeting, so hasband savve storyim olketa samting hia long hem taem olketa go bak long haos. Hem savve lukaftarem pikinini tu mekem waef bilong hem savve duim gud preaching waka bilong hem.—Readim Philippians 2:3, 4.
10, 11. (a) Long wanem wei nao dadi and mami ‘lanem pikinini long tingting bilong Jehovah’? (b) Why nao hem fitim for iumi praisem plande Christian dadi and mami?
10 For lukaftarem pikinini hem no minim nomoa for givim kaikai, kaleko, haos, and keepim hem taem hem sik. From world distaem hem klosap for finis, hem important tumas for olketa young wan lanem olketa gudfala wei bilong Christian start long taem olketa smol. Dadi and mami mas “stretem olketa and lanem olketa long tingting bilong Jehovah.” (Eph. 6:4) Olketa mas “lanem” pikinini for savve long tingting bilong Jehovah start long taem hem smol go kasem taem hem big.—2 Tim. 3:14, 15.
11 Taem Jesus talem olketa wea followim hem for “mekem pipol long evri nation for kamap disaepol,” datwan minim dadi and mami mas helpem pikinini bilong olketa tu for kamap disaepol. (Matt. 28:19, 20) Datwan hem no isi samting bikos pikinini savve kasem bigfala hevi from disfala world. Dastawe iumi evriwan long kongregeson mas praisem olketa dadi and mami hia wea helpem pikinini bilong olketa gogo olketa dedicate long Jehovah. From dadi and mami garem strongfala faith long Jehovah and tufala faithful for lanem pikinini, tufala “win” for protectim pikinini from world.—1 John 5:4.
Why Nao Samfala Disaed for Stap Singol or for No Garem Pikinini?
12. Why nao samfala Christian disaed for stap singol for lelebet longtaem?
12 From “lelebet taem nomoa hem stap” and “world hem gohed for change,” Bible talem iumi for tingim olketa gud samting wea man savve duim sapos hem stap singol. (1 Cor. 7:29-31) Dastawe samfala Christian disaed for stap singol long full laef bilong olketa or for stap singol for lelebet longtaem bifor olketa marit. Hem fitim iumi for praisem olketa from olketa no iusim taem wea olketa stap singol for aftarem samting wea olketa seleva laekem. Plande disaed for stap singol mekem olketa savve “givim olketa seleva evribit” long Jehovah. (Readim 1 Corinthians 7:32-35.) Samfala Christian wea singol olketa pioneer or waka long Bethel. Plande waka hard for go long Ministerial Training Skul mekem organization bilong Jehovah fit for iusim olketa long bigfala wei. Olketa wea pioneer for longtaem lelebet taem olketa singol talem hao samting wea olketa lanem long datfala taem hem barava helpem olketa bihaen olketa marit.
13. Why nao samfala Christian hasband and waef disaed for no garem pikinini?
13 Long samfala ples long world, nara samting tu change saed long famili. Plande hasband and waef disaed for no garem pikinini. Samfala duim datwan from selen hem hard. Olketa narawan duim olsem from olketa aftarem bigfala waka. Samfala Christian hasband and waef tu disaed for no garem pikinini mekem olketa savve duim plande samting for Jehovah. Diswan no minim olketa difren from olketa narawan wea marit and wea garem pikinini. Olketa hapi nomoa. Olketa willing for no garem pikinini mekem olketa savve duim waka bilong Jehovah firstaem. (1 Cor. 7:3-5) Samfala hasband and waef hia duim circuit or distrik waka or waka long Bethel. Samfala pioneer and samfala kamap missionary. Jehovah bae nating forgetim waka wea olketa duim and love wea olketa showimaot for hem.—Heb. 6:10.
“Kasem Trabol Long Body”
14, 15. Wanem “trabol long body” nao savve kasem olketa Christian dadi and mami?
14 Aposol Paul talem hao olketa Christian wea marit bae “kasem trabol long body.” (1 Cor. 7:28) Maet trabol hia hem sik wea kasem tufala wea marit, pikinini bilong olketa, or dadi and mami wea olo. Maet tufala kasem hard taem and hevi for lanem pikinini bilong olketa. Olsem iumi storyim finis long disfala study, Bible talem hao “long olketa last day, olketa nogud samting bae kamap wea mekem laef no isi.” Wanfala samting wea mekem laef no isi nao hem olketa pikinini wea “no herem toktok bilong dadi and mami.”—2 Tim. 3:1-3.
15 Hem no isi samting for olketa Christian dadi and mami for lanem olketa pikinini. Olketa “nogud samting” distaem savve kasem iumi tu. Dastawe olketa Christian dadi and mami mas waka hard for againstim olketa nogud samting long “disfala world” wea savve spoelem pikinini bilong olketa. (Eph. 2:2, 3) Bat samfala taem olketa no win long diswan! Taem wanfala boy or gele long Christian famili stop for worshipim Jehovah, datwan hem wanfala “trabol” for dadi and mami wea trae for lanem pikinini hia long olketa tru samting abaotem God.—Prov. 17:25.
“Then Big Trabol Bae Kamap”
16. Wanem “trabol” nao Jesus talem bae hem kamap?
16 Nomata wanem “trabol” nao kasem olketa wea marit and olketa wea garem pikinini, datwan hem smol nomoa sapos iu markem witim big trabol wea klosap kam. Taem Jesus storyim taem wea hem bae stap and taem wea world bae finis, hem talem olsem: “Big trabol bae kamap wea worse winim eni trabol wea happen bifor, start kam long taem wea world hem start, kam kasem distaem, and no eni trabol wea bae kam bihaen bae nogud olsem.” (Matt. 24:3, 21) Jesus talem hao wanfala big sekson nao bae no dae long disfala “big trabol.” Bat go kasem datfala taem, world bilong Satan bae gohed for againstim olketa Witness bilong Jehovah. Dastawe bae hem no isi for iumi evriwan, nomata iumi big finis or iumi pikinini yet.
17. (a) Why nao iumi no fraetem samting wea bae happen long future? (b) Wanem nao bae helpem iumi for tingting gud firstaem bifor iumi marit and garem pikinini?
17 Nomata olsem, iumi mas no fraetem samting wea bae happen long future. Olketa dadi and mami wea faithful long Jehovah savve Hem bae protectim olketa and smol pikinini bilong olketa. (Readim Isaiah 26:20, 21; Zeph. 2:2, 3; 1 Cor. 7:14) So long distaem, from iumi luksavve iumi stap long taem wea hem no isi and world hem klosap for finis, hem gud for iumi tingting gud firstaem bifor iumi marit or iumi garem pikinini. (2 Pet. 3:10-13) Taem iumi duim olsem, nomata iumi singol or marit, iumi garem pikinini or nomoa, bae iumi mekem Jehovah and Christian kongregeson kasem praise.
[Olketa Footnote]
a Lukim buk Live With Jehovah’s Day in Mind long page 125 wea garem heding “He Has Hated a Divorcing.”
b Olketa wea garem olketa problem long marit savve readim Wastaoa bilong September 15, 2003, and Awake! bilong January 8, 2001, for helpem olketa.
c Readim chapter 30, “Am I Ready for Marriage?” long buk Questions Young People Ask—Answers That Work.
Review
• Why nao olketa young Christian mas no marit kwiktaem?
• For lanem pikinini hem minim wanem?
• Why nao plande Christian disaed for stap singol and plande wea marit disaed for no garem pikinini?
• Wanem “trabol” nao savve kasem olketa Christian dadi and mami distaem?
[Piksa long page 17]
Why nao hem gud for olketa young Christian weit firstaem bifor olketa marit?
[Piksa long page 18]
Hasband savve duim plande samting for helpem waef for worshipim God
[Piksa long page 19]
Why nao samfala wea marit disaed for no garem pikinini?