Klosap Nao Kingdom Bilong God Bae Sevem Iumi!

“Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.”​—MATT. 6:​10.

1. Wanem nao main samting wea Jesus teachim long pipol?

TAEM Jesus Christ storyim Sermon long Maunten, hem talem wanfala prea wea mekhae long main samting wea hem teachim long pipol. Hem lanem olketa wea followim hem for prea olsem long God: “Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.” (Matt. 6:​9-​13) Jesus “go preach long evri taon and evri vilij and talemaot gud nius abaotem kingdom bilong God.” (Luke 8:1) Hem talem olketa wea followim hem: “Gohed for faithful long kingdom and for duim olketa samting wea God sei hem stret. Wei for duim olsem hem mas moa important long iufala winim eni nara samting.” (Matt. 6:​33) Taem iu redyim disfala study, tingim hao nao iu savve followim olketa samting hia long preaching waka. Trae for tingim wanem nao ansa bilong olketa kwestin hia: Why nao datfala message abaotem Kingdom hem important? Why nao God mas sevem olketa man? And wanem nao Kingdom bilong God bae duim for sevem iumi?

2. Why nao gud nius abaotem Kingdom hem important?

² Jesus talem finis: “Olketa bae talemaot gud nius abaotem kingdom long full earth mekem pipol long evri ples savve herem; and bihaen diswan world hem finis nao.” (Matt. 24:14) Disfala gud nius abaotem Kingdom bilong God nao hem barava important message long world! Klosap seven million Witness bilong Jehovah wea stap long winim 100,000 kongregeson long world, olketa duim bigfala preaching waka long full world for talem pipol disfala Kingdom hem stap finis nao. From iumi savve gavman bilong God stap finis long heven and klosap nao bae hem rulim earth, datwan barava gudfala nius. Datfala Kingdom bae duim samting wea Jehovah plan for duim long earth, olsem hem duim finis long heven.

3, 4. Taem Kingdom bilong God rulim earth, wanem nao bae kasem olketa man?

³ Taem Kingdom bilong God rulim earth, wanem nao bae kasem olketa man? Jehovah bae “aotem evri wata from eye bilong olketa, and bae no eniwan hem dae moa, and bae no eniwan hem sorre or krae or feel pain moa.” (Rev. 21:4) From no eniwan bae born sin, olketa bae no sik or dae. Bible talem olketa wea dae finis bae kasem chance for laef olowe. Hem sei: “Olketa man wea gud and olketa man wea nogud, olketa bae laef bak moa.” (Acts 24:15) Bae no eni kantri faet moa, bae no eniwan sik or hangre, bat earth bae kamap wanfala paradaes. Olketa wild animal distaem bae no killim dae olketa man and narafala animal.​—Ps. 46:9; 72:16; Isa. 11:​6-9; 33:24; Luke 23:43.

⁴ Pipol bae kasem olketa nambawan samting taem Kingdom rulim olketa. Bible talem finis kaen living wea pipol bae garem long datfala taem. Hem sei: “Olketa wea hambol bae tekem earth, and olketa bae hapi fogud bikos olketa stap gud.” Bat waswe long olketa nogud pipol? Bible talem finis: “Klosap nao man wea duim rabis samting bae finis.” Bat “olketa wea trustim Jehovah bae tekem earth.”​—Ps. 37:​9-​11.

5. Olketa nogud samting wea gohed long world distaem bae waswe?

⁵ Bat bifor God duim olketa gudfala samting hia, hem mas aotem firstaem evri nogud samting long disfala world witim olketa gavman, religion, and bisnis wea againstim gavman bilong Hem. Bae hem iusim gavman bilong hem long heven for duim datwan. Profet Daniel talem finis: “Long taem bilong olketa king hia [wea stap distaem] God bilong heven bae startim wanfala kingdom [long heven] wea bae nating savve finis. And bae no eni pipol moa tekova long datfala kingdom. Hem bae smasem and finisim evri kingdom hia [wea stap distaem], and hem nomoa bae stap olowe.” (Dan. 2:​44) Long datfala taem nao Kingdom bilong God, wea hem nao gavman long heven, bae rulim pipol wea stap long earth. Bae “wanfala niu skae and wanfala niu earth [kamap] . . . , wea evriwan wea stap long hem bae obeyim God.”​—2 Pet. 3:​13.

Why Nao God Mas Sevem Iumi Distaem?

6. Wanem nao Bible talem abaotem wei bilong pipol long disfala nogud world?

⁶ Taem Satan, Adam, and Eve no laek followim God and olketa laek disaed seleva wanem nao hem gud and wanem nao hem nogud, datwan spoelem laef bilong olketa man nao. Bihaen 1,600 year, “wei bilong pipol long earth hem barava nogud tumas and tingting bilong olketa hem nogud olowe.” (Gen. 6:5) No longtaem bihaen, God mekem Flood kasem full world. Bihaen 1,300 year, Solomon storyim nogud wei bilong pipol long taem bilong hem olsem: “Olketa wea dae finis lucky nao winim olketa wea laef yet. Bat olketa wea no born yet olketa lucky winim olketa wea dae finis and olketa wea laef yet, bikos olketa no lukim nogud samting wea pipol duim.” (Eccl. 4:​2, 3) Bihaen 3,000 year, wea hem nao taem bilong iumi, wei bilong pipol barava nogud go moa.

7. Why nao iumi barava needim Kingdom bilong God for sevem iumi distaem?

⁷ Nomata pipol duim nogud samting for longfala taem finis, distaem nao iumi barava needim Kingdom bilong God for sevem iumi. Long 100 year wea go pas finis, olketa samting hem barava nogud tumas, and distaem olketa nogud go moa. Report from wanfala organization wea studyim olketa samting wea gohed long world, hem sei: “Long [mek-20] century nomoa, namba bilong pipol wea dae long olketa war hem thri taems winim namba bilong olketa wea dae long evri war wea kamap long 1,900 year bifor datwan.” Start kam long 1914, winim 100 million pipol dae long olketa war! Wanfala buk talem samting olsem 60 million pipol dae long World War II. Samfala kantri distaem garem olketa samting for killim dae staka pipol wantaem nomoa. Nomata man garem bigfala savve saed long science and wakem staka difren kaen medicine distaem, samting olsem faev million pikinini dae from olketa sik or from olketa hangre.​—Lukim chapter 9 long disfala buk Wanem Nao Really Samting wea Bible Teachim?

8. Nomata gavman bilong man stap finis for staka thousand year, wanem nao iu luksavve long hem?

⁸ Nomata man duim enikaen samting for mekem world hem gud, no eni gud samting nomoa olketa duim. Olketa gavman, bisnis, and religion long world nating mekem man stap gud, hapi, and no sik. Olketa no stretem olketa big problem wea kasem olketa man distaem, bat olketa mekem olketa problem hia big go moa. Nomata gavman bilong man stap finis for staka thousand year, samting wea olketa duim barava fitim disfala toktok: “Man no fit for leadim laef bilong hem. No fitim man for leadim gogo bilong hemseleva.” (Jer. 10:23) Tru tumas, “taem man rulim narawan, hem spoelem hem” nomoa. (Eccl. 8:9) And tu, “kam kasem distaem, evri samting wea God wakem olketa singaot bigfala from olketa feel nogud tumas.”​—Rom. 8:​22.

9. Olketa Christian savve finis “olketa last day” bae waswe?

⁹ Bible tok olsem abaotem taem bilong iumi: “Long olketa last day, olketa nogud samting bae kamap wea mekem laef no isi.” Bihaen hem storyim wei bilong olketa man long olketa last day hia, hem talem moa: “Olketa rabis pipol and olketa wea giamanim pipol, baebae wei bilong olketa nogud go moa.” (Readim 2 Timothy 3:​1-5, 13.) Olketa Christian savve finis long diswan bikos “full world hem stap andanit long paoa bilong rabis man,” wea hem nao Satan. (1 John 5:​19) Nomata olsem, iumi savve klosap nao God bae sevem pipol wea lovem hem from disfala world wea nogud tumas.

God Nomoa Fit for Sevem Iumi Olketa Man

10. Why nao Jehovah nomoa fit for sevem iumi olketa man?

¹⁰ Taem iu story long pipol, minim long olketa hao Jehovah nomoa fit for sevem iumi olketa man. Hem nomoa garem paoa and hem laek for sevem pipol bilong hem from evri nogud samting. (Acts 4:​24, 31; Rev. 4:​11) Iumi trustim Jehovah bae sevem pipol bilong hem evritaem and duim samting wea hem talem finis. Hem promisim diswan: “Olsem mi planim finis, hem mas olsem nao.” God “bae duim wanem [hem] laekem.”​—Readim Isaiah 14:24, 25; 55:10, 11.

11, 12. Wanem nao God promis for duim for pipol bilong hem?

¹¹ Jehovah talem hao taem hem finisim olketa rabis pipol bae hem sevem pipol bilong hem. Taem God talem profet Jeremiah for tok strong long olketa man wea duim olketa rabis samting, hem talem Jeremiah: “Iu no fraet.” Why nao Jeremiah mas no fraet? Jehovah hem sei: “Mi stap witim iu for sevem iu.” (Jer. 1:8) Semsem tu, taem Jehovah redi for finisim olketa rabis pipol long Sodom and Gomorrah, hem sendem tufala angel for leadim Lot and famili bilong hem for go aot from datfala ples. “Then Jehovah mekem sulphur and fire kam daon . . . long Sodom and Gomorrah.”​—Gen. 19:15, 24, 25.

¹² Jehovah savve sevem pipol bilong hem nomata olketa stap long eni ples long disfala world. Taem hem mekem Flood finisim nogud pipol, hem “sevem Noah, wea hem wanfala man wea preach abaotem olketa stretfala samting, witim sevenfala pipol moa.” (2 Pet. 2:5) Jehovah bae sevem gudfala pipol tu taem hem finisim nogud pipol wea stap distaem. Dastawe Bible talem iumi olsem: “Iufala wea hambol, . . . iufala mas lukaotem Jehovah. Lukaotem stretfala wei, lukaotem hambol wei. Sapos olsem, taem day bilong kros bilong Jehovah hem kam, maet iufala stap sef.” (Zeph. 2:3) Taem God finisim evri nogud samting long world, ‘olketa gudfala pipol bae stap long earth, bat olketa rabis pipol bae finis.’​—Prov. 2:​21, 22.

13. Wanem nao Jehovah bae duim for sevem pipol bilong hem wea dae finis?

¹³ Bat staka wea worshipim God olketa dae finis from olketa sik, pipol spoelem olketa, and olketa nara samting kasem olketa. (Matt. 24:9) Sapos olsem, hao nao bae God sevem olketa? Olsem iumi storyim finis, “olketa man wea gud . . . olketa bae laef bak moa.” (Acts 24:15) Iumi hapi tumas from no eni samting savve stopem Jehovah for sevem pipol bilong hem!

Wanfala Stretfala Gavman

14. Why nao iumi savve Kingdom bilong God hem wanfala stretfala gavman?

¹⁴ Taem iu story long pipol, iu savve minim long olketa hao Kingdom bilong Jehovah long heven hem wanfala stretfala gavman. Datfala gavman bae duim samting followim olketa nambawan wei bilong God, olsem stretfala wei bilong hem and love. (Deut. 32:4; 1 John 4:​8) God markem Jesus Christ nao for rul long datfala gavman, from hem barava fit for rulim pipol long earth. Jehovah chusim tu 144,000 anointed Christian long earth for rul witim Christ long heven.​—Rev. 14:​1-5.

15. Long wanem wei nao gavman bilong God hem difren tumas from olketa gavman bilong man?

¹⁵ Taem Jesus witim 144,000 rulim iumi long earth, gavman bilong olketa bae difren tumas from olketa gavman bilong man distaem! Plande taem olketa gavman long world raf tumas long pipol and olketa faetem nara kantri, and staka million pipol nao dae. Dastawe Bible talem iumi for no trustim olketa man, ‘from olketa no savve sevem iumi’! (Ps. 146:3) Bat taem Christ hem rulim iumi, bae hem showimaot love long iumi! Jesus nao sei: “Kam long mi, iufala wea waka hard and wea karem hevi samting, mekem mi savve strongim iufala. Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala. Bae hem no hard for iufala waka witim mi, and iufala savve karem samting wea mi askem iufala for karem.”​—Matt. 11:28-​30.

Klosap Nao Olketa Last Day Bae Finis!

16. Wanem nao bae happen taem olketa last day finis?

¹⁶ Klosap nao “world distaem bae finis.” Start kam long 1914, iumi stap insaed long olketa last day. (Matt. 24:3) Jesus talem finis wanfala “big trabol” bae kamap, and hem barava klosap tumas nao. (Readim Matthew 24:21.) Datfala big trabol bae finisim full world bilong Satan. Bat taem datfala big trabol hem kam, wanem nao first samting wea bae happen? And wanem nao bae endim datwan?

17. Bifor datfala big trabol hem kam, wanem nao bae happen firstaem?

¹⁷ Seknomoa datfala big trabol bae kam. Tru tumas, “day bilong Jehovah” bae kam long taem wea pipol no tingim. Hem bae kam “long taem wea olketa sei: ‘Evri samting hem barava kwaet and stap gud nomoa!’ ” (Readim 1 Thessalonians 5:​2, 3.) Taem olketa kantri tingse olketa klosap stretem olketa bigfala problem, seknomoa “Bigfala Babylon,” wea hem nao evri giaman religion, bae finis. Datwan nao bae startim datfala big trabol. Pipol long world bae barava seke long datwan. Olketa king and olketa nara man bae sapraes tumas taem Bigfala Babylon hem finis.​—Rev. 17:​1-6, 18; 18:​9, 10, 15, 16, 19.

18. Taem Satan kam faetem pipol bilong Jehovah, wanem nao Jehovah bae duim?

¹⁸ Long datfala taem, bae iumi lukim “olketa saen kamap long sun and moon and olketa star,” and “saen bilong Son bilong man bae showaot long skae.” Then iumi bae ‘standap stret and liftimap hed bilong iumi from iumi savve klosap nao God bae sevem iumi.’ (Luke 21:25-​28; Matt. 24:29, 30) Satan, wea hem nao Gog, bae kam faetem pipol bilong God. Bat Jehovah tok olsem abaotem olketa wea faetem pipol bilong hem: “Man wea tasim iufala hem tasim eye bilong mi.” (Zech. 2:8) So nomata Satan trae for finisim pipol bilong God, bae hem nating win nomoa. Why nao olsem? Hem bikos Nambawan Lord, Jehovah, bae kwiktaem sevem pipol bilong hem.​—Ezek. 38:​9, 18.

19. Why nao iumi savve Christ Jesus witim olketa angel bae finisim world bilong Satan?

¹⁹ Taem God kam faetem olketa nation, ‘bae olketa mas savve hem nao Jehovah.’ (Ezek. 36:23) Hem bae sendem Christ Jesus witim staka angel for finisim evri nara samting long world bilong Satan. (Rev. 19:11-​19) No forgetim long bifor, wanfala angel nomoa “killim dae wan handred and eiti-faev thousand” enemy bilong God long wanfala naet nomoa. So iumi trustim Christ Jesus witim olketa angel bae finisim evri lalas samting bilong Satan long disfala world long Armageddon. Datwan nao bae endim datfala big trabol. (2 Ki. 19:35; Rev. 16:14, 16) Satan and olketa demon bae no savve spoelem olketa man for wan thousand year. Gogo, olketa tu bae finis evribit.​—Rev. 20:​1-3.

20. Wanem nao Kingdom bilong Jehovah bae duim?

²⁰ No eni rabis samting bae stap long earth and olketa gudfala pipol nomoa bae stap olowe long hem. Evriwan bae luksavve Jehovah nao Nambawan Man for sevem iumi. (Ps. 145:20) Datfala Kingdom bae showimaot God nomoa fit for rulim man, mekhae long holy nem bilong hem, and duim samting wea hem planim finis for disfala earth. Bae iu hapi tumas taem iu talem disfala gud nius long pipol and helpem olketa wea “garem gudfala heart” for luksavve klosap nao Kingdom bilong God bae sevem iumi olketa man!​—Acts 13:48.

Waswe, Iu Remember?

• Why nao iumi barava needim Kingdom bilong God for sevem iumi distaem?

• Wanem nao olketa samting wea bae kamap long datfala big trabol?

• Hao nao evriwan bae luksavve Jehovah nao Nambawan Man for sevem iumi?

[Piksa long page 12, 13]

Bible talem finis long taem bilong iumi, bigfala preaching waka bae kasem full world

[Piksa long page 15]

Olsem Jehovah sevem Noah and famili bilong hem, Hem savve sevem iumi tu

[Piksa long page 16]

Jehovah ‘bae aotem evri wata from eye bilong iumi, and bae no eniwan hem dae moa.’​—Rev. 21:4