Waka wea Governing Body Duim
GOVERNING Body bilong Olketa Jehovah’s Witness hem samfala anointed Christian man wea dedicate finis. Olketa nao stand for datfala faithful and wise slave wea garem waka for redyim spiritual kaikai and leadim waka for preachim Kingdom long full earth.—Matt. 24:14, 45-47.
Governing Body savve holem meeting bilong olketa evri week, klosap evritaem long Wednesday. Disfala meeting helpem olketa brata hia for garem wan mind taem olketa waka tugeta. (Ps. 133:1) Olketa insaed Governing Body waka tu long olketa difren komiti. Olketa komiti hia lukaftarem difren waka wea join witim waka for preachim Kingdom. Olketa komiti hia hem stap long daon.
◼ COORDINATORS’ KOMITI: Disfala komiti garem olketa wea coordinator bilong olketa narafala komiti, and wanfala secretary wea hem member bilong Governing Body tu. Disfala komiti hem mek sure evri nara komiti gohed waka gud. Hem helpem tu olketa brata bilong iumi long world wea kasem persecution, disaster, and nara big samting wea spoelem olketa.
◼ PERSONNEL KOMITI: Olketa brata long disfala komiti lukaftarem olketa wea waka long evri Bethel raonem world, for helpem olketa long spiritual saed and long olketa narafala wei. Disfala komiti nao chusim olketa wea waka long Bethel and ansarem eni kwestin wea olketa garem abaotem Bethel.
◼ PUBLISHING KOMITI: Disfala komiti hem lukaftarem waka for printim, pablisim, and sendem olketa Bible buk evriwea long world. Hem lukaftarem olketa printing factory and property wea Olketa Jehovah’s Witness garem raonem world. Disfala komiti hem disaedem hao nao for iusim donation wea pipol givim for helpem disfala Kingdom waka long full world.
◼ SERVICE KOMITI: Olketa long disfala komiti lukaftarem preaching waka and olketa kongregeson, pioneer, elder, and traveling overseer. Olketa lukaftarem waka for redyim Kingdom Ministry Bilong Iumi and olketa chusim olketa student wea bae go long Gilead Skul and Ministerial Training Skul, and talem ples wea olketa bae go long hem.
◼ TEACHING KOMITI: Disfala komiti hem redyim olketa tok for olketa assembly, convention, and meeting long kongregeson. Hem nao redyim olketa spiritual program for olketa long Bethel and olketa skul olsem Gilead Skul and Pioneer Service Skul, and tu, hem lukaftarem waka for redyim olketa kaset and video.
◼ RAETING KOMITI: Disfala komiti lukaftarem waka for raetem olketa buk and givimaot diswan long olketa brata and sista bilong iumi and long nara pipol. Disfala komiti hem ansarem olketa Bible kwestin wea pipol askem and chekim olketa drama and tok. Hem tu lukaftarem transleison waka wea gohed raonem full earth.
Aposol Paul hem sei kongregeson bilong olketa anointed Christian hem olsem body bilong man. Evri part long body nao important, needim narawan, and mas waka tugeta. (Rom. 12:4, 5; 1 Cor. 12:12-31) Jesus Christ, wea hem Hed, hem givim samting wea evri part long body needim for waka gud tugeta, and hem givim spiritual kaikai tu long olketa. (Eph. 4:15, 16; Col. 2:19) Datwan hem mekem Governing Body duim waka bilong olketa followim wanem Jehovah talem thru long holy spirit bilong hem.