Followim Tingting Bilong Jehovah
“Sapos iumi lovem God, bae iumi obeyim olketa law bilong hem. And olketa law bilong hem olketa no hard tumas for iumi obeyim.”—1 JOHN 5:3.
1, 2. (a) Why nao staka pipol distaem les for nara man talem olketa wanem nao olketa mas duim? (b) Waswe, pipol hia barava no followim tingting bilong nara man? Minim kam.
STAKA pipol distaem les for nara man talem olketa wanem nao olketa mas duim. Samfala pipol olsem garem disfala tingting, “Mi no laekem eniwan for talem mi wanem nao mi mas duim.” Bat waswe, pipol hia barava no followim tingting bilong nara man? Nomoa! Staka pipol followim nomoa wei bilong plande pipol long “disfala world.” (Rom. 12:2) Olsem aposol Peter talem, pipol hia olsem olketa “slave nomoa long olketa samting wea spoelem olketa.” (2 Pet. 2:19) Olketa “wakabaot followim wei bilong disfala world, and [olketa] followim ruler wea garem paoa ovarem air,” wea hem nao Satan.—Eph. 2:2.
2 Wanfala man wea raetem olketa buk hem tokplas olsem: “Mi les for dadi or mami, or priest, or bigman bilong religion, . . . or Bible tu for talem mi wanem nao stret samting for mi mas duim.” Hem tru, maet samfala long olketa hia duim samting wea no stret dastawe hem no fitim for iumi obeyim olketa. Bat waswe, taem man no laek followim tingting bilong eniwan, bae hem kasem gud samting? Iuseleva savve long ansa bilong datwan taem iu herem story abaotem kaen pipol olsem. Nomata pipol distaem barava needim samwan for leadim olketa, staka laek followim tingting bilong olketa seleva nomoa.
Tingting Bilong Iumi Long Olketa Bigman
3. Waswe, olketa Christian long first century followim nomoa samting wea olketa bigman talem? Why nao olsem?
3 From iumi olketa Christian, tingting bilong iumi long olketa bigman hem difren from tingting bilong pipol long world. Datwan no minim iumi followim nomoa evri samting wea pipol talem for iumi duim. Samfala taem iumi mas no followim samting wea pipol talem nomata olketa hia bigman. Olketa Christian long first century tu olsem. Taem hae priest and samfala man long Hae Kot bilong olketa Jew talem olketa aposol for no preach, olketa aposol no herem toktok bilong olketa. Olketa laek duim stret samting dastawe olketa no obeyim olketa bigman hia.—Readim Acts 5:27-29.
4. Hu nao samfala pipol bilong God wea duim stret samting nomata pipol no hapi long olketa?
4 Staka pipol bilong God long bifor olketa olsem tu. Moses “les for pipol sei hem pikinini bilong dota bilong Pharaoh, bat hem laek for safa witim pipol bilong God” nomata datwan mekem “king kros long hem.” (Heb. 11:24, 25, 27) Taem waef bilong Potiphar laek durong witim Joseph, Joseph ranawe nomata datfala woman fit for mek-trabol long hem. (Gen. 39:7-9) Daniel “disaed finis for no kaikaim olketa spesol kaikai bilong king mekem hem no kamap dirty.” Hem disaed olsem nomata datfala bigman bilong king no laek herem tingting bilong hem. (Dan. 1:8-14) Samting wea olketa man hia duim hem showimaot pipol bilong God laek duim stret samting nomata sapos nogud samting kasem olketa. Olketa no laek obeyim olketa man hia for mekem olketa hapi nomoa. Iumi tu mas olsem pipol bilong God long bifor.
5. Why nao samfala taem iumi no obeyim olketa bigman?
5 Taem iumi no followim toktok bilong samfala man, datwan no minim iumi laek bighed or iumi olsem pipol wea laek againstim gavman. Bat iumi disaed finis for followim tingting bilong Jehovah winim tingting bilong man. Taem law bilong gavman hem talem iumi for duim samting wea law bilong God hem stopem, iumi savve finis wanem nao bae iumi duim. Bae iumi no obeyim olketa man bat bae iumi obeyim God olsem olketa aposol long first century duim.
6. Why nao hem gud for iumi obeyim olketa samting wea Jehovah talem?
6 Wanem nao helpem iumi for followim tingting bilong God? Iumi duim samting wea Proverbs 3:5, 6 hem talem: “Barava trustim Jehovah and no depend long savve bilong iuseleva. Tingim hem long evri samting wea iu duim, and hem nao bae showim iu stretfala road for followim.” Iumi savve bae iumi kasem gud samting evritaem taem iumi duim wanem God laekem iumi for duim. (Readim Deuteronomy 10:12, 13.) Jehovah storyim hemseleva long olketa Israelite taem hem sei: “Mi nao Man wea teachim iufala for kasem gud samting, and Man wea leadim iufala long road wea iufala mas wakabaot long hem.” Hem talem moa: “Bae hem gud sapos iufala barava obeyim olketa law bilong mi! Sapos olsem, peace bilong iufala bae kamap olsem wanfala river, and gudfala wei bilong iufala olsem olketa wave long sea.” (Isa. 48:17, 18) Iumi tu bilivim datfala toktok. Iumi savve taem iumi obeyim olketa samting wea God talem, bae iumi kasem gud samting evritaem.
7. Sapos iumi no minim gud wanfala samting wea Bible talem, wanem nao iumi mas duim?
7 Nomata sapos iumi no minim gud wanfala samting wea Bible talem, iumi obeyim Jehovah. Datwan no minim iumi obey nating nomoa, bat iumi trustim Jehovah from hem nao savve wanem nao bae helpem iumi. Taem iumi obeyim hem, datwan showimaot iumi lovem hem tu. Aposol John sei olsem: “Sapos iumi lovem God, bae iumi obeyim olketa law bilong hem.” (1 John 5:3) Bat iumi mas obeyim Jehovah long nara samting tu.
Lane for Luksavve Long Wanem Hem Stret and Wanem Hem No Stret
8. Taem iumi “lane for luksavve long wanem hem stret and wanem hem no stret,” datwan showimaot wanem samting?
8 Bible sei iumi mas “lane for luksavve long wanem hem stret and wanem hem no stret.” (Heb. 5:14) Iumi mas lane for luksavve long tingting bilong Jehovah “long wanem hem stret and wanem hem no stret,” and no obeyim nating nomoa olketa law bilong hem. Hem gud for iumi luksavve olketa gud samting wea iumi bae kasem sapos iumi followim olketa wei bilong Jehovah. Sapos olsem, bae iumi talem sem samting olsem man wea raetem disfala psalm: “Law bilong iu hem stap barava insaed long mi.”—Ps. 40:8.
9. Wanem nao bae helpem iumi for followim tingting bilong Jehovah? Why nao iumi mas duim datwan?
9 Iumi mas ting raonem wanem iumi readim long Bible mekem iumi savve tinghae long olketa law bilong God. Taem iumi savve long wanfala samting wea Jehovah laekem for iumi mas duim, tingim diswan firstaem: ‘Why nao disfala law or disfala toktok wea showimaot tingting bilong Jehovah, hem stret? Why nao hem gud for mi obeyim datfala toktok? Wanem nogud samting nao kasem pipol wea no obeyim datfala toktok bilong God?’ Taem tingting bilong iumi hem followim tingting bilong Jehovah, bae iumi disaedem olketa samting followim wanem hem laekem. Bae iumi “luksavve wanem nao Jehovah laekem for [iumi] duim” and bae iumi obeyim hem. (Eph. 5:17) Bat hem no isi for duim datwan.
Satan Laek Tumas for Pipol No Followim Tingting Bilong God
10. Wanem nao wanfala samting wea Satan no laekem iumi for followim tingting bilong God long hem?
10 For longfala taem nao Satan laek tumas for pipol no followim tingting bilong God. Pipol distaem followim tingting bilong hem long staka samting. Wanfala nao, pipol no tinghae long marit wea God nao startim. Samfala pipol stap tugeta bat no marit, and samfala laek lusim hasband or waef bilong olketa tu. Maet olketa hia garem tingting olsem wanfala woman wea insaed long staka movie. Disfala woman hem sei: “Hem hard tumas for man and woman faithful long tufala.” Hem sei moa: “Mi no savve long eniwan wea hem faithful long hasband or waef bilong hem or wea laek olsem.” Narafala man wea frenim staka woman and wea insaed staka movie tu, hem tok olsem: “Mi tingse hem no wei bilong man and woman for stap olowe tugeta nomoa.” Hem gud for iumi tingim diswan: ‘Waswe, mi followim tingting bilong Jehovah long marit, or waswe, mi followim tingting bilong world?’
11, 12. (a) Why nao hem no isi for olketa young wan followim tingting bilong Jehovah? (b) Storyim samting wea kasem wanfala sista from hem no obeyim Jehovah.
11 Waswe, iu wanfala young wan wea worshipim Jehovah? Sapos olsem, Satan barava laekem iu for tingse bae iu no kasem eni gud samting taem iu followim tingting bilong Jehovah. Samting “wea young pipol laekem” and samting wea olketa nara young wan laek switim iu for duim savve mekem iu tingse hem hard tumas for followim olketa law bilong God. (2 Tim. 2:22) Iu mas no letem tingting olsem for spoelem iu. Bat iu mas tingim why nao hem stret for followim olketa law bilong God. Wanfala law long Bible nao hem for iumi “ranawe from wei for durong.” (1 Cor. 6:18) Olsem iumi storyim finis, tingim diswan firstaem: ‘Why nao disfala law hem stret? Why nao hem gud for mi obeyim datfala law?’ Maet iu savve long samfala pipol wea no followim toktok bilong God gogo nogud samting kasem olketa. Waswe, olketa barava hapi? Waswe, laef bilong olketa distaem hem gud winim taem olketa worshipim Jehovah? Waswe, olketa barava hapi winim pipol bilong God?—Readim Isaiah 65:14.
12 Tingim samting wea Sharon, wanfala sista, hem talem: “From mi no obeyim law bilong Jehovah, mi kasem datfala nogud sik AIDS. Staka taem mi ting go bak long olketa year wea mi worshipim Jehovah and mi hapi tumas.” Sharon luksavve krangge samting nao hem duim taem hem no tinghae long olketa law bilong Jehovah and no obeyim olketa tu. Jehovah givim kam olketa law for protectim iumi. Sevenfala week bihaen Sharon talem datfala toktok antap, hem dae nao. Nogud samting wea kasem hem showimaot no eni gud samting nomoa Satan bae givim long olketa wea followim disfala world. From Satan hem “dadi bilong evri laea toktok,” hem talem bae hem duim staka samting bat hem nating duim nomoa, olsem hem laea long Eve tu. (John 8:44) Dastawe hem gud for followim tingting bilong Jehovah long evri samting.
No Followim Tingting Bilong Iuseleva
13. Iumi mas no garem wanem kaen tingting?
13 Sapos iumi laek followim tingting bilong Jehovah, iumi mas no followim tingting bilong iumiseleva. Sapos iumi praod maet iumi no laekem eniwan for talem iumi wanem for duim. Maet iumi no laek followim toktok bilong olketa wea God markem for leadim pipol bilong hem. God markem faithful and wise slave for givim spiritual kaikai long iumi long barava taem. (Matt. 24:45-47) Iumi mas hambol and luksavve Jehovah hem iusim disfala sekson for lukaftarem pipol bilong hem distaem. Iumi mas olsem olketa faithful aposol long bifor. Taem samfala disaepol no laek followim Jesus moa, Jesus askem olketa aposol: “Waswe iufala, iufala laek go tu?” Peter sei long Jesus: “Lord, hu moa bae mifala followim? Iu nomoa storyim olketa samting wea bae mekem man laef olowe.”—John 6:66-68.
14, 15. Why nao iumi mas hambol and followim wanem Bible hem talem?
14 Sapos iumi laek followim tingting bilong Jehovah, iumi mas followim nao wanem Bible hem talem. Faithful and wise slave talem iumi for “wekap and garem gudfala tingting” evritaem. (1 Thess. 5:6) Datfala toktok barava fitim taem bilong iumi from iumi stap long olketa last day wea staka pipol “lovem olketa seleva, [and] laek kasem staka selen.” (2 Tim. 3:1, 2) Waswe, kaen tingting olsem savve spoelem iumi tu? Ia. Sapos iumi waka hard for kasem olketa samting long world, datwan savve mekem iumi no strong for followim God or hem savve mekem iumi tingim nomoa olketa material samting. (Luke 12:16-21) Dastawe iumi mas followim nao wanem Bible hem talem and no duim nomoa wanem iumiseleva laekem, olsem staka pipol long world bilong Satan duim!—1 John 2:16.
15 Faithful and wise slave redyim olketa spiritual kaikai, then olketa elder long kongregeson nao givim kam long iumi. Bible talem iumi olsem: “Obeyim olketa wea leadim iufala and followim olketa, from olketa mas ansa long hao olketa lukaftarem iufala; mekem olketa hapi for duim diswan and no sorre, from datwan bae spoelem iufala.” (Heb. 13:17) Waswe, diswan minim olketa elder long kongregeson no savve mistek? Nomoa! God savve lukim klia mistek bilong olketa winim iumi olketa man. Nomata olsem, hem laekem iumi for followim olketa. Nomata olketa elder no perfect, taem iumi waka tugeta witim olketa datwan showimaot iumi followim tingting bilong Jehovah.
Iumi Mas Hambol
16. Wanem nao iumi savve duim for showimaot iumi luksavve Jesus nao Hed bilong kongregeson?
16 Iumi mas tingim evritaem Jesus nao Hed bilong kongregeson. (Col. 1:18) Dastawe iumi mas hambol and followim samting wea olketa elder talem, and “barava tinghae long olketa from waka wea olketa duim.” (1 Thess. 5:12, 13) Olketa elder long kongregeson savve showimaot olketa followim tingting bilong God tu taem olketa no talemaot tingting bilong olketa seleva long kongregeson. Olketa “no duim difren samting from wanem olketa raetem finis” for mekhae long tingting bilong olketa seleva, bat olketa storyim nomoa toktok bilong God.—1 Cor. 4:6.
17. Why nao hem nogud for man apim hemseleva?
17 Evriwan long kongregeson mas luksavve long nogud samting wea kasem man taem hem apim hemseleva. (Prov. 25:27) Aposol John meetim wanfala disaepol wea garem kaen wei olsem. Hem sei: “Diotrephes hem laek apim hemseleva olowe and hem nating respectim eni samting wea mifala talem. So sapos mi kam, bae mi talemaot olketa samting wea hem duim olsem olketa rabis toktok wea hem talem againstim mifala.” (3 John 9, 10) Iumi distaem tu savve lane from diswan. Sapos iumi laek apim iumiseleva, iumi mas kwiktaem aotem kaen tingting olsem. Bible tok olsem: “Man wea praod bae foldaon, and man wea praod tumas bae stambol.” Olketa wea followim tingting bilong God mas no praod, bikos diswan bae mekem olketa kasem shame.—Prov. 11:2; 16:18.
18. Wanem nao bae helpem iumi for followim tingting bilong Jehovah?
18 Tru tumas, iumi mas no followim tingting bilong world bat iumi mas followim tingting bilong Jehovah. From hem nambawan samting for worshipim Jehovah, hem gud for iu ting raonem datwan evritaem. God nao iusim holy spirit bilong hem for leadim iu kam long hem dastawe iu worshipim hem. (John 6:44) No ting nating long datwan. Nomata wanem samting iu duim, waka hard for followim tingting bilong Jehovah and no tingting bilong iuseleva.
Waswe, Iu Remember?
• Wanem nao showimaot iumi followim tingting bilong Jehovah?
• Taem iumi lane for luksavve long wanem hem stret and wanem hem no stret, datwan showimaot wanem samting?
• Wanem nao samfala samting wea Satan no laekem iumi for followim tingting bilong God long hem?
• Why nao iumi mas hambol and followim tingting bilong Jehovah?
[Piksa long page 18]
“Mifala mas obeyim God olsem ruler winim olketa man”
[Piksa long page 20]
Bae iumi kasem gud samting taem iumi followim olketa law bilong God