“Willing Tumas” for Lanem Stretfala Savve
PIPOL bilong Jehovah laek tumas for duim samting wea hem hapi long hem. Dastawe iumi barava laek for strongim go moa faith bilong iumi and worshipim Jehovah witim full strong bilong iumi. Bat aposol Paul hem storyim wanfala samting wea maet kasem iumi olsem hem kasem olketa Jew bifor. Hem sei: “Olketa laek tumas for worshipim God, bat olketa no garem stretfala savve abaotem God.” (Rom. 10:2) So diswan showimaot hao taem iumi worshipim Jehovah, iumi mas garem stretfala savve abaotem hem and wanem hem laekem iumi for duim.
Long nara buk wea Paul raetem, hem storyim fasin wea God hapi long hem and wei wea man laek kasem savve. Hem prea long God for olketa wea followim Christ “for garem stretfala savve” abaotem wanem God hem laekem. Diswan bae mekem olketa “duim evri samting wea Jehovah hapi long hem,” and long semtaem “duim olketa gudfala waka and gohed for lanem stretfala savve abaotem God.” (Col. 1:9, 10) Why nao iumi mas garem “stretfala savve”? And why nao iumi mas gohed for lanem stretfala savve?
Wanem Nao Bae Mekem Man Garem Faith?
Taem iumi lanem stretfala savve abaotem God long Bible and wanem Jehovah laekem iumi for duim, datwan bae mekem iumi garem faith. Sapos iumi no garem stretfala savve, faith bilong iumi bae olsem wanfala ladder wea rotten and wea kwiktaem brek taem man standap long hem. Dastawe Paul hem talem iumi for iusim “gudfala tingting” mekem iumi savve worshipim God long stretfala wei. (Rom. 12:1, 2) Sapos iumi studyim Bible evritaem, datwan bae helpem iumi for duim olsem.
Ewa, wanfala regular pioneer long Poland hem sei: “Sapos mi no studyim Bible evritaem, bae mi no gohed for lanem stretfala savve abaotem Jehovah. Gudfala wei bilong mi tu bae kwiktaem nogud, and faith bilong mi bae no strong and diswan savve mekem mi no fren gud witim God nao.” Iumi mas keakea nogud datwan kasem iumi! Distaem bae iumi storyim wanfala man wea gohed lanem stretfala savve abaotem Jehovah and hao datwan mekem Jehovah hapi long hem.
“Mi Barava Lovem Law Bilong Iu!”
Psalm 119 long Bible hem storyim tingting bilong disfala man wea raetem psalm abaotem olketa law, kaonsel, komand, and judgment bilong Jehovah. Hem talem olsem: “Mi hapi tumas long olketa law bilong iu. . . . Mi hapi tumas long kaonsel bilong iu.” Hem talem tu: “Mi barava lovem law bilong iu! Hem nao samting wea mi ting raonem long full day.”—Ps. 119:16, 24, 47, 48, 77, 97.
Tufala toktok hia “barava lovem” and “ting raonem” hem showimaot man hia ting raonem Bible. Man hia laek tumas for studyim law bilong God. Hem laek tumas for minim gud toktok bilong Jehovah. Iumi luksavve man hia barava laek for savve gud long God and wanem God hem laekem.
Man wea raetem psalm hem barava lovem Bible. Hem gud for iumi tingim olketa kwestin hia: ‘Waswe, mi barava lovem Bible tu? Waswe, mi hapi for readim Bible evriday and ting raonem wanem mi readim? Waswe, mi prea firstaem bifor mi readim Bible?’ Sapos iumi duim olketa samting hia, datwan showimaot iumi “gohed for lanem stretfala savve abaotem God.”
Ewa hem sei: “Evritaem mi trae for duim samfala samting moa taem mi study seleva. Taem iumi kasem datfala brochure ‘See the Good Land,’ mi trae for iusim datwan evritaem taem mi study seleva. Mi lukluk long datfala buk Insight on the Scriptures and long olketa nara buk tu taem mi laek savve long samfala samting moa.”
Tingim tu wanfala hasband and waef, Wojciech and Małgorzata, wea garem big waka for lukaftarem famili. Wanem nao olketa duim mekem olketa savve studyim Bible? Olketa sei: “Mifala wanwan markem taem for study seleva. Then taem mifala duim famili study and long narataem wea mifala story tugeta, mifala savve storyim olketa samting wea mifala wanwan lanem.” Famili hia hapi tumas taem olketa duim study seleva. Diswan helpem olketa tu for “gohed for lanem stretfala savve.”
Willing for Study
Iumi savve God laekem “evri difren kaen man mas sev and kasem stretfala savve abaotem truth.” (1 Tim. 2:3, 4) Diswan showimaot iumi mas readim Bible and trae hard for “minim.” (Matt. 15:10) So iumi mas willing for study. Hem nao samting wea pipol long Beroea duim taem Paul talemaot gud nius long olketa. Bible hem sei: “Olketa willing tumas for herem datfala toktok and for lukluk gud long olketa Scripture sapos olketa samting wea olketa herem hem tru or nomoa.”—Acts 17:11.
Waswe, iu followim wei bilong pipol long Beroea? Waswe, taem iu studyim Bible, iu willing tumas for lane and no letem nara samting pullim tingting bilong iu? Nomata sapos bifor iumi man wea no savve laek study seleva, iumi savve trae for followim wei bilong olketa. Nomata samfala olo pipol long world no savve laek read and study, olketa olo Christian no laek olsem. Nomata iumi haomas year, no letem eni samting stopem iu for lane. Taem iu read, lukaotem samfala point wea iu savve talem long nara man. Iu savve talem hasband or waef bilong iu or wanfala brata or sista olketa samting wea iu readim or wea iu lanem taem iu study seleva. Sapos iu duim datwan, iu bae no forgetim olketa samting wea iu lanem and bae iu helpem nara man tu.
Taem iu study seleva, followim wanem Ezra hem duim. Hem “redyim heart bilong hem for studyim law bilong Jehovah.” (Ezra 7:10) Wanem nao iu savve duim for redyim heart bilong iu? First samting, hem gud for iu study long ples wea hem kwaet. Then sidaon and askem Jehovah for helpem iu and for givim savve long iu. (Jas. 1:5) Taem iu redi for study, tingim diswan, ‘Wanem nao bae mi lanem?’ Taem iu read, trae for tingim olketa main point. Iu savve raetem daon or andalaenem olketa samting wea iu laek for lukluk moa long hem. Tingim hao nao iu savve iusim olketa samting wea iu lanem taem iu preach, taem iu disaedem eni samting, and taem iu story witim olketa brata and sista. Bifor iu finis, lukluk moa long wanem iu studyim. Taem iu duim olsem, datwan bae mekem iu no forgetim wanem iu lanem.
Ewa story olsem abaotem wanem hem savve duim taem hem study: “Taem mi readim Bible, mi lukluk long olketa cross-reference, Watch Tower Publications Index, witim Watchtower Library long CD-ROM tu. Mi raetem daon olketa samting wea mi laek for iusim taem mi go preaching.”
Samfala duim study seleva for staka year finis, and olketa lanem plande samting abaotem God. (Prov. 2:1-5) Nomata olsem, olketa garem staka samting wea olketa mas duim and datwan mekem hem no isi tu for olketa markem taem for duim study seleva. Waswe, iu tu olsem? Wanem nao iu savve duim mekem iu garem taem for study seleva?
Wanem Nao Mi Savve Duim Mekem Mi Garem Taem for Study Seleva?
Hem isi tumas for markem taem for duim olketa samting wea iu laekem. Samting wea helpem staka brata and sista for duim study seleva hem taem olketa markem wanfala goal, olsem for readim full Bible. Maet taem iu readim samfala buk long Bible hem storyim samting wea no isi for iu minim, olsem laen bilong olketa famili, olketa didifren part long temple, or olketa profesi. So duim samfala samting wea bae helpem iu for kasem goal bilong iu. Maet bifor iu readim samfala chapter long Bible wea iu no mas minim gud, lukluk firstaem long disfala buk “All Scripture Is Inspired of God and Beneficial.” Disfala buk hem storyim samfala samting moa abaotem wanem hem happen long bifor.
Taem iu readim Bible, piksarem long mind bilong iu samting wea iu readim. Diswan savve mekem iu tingim olketa man wea iu read abaotem and samting wea kasem olketa. Taem iu duim study olsem, bae iu barava hapi. Bae iu laek tumas for markem taem for duim study seleva and bae gogo hem isi tu for iu readim Bible evriday.
Iumi savve olketa idea hia savve helpem iumi wanwan, bat waswe sapos famili bilong iu busy? Wanem nao iufala savve duim? Hem gud for famili story tugeta abaotem olketa gud samting wea olketa bae kasem taem olketa studyim Bible tugeta. Maet iufala savve tingim olketa gudfala idea olsem, for wekap early lelebet evriday or long samfala day for readim and storyim tugeta samfala chapter long Bible. Or maet iufala tingim hao iufala need for changem samfala samting long schedule bilong famili. Samfala famili savve storyim text or readim samfala chapter long Bible bihaen olketa kaikai. Bifor olketa wasim pleit or duim eni nara samting, famili savve story for 10 or 15 minute abaotem Bible or duim Bible reading for datfala week. Maet long firstaem hem no isi bat gogo famili bae hapi for duim datwan olowe.
Wojciech and Małgorzata storyim wanem nao helpem famili bilong olketa: “Bifor mifala savve weistim staka taem long olketa sismol samting nomoa, olsem for raetem olketa e-mail. So mifala trae for no iusim tumas taem for duim datwan. Mifala no iusim tumas taem tu for hapitaem bat mifala markem taem long wanfala day wea mifala duim study seleva.” Disfala famili barava hapi taem olketa duim olsem. Famili bilong iu tu savve hapi sapos iufala duim sem samting.
Man Bae Kasem Gud Samting Taem Hem Gohed for Lanem Stretfala Savve!
Taem iu duim study seleva long Bible, datwan savve mekem iu “duim olketa gudfala waka.” (Col. 1:10) Taem iu duim datwan, pipol bae lukim hao iu kamap wanfala strong Christian wea minim olketa truth long Bible. Bae iu tingting gud taem iu disaedem eni samting and bae iu fit for helpem olketa narawan wea no garem stretfala savve long Bible. Bat main samting nao, bae iu fren gud go moa witim Jehovah. Bae iu barava tinghae long olketa wei bilong hem, and pipol bae luksavve long diswan taem iu story abaotem hem long olketa.—1 Tim. 4:15; Jas. 4:8.
Nomata iu haomas year, gohed for hapi taem iu readim Bible and willing for study seleva. Jehovah bae no forgetim hard waka bilong iu. (Heb. 6:10) Hem bae givim staka gud samting long iu.
[Box long page 13]
TAEM IUMI ‘LANEM STRETFALA SAVVE’. . .
Datwan strongim faith bilong iumi long God and iumi duim samting wea Jehovah hapi long hem.—Col. 1:9, 10
Iumi bae minim gud samting wea iumi lanem. Datwan bae mekem iumi garem fasin for luksavve and tingting gud bifor iumi disaedem samting.—Ps. 119:99
Iumi bae hapi tumas for helpem pipol fren gud witim Jehovah.—Matt. 28:19, 20
[Piksa long page 14]
Hem gud for iumi faendem wanfala kwaet ples for duim study seleva
[Piksa long page 15]
Samfala famili savve readim samfala chapter long Bible bihaen olketa kaikai