Why Nao God No Ansarem Samfala Prea?

Iumi savve story long God enitaem. Jehovah God laekem iumi for prea long hem enitaem olsem gudfala dadi wea hapi taem olketa pikinini no fraet for story witim hem. Long semtaem tu, olsem wanfala dadi wea garem bigfala savve, hem stret tu for God no ansarem samfala prea. Waswe, hem hard for iumi savve why hem no ansarem evri prea or iumi savve faendem ansa long Bible?

Aposol John hem story olsem: ‘Taem iumi askem eni samting long God wea fitim wanem hem laekem, hem bae herem iumi.’ (1 John 5:​14) Olketa samting wea iumi askem mas fitim wanem God laekem. Samfala askem olketa samting wea barava no fitim wanem God laekem, olsem wei for winim olketa prize. Olketa narawan prea, bat wanem olketa askem hem no fitim wanem God laekem. Disaepol James tok strong againstim kaen wei for prea olsem, taem hem sei: ‘Iufala askem, bat iufala no kasem, bikos iufala ask for rong samting, mekem iufala savve iusim for samting wea body laekem tumas.’​—⁠James 4:⁠3.

Tingim sapos tufala team wea plei soccer prea for win. God bae no ansarem prea wea nara team talem for laek winim nara team. Semsem tu long prea bilong pipol wea go long war taem wan saed prea for winim nara saed.

God no ansarem prea bilong olketa wea no tinghae long law bilong hem. Jehovah tok strong long olketa wea laea for worshipim hem, taem hem sei: ‘Nomata iufala talem staka prea, mi no lisin bikos hand bilong iufala fulap witim blood bilong pipol wea iufala killim dae.’ (Isaiah 1:​15) Bible talem olsem: ‘God barava heitim prea bilong man wea no herem law bilong hem.’​—⁠Proverbs 28:⁠9.

Jehovah bae evritaem herem prea bilong olketa wea worshipim hem and wea trae for followim wanem hem laekem. Waswe, datwan minim bae hem evritaem givim wanem olketa askem? Nomoa. Tingim samfala wea Bible storyim.

Moses barava fren gud witim God; nomata olsem, hem tu mas askem ‘samting fitim wanem God laekem.’ Moses askem God for go long Canaan wea difren from wanem God talem. Moses askem olsem: ‘Plis letem mi lukluk long datfala gud land wea stap long nara saed long Jordan.’ Bat from Moses no obeyim wanem Jehovah talem firstaem, God talem hem bae hem no go long Promis Land. So from datwan, Jehovah talem stret long Moses olsem: ‘Inaf nao! No askem datwan moa long mi.’​—⁠Deuteronomy 3:​25, 26; 32:⁠51.

Aposol Paul askem God for mekem hem kamap free from “nila long body.” (2 Corinthians 12:⁠7) Maet disfala “nila” hem from sik wea hem kasem long eye bilong hem or wei wea pipol spoelem hem and olketa “giaman brata.” (2 Corinthians 11:26; Galatians 4:​14, 15) Paul talem olsem: “Thrifala taem nao mi askem Lord for finisim disfala samting from mi.” Bat God savve hao sapos Paul gohed preach nomata hem kasem “nila long body,” datwan barava showimaot paoa bilong God and wei wea hem trustim God. So nomata Paul barava askem God, God talem hem olsem: “Paoa bilong mi barava helpem iu.”​—⁠2 Corinthians 12:​8, 9.

Tru nao, God savve gud long wanem iumi needim nomata datfala samting iumi barava needim or nomoa. Jehovah evritaem duim gud samting for iumi, wea fitim nambawan plan bilong hem wea Bible storyim.