Hapi Long Waka for Teachim Pipol for Kamap Disaepol
‘So iufala go and teachim pipol for kamap disaepol bilong mi.’—MATT. 28:19.
1-3. (a) Wanem nao tingting bilong staka pablisa abaotem wei for garem Bible study? (b) Olketa wanem kwestin nao bae iumi storyim long disfala study?
WANFALA sista wea joinim Hindi languis grup long America tok olsem: “Mi study witim wanfala famili from Pakistan for winim 11-fala week. Mifala fren gud tugeta. Mi krae taem mi tingim hao olketa klosap go bak long Pakistan. Nomata mi sorre from bae mi no savve lukim olketa moa, mi hapi bikos mi lanem olketa abaotem Jehovah.”
2 Waswe, enitaem iu hapi tumas olsem datfala sista from iu garem wanfala Bible study? Jesus and olketa disaepol hapi tumas taem olketa teachim pipol for kamap disaepol. Taem 70-fala disaepol kam bak bihaen olketa go preach, olketa hapi tumas and storyim olketa samting wea olketa duim. Jesus tu ‘barava hapi from God givim kam holy spirit bilong hem.’ (Luke 10:17-21) Distaem tu staka pablisa hapi tumas taem olketa teachim pipol for kamap disaepol. Datwan barava tru bikos long 2007, olketa pablisa waka hard for duim six and haf million Bible study evri month!
3 Bat samfala pablisa no garem chance yet for garem wanfala Bible study. Maet samfala no garem Bible study long tu-thri year wea go pas finis. Taem iumi trae hard for garem Bible study, wanem nao samfala samting wea mekem hem no isi for duim datwan? Wanem nao iumi savve duim for no letem olketa samting hia stopem iumi for no garem Bible study? And wanem nao olketa gud samting wea iumi savve kasem taem iumi trae hard for obeyim disfala toktok bilong Jesus: ‘So iufala go and teachim pipol for kamap disaepol bilong mi’?—Matt. 28:19.
Olketa Samting wea Savve Mekem Iumi No Hapi
4, 5. (a) Long samfala kantri, staka pipol ting hao long truth? (b) Long samfala nara kantri, why nao hem no isi for olketa pablisa teachim pipol?
4 Long samfala kantri, pipol laekem tumas olketa buk bilong iumi and olketa laek for studyim Bible. Wanfala hasband and waef from Australia wea stap lelebet taem long Zambia sei olsem: “Olketa story wea mifala herem abaotem Zambia hem tru. Staka pipol interest tumas long truth. Street witnessing hem naes tumas! Pipol kam long mifala and samfala askem tu magasin wea olketa laekem.” Long wanfala year, olketa brata and sista long Zambia duim winim 200 thousand Bible study. Klosap evriwan garem winim wanfala Bible study.
5 Bat long samfala nara kantri, hem no isi for olketa pablisa givimaot olketa buk and for garem Bible study. Why nao olsem? Plande taem pipol no stap long haos, and olketa wea stap long haos, olketa no interest long religion. Maet olketa big kam long famili wea no interest long religion or olketa les tumas long pipol long giaman religion wea laea long wei bilong olketa. Staka pipol hia olsem olketa sheepsheep wea garekil and stap olobaot bikos olketa bigman long giaman religion nating lukaftarem olketa. (Matt. 9:36) Dastawe olketa hia maet no interest for storyim eni samting abaotem Bible.
6. Why nao samfala pablisa tingse olketa no fit for duim Bible study?
6 Samfala faithful pablisa feisim samting wea savve mekem olketa no hapi. Long bifor olketa busy for teachim pipol for kamap disaepol, bat distaem olketa no duim datwan tumas nao bikos olketa sik or olo. Maet tingting bilong iumi tu mekem iumi no duim disfala waka. Wanfala samting nao, maet iumi tingse iumi no fit for duim Bible study. Maet iu garem sem tingting olsem Moses taem Jehovah talem hem for go story long Pharaoh. Moses talem olsem: “Plis Jehovah, mi no savve toktok gud ia, nomata yesterday or bifor kam.” (Ex. 4:10) Maet iumi fraet nogud man wea iumi study witim no kamap disaepol bikos iumi no savve teach gud tu. So from iumi garem tingting olsem, maet iumi disaed for no garem wanfala Bible study nao. Wanem nao savve helpem iumi for no garem kaen tingting olsem?
Redyim Tingting Bilong Iumi
7. Wanem nao mekem Jesus laek for duim ministry?
7 First samting wea iumi mas duim nao hem for redyim tingting bilong iumiseleva. Jesus sei olsem: “Samting wea man tingting tumas abaotem nao bae hem storyim.” (Luke 6:45) Jesus laek for duim ministry bikos hem barava tingim pipol. Tingim diswan. Taem Jesus luksavve olketa Jew no fren witim God, “hem barava sorre tumas long olketa.” Hem sei long olketa disaepol: “Staka samting nao stap for harvestim . . . Askem man wea ownim planteison for sendem go olketa wakaman for harvestim planteison bilong hem.”—Matt. 9:36-38.
8. (a) Wanem nao hem gud for iumi ting raonem? (b) Wanem nao iumi savve lanem from samting wea wanfala Bible study talem?
8 Taem iumi teachim pipol for kamap disaepol, hem gud sapos iumi ting raonem olketa gud samting wea iumiseleva kasem taem wanfala brata or sista studyim Bible witim iumi. Tingim tu pipol wea iumi bae story witim long preaching and gudfala samting wea olketa savve kasem sapos olketa herem gud nius. Wanfala woman raet go long branch office long kantri bilong hem and hem sei: “Mi barava tinghae long olketa Witness wea kam long haos bilong mi for teachim mi. Samfala taem maet olketa wik long mi bikos mi askem staka kwestin tumas and mifala study for staka hour. Bat olketa isisi nomoa witim mi and laek tumas for teachim mi wanem olketa savve finis long hem. Mi thankiu long Jehovah and Jesus from olketa woman hia helpem mi.”
9. Wanem nao Jesus tingting strong long hem? Hao nao iumi savve followim wei bilong hem?
9 Hem tru, no evriwan long taem bilong Jesus kamap disaepol bilong hem. (Matt. 23:37) Samfala followim Jesus for lelebet taem, bat bihaen olketa no hapi nao long olketa samting wea hem teachim long olketa and olketa “no followim hem moa.” (John 6:66) Bat taem samfala no laek followim Jesus, Jesus no tingim message wea hem talem hem no important nao. Nomata staka seed wea hem plantim no garem eni frut, hem tingting strong nomoa abaotem gud samting wea hem duim. Hem lukim olketa planteison redi for harvestim and hem hapi tumas taem hem duim waka for harvestim datwan. (Readim John 4:35, 36.) Iumi no lukluk nomoa long drae graon wea wheat grow long hem, bat iumi lukluk long full planteison for harvestim long territory bilong iumi. Distaem iumi bae storyim wanem nao savve helpem iumi for garem gudfala tingting long pipol long territory bilong iumi.
Iumi Preach Mekem Iumi Startim Olketa Bible Study
10, 11. Wanem nao iu savve duim mekem iu gohed hapi for duim preaching waka?
10 Wanfala farmer plantim olketa seed mekem hem savve harvestim frut bilong hem. Iumi tu mas preach mekem iumi startim olketa Bible study. Bat waswe sapos iu preach evritaem long haos tu haos bat plande taem pipol no stap long haos or iu no savve lukim moa olketa return visit bilong iu? Diswan savve mekem iu barava wiki. Waswe, bae iu no go preach long haos tu haos nao? Nomoa! Plande taem, disfala wei for preach long haos tu haos nao hem firstaem wea pipol herem gud nius.
11 Bat waswe, iu savve preach long olketa nara wei tu mekem iu gohed hapi for duim disfala waka? Waswe, enitaem iu preach long pipol long street or long ples wea olketa waka? Waswe, iu savve ringim pipol long telephone or tekem telephone namba bilong olketa wea iu story witim mekem iu savve ringim olketa bihaen? Sapos iu gohed strong for duim ministry and traem olketa difren wei for preach, bae iu meetim pipol wea laek for herem gud nius abaotem Kingdom and datwan bae mekem iu hapi.
Taem Pipol No Interest
12. Wanem nao iumi savve duim sapos staka pipol long territory no interest long religion?
12 Waswe sapos staka pipol long territory no interest long religion? Waswe, iu savve storyim firstaem samting wea olketa interest long hem? Aposol Paul talem olsem long olketa brata and sista long Corinth: “Long olketa Jew, mi kamap olsem wanfala Jew . . . Long olketa wea no garem law, mi kamap olsem man wea no garem law, nomata mi garem law bilong God.” Why nao Paul duim olsem? Hem tok olsem: “Mi kamap evri samting long evrikaen pipol, mekem mi savve helpem samfala for kasem laef.” (1 Cor. 9:20-22) Hem gud sapos iumi tu storyim olketa samting wea pipol long territory interest long hem. Staka pipol wea no interest long religion laek for garem famili wea hapi. Maet olketa laek savve tu wanem nao savve mekem man hapi. Hem gud sapos iumi story abaotem Kingdom long wei wea mekem pipol hia interest.
13, 14. Wanem nao iumi savve duim mekem iumi hapi go moa taem iumi teachim pipol for kamap disaepol?
13 Nomata long olketa kantri wea staka pipol no interest, staka pablisa duim nara samting for teachim pipol for kamap disaepol and diswan mekem olketa hapi go moa. Wanem nao olketa duim? Olketa lanem nara languis. Wanfala hasband and waef wea winim 60 year savve hao staka thousand Chinese student and famili bilong olketa stap long territory bilong olketa. Hasband hia sei olsem: “Datwan mekem mitufala laek for lanem Chinese languis.” Hem sei moa: “Nomata evriday mifala mas iusim staka taem for studyim disfala languis, mifala kasem gudfala samting. Mifala studyim Bible witim staka Chinese pipol long territory bilong mifala.”
14 Nomata sapos iu no savve lanem nara languis, iu savve iusim disfala buk Gud Nius for Pipol Bilong Evri Nation taem iu story witim pipol wea story long difren languis. Iu savve kasem tu olketa buk bilong iumi long languis bilong pipol wea iu meetim. Hem tru, man mas waka hard and iusim staka taem for story witim pipol wea toktok long difren languis and wea garem olketa difren wei. Bat iumi mas tingim disfala toktok long Bible: “Man wea plantim staka samting bae harvestim staka samting tu.”—2 Cor. 9:6.
Evriwan Long Kongregeson Tu Help
15, 16. (a) Long wanem wei nao evriwan long kongregeson helpem man for kamap disaepol? (b) Wanem nao olketa olo savve duim?
15 Hem no wanfala brata or sista nomoa wea helpem wanfala man for kamap disaepol. Bat evriwan long kongregeson tu helpem man for kamap disaepol. Why nao iumi sei olsem? Jesus sei: “Evriwan bae luksavve iufala nao olketa disaepol bilong mi, sapos iufala lovem narawan.” (John 13:35) Tru tumas, taem olketa Bible study kam long olketa meeting, plande taem olketa tinghae long love wea olketa brata and sista showimaot. Wanfala woman wea studyim Bible hem sei: “Mi barava laek for go long olketa meeting. Pipol hapi for lukim mi and kam story witim mi!” Jesus talem hao olketa wea kamap disaepol bilong hem, maet famili bilong olketa againstim olketa. (Readim Matthew 10:35-37.) Bat hem promisim hao olketa long kongregeson bae kamap olsem “olketa brata, sista, mami, and pikinini” bilong olketa.—Mark 10:30.
16 Olketa olo brata and sista duim samting tu for helpem olketa Bible study fren gud witim Jehovah. Wanem nao olketa duim? Nomata sapos olketa olo no fit for duim Bible study distaem, olketa naesfala koment wea olketa talem long olketa meeting hem strongim faith bilong evriwan. From olketa “duim gudfala samting” for longfala taem finis, datwan strongim kongregeson and mekem pipol wea laek herem gud nius for kam long organization bilong God.—Prov. 16:31.
No Fraet
17. Wanem nao iumi savve duim sapos iumi tingse iumi no fit for duim Bible study?
17 Wanem nao iu savve duim sapos iu tingse iu no fit for duim Bible study? Tingim hao Jehovah helpem Moses. Jehovah givim holy spirit long Moses and hem markem tu brata bilong hem Aaron for waka witim hem. (Ex. 4:10-17) Jesus promisim hao God bae givim holy spirit bilong hem for helpem iumi preach. (Acts 1:8) Nara samting tu, taem Jesus sendem olketa disaepol for preach, hem markem tufala man for waka tugeta. (Luke 10:1) So sapos hem no isi for iu duim wanfala Bible study, askem God for givim holy spirit bilong hem long iu mekem iu garem gudfala tingting and askem wanfala brata or sista wea garem savve for iutufala preach tugeta. Taem iu tingim hao Jehovah chusim pipol wea olketa nao “wik samting long world” for duim disfala big waka, datwan bae strongim faith bilong iu.—1 Cor. 1:26-29.
18. Wanem nao hem gud for iumi tingim taem iumi duim Bible study?
18 Maet iumi tingse man wea iumi study witim bae no kamap disaepol bikos iumi no savve teach gud. Wanem nao bae helpem iumi for no garem tingting olsem? Hem gud for iumi tingim hao waka for helpem man kamap disaepol, hem no olsem taem man kukim kaikai. Sapos kaikai bae teist gud or nomoa, hem depend nomoa long datfala man wea kukim datfala kaikai. Bat for helpem man kamap disaepol, hem no iumiseleva nomoa wea duim datwan. Jehovah nao duim barava bigfala samting. Hem nao leadim man for kam long hem. (John 6:44) Iumi and olketa narawan long kongregeson waka hard for teach gud mekem datfala Bible study fren gud witim Jehovah. (Readim 2 Timothy 2:15.) And datfala Bible study tu mas followim samting wea hem lanem. (Matt. 7:24-27) Hem tru, sapos man no laek gohed for study, iumi savve sorre. Iumi laekem Bible study for disaed for worshipim Jehovah, bat iumi luksavve hao man wanwan nao mas “givim ansa for hemseleva long God.”—Rom. 14:12.
Wanem Nao Olketa Gud Samting wea Iumi Savve Kasem?
19-21. (a) Wanem nao olketa gud samting wea iumi kasem taem iumi duim olketa Bible study? (b) Hao nao tingting bilong Jehovah long evriwan wea duim preaching waka?
19 Taem iumi duim olketa Bible study, diswan helpem iumi for duim olketa samting for Kingdom firstaem. Nara samting tu, hem mekem iumi tinghae go moa long truth wea stap long Bible. Hao nao olsem? Barak, wanfala brata wea pioneer sei olsem: “Taem iu duim olketa Bible study, diswan barava helpem iu for studyim gud Bible bilong iu firstaem. Mi savve hao miseleva nao mas biliv strong long truth firstaem bifor mi savve teachim diswan long nara man.”
20 Sapos iu no garem Bible study, waswe, God no tinghae long worship bilong iu nao? Nomoa! Jehovah barava tinghae long iumi taem iumi trae hard for praisem hem. Iumi evriwan wea duim preaching waka, iumi “waka witim God.” Bat taem iumi garem Bible study, datwan savve mekem iumi barava hapi bikos iumi lukim God nao mekem seed wea iumi plantim for grow. (1 Cor. 3:6, 9) Wanfala pioneer sista, Amy, hem sei: “Taem iu lukim Bible study fren gud witim Jehovah, datwan mekem iu barava tinghae long Jehovah from hem iusim iu for helpem man hia for savve long Hem and kasem laef olowe.”
21 Taem iumi waka hard for startim and duim olketa Bible study, datwan bae helpem iumi gohed worshipim God distaem and strongim hope bilong iumi for laef olowe long niu world. From Jehovah helpem iumi for duim disfala waka, maet iumi savve helpem pipol wea lisin long iumi for laef olowe. (Readim 1 Timothy 4:16.) Datwan nao bae mekem iumi hapi tumas!
Waswe, Iu Tingim Yet?
• Wanem nao samfala samting wea savve stopem samfala pablisa for no garem Bible study?
• Wanem nao iumi savve duim sapos staka pipol long territory no interest?
• Wanem nao olketa gud samting wea iumi kasem taem iumi garem Bible study?
[Piksa long page 9]
Waswe, iu preach long olketa difren wei mekem iu savve faendem pipol wea laek herem gud nius?