Gohed “Strong for Duim Olketa Gudfala Waka”!

“Christ dae for sevem iumi from evri nogud samting. Hem mekem laef bilong iumi klin mekem iumi kamap pipol bilong hem wea strong for duim olketa gudfala waka.”​—⁠TITUS 2:​14.

1. Wanem nao pipol duim long temple area taem Jesus kasem ples hia long Nisan 10, 33 C.E.?

TINGIM samting wea happen long Nisan 10, 33 C.E., wea hem thrifala day bifor Pasova. Staka pipol wea kam long temple area long Jerusalem for worship olketa hapi tumas. Taem Jesus kasem temple, wanem nao happen? Matthew, Mark, and Luke storyim narataem moa hao Jesus raosem pipol wea salem and baem samting insaed long temple. Hem kapsaetem olketa tebol bilong pipol wea changem olketa difren selen and stul bilong olketa wea salem kurukuru. (Matt. 21:12; Mark 11:15; Luke 19:45) Jesus strong for duim sem samting wea hem duim thrifala year go finis.​—⁠John 2:​13-​17.

2, 3. Jesus raosem olketa man and animal from temple, bat wanem gudfala samting moa Jesus duim?

² Samting wea Matthew storyim hem showimaot Jesus no tingim nomoa temple taem hem raosem olketa man and animal from there, bat hem healim tu olketa man wea blind and kripol. (Matt. 21:14) Luke story abaotem olketa nara samting wea Jesus duim. Hem sei: “Evriday [Jesus] savve go teach long temple.” (Luke 19:47; 20:⁠1) Ministry wea Jesus duim nao barava showimaot hem strong for duim olketa gudfala waka.

³ Taem aposol Paul raetem leta long Titus, hem storyim hao Jesus “dae for sevem iumi from evri nogud samting. Hem mekem laef bilong iumi klin mekem iumi kamap pipol bilong hem wea strong for duim olketa gudfala waka.” (Titus 2:​14) Wanem nao iumi savve duim wea showimaot iumi “strong for duim olketa gudfala waka”? And wanem nao olketa gudfala king bilong Judah duim wea savve strongim iumi?

Strong for Preach and Teach

4, 5. Wanem nao fofala king long Judah duim wea showimaot olketa strong for duim gudfala waka?

⁴ Asa, Jehoshaphat, Hezekiah, and Josiah duim big waka for finisim wei for worshipim idol long Judah. Asa “aotem olketa altar bilong heathen pipol and hem aotem olketa ples for worship and hem brekem olketa ston post and hem daonem olketa timba post for worship.” (2 Chron. 14:⁠3) Jehoshaphat tingim evritaem tru worship, dastawe hem no fraet for “aotem olketa ples for worship and for daonem olketa timba post for worship long Judah.”​—⁠2 Chron. 17:⁠6; 19:⁠3.a

⁵ Hezekiah talem pipol for duim Pasova for sevenfala day long Jerusalem. Bihaen datwan, “evri Israelite wea hipap long there go long evri taon long Judah and olketa brekem olketa ston post and daonem olketa timba post for worship. Olketa aotem tu olketa ples for worship and olketa altar long evri ples long Judah, Benjamin, Ephraim, and Manasseh go kasem taem olketa finisim evri samting hia.” (2 Chron. 31:⁠1) Josiah kamap king taem hem 8 year nomoa. Bible hem sei: “Long taem wea hem young yet, long mek-eit year wea hem king, hem start for followim God bilong grani bilong hem, David. And long mek-twelv year wea hem king, hem start for mekem olketa ples long Judah and Jerusalem for klin. Hem aotem olketa ples for worship and daonem olketa timba post for worship and olketa idol and karving.” (2 Chron. 34:⁠3) Tru tumas, fofala king hia strong for duim olketa gudfala waka.

6. Why nao iumi fit for sei waka wea iumi duim distaem hem olsem wanem olketa king duim bifor?

⁶ Iumi duim wanfala waka distaem tu wea klosap olsem wanem olketa king duim bifor. Iumi helpem pipol for no bilivim moa olketa laea teaching wea olketa lanem long religion and for no worshipim idol tu. Taem iumi preach long haos tu haos, iumi story witim olketa difren kaen pipol. (1 Tim. 2:⁠4) Long wanfala kantri long Asia, wanfala gele tingim hao mami bilong hem savve standap front long staka idol long haos bilong olketa and worshipim olketa. Gele hia no minim hao nao staka idol hia fit for piksarem trufala God. So staka taem hem prea from hem laek savve hu nao trufala God. Wantaem tufala Witness kam long haos bilong hem. Tufala laek helpem hem for savve long nambawan nem bilong tru God, Jehovah. Gele hia hapi tumas taem hem lanem tru samting wea Bible talem abaotem olketa idol! Distaem hem strong for duim preaching waka and lanem pipol abaotem Jehovah and wanem God laekem olketa man for duim.​—⁠Ps. 83:18; 115:​4-8; 1 John 5:⁠21.

7. Wanem nao iumi savve duim for followim samting wea olketa man long taem bilong Jehoshaphat duim?

⁷ Taem iumi preach long haos tu haos, waswe, iumi trae kasem evri pipol long territory bilong iumi? Tingim wanem Jehoshaphat duim long mek-thri year wea hem king. Hem sendem faevfala bigman bilong hem witim naenfala Levite and tufala priest for go long evri taon long Judah for lanem pipol abaotem olketa law bilong Jehovah. From olketa man hia barava duim gud waka bilong olketa, pipol long olketa nara kantri wea stap raonem Judah olketa fraetem Jehovah nao. (Readim 2 Chronicles 17:​9, 10.) Taem iumi preach long haos tu haos long olketa difren taem and long olketa difren day, maet iumi savve story witim staka difren man long wanfala famili.

8. Wanem moa iumi savve duim mekem iumi preach long staka pipol?

⁸ Staka pipol bilong God distaem hapi for lusim hom bilong olketa and muv go long nara ples wea barava needim samfala Witness moa. Waswe, iu fit for go long nara ples tu? Maet samfala long iumi no fit for duim datwan. Sapos olsem, iumi savve trae preach long pipol wea toktok long nara languis wea stap long ples bilong iumi. Tingim wanfala brata wea nem bilong hem Ron wea hem 81 year. From hem meetim staka pipol wea toktok long olketa nara languis, hem lane hao for talem hello long 32 languis! No longtaem go nomoa, taem hem duim street witnessing, hem meetim wanfala hasband and waef wea kam from Africa and hem hello go long tufala long languis bilong olketa, wea hem Yoruba. Tufala askem Ron sapos hem kasem Africa finis. Taem hem sei nomoa, tufala askem hem hao nao hem savve long languis bilong olketa. So Ron preach long tufala nao. Olketa hapi for tekem samfala magasin and talem address bilong ples wea olketa stap long hem. Then Ron givim address hia long kongregeson wea stap klosap long olketa mekem olketa brata savve study witim tufala.

9. Why nao hem important for iumi readim scripture from Bible long pipol? Storyim eni example.

⁹ Taem olketa man bilong Jehoshaphat go for lanem pipol long Judah, olketa tekem tu “buk wea garem law bilong Jehovah.” Long full world, iumi trae hard for iusim Bible for lanem pipol, bikos hem nao toktok bilong God. Taem iumi preach long pipol, iumi no talem nomoa toktok from Bible bat iumi trae hard for readim scripture long olketa. Wanfala sista wea nem bilong hem Linda, hem kasem haos bilong wanfala woman wea sei hem no savve story longtaem bikos hem mas lukaftarem hasband bilong hem wea kasem stroke. Woman hia tok sorre olsem: “Mi no savve wanem nao mi duim wea mekem God letem disfala samting kasem mi.” Linda askem hem: “Waswe, hem olraet for mi showim iu wanfala samting wea bae strongim iu?” Then hem readim James 1:​13 and hem sei: “God no mekem iumi and famili bilong iumi for kasem olketa nogud samting for panisim iumi.” Then nomoa woman hia huggem Linda. Linda hem sei: “Taem mi readim scripture long woman hia, datwan nao strongim hem. Maet pipol nating herem enitaem bifor olketa scripture wea iumi readim from Bible.” Bihaen tufala story, woman hia start for study nao.

Olketa Young Wan wea Strong for Worshipim God

10. Why nao Josiah hem gudfala example for olketa young Christian followim?

¹⁰ Tingim Josiah moa. Iumi lanem finis hao hem start for followim God taem hem young yet and taem hem samting olsem 20 year hem duim bigfala waka for finisim wei for worshipim idol. (Readim 2 Chronicles 34:​1-3.) Staka young pipol distaem tu strong for duim ministry bilong olketa.

11-13. Wanem nao iumi savve lanem from olketa young wan distaem wea strong for worshipim Jehovah?

¹¹ Hannah wea stap long England hem 13 year nomoa taem hem lanem French languis long skul. Hem herem hao long wanfala taon klosap long ples bilong hem olketa brata startim wanfala grup wea toktok long French languis. Dadi bilong hem hapi for go witim hem long olketa meeting long there. Distaem Hannah hem 18 year and hem regular pioneer. Hem preach long pipol wea toktok long French languis. Waswe, iu savve lanem nara languis tu mekem iu helpem pipol for lane abaotem Jehovah?

¹² Rachel barava laekem datfala video Pursue Goals That Honor God. Hem tingim bak taem wea hem worshipim Jehovah long 1995 and hem sei: “Mi tingse mi gohed gud long truth.” Then hem sei: “Bihaen mi lukluk long datfala drama long video, mi luksavve hao for staka year mi isisi nomoa long truth. Mi luksavve mi mas waka hard long truth and duim gud preaching waka and study seleva.” Distaem Rachel gohed strong for worshipim Jehovah. Wanem gud samting nao hem kasem? Hem sei: “Distaem mi barava fren gud witim Jehovah. Mi story gud long Jehovah taem mi prea, mi hapi tumas taem mi duim study seleva abaotem olketa deep samting long truth, and mi savve tingim long mind bilong mi olketa story wea mi readim long Bible. From mi duim olsem, mi barava laekem preaching waka distaem and mi hapi tumas taem mi lukim hao toktok bilong Jehovah strongim pipol.”

¹³ Luke hem wanfala young wan wea barava tinghae long disfala video, Young People Ask​—⁠What Will I Do With My Life? Bihaen Luke lukim diswan, hem sei: “Mi mas barava ting strong long wanem mi duim long laef bilong mi.” Hem sei moa: “Long bifor, mi kasem hevi from olketa narawan for go long big skul firstaem mekem mi kasem waka wea mi bae tekem big selen. Then bihaen nao olketa sei mi savve trae kasem olketa spiritual goal. Bat kaen hevi olsem hem no helpem man for fren gud witim Jehovah.” Iufala olketa young brata and sista, waswe, iufala savve iusim wanem iu lanem long skul for duim samfala samting moa long ministry olsem Hannah duim? And waswe, iufala savve duim wanem Rachel duim and waka hard for kasem olketa goal wea mekhae long God? Followim wanem Luke hem duim. Sapos olsem, bae iu no kasem olketa nogud samting wea spoelem staka young wan distaem.

Trae Hard for Obeyim Olketa Warning

14. Jehovah laekem iumi for worshipim hem long wanem wei? Pipol bilong God mas hao and why nao datwan hem no isi?

¹⁴ Sapos iumi laekem Jehovah for hapi long hao iumi worshipim hem, wei bilong iumi mas stret. Isaiah tok olsem: “Kamaot, kamaot from [Babylon]. Iufala mas no tasim eni samting wea no klin. Iufala wea karem olketa holy samting bilong haos bilong Jehovah, iufala mas kamaot from datfala ples and iufala mas klin.” (Isa. 52:11) Staka year bifor Isaiah talem datfala toktok, King Asa barava waka hard for raosem from Judah pipol wea durong. (Readim 1 Kings 15:​11-​13.) And staka handred year bihaen Isaiah talem datfala toktok, aposol Paul talem Titus hao Jesus dae for iumi mekem iumi ‘kamap pipol bilong hem wea klin and wea strong for duim olketa gudfala waka.’ (Titus 2:​14) Distaem staka pipol long world olketa durong dastawe hem no isi for iumi and olketa young wan for no olsem olketa. Wanfala samting nao, olketa showim staka rabis piksa long television, movie, and long Internet wea mekem man laek durong. So nomata iumi young or olo, evriwan wea worshipim God mas trae hard for no lukluk long olketa rabis piksa hia.

15. Wanem nao savve helpem iumi for heitim olketa nogud samting?

¹⁵ Taem iumi trae hard for obeyim olketa warning wea God talem, datwan helpem iumi for heitim olketa nogud samting. (Ps. 97:10; Rom. 12:⁠9) Iumi mas heitim olketa rabis piksa mekem datwan “no switim iumi for duim olketa nogud samting,” olsem wanfala Christian talem. Dastawe iumi mas disaed strong for no lukluk long olketa rabis piksa. Taem iumi luksavve hao olketa rabis piksa savve barava spoelem iumi, hem bae helpem iumi for barava heitim datwan. Wanfala brata disaed strong for duim samfala samting mekem hem no lukluk moa long olketa rabis piksa long Internet. Hem muvim computer bilong hem long ples wea evriwan long famili savve lukim screen. Hem disaed strong for lusim nogud wei bilong hem mekem hem savve gohed strong for duim olketa gudfala samting. And from hem iusim Internet for bisnis bilong hem, hem disaed for iusim datwan nomoa taem waef bilong hem stap witim hem.

Gud Samting wea Kamaot From Gudfala Wei Bilong Iumi

16, 17. Taem pipol lukim gudfala wei bilong iumi, datwan savve mekem olketa hao? Storyim eni example.

¹⁶ Olketa young wan wea worshipim Jehovah showimaot olketa gudfala wei and pipol wea lukim diswan barava tinghae long datwan! (Readim 1 Peter 2:​12.) Taem wanfala man kam long Bethel long London for fixim printing machine, hem start for garem difren tingting nao abaotem Olketa Jehovah’s Witness. Waef bilong hem wea study witim wanfala Witness, hem lukim hao hasband bilong hem changem tingting bilong hem nao. Long bifor, hasband bilong hem no savve laekem olketa Witness for kam long haos. Bat bihaen hem waka long datfala day long Bethel, hem barava tinghae long wei wea olketa long Bethel kaen long hem. Hem sei no eniwan tok swear. Evriwan patient nomoa and no eniwan raoa. Wanfala samting wea hem barava tinghae long hem nao, olketa young brata and sista hapi for duim waka bilong olketa. Nomata olketa no tekem pei, olketa hapi for iusim taem and strong bilong olketa for helpem disfala preaching waka for gohed.

¹⁷ Olketa brata and sista wea waka for selen for lukaftarem famili, olketa tu savve waka gud tumas. (Col. 3:​23, 24) From olketa waka gud olsem, plande taem boss bilong olketa tinghae long diswan and no laekem olketa for finis from waka bilong olketa.

18. Wanem nao iumi savve duim for showimaot iumi “strong for duim olketa gudfala waka”?

¹⁸ Taem iumi trustim Jehovah, obeyim wanem hem talem, and lukaftarem gud ples wea iumi hipap for meeting, iumi showimaot iumi lovem haos bilong Jehovah and tingim evritaem. Nara samting tu, iumi laek duim samfala samting moa long preaching waka and for teachim pipol for kamap disaepol. Nomata iumi young or olo, taem iumi waka hard for garem olketa gudfala wei wea Jehovah hapi long hem, bae iumi kasem staka gud samting. And pipol bae gohed for luksavve hao iumi nao pipol wea “strong for duim olketa gudfala waka.”​—⁠Titus 2:⁠14.

[Footnote]

Tingim wanem iu lanem from pipol long bifor and distaem.

• Wanem nao iu savve duim for showimaot iu strong for preach and teach?

• Wanem nao olketa young wan savve duim for showimaot olketa “strong for duim olketa gudfala waka”?

• Wanem nao man savve duim for lusim olketa nogud wei?

[Piksa long page 13]

Waswe, evritaem iu iusim Bible long ministry?

[Piksa long page 15]

Sapos iu lanem nara languis long skul, diswan savve helpem iu duim samfala samting moa long ministry

[Piksa long page 14]