Samting Iumi Lanem From Jesus
Abaotem Future Bilong Olketa Man
Waswe, Jesus promisim laef long heven?
Ia, hem promisim! Jesus seleva laef bak and hem go stap witim Dadi bilong hem long heven. Bat bifor Jesus hem dae and laef bak, hem talem 11-fala faithful aposol bilong hem olsem: “Haos bilong Dadi bilong mi garem staka spes. . . . Mi go for redyim ples for iufala.” (John 14:2) Bat no staka nao bae go long heven. Jesus hem talem diswan klia long olketa disaepol bilong hem: “Iufala smol sekson bilong olketa sheepsheep, iufala no fraet, bikos Dadi bilong iufala hem hapi for givim kingdom long iufala.”—Luke 12:32.
Wanem nao “smol sekson” bae duim long heven?
Dadi hem laekem disfala smol sekson for kamap part long wanfala gavman long heven witim Jesus. Hao nao iumi savve? Bihaen Jesus laef bak, hem talem aposol John hao samfala wea faithful bae “rul olsem olketa king ovarem earth.” (Revelation 1:1; 5:9, 10) Diswan hem gud nius. Wanfala samting wea olketa man barava needim nao hem gudfala gavman. Wanem samting nao disfala gavman wea Jesus rul long hem bae duim? Jesus hem sei: “Mi talem iufala tru samting, God bae mekem evri samting niu moa long taem wea Son bilong man hem sidaon long nambawan throne bilong hem. Long taem hia nao, iufala wea followim mi bae sidaon tu long twelvfala throne.” (Matthew 19:28) Gavman wea Jesus and olketa wea followim hem bae rul long hem, bae “mekem evri samting niu moa,” olsem perfect laef wea firstfala hasband and waef enjoyim long earth bifor tufala sin.
Wanem hope nao Jesus talem for olketa narawan?
God wakem Jesus for laef long heven bat hem wakem olketa man for laef long earth. (Psalm 115:16) Dastawe, Jesus sei: “Iufala olketa man bilong disfala earth bat mi kam from antap.” (John 8:23) Jesus hem storyim nambawan future for olketa man long earth. Hem sei olsem: “Olketa wea hambol bae hapi, bikos God bae givim earth long olketa.” (Matthew 5:5) Long hia Jesus storyim wanfala psalm wea sei: “God bae givim earth long olketa wea hambol, and olketa bae hapi fogud bikos olketa stap gud. Olketa gudfala pipol nomoa bae stap long earth, and olketa bae stap long hem for olowe.”—Psalm 37:11, 29.
So hem no datfala “smol sekson” wea go long heven nomoa bae kasem laef olowe. Jesus storyim tu wanfala laef wea evri narawan savve kasem. Hem sei olsem: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.”—John 3:16.
Hao nao bae God aotem evri samting wea mekem man safa?
Jesus storyim hao man bae free from tufala samting wea mekem hevi kamap taem hem sei: “God judgem world distaem and bae hem aotem man wea rulim disfala world.” (John 12:31) First samting, God bae judgem and finisim olketa wea no obeyim hem, wea mekem olketa man safa. Mek-tu samting, God bae aotem Satan and hem bae no leadim rong moa olketa man.
Waswe long olketa wea laef and dae long taem bifor wea no garem chance for lane and showimaot faith long God and Christ? Jesus talem wanfala criminal man wea hange saed long hem: “Iu bae stap witim mi long Paradaes.” (Luke 23:43) Datfala man, witim staka nara million pipol, bae garem chance for lane abaotem God taem Jesus bae mekem hem for laef bak insaed paradaes long earth. Long datfala taem, hem bae garem chance for stap witim olketa wea hambol and raeteous wea kasem laef olowe long earth.—Acts 24:15.
For savve moa abaotem diswan, lukim chapter 3 and 7 long buk Wanem Nao Really Samting wea Bible Teachim?*
[Footnote]
Olketa Jehovah’s Witness pablisim.
[Piksa long page 23]
“Olketa gudfala pipol nomoa bae stap long earth, and olketa bae stap long hem for olowe.” —Psalm 37:29