Waswe, Iu Garem Waka Bifor? Waswe, Iu Savve Duim Moa?
WASWE, bifor iu garem waka long kongregeson? Maet iu wanfala ministerial servant or elder. Maet iu insaed full-taem service. Iu hapi and laekem tumas waka wea iu duim, bat gogo samting happen wea mekem iu no savve duim waka hia.
Maet iu mas lukaftarem famili bilong iu or from iu olo or sik. Sapos olsem, datwan no minim iu duim nogud samting. (1 Tim. 5:8) Long first century, Philip hem missionary, bat gogo hem go stap long Caesarea for lukaftarem famili bilong hem. (Acts 21:8, 9) Taem King David hem olo, hem organizem samfala samting for taem son bilong hem Solomon bae kamap king bihaen hem dae. (1 Ki. 1:1, 32-35) Nomata olsem, Jehovah lovem and tinghae long Philip and David, and pipol distaem tu tinghae long wanem tufala duim.
Bat maet olketa elder long kongregeson aotem datfala waka from iu. Waswe, hem bikos iu duim samting wea no stret? Or waswe, hem bikos samfala problem kamap long famili? (1 Tim. 3:2, 4, 10, 12) Maet iu tingse hem no stret for olketa aotem iu from datfala waka, and maet iu feel nogud yet.
Iu Savve Duim Samting for Kasem Waka Moa
Sapos olketa elder aotem waka from iu, waswe, hem hard nao for iu kasem eni waka moa? Staka taem maet hem no olsem. Bat sapos iu laek kasem waka moa, iu mas laek for duim datwan moa. (1 Tim. 3:1) Bat why nao iu laek kasem waka moa? Hem from sem samting wea mekem iu dedicatem laef bilong iu long Jehovah. Iu lovem Jehovah and pipol bilong hem. Sapos iu hapi for kasem waka moa for showimaot datfala love, Jehovah bae iusim iu. Hem bae iusim savve wea iu garem bifor and wea iu kasem bihaen iu lusim datfala waka.
Tingim wanem nao Jehovah talem long olketa Israelite taem olketa no pipol bilong hem nao. Bible hem sei: “Mi nao Jehovah. Mi nating change. Iufala olketa son bilong Jacob, and iufala no finis evribit.” (Mal. 3:6) Jehovah lovem olketa Israelite and hem laek iusim olketa moa. Jehovah laek iusim iu tu. Wanem nao iu savve duim? Sapos iu laek kasem waka moa, important samting nao, iu mas showimaot iu fren gud witim Jehovah. From iu no garem waka yet long kongregeson, hem gud for iu strongim go moa wei wea iu fren witim Jehovah.
Sapos iu laek “stap strong” long truth, iu mas “lukaotem Jehovah and askem hem for strongim iu.” (1 Cor. 16:13; Ps. 105:4) Wanfala samting wea helpem iu for duim diswan nao hem for iu prea long Jehovah. Taem iu story long hem abaotem wanem nao kasem iu, talemaot tingting bilong iu and askem hem for givim holy spirit long iu. Sapos iu duim olsem, iu bae fren gud witim Jehovah, and diswan bae strongim iu. (Ps. 62:8; Phil. 4:6, 13) Nara samting wea bae helpem iu, hem for duim study seleva long Bible. From iu no garem waka distaem, maet iu fit for duim gud study seleva and famili study, and garem gudfala schedule wea maet bifor iu no garem.
Tingim tu hao iu wanfala Witness bilong Jehovah yet. (Isa. 43:10-12) Nambawan samting wea iumi evriwan savve duim distaem nao hem for “waka witim God.” (1 Cor. 3:9) Sapos iu duim samfala hour moa long preaching waka, datwan bae strongim go moa wei wea iu fren witim Jehovah and strongim olketa brata and sista tu for fren witim hem.
Wanem Nao Iu Savve Duim Sapos Iu Feel Nogud?
Taem olketa elder aotem iu from waka long kongregeson, maet iu shame and sorre. Maet iu laek pruvim iu no duim eni rong samting. Bat waswe sapos olketa brata herem tingting bilong iu bat olketa sei iu no fit nao for garem datfala waka? Maet iu feel nogud yet long olketa brata hia and datwan mekem iu no laek kasem waka moa and no laek lane from samting wea kasem iu. Bae iumi storyim samting wea kasem Job, Manasseh, and Joseph and hao story bilong olketa savve helpem man taem hem feel nogud.
Job duim bigfala waka for Jehovah. Hem wanfala elder and judge. (Job 1:5; 29:7-17, 21-25) Evri samting long laef bilong Job hem gud tumas, bat gogo nogud samting kasem hem. Hem lusim evri material samting, evri pikinini bilong hem dae, and hem sik big. Pipol no respectim hem tu. Job hem sei: “Distaem mi olo nao and olketa young man mekfani nomoa long mi.”—Job 30:1.
Long tingting bilong Job, hem nating duim eni rong samting nomoa so hem laek pruvim diswan long pipol. (Job 13:15) Bat Job hem hapi for weitim Jehovah for stretem evri samting, and hem kasem gud samting from diswan. Hem luksavve hem mas kasem kaonsel, olsem for samting wea hem talem taem hem kasem test. (Job 40:6-8; 42:3, 6) From Job hem hambol, gogo God barava blessim hem.—Job 42:10-13.
Sapos olketa elder aotem waka from iu bikos iu duim samting wea no stret, maet iu garem tingting olsem, ‘Waswe, Jehovah and olketa brata barava forgivim mi and no tingim nao mistek wea mi duim?’ Tingim King Manasseh long Judah bifor. Hem “duim staka samting wea hem barava nogud long tingting bilong Jehovah for mekem hem kros.” (2 Ki. 21:6) Bat taem Manasseh dae, Jehovah tingim hem wanfala faithful king. Why nao olsem?
Nomata Manasseh duim nogud samting, gogo hem hapi long discipline wea hem kasem. From hem no obeyim warning wea hem kasem, Jehovah mekem army bilong Assyria for kam faetem hem, and olketa taemapem hem long chain and tekem hem go farawe long Babylon. Taem Manasseh stap long there, hem “mekem Jehovah hapi long hem moa and hem gohed for barava hambol long God bikos hem nao God bilong olketa grani bilong hem. And hem gohed for prea long God.” From Manasseh barava repent and duim olketa stretfala samting, God forgivim hem.—2 Chron. 33:12, 13.
Maet iu no savve kasem bak evri waka long wantaem nomoa. Bat gogo iu savve kasem bak samfala waka. Sapos iu hapi for duim olketa waka hia and iu duim gud, plande taem iu savve kasem samfala waka moa. Bat no tingse evri samting bae gohed gud kwiktaem olsem hao iu laekem. Maet samfala samting wea iu no laekem hem happen. Nomata olsem, sapos iu hapi for duim waka and no givap, iu bae kasem gud samting.
Tingim Joseph, son bilong Jacob. Taem Joseph hem 17 year, olketa brata bilong hem salem hem for hem kamap slave. (Gen. 37:2, 26-28) Hem no tingim olketa brata bilong hem bae duim olsem long hem. Nomata olsem, hem duim wanem hem fit for duim, and from Jehovah blessim hem, hem kamap “boss long haos bilong masta bilong hem.” (Gen. 39:2) Bat bihaen olketa putim Joseph long prison. Nomata olsem, hem gohed faithful long Jehovah and Jehovah strongim hem. Gogo hem kasem waka for lukaftarem olketa prisoner.—Gen. 39:21-23.
Joseph nating savve gud samting bae kamaot from hem stap long prison. Hem gohed nomoa for duim wanem hem fit for duim. From datwan, Jehovah iusim hem for mekem no eni samting spoelem laen wea Pikinini wea hem promisim bae born kam long hem. (Gen. 3:15; 45:5-8) No eniwan long iumi fit for duim big samting olsem Joseph, nomata olsem, story bilong hem showimaot Jehovah nao bihaenem waka wea pipol bilong hem kasem. Hem gud tumas for followim wei bilong Joseph.
Lane From Olketa Hard Samting wea Kasem Iu
Job, Manasseh, and Joseph kasem olketa nogud samting wea mekem olketa sorre. Nomata olsem, thrifala evriwan hapi nomoa long wanem Jehovah letem for kasem olketa, and olketa lanem gud samting from datwan. Wanem nao iu savve lanem?
Trae for luksavve wanem nao Jehovah laek lanem long iu. From Job feel nogud, hem tingim hemseleva nomoa and no olketa samting wea important. Bat taem Jehovah stretem Job, hem tingting stret and hem sei: “Mi tok, bat mi no minim olketa samting wea mi talem.” (Job 42:3) Sapos iu feel nogud from iu no garem nao samfala waka long kongregeson, ‘no tinghae long iuseleva tumas winim wanem hem fitim, bat garem gudfala tingting.’ (Rom. 12:3) Maet Jehovah laek stretem iu long wei wea iu no luksavve long hem.
Hapi long discipline wea iu kasem. Maet firstaem Manasseh tingse discipline wea hem kasem hem ova tumas. Nomata olsem, hem followim datwan, hem repent, and no duim moa nogud samting. Nomata sapos iu feel nogud long discipline wea iu kasem, ‘iu mas hambol front long Jehovah, and hem bae mekhae long iu.’—1 Pet. 5:6; Jas. 4:10.
Weit lelebet and hapi for lane. Samting wea kasem Joseph fit for mekem hem heitim olketa brata bilong hem and duim nogud samting go bak long olketa. Bat hem garem gudfala tingting and hem sorre long olketa. (Gen. 50:15-21) Sapos eni samting mekem iu feel nogud, weit lelebet and letem Jehovah lanem iu.
Waswe, iu garem waka long kongregeson bifor? Duim samting wea bae mekem Jehovah laek givim iu samfala waka moa long future. Strongim wei wea iu fren witim hem. Trae for no feel nogud bat weit lelebet and hambol. Hapi for duim eni waka wea iu kasem. “Jehovah evritaem givim olketa gudfala samting long olketa wea duim stret samting.”—Ps. 84:11.
[Piksa long page 30]
Prea long Jehovah mekem iu stap strong long truth
[Piksa long page 31]
Sapos iu duim samfala hour moa long preaching waka, datwan bae strongim go moa wei wea iu fren witim Jehovah
[Piksa long page 32]
Duim samting wea bae mekem Jehovah laek givim iu samfala waka moa long future