Tinghae Long Wanem Iu Savve Duim Long Organization Bilong Jehovah
“God putim olketa difren part long body for stap olsem hao hem laekem. Hem putim long ples bilong olketa.”—1 COR. 12:18.
1, 2. (a) Wanem nao mekem iumi luksavve evriwan duim difren samting long kongregeson? (b) Wanem nao olketa kwestin wea iumi bae ansarem long disfala study?
START kam long Israel bifor, Jehovah iusim kongregeson for lukaftarem pipol bilong hem and talem olketa wanem for duim. Tingim diswan. Bihaen olketa Israelite winim taon long Ai, Joshua “readim big evri toktok bilong law, olketa blessing and olketa trabol, for fitim evri samting wea olketa raetem insaed long datfala buk bilong law . . . front long full kongregeson bilong Israel.”—Josh. 8:34, 35.
2 Long first century C.E., aposol Paul talem Timothy wea hem elder hao Christian kongregeson hem “famili bilong God” and “post wea sapotim truth.” (1 Tim. 3:15) Long distaem, “famili” bilong God nao hem evri brata and sista long full world. Long 1 Corinthians chapter 12, Paul storyim kongregeson hem olsem body bilong man. Hem talem hao nomata evri part long body duim difren waka, waka wea olketa duim hem important. Paul hem sei: “God putim evri difren part long body for stap olsem hao hem laekem. Hem putim long ples bilong olketa.” Hem talem tu hao “olketa part long body wea iumi no tinghae tumas long olketa, olketa nao iumi mas barava tinghae long olketa.” (1 Cor. 12:18, 23) So insaed long kongregeson, wanem wanfala man duim hem no winim wanem narawan duim. Tufala evriwan duim gud samting. So hao nao bae iumi tinghae long samting wea iumi savve duim long organization bilong Jehovah? Long wanem wei nao living bilong iumi savve mekem iumi duim difren samting long kongregeson? And wanem nao iumi savve duim ‘mekem evriwan lukim iumi gohed kamap strongfala Christian’?—1 Tim. 4:15.
Hao for Tinghae Long Wanem Iumi Savve Duim
3. Wanem nao wanfala samting wea bae mekem iumi luksavve long wanem iumi savve duim long kongregeson and tinghae long datwan?
3 Wanfala samting wea bae helpem iumi for luksavve long wanem iumi savve duim long kongregeson and tinghae long datwan, hem taem iumi followim nao samting wea “wakaman wea faithful and wise” and Governing Body bilong hem talem. (Readim Matthew 24:45-47.) Iumi mas lukluk long iumiseleva for lukim sapos iumi obeyim evri samting wea wakaman hia talem. Tingim diswan. Long staka year wea go pas finis, iumi kasem kaonsel abaotem kaleko wea iumi werem, lukluk bilong iumi, hapitaem wea iumi chusim, and for no lukluk long rabis samting long Internet. Waswe, iumi barava followim olketa kaonsel hia mekem iumi gohed fren gud witim Jehovah? Waswe long kaonsel for duim famili worship evritaem? Waswe, iumi markem wanfala evening for duim famili worship? Sapos iumi no marit, waswe, iumi markem taem for duim study seleva long Bible? Jehovah bae blessim iumi wanwan and famili bilong iumi sapos iumi followim wanem wakaman hia talem.
4. Wanem nao iumi mas tingim firstaem bifor iumiseleva disaedem samting?
4 Maet samfala sei hem gud nomoa for man seleva chusim wanem kaen hapitaem for hem savve duim, wanem kaen kaleko for hem werem, and wanem kaen lukluk for hem garem. Bat man wea dedicate finis and wea tinghae long wanem hem duim long kongregeson, hem bae no disaedem samting followim wanem hemseleva laekem. Bat bifor hem disaedem eni samting, hem mas tingim firstaem wanem nao tingting bilong Jehovah wea stap long Bible. Iumi mas tingim message long Bible hem olsem ‘lamp for leg bilong iumi and laet for road bilong iumi.’ (Ps. 119:105) Hem gud for iumi tingim tu hao olketa samting wea iumiseleva disaedem savve mekem pipol no tinghae long ministry wea iumi duim and hem savve spoelem tu olketa long kongregeson and olketa narawan.—Readim 2 Corinthians 6:3, 4.
5. Why nao iumi mas keakea for no followim tingting bilong iumiseleva?
5 “Tingting wea olketa son wea no obey garem” hem spoelem barava staka pipol gogo datkaen tingting hem olsem air wea iumi brithim wea stap evriwea. (Eph. 2:2) Sapos iumi garem kaen tingting olsem, iumi bae tingse iumi no needim eni kaonsel wea organization bilong Jehovah givim long iumi. Iumi no laek olsem Diotrephes wea ‘nating laek herem toktok bilong aposol John.’ (3 John 9, 10) Iumi mas keakea for no followim nomoa wanem iumiseleva laekem. Iumi mas keakea for no talem or duim eni samting wea showimaot iumi no obeyim faithful wakaman wea Jehovah iusim distaem. (Num. 16:1-3) Bat iumi mas tinghae long wei for duim wanem wakaman hia talem. Hem gud for iumi obeyim olketa wea leadim iumi long kongregeson and stap anda long olketa.—Readim Hebrews 13:7, 17.
6. Why nao iumi mas lukluk gud long living bilong iumi?
6 Nara samting wea bae helpem iumi for luksavve long wanem iumi savve duim long kongregeson and tinghae long datwan, hem nao for iumi lukluk gud long living bilong iumiseleva and duim wanem iumi fit for duim for ‘mekem iumi duim samfala samting moa long ministry’ and mekhae long Jehovah. (Rom. 11:13) Samfala regular pioneer. Samfala kamap missionary, traveling overseer and waka long Bethel. Staka brata and sista buildim olketa Kingdom Hall. Bat staka nara pipol bilong Jehovah waka hard for helpem famili bilong olketa gohed worshipim Jehovah and duim preaching waka evri week. (Readim Colossians 3:23, 24.) From iumi hapi tumas for duim wanem God laekem and waka hard for worshipim hem, iumi savve duim samting long organization bilong Jehovah.
Living Bilong Iumi Savve Mekem Iumi Duim Difren Samting Long Kongregeson
7. Long wanem wei nao living bilong iumi savve mekem iumi luksavve long wanem iumi fit for duim long kongregeson?
7 Hem important for iumi lukluk gud long living bilong iumi. Diswan bae mekem iumi savve wanem nao iumi fit for duim long kongregeson. Tingim diswan. Samting wea wanfala brata duim long kongregeson hem no semsem witim samting wea wanfala sista duim. Sapos iumi olo or young, sik, or sapos olketa nara samting kasem iumi, olketa samting hia savve mekem iumi luksavve long wanem iumi fit for duim long kongregeson. Proverbs 20:29 hem sei: “Olketa young wan luk gud tumas from olketa strong, and iumi respectim olketa olo from olketa garem white hair.” Maet olketa young wan long kongregeson strong for duim olketa bigfala waka bikos body bilong olketa strong, bat savve wea olketa olo garem from olketa laef longtaem savve helpem kongregeson. Jehovah kaen tumas long iumi dastawe iumi savve duim samting long organization bilong hem.—Acts 14:26; Rom. 12:6-8.
8. Wanem nao bae mekem iumi laek duim samfala samting moa long kongregeson?
8 Tingim wanfala tokpiksa wea bae helpem iumi for luksavve long wanem iumi fit for duim long kongregeson. Tufala really sista duim finis secondary skul and tufala garem semkaen living. Mami and dadi bilong tufala encouragem tufala for regular pioneer bihaen tufala finis skul. Wanfala hem pioneer bat narawan hem waka for selen. Wanem nao mekem tufala no disaedem sem samting? Tufala duim samting wea tufala seleva laekem. Iumi tu savve olsem. Iumi mas tingting strong long wanem nao iumi laek duim long organization bilong God. Waswe, iumi savve duim samfala samting moa for worshipim Jehovah and changem samfala samting long living bilong iumi mekem iumi fit for duim datwan?—2 Cor. 9:7.
9, 10. Wanem nao iumi shud duim sapos iumi stap nomoa long kongregeson and duim nomoa lelebet samting?
9 Waswe sapos iumi stap nomoa long kongregeson and duim nomoa lelebet samting? Paul raet olsem long olketa Christian long Philippi: “God duim samting wea hem hapi long hem taem hem strongim iufala for laek duim evri samting wea hem laekem.” Tru tumas, Jehovah savve helpem iumi for duim wanem hem laekem.—Phil. 2:13; 4:13.
10 Iumi shud askem Jehovah for mekem iumi duim wanem hem laekem. King David long Israel duim datwan. Hem prea olsem: “Jehovah, plis, iu teachim mi olketa wei bilong iu, mekem mi savve gud long olketa wei hia. Iu teachim mi mekem mi savve followim trufala toktok bilong iu bikos iu nao God bilong mi wea gohed for sevem mi. And mi gohed trustim iu olowe.” (Ps. 25:4, 5) Iumi tu savve duim sem samting taem iumi prea long Jehovah and askem hem for iumi duim wanem hem laekem. Taem iumi ting raonem hao Jehovah God and Jesus tinghae long wanem iumi duim for tufala, iumi barava tinghae long olketa tu. (Matt. 26:6-10; Luke 21:1-4) Taem iumi garem wei for tinghae olsem, iumi bae askem Jehovah for mekem iumi laek duim samfala samting moa long kongregeson. Profet Isaiah showimaot gudfala wei for iumi followim. Taem Jehovah askem hem: “Hu nao bae mi sendem and hu nao bae go for talemaot toktok bilong iumi?” Isaiah hem sei: “Mi long hia! Iu sendem mi.”—Isa. 6:8.
Duim Samting for Mekem Evriwan Lukim Iu Gohed Kamap Strongfala Christian
11. (a) Why nao olketa brata mas waka hard for kasem samfala waka moa long kongregeson? (b) Wanem nao wanfala brata mas duim mekem hem fit for duim samfala waka moa long kongregeson?
11 Long 2008 service year, 289,678 pipol nao baptaes. Diswan showimaot iumi needim staka brata for leadim kongregeson. Wanem nao wanfala brata mas duim firstaem? Hem mas waka hard for kasem olketa mark wea Bible putim for olketa ministerial servant and olketa elder. (1 Tim. 3:1-10, 12, 13; Titus 1:5-9) Wanem nao wanfala brata savve duim mekem hem kasem olketa mark hia? Hem mas go preach evritaem, duim gud olketa waka bilong hem long kongregeson, trae hard for givim olketa gudfala ansa long meeting and story gud witim olketa brata and sista. Taem hem duim olsem, datwan showimaot brata hia tinghae long wanem hem duim long kongregeson.
12. Wanem nao olketa young wan savve duim for showimaot olketa strong long truth?
12 Wanem nao olketa young brata savve duim for showimaot olketa gohed kamap strongfala Christian long kongregeson? Olketa savve waka hard for garem “bigfala savve and for savve gud long olketa wei bilong God” taem olketa lane abaotem Bible. (Col. 1:9) Taem olketa studyim gud Bible and go long olketa meeting evritaem and ansa long olketa meeting, datwan bae helpem olketa for gohed kamap strongfala Christian. Olketa young brata savve waka hard tu mekem olketa fit for kasem “chance for duim staka waka moa” long full-taem service for Jehovah. (1 Cor. 16:9) Man savve hapi and kasem staka blessing taem hem waka long full-taem service for Jehovah.—Readim Ecclesiastes 12:1.
13, 14. Wanem nao olketa sista savve duim for showimaot olketa tinghae long samting wea olketa duim long kongregeson?
13 Olketa sista tu savve showimaot olketa tinghae long preaching waka wea olketa duim wea mekem toktok long Psalm 68:11 kamap tru. Hem sei: “Jehovah seleva hem talem disfala toktok, olketa woman wea talemaot gud nius wanfala big army.” Wanfala nambawan samting wea olketa sista savve duim for showimaot olketa tinghae long wanem olketa duim long kongregeson, hem for teachim pipol for kamap disaepol. (Matt. 28:19, 20) So taem olketa sista iusim strong for duim ministry, olketa showimaot olketa tinghae long wanem olketa duim long kongregeson.
14 Paul raet olsem long Titus: “Olketa olo woman mas showimaot gudfala wei, . . . teachim gudfala samting, mekem olketa savve helpem olketa young woman for garem stretfala tingting for lovem hasband bilong olketa, for lovem pikinini bilong olketa, for garem stretfala tingting, keepim wei bilong olketa klin, duim waka long haos, garem gudfala wei, stap anda long hasband bilong olketa mekem no eniwan savve tok spoelem word bilong God.” (Titus 2:3-5) Olketa mature sista savve duim gudfala samting for olketa long kongregeson! Taem olketa sista respectim olketa brata wea leadim kongregeson and werem gudfala kaleko and garem gudfala lukluk wea fitim Christian, and chusim gudfala hapitaem, olketa showimaot gudfala wei for olketa narawan followim. Datwan bae showimaot olketa tinghae long wanem olketa duim long kongregeson.
15. Wanem nao olketa sista wea no marit maet duim from olketa feel olsem olketa stap seleva nomoa?
15 Samfala taem maet hem no isi for sista wea no marit for luksavve wanem hem savve duim long kongregeson. Wanfala sista hem sei: “Samfala taem mi feel olsem mi stap seleva nomoa.” Hem talem wanem nao helpem hem. Hem sei: “Prea and study helpem mi for luksavve moa long wanem mi savve duim long kongregeson. Mi study abaotem hao Jehovah ting long mi. Then mi waka hard for duim samting for helpem olketa narawan long kongregeson. From mi duim datwan, mi no tingim miseleva bat mi tingim narawan.” Long Psalm 32:8, Jehovah talem David olsem: “Bae mi givim advaes long iu and gohed for lukaftarem iu.” Tru tumas, Jehovah hem tingim evriwan wea worshipim hem. Hem tingim tu olketa sista wea no marit and hem helpem evri pipol bilong hem for tinghae long samting wea olketa savve duim long kongregeson.
Tinghae Long Wanem Iu Savve Duim Long Kongregeson!
16, 17. (a) Taem iumi letem Jehovah leadim iumi kam long organization bilong hem, why nao datwan hem nambawan samting? (b) Wanem nao iumi savve duim for showimaot iumi luksavve long spesol samting wea iumi savve duim long organization bilong Jehovah?
16 Jehovah nao leadim iumi wanwan for fren witim hem. Jesus hem sei: “Hard for eniwan kam long mi sapos Dadi wea sendem mi kam hem no leadim hem kam long mi firstaem.” (John 6:44) Tingim diswan. Nomata staka billion pipol stap long earth, iumi nao Jehovah leadim kam long organization bilong hem. Taem iumi letem Jehovah leadim iumi kam long organization bilong hem, datwan hem nambawan samting. Iumi stap gud distaem and iumi barava hapi tumas from iumi luksavve long wanem iumi savve duim long kongregeson!
17 Man wea raetem psalm hem sei: “Jehovah, mi laekem tumas for stap long haos bilong iu.” Hem sei olsem tu: “From mi stap insaed kongregeson bilong iu Jehovah, iu mekem mi stap sef from evri trabol and bae mi praisem iu.” (Ps. 26:8, 12) Trufala God hem luksavve iumi wanwan savve duim samting long organization bilong hem. Taem iumi gohed for followim wanem organization bilong Jehovah hem talem and iumi gohed duim staka samting long kongregeson, iumi bae luksavve long spesol samting wea iumi savve duim long organization bilong Jehovah.
Waswe, Iu Tingim Yet?
• Why nao iumi savve sei evri Christian savve duim samting long kongregeson?
• Long wanem wei nao iumi savve showimaot iumi tinghae long wanem iumi duim long kongregeson?
• Wanem nao olketa samting wea savve mekem iumi duim difren samting long kongregeson?
• Wanem nao olketa young wan and olketa bigman savve duim for showimaot olketa tinghae long wanem olketa duim long organization bilong God?
[Piksa long page 16]
Wanem nao olketa brata savve duim for kasem samfala waka moa long kongregeson?
[Piksa long page 17]
Wanem nao olketa sista savve duim for showimaot olketa tinghae long wanem olketa duim long kongregeson?