‘No Fraet for Talemaot Message Bilong God’
“God givim holy spirit long [olketa] and olketa nating fraet nao for talemaot message bilong God.”—ACTS 4:31.
1, 2. Why nao hem important tumas for duim gud ministry bilong iumi?
THRIFALA day bifor Jesus dae, hem tok olsem long olketa disaepol bilong hem: “Olketa bae talemaot disfala gud nius abaotem kingdom long evri ples long world mekem pipol long evri kantri mas herem. Bihaen datwan nao, world bae finis.” Bifor Jesus go ap long heven bihaen hem laef bak, hem talem olketa wea followim hem for ‘teachim pipol long evri kantri for kamap disaepol and for teachim olketa for followim evri samting wea hem laekem olketa for duim.’ Hem promis for stap witim olketa “go kasem taem wea world hem gogo for finis.”—Matt. 24:14; 26:1, 2; 28:19, 20.
2 Iumi Olketa Jehovah’s Witness busy for duim waka wea olketa long first century startim. Disfala waka for preach abaotem Kingdom and for helpem pipol kamap disaepol hem nao barava important waka bikos hem savve sevem pipol. Dastawe hem important tumas for iumi duim gud ministry bilong iumi! Long disfala study, iumi bae lanem hao taem holy spirit leadim iumi datwan helpem iumi for no fraet taem iumi duim ministry. Tufala study bihaen diswan storyim hao holy spirit bilong Jehovah savve helpem iumi for teach gud and for preach evritaem.
Iumi Needim Wei for No Fraet
3. Why nao iumi needim wei for no fraet for duim preaching waka?
3 Hem nambawan privilege for duim disfala waka for preach abaotem Kingdom wea God givim long iumi. Bat samfala taem hem no isi for duim datwan. Nomata samfala pipol willing for herem gud nius abaotem Kingdom bilong God, staka pipol distaem olsem pipol wea stap long taem bilong Noah. Jesus sei olketa “nating tinghae long samting wea Noah talemaot, gogo flood hem kam nomoa and evriwan draon nao.” (Matt. 24:38, 39) Samfala pipol tu mekfani long iumi or againstim iumi. (2 Pet. 3:3) Maet olketa bigman bilong gavman or religion, olketa wea iumi skul witim or waka witim, or famili bilong iumi tu againstim iumi. Nara samting tu, maet iumi garem samfala wik point olsem for feel shame or fraet nogud pipol les long iumi. Staka samting savve mekem hem no isi for iumi preach abaotem message bilong God. Dastawe iumi mas “no fraet” mekem iumi gohed for preach. (Eph. 6:19, 20) Wanem nao savve helpem iumi for no fraet?
4. (a) Wanem nao hem minim for no fraet? (b) Wanem nao strongim aposol Paul for no fraet for story long pipol long Thessalonica?
4 Datfala Greek word wea iumi transleitim “no fraet” hem minim “for tok stret.” Bat datwan no minim man hem tok raf long narawan. (Col. 4:6) Iumi savve tok stret, bat iumi laek for stap gud witim evriwan tu. (Rom. 12:18) Nara samting tu, nomata iumi mas no fraet taem iumi preachim gud nius abaotem Kingdom bilong God, iumi mas careful long wanem iumi talem nogud iumi mekem man feel nogud. Tru tumas, sapos iumi laek garem wei for no fraet, iumi mas waka hard for garem olketa nara wei tu. Bat for garem wei for no fraet olsem hem no from strong bilong iumiseleva. Bihaen ‘pipol tok nogud long aposol Paul and olketa fren bilong hem long Philippi,’ wanem nao ‘strongim olketa for no fraet’ for story long pipol long Thessalonica? Paul sei ‘God nao strongim olketa.’ (Readim 1 Thessalonians 2:2.) Jehovah God savve helpem iumi tu and strongim iumi for no fraet.
5. Wanem nao Jehovah duim for helpem Peter, John, and olketa nara disaepol for no fraet?
5 Taem “olketa bigman [wea rulim pipol] and olketa man wea teachim law” kwestinim aposol Peter and John, tufala sei: “Hem saed bilong iufala sapos iufala tingse hem stret long tingting bilong God for mifala obeyim iufala and no obeyim God. Bat hard tumas for mifala no storyim olketa samting wea mifala lukim and herem.” Taem Peter and John and olketa nara disaepol prea long God, olketa no askem God for stopem wei wea pipol spoelem olketa bat olketa ask olsem: “Plis Jehovah, herem nogud samting wea olketa sei bae olketa duim, and mekem olketa wakaman bilong iu no fraet for talemaot message bilong iu.” (Acts 4:5, 19, 20, 29) Wanem nao Jehovah duim? (Readim Acts 4:31.) Jehovah givim holy spirit for helpem olketa for no fraet. Holy spirit bilong God savve helpem iumi tu. So wanem nao iumi savve duim for kasem holy spirit bilong God and for datfala spirit leadim iumi taem iumi duim ministry?
Wanem Nao Savve Mekem Iumi for No Fraet?
6, 7. Hao nao man savve kasem holy spirit bilong God? Storyim samfala example.
6 Wei for man savve kasem holy spirit bilong God nao hem for ask stret long God for datwan. Jesus sei: “Iufala olketa man wea sin bat iufala givim olketa gudfala samting long olketa pikinini bilong iufala, iaman? Sapos olsem, Dadi bilong iufala long heven bae barava givim holy spirit long olketa wea askem hem tu!” (Luke 11:13) Tru tumas, iumi shud evritaem prea long God for hem givim holy spirit long iumi. Sapos iumi fraet for duim street witnessing, enitaem witnessing, or for duim bisnis territory, iumi savve prea long Jehovah for givim holy spirit long iumi and askem hem for helpem iumi for no fraet.—1 Thess. 5:17.
7 Hem nao samting wea wanfala Christian sista wea nem bilong hem Rosa duim.a Wantaem long ples wea Rosa waka, wanfala skul teacher wea hem waka witim hem readim report from narafala skul abaotem wei wea pipol raf tumas long olketa pikinini. Teacher hia barava feel nogud long wanem hem readim and hem tok big olsem, “Mae krangge, no eniting gud long world ia nao!” Rosa lukim hem gud chance nao for hem preach long woman hia. Wanem nao hem duim mekem hem no fraet for story? Rosa sei: “Mi prea long Jehovah for givim holy spirit for helpem mi.” Hem story gud witim woman hia and tufala plan for story moa long narataem. Tingim tu wanfala pikinini long New York City wea 5 year wea nem bilong hem Milane. Milane sei: “Evritaem bifor mi go long skul mami prea long Jehovah for mi.” Wanem nao hem prea abaotem? Hem askem Jehovah for helpem Milane for no fraet for saedem Jehovah and for story abaotem hem! Mami bilong Milane sei: “Diswan barava helpem Milane for storyim biliv bilong hem abaotem birthday and olketa holiday bilong world and for no joinim olketa celebration hia taem olketa kamap.” Olketa example hia showimaot prea savve barava helpem iumi for no fraet!
8. Wanem nao iumi lanem from profet Jeremiah abaotem wei for no fraet?
8 Tingim tu wanem nao helpem profet Jeremiah for no fraet. Taem Jehovah markem Jeremiah for kamap profet for olketa nation, hem sei long Jehovah: “Mi young tumas and mi no savve story gud.” (Jer. 1:4-6) Bat gogo from Jeremiah strong tumas for preach pipol ting long hem olsem man for talemaot nogud samting nomoa wea bae happen. (Jer. 38:4) Jeremiah no fraet for talemaot judgment message bilong Jehovah for winim 65 year and bikos hem nating fraet for preach, staka pipol long Israel savve abaotem hem. Dastawe taem Jesus kam long earth 600 year bihaen datwan, samfala pipol tingse Jesus nao Jeremiah wea laef bak moa bikos hem no fraet for preach. (Matt. 16:13, 14) Wanem nao mekem Jeremiah no shame for toktok nomata long firstaem hem fraet for duim disfala waka? Hem sei: “[Message bilong God] hem olsem fire wea bone insaed long mi and mi feel olsem evri bon bilong mi hem bone. Mi trae for holem insaed long mi bat hem hard nao.” (Jer. 20:9) Tru tumas, message bilong Jehovah strongim Jeremiah and mekem hem for laek story nao.
9. Hao nao message bilong God savve mekem iumi duim sem samting olsem Jeremiah duim?
9 Aposol Paul sei olsem long olketa Hebrew Christian: “Message bilong God hem laef and garem paoa and hem sharp winim naef for faet wea hem sharp long tufala saed. Hem savve go deep insaed long man and lukluk insaed long hem and aotsaed long hem. Hem go deep insaed olketa join and bon bilong man. Hem fit for luksavve long tingting bilong man and wanem hem laek tumas for duim.” (Heb. 4:12) Message bilong God savve mekem iumi for duim sem samting olsem Jeremiah duim. Tingim, nomata God iusim olketa man for raetem Bible, hem no wisdom bilong man wea insaed long Bible bikos God iusim holy spirit for mekem olketa raetem tingting bilong hem. Long 2 Peter 1:21, hem sei: “No eni profesi wea olketa profet talem hem kam from olketa seleva, bat holy spirit mekem olketa for talemaot toktok bilong God.” Taem iumi duim gud study seleva long Bible, iumi bae tingim evritaem message long Bible wea holy spirit helpem olketa man for raetem. (Readim 1 Corinthians 2:10.) Datfala message savve “olsem fire wea bone” insaed long iumi wea mekem iumi laek tumas for storyim datwan long pipol.
10, 11. (a) For mekem iumi no fraet for talemaot message bilong God, wei bilong iumi for studyim Bible mas hao? (b) Wanem nao plan bilong iu for mekem wei wea iu study seleva kamap gud?
10 Sapos iumi laekem Bible for barava helpem iumi, iumi mas studyim long wei wea message long Bible bae kasem heart bilong iumi. Tingim profet Ezekiel. Hem lukim vision wea Jehovah givim wanfala scroll long hem. Jehovah talem hem for kaikaim disfala scroll wea garem strongfala message wea hem mas talem long pipol wea no laek herem. Ezekiel mas kaikaim datfala message mekem hem barava stap insaed long hem. Sapos hem duim olsem, datwan bae mekem waka bilong hem for talemaot datfala message hem swit naes olsem honey.—Readim Ezekiel 2:8 go kasem 3:4, 7-9.
11 Iumi tu kasem sem samting olsem Ezekiel. Staka pipol distaem no laek herem message long Bible. Sapos iumi laek for gohed talemaot message bilong God, hem important tumas for iumi studyim Bible long wei wea hem bae mekem iumi minim gud and bilivim datwan. Hem mas kamap wei bilong iumi for studyim Bible evritaem, and no long taem wea iumi free nomoa. Iumi laek for garem sem feeling olsem man wea raetem disfala psalm: “Jehovah, iu nao strongfala ples bilong mi for haed and iu nao sevem mi. Mi laekem toktok bilong mi and samting wea stap long heart bilong mi for mas mekem iu hapi.” (Ps. 19:14) Hem important tumas for iumi iusim taem for ting raonem wanem iumi readim long Bible mekem olketa tru samting hia barava kasem heart bilong iumi! Tru tumas, iumi shud waka hard for kamap gud long wei wea iumi study seleva.b
12. Hao nao olketa Christian meeting helpem iumi for followim holy spirit?
12 Nara samting wea iumi savve duim for kasem gud samting from holy spirit bilong Jehovah hem for “tingim narawan mekem iumi evriwan savve showimaot love and duim olketa gudfala samting, and for no lusim wei for hipap tugeta.” (Heb. 10:24, 25) Taem iumi waka hard for go evritaem long olketa meeting, lisin gud, and followim wanem iumi lanem, hem olketa gudfala wei for letem holy spirit leadim iumi. Tru tumas, Jehovah iusim holy spirit bilong hem for leadim kongregeson!—Readim Revelation 3:6.
Gud Samting wea Iumi Kasem From Iumi No Fraet
13. Wanem nao iumi lanem from preaching waka wea olketa Christian long first century duim?
13 No eni nara samting long universe hem strong winim holy spirit, and hem savve helpem olketa man for duim wanem Jehovah laekem. From olketa Christian long first century kasem holy spirit, olketa preach long staka ples. Olketa preach abaotem gud nius “long evri difren kaen pipol long world.” (Col. 1:23) From staka long olketa hia “no skul gud,” diswan mekem iumi luksavve holy spirit nao barava helpem olketa for duim disfala waka.—Acts 4:13.
14. Wanem nao savve helpem iumi for ‘showimaot long laef bilong iumi holy spirit hem leadim iumi’?
14 Taem iumi letem holy spirit leadim iumi long laef bilong iumi, datwan strongim iumi tu for no fraet taem iumi duim ministry. Olketa gud samting wea iumi kasem from iumi evritaem prea long God for holy spirit, duim gud study seleva, ting raonem gud wanem iumi readim, and go evritaem long olketa Christian meeting savve helpem iumi ‘showimaot long laef bilong iumi holy spirit hem leadim iumi.’ (Rom. 12:11) Tingim ‘wanfala Jew from Alexandria wea nem bilong hem Apollos. Hem savve tumas for story.’ Bible hem sei olsem abaotem hem: “From God givim holy spirit long hem, hem barava strong for preach and teachim pipol stret samting abaotem Jesus.” (Acts 18:24, 25) Sapos ‘iumi showimaot long laef bilong iumi holy spirit hem leadim iumi,’ datwan savve mekem iumi no fraet for preach long haos tu haos and for duim enitaem witnessing.—Rom. 12:11.
15. Taem iumi no fraet for preach, hao nao datwan helpem iumi?
15 Taem iumi no fraet for preach, datwan savve helpem iumi long staka samting. Hem helpem iumi for garem gudfala tingting bikos iumi luksavve waka wea iumi duim hem important and savve helpem pipol. Hem mekem iumi laek tumas for preach bikos taem iumi duim gud ministry bilong iumi, iumi barava hapi. And hem mekem iumi gohed strong for duim disfala waka bikos iumi luksavve pipol mas herem gud nius bifor hem tu leit.
16. Sapos iumi no strong tumas distaem for duim ministry, wanem nao iumi mas duim?
16 Waswe sapos iumi no strong tumas distaem for duim ministry olsem bifor? Sapos olsem, iumi shud lukluk gud long iumiseleva. Paul sei: “Iufala mas gohed lukluk gud long iufala seleva for savve sapos iufala biliv yet or nomoa, and gohed lukluk long wanem kaen man nao iufala.” (2 Cor. 13:5) Tingim diswan: ‘Waswe, laef bilong mi showimaot holy spirit leadim mi? Waswe, mi prea long Jehovah for givim holy spirit long mi? Waswe, samting wea mi talem long prea showimaot mi laekem God for helpem mi duim wanem hem laekem? Waswe, mi talem Jehovah mi tinghae long ministry wea hem askem mi for duim? Waswe, mi study seleva evritaem? Haomas taem nao mi iusim for ting raonem wanem mi readim and herem? Waswe, mi tekpart long olketa kongregeson meeting?’ Taem iu ting raonem olketa kwestin hia, diswan savve helpem iu for luksavve wanem nao samfala wik point bilong iu and wanem nao savve helpem iu for winim datwan.
Holy Spirit Bae Helpem Iu for No Fraet
17, 18. (a) Preaching waka wea iumi duim distaem hem kamap hao big? (b) Wanem nao savve helpem iumi for “no fraet” for talemaot gud nius abaotem Kingdom bilong God?
17 Bihaen Jesus laef bak, hem sei long olketa disaepol: “Taem iufala kasem holy spirit datwan bae strongim iufala, and iufala bae talem pipol abaotem mi long Jerusalem and long evri ples long Judea and long Samaria and long evri farawe ples long earth.” (Acts 1:8) Datfala preaching waka wea olketa duim long datfala taem hem kamap barava big tumas distaem. Winim 7 million Witness bilong Jehovah preach abaotem Kingdom long winim 230 kantri and olketa iusim klosap wan and haf billion hour evri year for duim ministry. Hem nambawan privilege for duim disfala waka wea bae no kamap moa!
18 Holy spirit bilong God leadim preaching waka distaem olsem long first century tu. Sapos iumi letem holy spirit leadim iumi, iumi bae “no fraet” for duim ministry. (Acts 28:31) So letem holy spirit leadim iumi taem iumi talemaot gud nius abaotem Kingdom bilong God!
[Olketa Footnote]
a Mifala changem samfala nem.
b For kasem gudfala samting taem iu study seleva and duim Bible reading, lukim buk Kasem Gud Samting From Theocratic Ministry Skul Education, long tufala chapter wea garem title, “Waka Hard Long Wei for Read” and “Study Givim Reward,” long page 21-32.
Wanem Nao Iu Lanem?
• Why nao iumi needim wei for no fraet for talemaot message bilong God?
• Wanem nao helpem olketa disaepol long first century for no fraet for preach?
• Wanem nao iumi savve duim mekem iumi no fraet for preach?
• Wanem gud samting nao iumi kasem from iumi no fraet for preach?
[Piksa long page 7]
Wanem nao dadi and mami savve duim for helpem pikinini no fraet?
[Piksa long page 8]
Iu savve talem shortfala prea for helpem iu no fraet taem iu duim ministry