Samfala Ask Olsem . . .

Waswe, Jesus hem Michael Datfala Chief Angel?

▪ Ansa hem ia. Long staka ples pipol savve garem staka nem. Hem semsem tu witim pipol wea Bible story abaotem olketa. Tingim, nara nem bilong Jacob hem Israel. (Genesis 35:10) Aposol Peter garem faevfala nem, Symeon, Simon, Peter, Cephas, and Simon Peter. (Matthew 10:2; 16:16; John 1:​42; Acts 15:7, 14) Hao nao iumi savve Michael hem nara nem bilong Jesus? Tingim olketa Scripture wea storyim datwan.

Bible storyim datfala maeti spirit wea nem bilong hem Michael faevfala taem. Hem stap thrifala taem long buk bilong Daniel. Long Daniel 10:​13, 21, hem storyim Michael wea hem “main wan long olketa prince” and “prince bilong iufala pipol,” hem sevem wanfala angel wea go for duim wanfala waka. And tu, long Daniel 12:​1, iumi lanem hao long taem bilong end, ‘Michael wea hem datfala nambawan prince bilong peace bae gohed stand for saed bilong olketa son bilong pipol bilong iu.’

Long Revelation 12:7, hem storyim moa “Michael and olketa angel bilong hem,” olketa faet long wanfala important war. And long datfala war, olketa aotem Satan and olketa nogud angel bilong hem from heven.

So long olketa scripture wea iumi storyim finis, hem showimaot Michael hem wanfala angel for faet, wea faet for protectim pipol bilong God, and hem faet againstim tu Satan wea hem enemy bilong Jehovah.

Long Jude verse 9 hem iusim disfala toktok “chief angel” for Michael. Bible hem evritaem iusim “chief angel” for wanfala man nomoa. Nara scripture wea storyim chief angel nomoa hem long 1 Thessalonians 4:​16. Long there, Paul hem storyim Jesus wea laef bak taem hem sei: “Lord bae kam daon from heven witim wanfala strong singaot, witim voice bilong wanfala chief angel and witim trumpet bilong God.” So Jesus Christ nao hem datfala chief angel.

Taem iumi tingim samting wea iumi storyim, wanem nao iumi lanem? Jesus Christ nao hem Michael datfala chief angel. Long tufala nem hia, Michael (wea minim “Hu Nao Olsem God?”) and Jesus (wea minim “Jehovah Hem Sevem Iumi”) hem mekhae long waka wea Jesus duim for sapotim haefala rul bilong God. Long Philippians 2:​9 hem sei: “God givim [Jesus wea kasem glory] wanfala barava hae position long hem and givim hem datfala nem wea hae winim evri nara nem.”

Hem important for savve, laef bilong Jesus hem no start taem hem born long earth. Bifor Jesus hem born, wanfala angel hem talem Mary hao holy spirit bae mekem hem for bornem wanfala pikinini wea Mary mas nemim hem Jesus. (Luke 1:​31) Taem Jesus duim ministry bilong hem, hem evritaem storyim laef bilong hem long heven bifor.​—John 3:​13; 8:​23, 58.

So Jesus wea laef long heven bifor, hem nao Michael datfala chief angel. Bihaen Jesus laef bak and go long heven, hem startim moa waka bilong hem olsem Michael datfala chief angel for “mekhae long God wea hem Dadi” bilong iumi.​—Philippians 2:​11.