Kontrolem Kros Mekem Iu ‘Gohed for Winim Nogud Samting’

“Iufala mas no changem bak nogud samting wea narawan duim, . . . bat gohed for duim gud samting mekem iufala savve winim datwan.”​—⁠ROM. 12:​19, 21.

1, 2. Olketa Witness wea go long dedication bilong wanfala branch showimaot wanem gudfala example?

THIRTI foa Jehovah’s Witness wea go for dedication bilong wanfala branch office mas weit bikos plane wea olketa kam long hem garem problem. Olketa shud stop for wan hour nomoa for plane hia refillim petrol, bat sorre tumas, olketa weit for 44 hour long airport wea stap farawe from taon. Ples hia no garem gudfala kaikai, wata, and toilet. Staka pipol wea kam long datfala plane barava kros and tok spoelem olketa wakaman long airport. Bat olketa brata and sista kwaet nomoa.

² Gogo, olketa Witness kasem ples wea dedication program gohed bat olketa herem end long program nomoa. Nomata olketa taed, olketa hapi for stap bihaen program hem finis for story witim olketa brata long datfala ples. Bihaen, olketa herem wanfala man long datfala plane talem naesfala koment abaotem olketa Witness hia bikos olketa patient and kontrolem kros bilong olketa. Hem sei long samwan long datfala airline: “Sapos 34 Christian no stap long datfala airport, wanfala big trabol mas happen.”

Iumi Stap Long World wea Pipol Kros Tumas

3, 4. (a) Wanem nao happen from pipol kros tumas, and diswan start kam long wanem taem? (b) Waswe, Cain fit for kontrolem kros bilong hem? Storyim kam.

³ From world hem nogud tumas, datwan savve mekem pipol kros. (Eccl. 7:⁠7) Staka taem diswan mekem pipol heitim narawan and raf tumas. Pipol long wanfala ples faetem pipol long nara ples, pipol long sem kantri faetem olketa seleva, and olketa problem long famili savve mekem pipol raoa tu. Diskaen wei for kros and raf hem start kam bifor yet. Cain, firstborn son bilong Adam and Eve, killim dae brata bilong hem Abel bikos hem jealous and kros long hem. Jehovah sei bae hem blessim Cain sapos hem kontrolem kros bilong hem, bat nomata olsem, Cain duim barava nogud samting.​—⁠Readim Genesis 4:​6-8.

⁴ Nomata Cain no perfect, hem savve disaed for duim gudfala samting. Hem fit for kontrolem kros bilong hem. Hem duim nogud samting dastawe hem guilty. Iumi tu no perfect, so hem no isi for kontrolem kros bilong iumi. Olketa nara big problem tu savve mekem iumi for wari distaem from ‘olketa nogud samting wea kamap.’ (2 Tim. 3:⁠1) Iumi savve feel nogud from hem no isi for kasem selen. Olketa police and samfala organization wea savve helpem famili sei wei for kros and for raf long narawan long famili hem kamap big long taem wea hem hard for pipol kasem selen.

5, 6. Hem isi tumas for wei bilong pipol long world mekem iumi hao?

⁵ Staka pipol “lovem olketa seleva,” “praod tumas,” and “raf tumas.” Dastawe hem isi tumas for wei bilong pipol olsem for mekem iumi garem olketa nogud wei and for kros tu. (2 Tim. 3:​2-5) Staka movie and program long television showimaot hem gud nomoa for man changem bak nogud samting and for man raf taem hem stretem problem. Olketa mekem man wea lukluk laek for lukim main actor killim dae rabis man nomata hem raf tumas taem hem duim datwan.

⁶ Olketa program olsem no mekhae long wei bilong God bat mekhae long “tingting bilong pipol long disfala world” from Satan rulim world and hem kros tumas. (1 Cor. 2:​12; Eph. 2:2; Rev. 12:12) World mekhae long wanem body laekem and hem againstim holy spirit bilong God. Wanfala main teaching bilong Christ nao hem for no changem bak nogud samting long man wea duim nogud samting long iumi. (Readim Matthew 5:​39, 44, 45.) Hao nao iumi savve barava followim olketa teaching bilong Jesus?

Olketa Gud and Nogud Example

7. Wanem nao happen taem Simeon and Levi no kontrolem kros bilong tufala?

⁷ Bible talem staka kaonsel abaotem wei for kontrolem kros and hem storyim tu wanem savve happen taem man kontrolem kros or nomoa. Tingim samting wea happen taem Simeon and Levi, tufala son bilong Jacob, duim nogud samting long Shechem bikos hem spoelem Dinah, sista bilong olketa. Olketa “barava feel nogud and gogo olketa kros tumas.” (Gen. 34:⁠7) Then olketa nara son bilong Jacob spoelem taon wea Shechem stap and tekem evri samting witim olketa woman and olketa pikinini. Olketa praod tumas dastawe olketa duim diswan. Long tingting bilong olketa, Shechem spoelem olketa and Jacob, dadi bilong olketa. Bat hao nao tingting bilong Jacob abaotem wanem olketa duim?

8. Wanem nao iumi lanem from story bilong Simeon and Levi?

⁸ Jacob mas sorre tumas long samting wea kasem Dinah, nomata olsem, hem tok strong long olketa son bilong hem bikos olketa duim barava nogud samting. Simeon and Levi tingse samting wea olketa duim hem gud nomoa, dastawe olketa sei: “Waswe, hem olraet for eniwan mekem sista bilong mifala for olsem jury nomoa?” (Gen. 34:31) Jehovah tu hem barava nating hapi long wanem olketa duim. Dastawe bihaen staka year, Jacob talem profesi hao olketa wea kam from laen bilong Simeon and Levi bae stap nomoa long land bilong olketa nara tribe bilong Israel. (Readim Genesis 49:​5-7.) Tru tumas, from olketa no kontrolem kros bilong olketa, God witim dadi bilong olketa no hapi long olketa.

9. Wanem taem nao David klosap duim nogud samting from hem kros tumas?

⁹ King David no olsem. Hem showimaot gudfala wei. Hem no changem bak nogud samting nomata hem fit for duim datwan. (1 Sam. 24:​3-7) Bat wantaem hem klosap duim nogud samting from hem kros tumas. Nabal, wanfala rich man, singaot nogud long olketa man bilong David nomata olketa protectim sheepsheep and olketa wakaman bilong hem. From David feel nogud long wanem Nabal talem, hem redi for killim hem. Taem David and olketa man bilong hem gogo for faetem Nabal and famili bilong hem, wanfala young man go talem Abigail, waef bilong Nabal, and askem hem for duim samting. Abigail kwiktaem redyim staka kaikai and go for lukim David. Abigail hambol and sei sorre from wei bilong Nabal nogud tumas and hem talem David for fraet long Jehovah. David start for tingting gud and sei: “Thankiu nao iu stopem mi tuday for no killim dae eniwan.”​—⁠1 Sam. 25:​2-​35.

Tingting Bilong Olketa Christian

10. Wanem nao tingting bilong olketa Christian abaotem wei for changem bak nogud samting?

¹⁰ Story bilong Simeon and Levi showimaot Jehovah barava no laekem man wea no kontrolem kros and wea raf. Bat story bilong David and Abigail showimaot Jehovah blessim man wea trae hard for stap gud witim narawan. Aposol Paul sei: “Traem best bilong iufala for stap gud witim olketa narawan. Iufala mas no changem bak nogud samting wea narawan duim, bat letem God nao for judgem olketa, bikos olketa Holy Raeting talem finis: ‘Jehovah hem sei, mi nao bae changem bak nogud samting. Mi nomoa savve duim diswan.’ Bat ‘sapos enemy bilong iufala hem hangre, givim kaikai long hem. Sapos hem laek drink, givim wata long hem. Diswan bae hem olsem iufala hipimap olketa hot sakol long hed bilong hem.’ No letem nogud samting for spoelem iufala, bat gohed for duim gud samting mekem iufala savve winim datwan.”​—⁠Rom. 12:​18-​21.a

11. Wanem nao helpem wanfala sista for kontrolem kros bilong hem?

¹¹ Iumi savve followim datfala kaonsel. Tingim samting wea kasem wanfala sista. Hem story long wanfala elder abaotem niu boss bilong hem. Hem sei boss hia favorim narawan and no kaen. Sista hia kros long boss and laek for finis from waka. Elder talem hem for tingting gud firstaem. Elder luksavve from sista kros tumas long boss, dastawe boss no kaen long hem. (Titus 3:​1-3) Elder sei nomata sapos gogo sista hia kasem nara waka, bae hem mas lusim wei bilong hem for kros kwiktaem. Hem talem sista samting wea hem laekem boss for duim long hem, hem tu mas duim long boss, olsem Jesus lanem iumi. (Readim Luke 6:​31.) Sista sei bae hem trae hard for duim datwan. Wanem nao happen? Gogo boss start for kaen long sista, and thankiu tu for waka wea hem duim.

12. Sapos wanfala Christian no kaen long iumi, why nao hem isi for iumi feel nogud?

¹² Sapos man long world mekem problem olsem kamap for iumi, iumi shud no sapraes. From staka samting long world bilong Satan hem no stret, iumi mas kontrolem kros bilong iumi. (Ps. 37:​1-​11; Eccl. 8:​12, 13; 12:​13, 14) Bat taem iumi garem problem witim Christian brata or sista, datwan savve mekem iumi feel nogud tumas. Wanfala sista sei: “Taem mi kam insaed long truth and luksavve pipol bilong Jehovah no perfect, datwan barava spoelem mi.” Taem iumi lusim world wea pipol no showimaot love, iumi laekem evriwan long kongregeson for kaen long narawan. Dastawe sapos samwan long kongregeson talem or duim samting wea no fitim wanfala Christian, iumi savve feel sorre or kros tumas. And sapos wanfala elder or ministerial servant nao duim datwan, iumi savve feel nogud tumas. Maet iumi ting olsem: ‘Hao nao olketa samting olsem savve happen insaed organization bilong Jehovah?’ Bat semkaen samting tu happen long samfala anointed Christian long taem bilong olketa aposol. (Gal. 2:​11-​14; 5:​15; Jas. 3:​14, 15) Sapos datwan kasem iumi, wanem nao iumi shud duim?

13. Hao nao iumi savve stretem problem, and why nao iumi mas duim olsem?

¹³ Sista wea iumi storyim sei: “Mi start for prea for eniwan wea mekem mi feel nogud. Datwan barava helpem mi.” Olsem iumi readim finis, Jesus lanem iumi for prea for olketa wea spoelem iumi. (Matt. 5:​44) Dastawe iumi mas prea for olketa long kongregeson! Olsem wanfala dadi wea laekem pikinini for lovem narawan long famili, Jehovah tu laekem pipol bilong hem for fren gud tugeta. Bae iumi hapi tumas long future taem iumi stap gud witim narawan for olowe dastawe Jehovah lanem iumi for stap gud distaem. Hem laekem iumi for wan mind for duim waka bilong hem. So taem iumi garem problem witim narawan, hem gud for iumi stretem or “forgetim” and gohed for wan mind. (Readim Proverbs 19:11.) Taem iumi garem problem witim narawan, iumi mas no lusim kongregeson. Bat iumi mas helpem narawan for stap sef long ‘hand bilong Jehovah for olowe.’​—⁠Deut. 33:⁠27.

Gud Samting Kamap Taem Iumi Kaen

14. Wanem nao savve helpem iumi for winim Satan?

¹⁴ From Satan and olketa demon laek spoelem waka for talemaot gud nius, olketa trae hard for mekem olketa famili and kongregeson no hapi. Olketa trae for mekem problem kamap mekem iumi faetem iumiseleva. (Matt. 12:25) Dastawe hem gud for iumi followim kaonsel wea Paul talem. Hem sei: “Wanfala slave bilong Lord no need for faet, bat mas kaen long evriwan.” (2 Tim. 2:​24) No forgetim hao “iumi no faetem man, bat iumi faetem . . . olketa rabis spirit.” So for winim disfala faet, iumi mas werem evri samting for faet wea God hem givim witim “sandol bilong gud nius bilong peace.”​—⁠Eph. 6:​12-​18.

15. Taem pipol long world trae for spoelem iumi, iumi mas hao?

¹⁵ Olketa enemy bilong Jehovah duim rabis samting againstim pipol bilong hem wea stap gud. Samfala barava raf long Olketa Jehovah’s Witness. Olketa narawan tok spoelem iumi long kot or long niuspepa. Jesus talem olketa disaepol diswan bae happen. (Matt. 5:​11, 12) Long taem olsem, iumi mas hao? ‘Sapos eniwan duim or talem nogud samting long iumi, iumi mas no changem bak.’​—⁠Rom. 12:17; readim 1 Peter 3:​16.

16, 17. Wanem test nao kasem wanfala kongregeson?

¹⁶ Nomata Satan duim enikaen samting for spoelem iumi, iumi savve givim gudfala witness long pipol taem iumi ‘gohed for duim gud samting mekem iumi savve winim nogud samting.’ Long wanfala island long Pacific, wanfala kongregeson rentim hall for Memorial. Taem olketa bigman long wanfala church herem diswan, olketa talem evriwan long church for hipap long datfala hall long taem for Memorial. Bat boss bilong olketa police talem olketa bigman bilong church for lusim hall bifor taem bilong Memorial. Nomata olsem, long taem wea Memorial shud start, evriwan long datfala church stap yet and duim service bilong olketa.

¹⁷ Taem police redi for aotem evriwan from datfala hall, president bilong church sei long wanfala elder: “Waswe, iufala planim eni spesol samting for tunaet?” Elder hia story abaotem Memorial and datfala man sei: “Sei, mi nating savve nomoa!” Then nomoa wanfala policeman sei: “Bat mifala talem iufala finis long morning!” Bigman bilong church luk go long elder and smile taem hem sei: “So wanem nao bae iufala duim? Staka pipol nao insaed long hall. Waswe, bae iu talem police for raosem mifala?” Long kleva wei, hem trae for mekem hem luk olsem olketa Witness nao laek spoelem olketa! Wanem nao olketa brata duim?

18. Wanem nao olketa brata duim taem problem kamap? Wanem nao happen from olketa duim datwan?

¹⁸ Olketa Witness willing for letem church duim service bilong olketa for haf hour, then bihaen olketa bae duim Memorial. Church service hia hem ovataem, nomata olsem, bihaen evriwan go, olketa brata duim Memorial. Long next day, gavman markem wanfala komiti for lukluk long wanem nao happen. Bihaen olketa herem full story, komiti talem church for announcem hao bigman bilong church nao startim problem, no olketa Witness. Komiti thankiu tu long Olketa Jehovah’s Witness bikos olketa patient long datfala hard taem. From olketa Witness traem best for “stap gud witim olketa narawan,” gud samting nao kamap.

19. Wanem tu savve helpem iumi for stap gud witim narawan?

¹⁹ Iumi savve stap gud tu witim narawan taem iumi talem kaenfala toktok. Study bihaen diswan bae storyim wanem hem minim for talem kaenfala toktok and hao iumi savve duim datwan.

[Footnote]

Waswe, Iu Savve Minim Kam?

• Why nao pipol long world savve kros tumas?

• Hu nao Bible storyim wea kontrolem kros and no kontrolem kros, and wanem nao kamaot from datwan?

• Sapos wanfala brata or sista mekem iumi feel nogud, wanem nao iumi shud duim?

• Taem pipol long world trae for spoelem iumi, iumi mas hao?

[Piksa long page 16]

Simeon and Levi no kontrolem kros bilong tufala

[Piksa long page 18]

Wei for kaen long narawan savve helpem hem for showim gudfala wei