Kwestin From Reader
Why nao Jesus savve talem wanfala woman wea sin, hem kasem forgiveness?—Luke 7:37, 48.
Taem Jesus kaikai long haos bilong Simon, wanfala Pharisee, wanfala woman “kam nildaon bihaen long Jesus.” Hem gohed krae and tias bilong hem tuwetem leg bilong Jesus and hem draem witim hair bilong hem. Hem kissim leg bilong Jesus and oilim tu witim oil wea smel naes. Bible sei hem “wanfala olobaot woman” wea sin. Iumi evriwan born sin, bat staka taem Bible iusim disfala word sin for storyim barava nogud sin wea wanfala man gohed for duim. Luk olsem datfala woman hem wanfala olobaot woman. Jesus sei long datfala woman: “Mi forgivim olketa sin bilong iu.” (Luke 7:36-38, 48) Wanem nao Jesus minim taem hem talem datwan? From hem no givim yet laef bilong hem olsem price for sevem pipol, hao nao hem savve forgivim sin bilong datfala woman?
Bihaen datfala woman tuwetem leg bilong Jesus and oilim, Jesus talem long Simon tokpiksa for minim wanfala important samting. Jesus sei sin wea iumi garem hem olsem wanfala kaon wea iumi no fit for peim. Hem talem Simon: “Tufala man kaon long wanfala man. Wanfala hem kaonem faev handred denarii and narawan kaonem fifti denarii. Bat taem tufala no savve changem kaon bilong olketa, hem willing nomoa for forgivim tufala. So hu long tufala hia nao bae barava lovem disfala man?” Simon sei long hem: “Ating man wea kaonem big selen nao bae barava lovem hem.” Jesus sei long hem: “Hem nao ia.” (Luke 7:41-43) Iumi evriwan mas obeyim God, so taem iumi no obeyim hem and sin, iumi garem kaon wea iumi no fit for peim. Dastawe iumi garem bigfala kaon. Jehovah hem olsem man wea iumi kaonem selen long hem and hem willing for peim olketa kaon bilong iumi. Dastawe Jesus encouragem olketa wea followim hem for prea long God and askem hem: “Forgivim sin [kaon] bilong mifala, from mifala tu forgivim olketa wea sin [kaon] againstim mifala.” (Matt. 6:12) Luke 11:4 talem tu olketa kaon minim olketa sin.
Long bifor, wanem nao mekem God savve forgivim sin bilong olketa man? God hem garem olketa mark saed long samting wea stret and no stret. So panis bilong sin hem dae. Dastawe from Adam sin, hem mas dae. Bat God givim Law for olketa Israelite mekem hem savve forgivim sin bilong olketa sapos olketa sakrifaesim animal long hem. Aposol Paul sei: “Law hem sei blood savve mekem staka samting for kamap klin, and God no savve forgivim eniwan sapos no eni blood kapsaet.” (Heb. 9:22) Olketa Jew no savve long eni nara wei moa for God forgivim sin bilong olketa. Dastawe olketa wea stap long taem bilong Jesus no hapi long wanem hem talem long datfala woman. Olketa wea sidaon witim Jesus tingting olsem: “Wanem kaen man nao diswan wea hem savve forgivim sin bilong nara man?” (Luke 7:49) Hao nao Jesus savve forgivim olketa bigfala sin bilong datfala woman?
Bihaen Adam and Eve sin, Jehovah talem firstfala profesi wea sei plan bilong hem for wanfala “pikinini” bae kam, wea Satan and olketa “pikinini” bilong hem bae killim leg bilong hem. (Gen. 3:15) Datwan happen taem olketa enemy bilong God killim dae Jesus. (Gal. 3:13, 16) Christ pourimaot blood bilong hem olsem price for sevem iumi from sin and dae. No eni samting savve stopem plan bilong Jehovah, so taem hem talem profesi long Genesis 3:15, long tingting bilong hem, hem olsem Jesus givim finis laef bilong hem olsem price for sevem pipol. From datwan, hem savve forgivim olketa wea showimaot faith long olketa promis bilong hem.
Bifor Christ hem kam, Jehovah ting long samfala man olketa raeteous. Samfala nao, Enoch, Noah, Abraham, Rahab, and Job. Olketa showimaot faith long olketa promis bilong God. James sei: “Long tingting bilong Jehovah, Abraham hem raeteous bikos hem showimaot faith long hem.” James sei moa: “Long sem wei tu, God ting long Rahab wea olobaot hem raeteous bikos long wanem hem duim.”—Jas. 2:21-25.
King David duim samfala big sin, bat hem showimaot strongfala faith long God and hem repent evritaem. Bible sei: “God sendem [Jesus] for dae olsem wanfala sakrifaes mekem olketa man wea garem faith long blood bilong hem savve fren bak witim God. God hem duim diswan for showimaot hem raeteous bikos long bifor kam hem forgivim pipol wea duim sin and hem patient witim olketa. Long distaem tu God laek for showimaot hem raeteous taem hem ting long man wea garem faith long Jesus olsem hem raeteous.” (Rom. 3:25, 26) Jehovah savve forgivim sin bilong David and long semtaem duim samting wea stret bikos long future, Jesus bae dae olsem wanfala sakrifaes.
Woman wea oilim leg bilong Jesus hem olsem tu. Hem woman wea olobaot bat hem repent. Hem luksavve hem needim forgiveness from sin bilong hem, and hem duim samting for showimaot hem tinghae long man wea Jehovah iusim for sevem pipol. Nomata Jesus no dae yet, long tingting bilong God, hem olsem Jesus givim finis laef bilong hem and woman hia fit for kasem gud samting from datwan. Dastawe Jesus talem woman hia: “Mi forgivim olketa sin bilong iu.”
Disfala story showimaot Jesus no heitim pipol wea sin. Hem kaen long olketa. Jehovah tu willing for forgivim sin bilong olketa wea repent. Datwan barava encouragem iumi evriwan wea born sin!
[Piksa long page 7]
Long tingting bilong God, olketa hia raeteous