Toktok Bilong Iu Mas Showimaot Iu “Garem Love and Barava Kaen”
“Toktok bilong hem showimaot hem wise, hem garem love and barava kaen.”—PROV. 31:26.
1, 2. (a) Jehovah laekem olketa wea worshipim hem for showimaot wanem kaen wei? (b) Wanem nao bae iumi storyim long disfala study?
LONG bifor, mami bilong King Lemuel talem hem wanfala important samting wea gudfala waef shud showimaot. Hem sei: “Toktok bilong hem showimaot hem wise, hem garem love and barava kaen.” (Prov. 31:1, 10, 26) Jehovah God bae hapi tumas long woman wea wise and long eniwan tu wea garem love and barava kaen. (Readim Proverbs 19:22.) Toktok bilong evriwan wea worshipim tru God mas showimaot diswan.
2 Wanem nao hem minim for garem love and barava kaen? Iumi mas showimaot diswan long hu? Wanem nao bae helpem iumi for talem toktok wea ‘showimaot iumi garem love and iumi barava kaen?’ Hao nao datwan bae helpem iumi for story gud witim olketa long famili and olketa nara Christian?
Man wea Showimaot Love and Hem Faithful, Hem Kaen
3, 4. (a) Wanem nao hem minim for garem love and barava kaen? (b) Hao nao wei for garem love and barava kaen hem difren from wei for kaen nomoa?
3 Man wea garem love and barava kaen, hem interest long pipol, duim samting for helpem olketa, and talem olketa gudfala toktok. Love helpem hem for interest long narawan. Bat hem no love nomoa wea mekem man for garem love and barava kaen. Long Hebrew languis, toktok wea olketa transleitim for man “garem love and barava kaen,” hem minim tu for faithful and willing for helpem narawan go kasem taem hem kasem gud samting from datwan.
4 Bat wei for garem love and barava kaen long narawan hem difren from wei for kaen nomoa. Pipol savve kaen long narawan nomata olketa no savve long olketa. Taem ship wea aposol Paul and 275 pipol wea go insaed hem rek, pipol long island long Malta kaen long olketa nomata olketa no savve long olketa. (Acts 27:37–28:2) Bat for iumi garem love and barava kaen long narawan, iumi mas faithful long olketa, and for iumi faithful long olketa iumi mas fren gud witim olketa firstaem.a Olketa Kenite showimaot diskaen love and barava kaen long “olketa son bilong Israel taem olketa lusim Egypt.”—1 Sam. 15:6.
Mas Prea and Ting Raonem
5. Wanem nao savve helpem iumi for kontrolem toktok bilong iumi?
5 Hem no isi for iumi talem toktok wea showimaot iumi garem love and barava kaen. Disaepol James sei: “No eni man savve kontrolem toktok bilong hem. Toktok wea man talem wea spoelem narawan hem olsem poison wea savve killim man dae.” (Jas. 3:8) Wanem nao savve helpem iumi for kontrolem toktok bilong iumi nomata datwan no isi? Wanem Jesus talem long olketa bigman bilong religion savve helpem iumi. Hem sei: “Samting wea man tingting tumas abaotem nao bae hem storyim.” (Matt. 12:34) Sapos iumi laek for kontrolem toktok bilong iumi and showimaot iumi garem love and barava kaen, iumi mas waka hard for garem olketa gudfala wei hia insaed heart bilong iumi. Bae iumi storyim hao prea and wei for ting raonem samting savve helpem iumi for duim datwan.
6. Why nao iumi shud ting raonem wei wea Jehovah garem love and barava kaen?
6 Bible sei: “Jehovah . . . garem love and barava kaen.” (Ex. 34:6) Man wea raetem psalm sei: “Jehovah, iu garem love and barava kaen long pipol evriwea long earth.” (Ps. 119:64) Staka story insaed long Bible storyim Jehovah showimaot datwan long olketa wea worshipim hem. Sapos iumi markem taem for ting raonem ‘olketa samting wea Jehovah duim,’ datwan savve helpem iumi tu for garem love and barava kaen.—Readim Psalm 77:12.
7, 8. (a) Wanem nao Jehovah duim wea showimaot hem garem love and barava kaen long Lot and famili bilong hem? (b) Hao nao David feel abaotem wei wea God garem love and barava kaen long hem?
7 Tingim hao Jehovah sevem Lot and famili bilong hem wea olketa relative bilong Abraham. Lot hem stap long Sodom, and taem Jehovah redi for finisim datfala taon, olketa angel kam for helpem Lot and famili bilong hem for kwiktaem lusim taon hia. Bible sei: “From Jehovah kaen long Lot, nomata hem gohed for delay, [tufala angel] holem hand bilong hem witim waef and tufala dota bilong hem and tekem hem go aotsaed long datfala taon.” Taem iumi ting raonem wanem Jehovah duim for sevem olketa, diswan mekem iumi for tinghae long love and barava kaen wei bilong hem!—Gen. 19:16, 19.
8 Tingim tu King David long Israel bifor wea singsing olsem: “[Jehovah] forgivim evri sin bilong iufala, and hem healim evri sik bilong iufala.” David barava tinghae long Jehovah taem hem forgivim sin wea hem duim witim Bath-sheba! David barava mekhae long Jehovah and sei: “Olsem heven hem hae winim earth, Jehovah garem love and barava kaen long olketa wea fraet long hem.” (Ps. 103:3, 11) Taem iumi ting raonem olketa example hia and olketa nara story long Bible, iumi laek for praisem and thankiu long Jehovah bikos hem garem love and barava kaen. Sapos iumi barava tinghae long wei bilong Jehovah, bae iumi laek for followim wei bilong hem.—Eph. 5:1.
9. Why nao olketa wea worshipim Jehovah mas garem love and barava kaen evriday?
9 Samfala example long Bible storyim hao Jehovah garem love and barava kaen, wea minim hem showimaot love and faithful long olketa wea fren gud witim hem. Waswe long olketa wea no fren gud witim Hem? Waswe, Jehovah raf or no kaen long olketa? Nomoa. Luke 6:35 sei: “Nomata olketa wea no savve sei thankiu and nogud pipol, God hem kaen long olketa tu.” Bible sei tu: “Hem mekem sun hem shaen long pipol wea gud and pipol wea nogud and hem mekem hem rain long pipol wea obeyim God and wea no obeyim God.” (Matt. 5:45) Bifor iumi lanem and followim truth, God hem kaen long iumi olsem hem kaen long evriwan. Bat taem iumi worshipim Jehovah, hem showimaot love and hem faithful long iumi. Hem olowe garem love and barava kaen long iumi. (Readim Isaiah 54:10.) Iumi barava tinghae long datfala wei bilong hem! Datwan bae mekem iumi tu for showimaot kaen wei olsem long toktok bilong iumi and wanem iumi duim evriday!
10. Why nao prea hem barava important for helpem iumi garem love and barava kaen long narawan?
10 Prea hem barava important samting for helpem iumi garem love and barava kaen. Holy spirit bilong Jehovah savve mekem man for garem disfala wei. (Gal. 5:22) Taem iumi letem holy spirit for leadim iumi, datwan bae helpem iumi for showimaot love and barava kaen long narawan. Jehovah bae givim holy spirit long iumi sapos iumi askem hem. (Luke 11:13) Hem fitim for iumi gohed prea for spirit bilong God and followim datwan. For toktok bilong iumi showimaot iumi garem love and barava kaen long narawan, hem barava important for iumi prea and ting raonem datwan.
Hasband and Waef Mas Kontrolem Toktok Bilong Tufala
11. (a) Hao nao iumi savve Jehovah laekem hasband for garem love and barava kaen long waef? (b) Hao wei for garem love and barava kaen savve helpem hasband for kontrolem toktok bilong hem?
11 Aposol Paul sei long olketa hasband: “Gohed for lovem waef bilong iufala, long sem wei wea Christ tu hem lovem kongregeson and givim laef bilong hem for datwan.” (Eph. 5:25) Then Paul talem moa disfala samting wea Jehovah talem long Adam and Eve: “Man bae lusim dadi and mami bilong hem, hem bae stap olowe witim waef bilong hem, and tufala bae kamap wanfala body nomoa.” (Eph. 5:31) Jehovah laekem olketa hasband for faithful long waef and gohed garem love and barava kaen long olketa. Hasband wea showimaot love and faithful long waef bae no storyim olobaot mistek or tok daonem waef bilong hem. Hem hapi for praisem waef bilong hem. (Prov. 31:28) Sapos hasband and waef kasem eni problem, hasband mas garem love and barava kaen and no tok spoelem waef.
12. Hao nao waef savve showimaot hem garem love and barava kaen taem hem kontrolem toktok bilong hem?
12 Waef wea garem love and barava kaen mas kontrolem toktok bilong hem. Toktok bilong waef abaotem hasband mas no followim tingting bilong pipol long world. Waef wea “garem bigfala respect for hasband bilong hem” story gud abaotem hem taem hem stap witim nara pipol and datwan mekem olketa respectim hasband tu. (Eph. 5:33) From waef laekem olketa pikinini tu for respectim dadi bilong olketa, hem no argue witim hasband or kwestinim hem taem olketa pikinini stap. Hem bae storyim olketa samting olsem taem tufala stap seleva. Bible sei: “Wisefala woman buildimap haos bilong hem.” (Prov. 14:1) Haos bilong hem bae naesfala ples wea famili hapi for stap.
13. Long wea nao hem barava important for hasband and waef garem love and barava kaen? Wanem nao bae helpem tufala for duim datwan?
13 Nomata hasband and waef stap long haos, toktok bilong tufala mas showimaot respect. Paul sei: “Iufala mas barava lusim evri rabis wei. Iufala mas no kros tumas long eniwan, no duim nogud samting long narawan, no tok spoelem narawan, and no talem eni rabis toktok.” Hem sei moa: “Iufala mas sorre long narawan, kaen long olketa, hambol, no raf, and patient. . . . Iufala mas lovem narawan bikos love nao hem nambawan wei wea mekem pipol wan mind.” (Col. 3:8, 12-14) Taem olketa pikinini evritaem herem dadi and mami talem kaenfala toktok and showimaot love, olketa bae hapi and laek for followim wei bilong tufala.
14. Hao nao olketa hasband savve talem toktok wea comfortim famili?
14 Man wea raetem psalm askem Jehovah: “Plis, from iu garem love and barava kaen, iu comfortim mi.” (Ps. 119:76) Nambawan wei wea Jehovah comfortim pipol bilong hem nao taem hem encouragem and leadim olketa. (Ps. 119:105) Hao nao olketa hasband savve lane from example bilong Dadi bilong iumi long heven for talem toktok wea comfortim famili? Olketa savve duim datwan taem olketa encouragem and leadim famili. Famili Worship hem gud taem for studyim olketa nambawan samting long Bible!—Prov. 24:4.
Showimaot Love and Faithful Long Olketa Brata and Sista
15. Hao nao toktok bilong olketa elder and olketa mature Christian savve protectim olketa insaed kongregeson?
15 King David prea olsem: “Wei wea iu garem love and iu barava kaen and talem tru samting, datwan nao evritaem protectim mi.” (Ps. 40:11) Wanem nao olketa elder and olketa mature Christian savve duim for followim disfala example bilong Jehovah? Taem toktok bilong iumi encouragem narawan for followim wanem Bible talem, iumi showimaot iumi garem love and barava kaen long narawan.—Prov. 17:17.
16, 17. Wanem nao samfala samting wea iumi savve duim for showimaot iumi garem love and barava kaen long toktok bilong iumi?
16 Sapos iumi luksavve wanfala brata or sista start for duim samting wea bae mekem hem againstim Bible principle, wanem nao iumi shud duim? From iumi garem love and barava kaen, iumi bae talem toktok for helpem hem. (Ps. 141:5) Sapos iumi savve wanfala brata or sista duim bigfala sin, love bae mekem iumi for encouragem hem for “kolem kam olketa elder long kongregeson” mekem olketa savve “prea for hem, and oilim hem witim oil long nem bilong Jehovah.” (Jas. 5:14) Sapos hem no story witim olketa elder, iumi nao mas talem olketa. Datwan showimaot iumi garem love and barava kaen long hem. Samfala long iumi maet barava wikdaon, lonely, feel iusles, or sorre tumas. Iumi savve showimaot iumi garem love and barava kaen taem iumi “tok kaen long olketa wea feel sorre.”—1 Thess. 5:14.
17 Wanem nao iumi shud duim sapos eniwan wea againstim iumi talem laea story abaotem olketa brata and sista? Iumi no daotem faith bilong olketa brata and sista, and iumi shud no talem eni samting long man wea againstim iumi, bat sapos fitim, askem hem sapos hem garem eni pruv for sapotim wanem hem talem. Sapos man hia laek spoelem olketa brata and sista and laek for savve wea nao olketa stap, iumi mas faithful long olketa brata bilong iumi and no talem eni samting.—Prov. 18:24.
Man wea “Garem Love and Barava Kaen Bae Kasem Laef”
18, 19. Why nao toktok bilong iumi mas evritaem showimaot iumi garem love and barava kaen long olketa brata and sista?
18 Iumi mas showimaot love and faithful long evri brata and sista bilong iumi. Iumi mas evritaem talem toktok wea showimaot iumi garem love and barava kaen nomata samfala taem datwan hem no isi. Taem olketa son bilong Israel no garem love and no barava kaen, olketa “olsem dew wea drae kwiktaem,” wea datwan mekem Jehovah no hapi. (Hos. 6:4, 6) Bat Jehovah hem hapi sapos iumi evritaem garem love and barava kaen. Tingim olketa blessing wea man kasem sapos hem duim datwan.
19 Proverbs 21:21 sei: “Man wea trae for duim stret samting and garem love and barava kaen bae kasem laef, gud samting, and praise.” Wanfala long olketa blessing wea man bae kasem hem laef olowe. Jehovah helpem hem for “hol strong long laef wea hem barava tru laef.” (1 Tim. 6:12, 19) So iumi mas gohed for ‘garem love and barava kaen long narawan.’—Zech. 7:9.
[Footnote]
a For savve moa long hao wei for garem love and barava kaen hem difren from wei for faithful, showimaot love, and for kaen, lukim Wastaoa bilong May 15, 2002, page 12-13, 18-19.
Waswe, Iu Savve Minim Kam?
• Man wea garem love and barava kaen hem wanem kaen man?
• Wanem nao bae helpem iumi for talem toktok wea showimaot iumi garem love and barava kaen?
• Hao nao hasband and waef savve showimaot love long toktok bilong tufala?
• Olketa wanem taem nao toktok bilong iumi savve showimaot iumi garem love and barava kaen long olketa brata and sista?
[Piksa long page 23]
David mekhae long Jehovah bikos Hem garem love and barava kaen
[Piksa long page 24]
Waswe, iu duim Famili Worship evritaem?