“Wanfala Leader Nomoa Iufala Garem, and Hem Nao Christ”
“No letem eniwan kolem iufala Leader, bikos wanfala Leader nomoa iufala garem, and hem nao Christ.”—MATT. 23:10.
1. Hu nao Leader bilong Olketa Jehovah’s Witness, and why nao olsem?
OLKETA religion wea sei olketa Christian garem olketa leader, olsem pope bilong Rome, olketa bigman bilong Eastern Orthodox church, and olketa bigman long olketa nara religion. Bat Olketa Jehovah’s Witness no garem eni leader long earth. Olketa no followim eni man. Diswan fitim profesi wea Jehovah talem abaotem Son bilong hem. Hem sei: “Mi mekem hem kamap leader and for rul ovarem olketa kantri. Hem nao bae showimaot paoa bilong mi long olketa.” (Isa. 55:4) Olketa anointed Christian and “olketa nara sheepsheep” laekem nomoa datfala Leader wea Jehovah givim long olketa. (John 10:16) Olketa agree witim disfala toktok bilong Jesus: “Wanfala Leader nomoa iufala garem, and hem nao Christ.”—Matt. 23:10.
Angel wea Leader Bilong Israel
2, 3. Wanem important waka nao Son bilong God duim for olketa Israelite?
2 Staka handred year bifor Christian kongregeson start, Jehovah markem wanfala angel for leadim olketa Israelite. Bihaen olketa Israelite lusim Egypt, Jehovah talem olketa: “Bae mi sendem wanfala angel for go firstaem long iufala for lukaftarem iufala and hem bae leadim iufala for go long land wea mi redyim for iufala. Iufala mas obeyim hem and followim hem. Iufala mas no bighed and againstim hem bikos hem nao stand for nem bilong mi and hem bae no forgivim olketa wea againstim hem.” (Ex. 23:20, 21) Bible showimaot datfala angel ‘wea stand for nem bilong Jehovah,’ hem nao firstborn Son bilong God.
3 Bifor Son bilong God kam long earth, maet nem bilong hem nao Michael. Long buk bilong Daniel, Michael hem “leader bilong pipol bilong [Daniel],” wea hem nao olketa Israelite. (Dan. 10:21) Samting wea disaepol Jude storyim showimaot Michael helpem olketa Israelite longfala taem bifor Daniel hem stap. Bihaen Moses dae, luk olsem Satan laek iusim body bilong Moses for duim wanem hemseleva laekem. Maet hem laek for mekem olketa Israelite worshipim idol. Bat Michael stopem hem. Jude sei: “Taem Michael datfala chief angel hem raoa witim Devil abaotem body bilong Moses, hem no tok spoelem hem bat hem sei: ‘Jehovah nao bae tok strong long iu.’” (Jude 9) Bifor olketa Israelite winim Jericho, luk olsem Michael, wea “leader bilong army bilong Jehovah,” nao kam long Joshua for talem hem Jehovah bae strongim hem. (Readim Joshua 5:13-15.) Taem wanfala chief demon trae for stopem wanfala angel for no talem important message long profet Daniel, Michael datfala chief angel nao helpem datfala angel.—Dan. 10:5-7, 12-14.
Leader wea Profesi Storyim, Hem Kam Nao
4. Wanem profesi nao storyim taem wea Messiah bae kam?
4 Bifor datfala samting hem happen, Jehovah sendem angel Gabriel for talem profesi long Daniel abaotem taem wea “Messiah datfala Leader” bae kam. (Dan. 9:21-25)a John baptaesim Jesus long 29 C.E., wea hem nao barava taem wea profesi storyim. Holy spirit kam daon long Jesus, wea showimaot hem nao Christ, datfala Messiah wea Jehovah chusim. (Matt. 3:13-17; John 1:29-34; Gal. 4:4) Hem nomoa bae kamap nambawan Leader.
5. Wanem nao Christ duim wea showimaot hem Leader taem hem duim ministry long earth?
5 Taem Jesus startim ministry bilong hem long earth, hem pruvim hem nao “Messiah datfala Leader.” Tu-thri day bihaen hem startim ministry, hem chusim samfala for kamap disaepol and hem duim firstfala mirakol. (John 1:35–2:11) Olketa disaepol followim Jesus long evri ples wea hem go for preachim gud nius abaotem Kingdom. (Luke 8:1) Jesus lanem olketa hao for preach and hem leadim olketa long disfala waka for preach and teachim pipol. Hem showimaot nambawan example. (Luke 9:1-6) Olketa Christian elder distaem tu shud duim sem samting olsem Jesus.
6. Wanem nao Jesus duim wea showimaot hem Leader and man for lukaftarem olketa sheepsheep?
6 Jesus storyim hemseleva tu olsem man for lukaftarem olketa sheepsheep. Olketa man for lukaftarem sheepsheep bifor leadim olketa sheepsheep bilong olketa. Long buk, The Land and the Book, wea William Thomson raetem, hem sei: “Olketa man for lukaftarem sheepsheep savve wakabaot firstaem long olketa, no for showim nomoa ples wea olketa sheepsheep shud followim, bat for mek sure ples hem sef and fitim olketa sheepsheep for wakabaot long hem. . . . Hem iusim walking stik for leadim olketa sheepsheep for go long ples wea grass grow gud, and hem iusim tu datfala stik for stopem eni samting wea laek spoelem olketa.” Jesus showimaot hem nao nambawan Leader and man for lukaftarem olketa sheepsheep. Hem sei: “Mi nao nambawan man for lukaftarem olketa sheepsheep. Nambawan man for lukaftarem olketa sheepsheep hem willing for dae for sevem olketa. Olketa sheepsheep bilong mi herem toktok bilong mi, and mi savve long olketa, and olketa followim mi.” (John 10:11, 27) Olsem Jesus talem, hem givim laef bilong hem for olketa sheepsheep, and bihaen Jehovah “mekem hem laef bak for leadim pipol and sevem olketa.”—Acts 5:31, New Jerusalem Bible; Heb. 13:20.
Leader Bilong Christian Kongregeson
7. Wanem nao Jesus iusim for leadim kongregeson?
7 Bifor Jesus go bak long heven, hem sei long olketa disaepol: “God givim paoa long mi ovarem evri samting long heven and earth.” (Matt. 28:18) Jehovah givim holy spirit long Jesus and Jesus iusim datwan for strongim olketa disaepol for savve long tru samting. (John 15:26) Long Pentecost 33 C.E., Jesus givim holy spirit long olketa Christian. (Acts 2:33) Long datfala taem nao Christian kongregeson hem start. Jehovah mekem Son bilong hem Leader long heven ovarem kongregeson long earth. (Readim Ephesians 1:22; Colossians 1:13, 18.) Jesus iusim holy spirit for leadim Christian kongregeson, and hem iusim olketa angel wea “stap anda long hem” for helpem hem.—1 Pet. 3:22.
8. Hu nao Christ iusim long first century for leadim olketa disaepol, and hu nao hem iusim distaem?
8 Christ iusim holy spirit tu taem hem givim “olketa man olsem present.” Hem givim “samfala wea lukaftarem olketa long kongregeson, and samfala wea teach.” (Eph. 4:8, 11) Aposol Paul talem olketa elder: “Holy spirit hem markem iufala for elder long kongregeson bilong God. . . . So iufala mas lukluk gud long iufala seleva and lukaftarem olketa sheepsheep.” (Acts 20:28) Taem Christian kongregeson start, evri elder hia hem olketa anointed Christian. Olketa aposol and elder long kongregeson long Jerusalem nao insaed long governing body. Christ iusim datfala governing body for leadim evri anointed “brata” bilong hem wea stap long earth. (Heb. 2:11; Acts 16:4, 5) Long distaem, Christ markem wakaman wea faithful and wise and Governing Body wea stand for datfala wakaman, for “lukaftarem evri samting bilong hem” long earth, wea hem nao evri samting wea join witim Kingdom. Olketa wea insaed long Governing Body hem samfala anointed brata nomoa. (Matt. 24:45-47) Olketa anointed Christian and olketa nara sheepsheep luksavve taem olketa stap anda long Governing Body datwan showimaot olketa followim Leader bilong olketa, Christ.
Christ Startim Preaching Waka
9, 10. Wanem nao Christ duim for mekem gud nius abaotem Kingdom kasem staka ples?
9 Start long first century, Jesus leadim waka for preach and teach wea gohed evriwea long world. Hem showim olketa aposol hao for duim preaching waka. Taem hem duim ministry, hem sei long olketa: “No go long pipol wea no Jew, and no go long eni taon long Samaria, bat go long pipol bilong Israel nomoa, wea olsem olketa sheepsheep wea lus. Taem iufala go, iufala preach and sei: ‘Kingdom bilong God hem kam klosap nao.’” (Matt. 10:5-7) Olketa aposol gohed for preach long olketa Jew and pipol wea followim religion bilong olketa Jew, and bihaen long Pentecost 33 C.E., olketa barava strong for duim datfala waka.—Acts 2:4, 5, 10, 11; 5:42; 6:7.
10 Bihaen datwan, Jesus iusim holy spirit tu for leadim olketa disaepol for preach long pipol long Samaria and then long olketa wea no Jew. (Acts 8:5, 6, 14-17; 10:19-22, 44, 45) From Jesus laekem gud nius for kasem staka ples, hemseleva duim samting for mekem Saul, man bilong Tarsus, for kamap Christian. Jesus sei long Ananias: “Iu getap and go long haos bilong Judas long datfala road wea olketa kolem Stret Road. Ask for wanfala man wea nem bilong hem Saul. Hem man bilong Tarsus. . . . Iu go nao, bikos mi chusim disfala man for talemaot nem bilong mi long pipol long olketa difren kantri and long olketa king and olketa son bilong Israel tu.” (Acts 9:3-6, 10, 11, 15) “Disfala man” nao hem aposol Paul.—1 Tim. 2:7.
11. Long wanem wei nao Christ iusim holy spirit for mekem preaching waka kasem olketa nara ples?
11 From Christ laekem pipol from nara kantri wea no Jew for herem message abaotem Kingdom, holy spirit leadim Paul for duim missionary waka long Asia Minor and long Europe. Luke sei: “Taem olketa [profet and teacher wea stap long kongregeson long Antioch long Syria] gohed worshipim Jehovah and followim kastom for no kaikai, holy spirit hem sei: ‘Markem Barnabas and Saul for duim spesol waka wea mi chusim tufala for duim.’ So narataem moa olketa no kaikai. Olketa prea and putim hand long tufala and sendem tufala go.” (Acts 13:2, 3) Jesus wea hem Leader bilong kongregeson nao “chusim” Saul bilong Tarsus for talemaot nem bilong Hem long pipol long olketa difren kantri. Long mek-tu missionary gogo bilong Paul, hem barava showaot klia Jesus iusim holy spirit for leadim preaching waka. Bible sei “spirit bilong Jesus,” wea hem nao holy spirit wea God givim long Jesus, leadim Paul and olketa wea gogo witim hem long ples wea olketa laek for go and long taem wea fitim olketa for go. Paul lukim wanfala vision tu wea mekem olketa for go long Europe.—Readim Acts 16:6-10.
Jesus Leadim Kongregeson Bilong Hem
12, 13. Wanem nao Revelation storyim wea showimaot Christ hem lukluk gud long each kongregeson?
12 Jesus lukluk gud long wanem hem gohed long olketa kongregeson long first century. Hem savve gud long spiritual saed bilong each kongregeson. Iumi luksavve long diswan taem iumi readim Revelation chapter 2 and 3. Jesus storyim sevenfala kongregeson wea stap long Asia Minor. (Rev. 1:11) Iumi savve Jesus mas savve gud long spiritual saed bilong olketa nara kongregeson long datfala taem tu.—Readim Revelation 2:23.
13 Jesus praisem samfala kongregeson hia bikos olketa no givap, olketa gohed faithful nomata olketa kasem hard taem, followim wanem hem talem, and againstim olketa apostate. (Rev. 2:2, 9, 13, 19; 3:8) Bat hem givim strongfala kaonsel tu long samfala kongregeson bikos love bilong olketa for God hem no strong olsem bifor, olketa acceptim nomoa wei for worshipim idol, olketa durong, and followim teaching bilong man. (Rev. 2:4, 14, 15, 20; 3:15, 16) Jesus lovem evri kongregeson nomata olketa wea hem givim strong kaonsel long olketa tu. Hem sei: “Evriwan wea mi lovem, mi givim kaonsel long olketa and disciplinem olketa. So iufala mas gohed strong for worshipim God and repent.” (Rev. 3:19) Nomata Jesus stap long heven, hem iusim holy spirit for leadim olketa kongregeson long earth. Bihaen Jesus story long olketa kongregeson, hem sei: “Eniwan wea garem ear hem mas herem olketa toktok wea holy spirit hem talem long olketa kongregeson.”—Rev. 3:22.
14-16. (a) Wanem nao Jesus duim wea showimaot hem leadim pipol bilong Jehovah long earth? (b) From Jesus “stap witim” olketa disaepol “go kasem taem wea world hem gogo for finis,” wanem nao kamaot from datwan? (c) Wanem nao bae iumi storyim long next study?
14 Iumi lanem finis, Michael (Jesus) hem strongfala angel wea hem Leader bilong Israel bifor. Then long first century, Jesus leadim and lukaftarem olketa disaepol. Taem hem duim ministry, hem leadim preaching waka, and bihaen hem laef bak, hem gohed for leadim datfala waka mekem gud nius kasem staka ples.
15 Jesus iusim holy spirit for mekem datfala waka for kasem evri ples long earth. Bifor Jesus go bak long heven, hem sei long olketa disaepol: “Taem iufala kasem holy spirit datwan bae strongim iufala, and iufala bae talem pipol abaotem mi long Jerusalem and long evri ples long Judea and long Samaria and long evri farawe ples long earth.” (Acts 1:8; readim 1 Peter 1:12.) From Christ leadim preaching waka, staka pipol long first century herem gud nius.—Col. 1:23.
16 Bat wanem Jesus talem showimaot datfala waka bae gohed go kasem taem wea world hem gogo for finis. Bihaen Jesus talem olketa disaepol for preach and teachim pipol long evri kantri for kamap disaepol, hem promisim olketa: “Bae mi stap witim iufala go kasem taem wea world hem gogo for finis.” (Matt. 28:19, 20) Taem Christ kasem paoa for rul long 1914, samting wea hem duim showimaot hem barava “stap witim” olketa disaepol and gohed for leadim olketa. Long next study, bae iumi storyim bigfala waka wea hem duim start long 1914.
[Footnote]
a For savve moa abaotem disfala profesi, lukim chapter 11 long buk Tingting Strong Long Profesi Bilong Daniel!
Review
• Wanem nao Son bilong God duim wea showimaot hem Leader bilong Israel?
• Wanem nao Christ iusim for leadim kongregeson bilong hem long earth?
• Wanem nao Christ duim for mekem gud nius kasem staka ples?
• Wanem nao showimaot Christ hem lukluk gud long spiritual saed bilong each kongregeson?
[Piksa long page 21]
“Bae mi sendem wanfala angel for go firstaem long iufala”
[Piksa long page 23]
Olsem long bifor, Christ iusim “olketa man olsem present” for lukaftarem olketa sheepsheep