Waswe, Iu Showimaot Example Long Wei for Respectim Narawan?
“Iufala mas lovem olketa narawan wea biliv, olsem man lovem brata bilong hem. Showimaot gudfala example long wei for respectim narawan.”—ROM. 12:10.
1, 2. (a) Wanem kaonsel nao Paul talem long leta wea hem raetem for olketa long Rome? (b) Olketa wanem kwestin nao bae iumi storyim?
LONG leta wea aposol Paul raetem for olketa long Rome, hem showimaot hem important for iumi olketa Christian lovem olketa long kongregeson. Hem sei love bilong iumi “mas tru wan.” Hem talem tu iumi mas “lovem olketa narawan wea biliv, olsem man lovem brata bilong hem.”—Rom. 12:9, 10a.
2 For showimaot love wea tru hem minim iumi mas duim moa samting winim wei for tingim nomoa narawan. Iumi need for duim samting wea showimaot iumi lovem narawan. Tru tumas, no eniwan bae savve iumi lovem or tingim olketa sapos iumi no showimaot datwan long wanem iumi duim. Dastawe Paul talem disfala kaonsel: “Showimaot gudfala example long wei for respectim narawan.” (Rom. 12:10b) Wanem nao hem minim for respectim narawan? Why nao hem important for showimaot gudfala example long wei for respectim olketa brata and sista? Hao nao iumi savve duim datwan?
Wanem Nao Hem Minim for Respectim Narawan?
3. Wanem nao datfala word “respect” savve minim long Hebrew and Greek languis?
3 Main Hebrew word wea iumi transleitim “respect” hem minim for ting long man olsem hem important. Long Bible, Greek word wea iumi transleitim “respect” savve minim tu for tinghae long samting, ting long samting olsem hem important, or spesol. (Luke 14:10) Tru tumas, olketa wea iumi respectim barava important and spesol long iumi.
4, 5. Wanem nao hem minim for respectim narawan? Storyim tokpiksa.
4 Wanem nao hem minim for respectim narawan? Wei for respectim narawan hem showaot firstaem long hao iu ting long hem. Hao iu ting long datfala man bae showaot long wanem iu duim for hem tu. So firstaem iumi mas showimaot iumi respectim olketa brata and sista long hao iumi ting long olketa, then iumi savve duim samting wea showimaot iumi respectim olketa.
5 Hao nao wanfala Christian savve showimaot trufala respect long olketa brata and sista sapos datwan no kam from heart bilong hem? (3 John 9, 10) Tingim wanfala flaoa wea iu plantim. Hem bae grow gud sapos iu plantim long gudfala graon. Long sem wei tu, man savve showimaot trufala respect sapos datwan kam from heart bilong hem. So sapos iumi no showimaot respect from heart bilong iumi, gogo, wei bilong iumi for showimaot respect bae olsem wanfala flaoa wea dae from hem no grow long gudfala graon. Dastawe taem Paul talem datfala kaonsel for showimaot respect, hem sei tu: “Love bilong iufala mas tru wan.”—Rom. 12:9; readim 1 Peter 1:22.
Respectim Olketa wea God Wakem “Olsem Hem”
6, 7. Why nao iumi mas respectim olketa narawan?
6 From wei for showimaot trufala respect nao main samting wea bae mekem iumi for duim gud samting long narawan, iumi mas evritaem tingim why nao Bible talem iumi for respectim olketa brata and sista. Bae iumi storyim tufala reason.
7 Long evri samting wea God wakem long earth, olketa man nomoa God wakem ‘olsem hem.’ (Jas. 3:9) Dastawe iumi savve garem olketa gudfala wei bilong God olsem love, wisdom, and wei for duim stret samting. Tingim nara samting wea iumi kasem from God. Man wea raetem psalm sei: “Jehovah . . . , respect wea iu kasem hem hae winim heven! . . . Iu mekem [man] no hae winim olketa angel, and witim glory and respect iu givim crown long hem.” (Ps. 8:1, 4, 5; 104:1)a God showimaot respect long olketa man. So taem iumi respectim narawan, datwan showimaot iumi respectim Jehovah, wea hem nao firstaem showimaot diswan. So sapos hem important for iumi respectim olketa man, datwan showimaot hem barava important for respectim olketa brata and sista!—John 3:16; Gal. 6:10.
Iumi Evriwan Part Long Wanfala Famili
8, 9. Wanem nao nara reason wea Paul talem why iumi mas respectim olketa brata and sista?
8 Paul talem nara reason why iumi mas respectim narawan. Hem sei: “Iufala mas lovem olketa narawan wea biliv, olsem man lovem brata bilong hem.” Greek toktok wea iumi transleitim “lovem olketa narawan,” hem minim wei wea olketa insaed famili lovem and sapotim each other. Toktok wea Paul talem showimaot hem important for olketa long kongregeson garem love and wan mind olsem wanfala famili. (Rom. 12:5) Bat Paul talem datfala toktok for olketa anointed Christian wea Jehovah nao adoptim olketa. So olketa anointed Christian wanfala famili wea barava fren gud tugeta. Dastawe olketa anointed Christian long taem bilong Paul garem gudfala reason for respectim each other. Olketa anointed Christian distaem tu duim sem samting.
9 Waswe long “olketa nara sheepsheep”? (John 10:16) Nomata God no adoptim olketa yet olsem olketa pikinini bilong hem, olketa savve kolem narawan brata and sista bikos olketa wan mind and part long wanfala Christian famili long world. (1 Pet. 2:17; 5:9) Dastawe sapos olketa nara sheepsheep minim why olketa kolem narawan “brata” or “sista,” olketa tu garem gudfala reason for respectim olketa.—Readim 1 Peter 3:8.
Why Nao Hem Important?
10, 11. Why nao hem important for respectim narawan?
10 Why nao hem important for respectim narawan? Taem iumi respectim olketa brata and sista bilong iumi, datwan mekem kongregeson stap gud and garem wan mind.
11 Iumi luksavve taem iumi fren gud witim Jehovah and kasem holy spirit bilong hem, datwan barava strongim iumi. (Ps. 36:7; John 14:26) Bat iumi kasem strong tu taem olketa nara brata and sista duim samting wea showimaot olketa tinghae long iumi. (Prov. 25:11) Iumi savve hapi taem samwan talem or duim samting wea showimaot hem respectim iumi. Datwan savve strongim iumi for gohed worshipim Jehovah. Maet iu tu feel olsem.
12. Wanem nao iumi wanwan savve duim for helpem kongregeson garem love and stap gud tugeta?
12 From Jehovah savve iumi need for kasem respect, hem talem iumi for “showimaot gudfala example long wei for respectim narawan.” (Rom. 12:10; readim Matthew 7:12.) Olketa Christian brata and sista wea followim datfala kaonsel helpem kongregeson for garem love and stap gud tugeta. So hem gud for tingim, ‘Waswe, enitaem mi talem toktok and duim samting for showimaot mi barava respectim brata or sista long kongregeson?’—Rom. 13:8.
Iumi Evriwan Shud Respectim Narawan
13. (a) Hu nao shud main wan for showimaot respect? (b) Samting wea Paul storyim long Romans 1:7 showimaot wanem?
13 Hu nao shud main wan for showimaot respect? Bible sei olketa Christian elder nao mas showimaot “example” long kongregeson. (1 Pet. 5:3) Hem tru, olketa elder showimaot example long staka waka wea olketa duim. Nomata olsem, from olketa lukaftarem kongregeson, olketa mas showimaot gudfala example long wei for respectim olketa brata and sista and olketa nara elder tu. Olsem example, taem olketa elder story tugeta abaotem need bilong kongregeson, olketa showimaot respect taem olketa lisin long wanem nara elder talem. And taem olketa elder disaedem samting, olketa showimaot respect long wei for tingim wanem each elder talem. (Acts 15:6-15) Bat datfala leta wea Paul raetem for olketa long Rome, hem no for olketa elder nomoa bat hem for evriwan insaed kongregeson. (Rom. 1:7) So datfala kaonsel for showimaot gudfala example long wei for respectim narawan hem for iumi evriwan.
14. (a) Hao nao wei for showimaot respect and for showimaot gudfala example long wei for respectim narawan hem difren? Storyim tokpiksa. (b) Wanem kwestin nao hem gud for iumi tingim?
14 Tingim moa nara samting abaotem datfala kaonsel wea Paul talem. Hem talem olketa Christian long Rome for no showimaot respect nomoa bat for showimaot gudfala example long wei for respectim narawan. Hao nao tufala samting hia hem difren? Tingim disfala example. Waswe, bae teacher talem olketa student wea savve read finis for lane moa for read? Nomoa, bikos olketa student savve read finis. Bat teacher bae laek for helpem olketa kamap gud long hao for read. Long sem wei, love nao hem mark bilong olketa tru Christian and datwan helpem iumi for respectim narawan. (John 13:35) Bat olsem olketa student savve lanem staka samting moa sapos olketa lane for read gud, iumi tu savve kamap strongfala Christian sapos iumi showimaot gudfala example long wei for respectim narawan. (1 Thess. 4:9, 10) Iumi evriwan nao shud duim datwan. Waswe, iu showimaot gudfala example long wei for respectim olketa narawan long kongregeson?
Respectim “Olketa wea Poor”
15, 16. (a) Iumi mas no forget for showimaot respect long hu, and why nao olsem? (b) Wanem nao bae showimaot iumi respectim evri brata and sista?
15 Long kongregeson, iumi mas no forget for showimaot respect long hu? Bible sei: “Man wea kaen long samwan wea poor hem garem kaon long Jehovah, and Hem bae givim bak gudfala samting long hem.” (Prov. 19:17) Hao nao iumi savve followim datfala principle taem iumi trae hard for showimaot gudfala example long wei for respectim narawan?
16 Staka pipol savve respectim olketa wea garem hae position, bat maet olketa no savve respectim olketa man nating. Bat Jehovah hem no olsem. Hem sei: “Olketa wea respectim mi bae mi respectim olketa.” (1 Sam. 2:30; Ps. 113:5-7) Jehovah respectim evriwan wea worshipim and respectim hem. Hem no les long “olketa wea poor.” (Readim Isaiah 57:15; 2 Chron. 16:9) Iumi laek for followim example bilong Jehovah. So for luksavve sapos iumi respectim narawan, hem gud for tingim disfala kwestin, ‘Wanem nao tingting bilong mi abaotem olketa wea no garem privilege for lukaftarem kongregeson?’ (John 13:14, 15) Ansa bilong iumi bae showimaot sapos iumi garem trufala respect for narawan or nomoa.—Readim Philippians 2:3, 4.
Showimaot Respect Long Wei for Iusim Taem Bilong Iumi
17. Wanem nao wanfala wei wea iumi savve showimaot respect long narawan, and why nao hem important?
17 Wanem nao wanfala wei wea iumi savve showimaot respect long evriwan insaed kongregeson? Hem nao for iusim taem wea iumi garem for helpem narawan. Why nao datwan important? Iumi olketa Christian savve busy, and iumi savve iusim staka taem for duim olketa important waka insaed kongregeson. So taem wea iumi garem hem barava important long iumi. Iumi shud no tingse olketa brata and sista mas iusim evri free taem bilong olketa for helpem iumi. Semsem tu, olketa brata and sista long kongregeson shud no tingse iumi mas iusim evri free taem bilong iumi for helpem olketa.
18. Taem iumi lukluk long piksa long page 18, hao nao iumi showimaot iumi willing for iusim taem bilong iumi for helpem narawan?
18 Nomata olsem, iumi luksavve (wea main wan nao hem olketa elder long kongregeson) taem iumi willing for leavim waka wea iumi duim mekem iumi iusim taem for helpem olketa brata and sista, datwan showimaot iumi respectim olketa. Long wanem wei? Taem iumi leavim wanem iumi duim for helpem olketa, hem olsem iumi sei, ‘Mi barava tingim iu and hem important long mi for helpem iu winim wei for gohed duim samting for miseleva.’ (Mark 6:30-34) Bat sapos iumi no willing for duim datwan, maet iumi mekem brata or sista feel olsem hem no important long iumi. Hem tru, samfala taem iumi mas duim samting wea hem important and iumi mas no leavim. Nomata olsem, wei wea iumi willing for iusim taem bilong iumi or nomoa showimaot sapos iumi respectim olketa brata and sista.—1 Cor. 10:24.
Gohed Showimaot Gudfala Example
19. Wanem nao nara samting wea iumi savve duim for showimaot iumi respectim olketa brata and sista?
19 Iumi savve respectim olketa brata and sista long olketa nara important wei tu. Tingim, taem iumi iusim taem for helpem olketa, iumi shud lisin long wanem olketa talem. Jehovah nao showimaot example long diswan. David hem sei: “Jehovah lukluk long olketa wea raeteous, and taem olketa askem hem for helpem olketa, hem herem olketa.” (Ps. 34:15) Iumi followim example bilong Jehovah taem iumi lukluk long olketa brata and sista and lisin taem olketa askem iumi for help. Taem iumi duim olsem, iumi showimaot iumi respectim olketa.
20. Wanem nao iumi laek for tingim evritaem abaotem wei for showimaot respect?
20 Olsem iumi storyim finis, iumi laek for tingim evritaem why iumi shud barava respectim olketa brata and sista. Nara samting, iumi shud showimaot example long wei for respectim evriwan nomata olketa wea poor. Taem iumi duim olketa samting hia, datwan bae strongim love wea iumi garem for olketa brata and sista and wan mind wea iumi garem long kongregeson. So iumi evriwan mas no respectim nomoa narawan bat gohed showimaot gudfala example long diswan. Waswe, iu barava laek for duim datwan?
[Footnotes]
a Olketa toktok wea David talem long Psalm 8 hem profesi tu abaotem Jesus Christ.—Heb. 2:6-9.
Waswe, Iu Tingim Yet?
• Wanem nao hem minim for respectim narawan?
• Wanem nao olketa reason why iumi mas respectim olketa brata and sista?
• Why nao hem important for respectim narawan?
• Wanem nao iumi savve duim for showimaot iumi respectim olketa brata and sista?
[Piksa long page 18]
Wanem nao iumi savve duim for showimaot iumi respectim olketa brata and sista?