First Samting
Lovem Pipol, No Lovem Selen and Olketa Material Samting
WANEM NAO BIBLE TEACHIM? “Enikaen nogud samting hem kamaot from wei for laekem tumas selen.”—1 Timothy 6:10.
WHY NAO HEM NO ISI? Olketa wea mekem advertise mekem iumi for no satisfae witim wanem iumi garem. Olketa laekem iumi for waka olowe, mekem iumi peim olketa niu samting wea gud and wea moa expensive winim wanem iumi garem finis. Hem isi for lovem selen and tingim datwan olsem hem barava important. Bat Bible warnim iumi and sei taem man lovem staka rich samting bae hem nating satisfae. King Solomon sei: “Man wea lovem silver bae no satisfae witim silver nomoa, olsem eniwan wea lovem richfala samting bae no satisfae witim wages.”—Ecclesiastes 5:10.
WANEM NAO IU SAVVE DUIM? Followim wei bilong Jesus, and lane for lovem pipol winim olketa material samting. Jesus willing for lusim evri samting, nomata laef bilong hem tu, bikos hem lovem pipol. (John 15:13) Hem sei: “Man wea givim samting hem barava hapi winim man wea kasem samting.” (Acts 20:35) Sapos hem wei bilong iumi for iusim taem and olketa samting wea iumi garem for helpem pipol, olketa tu bae duim sem samting long iumi. Jesus sei, taem “iufala givim samting long nara pipol, . . . olketa bae givim samting long iufala.” (Luke 6:38) Olketa wea laekem tumas selen and for garem staka samting kasem staka problem wea barava spoelem olketa. (1 Timothy 6:9, 10) Bat man savve barava satisfae taem hem lovem pipol and olketa tu lovem hem.
Waswe, iu tingse hem bae gud for ting raonem sapos iu savve changem samfala samting long living bilong iu? Waswe, iu savve katdaon long olketa samting wea iu garem or wea iu ting for peim? Sapos iu duim olsem, bae iu garem staka taem and strong for duim olketa important samting, wea hem nao for helpem pipol and worshipim God, wea givim iu evri samting wea iu garem.—Matthew 6:24; Acts 17:28.
[Piksa long page 4]
“Iufala givim samting long nara pipol, and olketa bae givim samting long iufala”