Wanem Nao Pikinini Bilong Iu Bae Talem?

DADI AND MAMI: Long January 15, 2010, Wastaoa, page 16-​20 mifala storyim hao hem gud for practice witim pikinini bilong iu. Disfala article bae storyim olketa idea for helpem pikinini bilong iu winim olketa hevi long skul. Iu savve practicem olketa idea hia long taem bilong Famili Worship.

OLKETA pikinini wea Jehovah’s Witness savve kasem olketa hevi long skul. Staka taem olketa skulfren savve askem why olketa no salutim flag, no celebratem birthday, and no duim samfala project abaotem holiday. Sapos olketa skulfren askem pikinini bilong iu olketa kwestin olsem, wanem nao pikinini bilong iu bae talem?

Samfala Witness pikinini savve sei: “Mi no savve duim datwan ia. Religion bilong mi stopem.” Iumi shud praisem olketa pikinini hia from olketa sapotim tru worship. Maet wanem olketa talem stopem narawan for askem eni kwestin moa. Bat Bible talem iumi for “redi evritaem for givim gudfala ansa taem eniwan askem [iumi]” abaotem biliv bilong iumi. (1 Pet. 3:​15) Taem iumi duim olsem hem no minim for just sei, “Mi no savve duim datwan.” Nomata sapos olketa narawan no agree long wanem iumi talem, maet samfala laek for savve why nao iumi disaed olsem.

Staka Witness pikinini iusim olketa buk olsem Lane From Datfala Nambawan Teacher for storyim Bible. Olketa story long Bible savve helpem narawan luksavve why olketa Witness pikinini no duim samfala samting. Samfala pikinini long skul interest long olketa Bible story, and diswan mekem staka for laek study. Maet hem no isi long olketa nara pikinini long skul for herem full story long Bible. Maet samfala pikinini no minim samfala Bible story sapos olketa no herem full story. Taem skulfren bilong Minhee, wea 11 year, invaetem hem for go long birthday party, Minhee sei: “Bible no talem iumi for celebratem birthday. Bible storyim wanfala man wea olketa killim dae long birthday party wea nem bilong John Baptaesa.” Bat Minhee sei fren bilong hem no minim wanem hem talem.

Samfala taem hem gud for showim piksa or wanfala story long buk bilong iumi. Waswe sapos olketa bigman long skul no laekem olketa pikinini for showim olketa buk bilong religion long nara student? Waswe, olketa pikinini bilong iumi savve preach nomata olketa no iusim eni buk? Wanem nao iu savve duim for helpem pikinini for givim gudfala ansa?

Practice Witim Pikinini

Wei for practice long haos bae helpem pikinini. Dadi and mami savve act olsem olketa skulfren. Taem pikinini storyim biliv bilong hem, hem gud for dadi and mami praisem olketa and showim hao for kamap gud moa long wei for storyim biliv and why hem gud for duim datwan. Olsem example, encouragem olketa for iusim toktok wea olketa skulfren bae minim. Joshua wea 9 year sei olketa skulfren no minim olketa word olsem “konsens” and “faithful.” So hem mas iusim olketa word wea isi for narawan minim.​—⁠1 Cor. 14:⁠9.

Samfala pikinini maet kwiktaem for no interest sapos ansa wea iu talem hem long tumas. Taem iu askem olketa for talemaot tingting bilong olketa, datwan savve mekem olketa for interest long wanem iu storyim. Haneul, wanfala gele wea 10 year sei: “Olketa skulfren laek for story and no for mi nomoa explainim samting.” For mekem evriwan story gud tugeta, askem olketa kwestin and lisin long wanem narawan talem.

Story long box garem olketa idea wea olketa Witness pikinini savve iusim for story long skulfren. Olketa pikinini no need for baeheartim olketa story hia, bikos olketa pikinini no semsem and maet olketa need for changem story fitim samting wea kamap. Dastawe Witness pikinini shud tingim main idea, tingim hao for talem long toktok bilong hem, and then explainim long wei wea fitim skulfren. Sapos pikinini bilong iu hem skul, practicem olketa idea hia witim hem.

Olketa dadi and mami mas waka hard for lanem pikinini. Hem gud for olketa lanem pikinini long olketa Bible principle and followim.​—⁠Deut. 6:7; 2 Tim. 3:​14.

Next taem iu duim Famili Worship, trae for practicem olketa idea long box witim pikinini. Diswan bae barava helpem hem. Bat tingim goal hem no for baeheartim olketa word hia. Maet iu actim tu-thri taem and talem olketa difren toktok for luksavve wanem pikinini bilong iu bae talem. Taem pikinini trae for explainim biliv bilong hem, helpem hem for garem gudfala tingting and story long wei wea no mekem man feel nogud. Gogo pikinini bae savve hao for storyim biliv bilong hem long olketa skulfren, neiba, and olketa teacher.

[Piksa long page 3]

“Why nao iu no salutim flag?”

[Piksa long page 4]

“Hello John. Mi laekem iu for kam long birthday party bilong mi”

[Piksa long page 4]

BIRTHDAY PARTY

_______

Mary: Hello John. Mi laekem iu for kam long birthday party bilong mi.

John: Thankiu tumas Mary. Bat mi no celebratem birthday.

Mary: Why nao iu no celebratem? Famili bilong mi hapi taem mi born.

John: Famili bilong mi tu hapi taem mi born. Bat mi no tingim hem gudfala reason for mi celebratem birthday. Staka pipol wea celebratem birthday tingse olketa nao barava important long datfala day. Bat long tingting bilong mi, God nao important and iumi shud thankiu long hem bikos hem nao givim iumi laef!

Mary: So hao, mi shud no garem birthday party?

John: Hem saed bilong iu. Bat tingim diswan. Man savve kasem present long birthday bilong hem, bat Bible sei man wea givim samting hem barava hapi winim man wea kasem samting. Winim wei for tingim nomoa birthday bilong iumi, mi tingse hem gud for sei thankiu long God, tingim nara pipol, and duim gud samting for olketa!

Mary: Mi nating tingim datwan. So waswe, dadi and mami bilong iu no givim eni present long iu?

John: Nomoa, olketa givim. Dadi and mami savve givim present enitaem. Waswe Mary, iu laek savve hao wei for celebratem birthday hem start?

Mary: Ia, mi laek savve!

John: Tumoro bae mi talem iu interesting story abaotem wanfala birthday wea happen bifor.

SALUTIM FLAG

_______

Jenny: Sarah, why nao iu no salutim flag?

Sarah: Thankiu nao for kwestin bilong iu. Hem olraet for mi askem why iu salutim flag?

Jenny: Mi duim bikos mi lovem kantri bilong mi.

Sarah: Jenny, mi savve iu lovem mami bilong iu bat waswe, iu salutim hem?

Jenny: Nomoa, bat mi salutim flag for showimaot mi respectim. Waswe, iu no respectim flag?

Sarah: Mi respectim. Bat iumi no salutim evriwan and evri samting wea iumi respectim, iaman?

Jenny: Iu tok tru, mi respectim teacher, bat mi no salutim hem. Mi no barava savve tu why mi salutim flag.

Sarah: Jenny, staka pipol tingse flag hem stand for kantri bilong olketa. Taem olketa salutim flag hem minim olketa willing for duim eni samting for kantri bilong olketa. Bat mi no tingting for duim olsem. Mi no savve givim laef bilong mi for kantri bikos God nao givim mi laef. Mi disaed for givim laef bilong mi for hem. So nomata mi respectim flag, mi no salutim.

Jenny: Mi minim.

Sarah: Jenny, mi hapi nao iu ask abaotem diswan. Sapos iu laek savve why mi no duim samfala samting, iu askem mi. Iu savve Jenny, Bible storyim wanfala king bilong Babylon bifor wea talem pipol for baodaon long idol. Samfala no baodaon nomata olketa savve bae olketa dae.

Jenny: Iu tok tru? Wanem nao happen long olketa?

Sarah: Bae mi talem iu long brek taem.

WEI FOR VOTE LONG SKUL

_______

Mike: Tim, hu nao iu tingse hem fit for hed boy long skul?

Tim: Mi nating saedem eniwan.

Mike: Why nao olsem?

Tim: Mi garem nambawan leader finis. Mi promis for followim Jesus, so hard for mi chusim nara leader moa. Iu laek savve why mi tingse hem nambawan Leader?

Mike: Nomoa, mi no interest for savve.

Tim: Sapos enitaem iu laek savve, mi hapi for talem iu.