Tinghae Long Marit From Hem Present wea God Givim
“Dastawe man bae lusim dadi and mami bilong hem and hem bae stap olowe witim waef bilong hem. Tufala bae kamap wanfala body nomoa.”—GEN. 2:24.
1. Why nao hem fitim for iumi respectim Jehovah?
JEHOVAH GOD nao startim marit and hem fitim for iumi respectim hem. Hem Dadi bilong iumi long heven wea wakem evri samting and Ruler bilong iumi, dastawe Bible sei hem nomoa man wea givim “evri gud samting.” (Jas. 1:17; Rev. 4:11) Datwan showimaot hem barava lovem iumi. (1 John 4:8) Evri samting wea Jehovah teachim iumi, evri samting wea hem askem iumi for duim, and evri samting wea hem givim, hem for helpem iumi and mekem iumi hapi.—Isa. 48:17.
2. Wanem nao Jehovah talem long Adam and Eve?
2 Bible sei marit hem wanfala long olketa “gud” present wea God givim. (Ruth 1:9; 2:12) Taem Jehovah mekem Adam and Eve for marit, hem talem wanem tufala mas duim for hapi and stap gud. (Readim Matthew 19:4-6.) Sapos tufala followim wanem God talem, bae tufala hapi for olowe. Bat tufala no obeyim God and from datwan tufala kasem olketa nogud samting.—Gen. 3:6-13, 16-19, 23.
3, 4. (a) Wanem nao staka pipol duim wea showimaot olketa no tinghae long marit and no respectim Jehovah? (b) Wanem nao bae iumi storyim long disfala study?
3 Staka pipol wea marit distaem no laek followim wanem Jehovah talem taem olketa disaedem samting, olsem Adam and Eve duim. Samfala stap tugeta bat no marit and samfala garem staka partner and no tingting for marit. Samfala lusim hasband or waef or sei hem olraet nomoa for man maritim man and woman maritim woman. (Rom. 1:24-32; 2 Tim. 3:1-5) Olketa no tingim marit hem present wea God givim, and from olketa no tinghae long datwan olketa no respectim Jehovah God tu.
4 Nomata samfala wea worshipim Jehovah tu no tinghae long wanem Jehovah talem abaotem marit. Samfala Christian disaed for separate, or divorce nomata olketa no garem reason from Bible for duim datwan. Wanem nao savve helpem iumi for no duim datwan? Hao nao toktok bilong God long Genesis 2:24 savve helpem olketa Christian for strongim marit bilong olketa? And wanem nao savve helpem olketa wea laek marit for redi for datwan? Bae iumi storyim thrifala hasband and waef wea Bible storyim wea showimaot wei for respectim Jehovah hem main samting wea mekem marit stap gud.
Gohed for Faithful
5, 6. Wanem nao maet testim faithful fasin bilong Zechariah and Elizabeth, and wanem gud samting nao tufala kasem from tufala faithful?
5 Zechariah and Elizabeth evritaem disaedem stret samting. Zechariah maritim Elizabeth bikos hem luksavve hem lovem Jehovah and Elizabeth lukim sem samting long Zechariah. Zechariah faithful for duim waka bilong hem olsem priest, and tufala waka hard for followim Law bilong God. Tufala tinghae long staka samting wea Jehovah duim for tufala. Bat sapos iu go long haos bilong tufala long Judah bae iu lukim no eni pikinini stap. Elizabeth no savve garem pikinini, and tufala evriwan olo.—Luke 1:5-7.
6 Olketa Israelite bifor tinghae tumas long wei for garem pikinini and olketa famili savve garem staka pikinini. (1 Sam. 1:2, 6, 10; Ps. 128:3, 4) Maet long datfala taem wanfala Israelite man bae divorcem waef sapos hem no bornem pikinini. Bat Zechariah stap witim Elizabeth nomata hem no savve garem pikinini. Hem no lukaotem eni excuse for lusim waef bilong hem, and Elizabeth tu no duim olsem. Nomata tufala sorre from tufala no garem pikinini, tufala faithful long each other and long Jehovah. Gogo Jehovah duim mirakol for tufala garem wanfala boy nomata tufala olo.—Luke 1:8-14.
7. Wanem nao nara samting wea Elizabeth duim wea showimaot hem faithful long Zechariah?
7 Elizabeth duim nara samting tu wea showimaot hem faithful long Zechariah. Taem hem bornem John, Zechariah no savve toktok bikos hem nating bilivim wanem angel talem. Nomata olsem, Zechariah mekem waef bilong hem luksavve angel talem hem for nemim datfala pikinini “John.” Olketa neiba and relative laek nemim pikinini hia long dadi bilong hem, Zechariah. Bat Elizabeth faithful for followim wanem hasband bilong hem disaedem. Elizabeth sei: “Nomoa ia! Nem bilong hem John.”—Luke 1:59-63.
8, 9. (a) Hao nao wei for faithful hem strongim marit? (b) Wanem nao hasband and waef savve duim for showimaot tufala faithful long each other?
8 Staka hasband and waef distaem tu savve feel sorre and kasem olketa hard taem olsem Zechariah and Elizabeth. Sapos hasband or waef no faithful, bae marit bilong tufala no stap gud. Wei for switim feeling bilong nara man or woman, lukluk long olketa rabis piksa, duim adultery, or olketa nara nogud samting savve mekem tufala for no trustim each other. And taem hasband and waef no trustim each other, datwan savve spoelem love wea tufala garem. Wei wea hasband and waef faithful hem olsem wanfala fence raonem haos. Datfala fence hem for protectim famili. So taem hasband and waef faithful long each other, tufala bae feel olsem no eni samting savve spoelem marit and tufala bae story gud tugeta. Datwan bae strongim love wea tufala garem. Tru tumas, wei for faithful hem barava important.
9 Jehovah talem Adam: “Man bae lusim dadi and mami bilong hem and hem bae stap olowe witim waef bilong hem.” (Gen. 2:24) Wanem nao datwan minim? Bifor man and woman marit, maet tufala iusim staka taem witim olketa fren and relative. Bat bihaen tufala marit tufala mas no tingim olketa fren and relative firstaem bat tufala mas tingim each other firstaem. Olketa mas no letem dadi and mami for poke nose long wanem tufala disaedem or wanem tufala no agree long hem. Tufala mas stap olowe witim each other. Hem nao wanem God talem.
10. Wanem nao bae helpem hasband and waef for faithful?
10 Nomata hasband and waef no sem religion, tufala savve kasem gud samting taem tufala faithful. Wanfala sista wea hasband bilong hem no Witness sei: “Mi thankiu long Jehovah for teachim mi for stap anda long hasband and for barava respectim hem. From mitufala faithful, lovem and respectim each other, mitufala stap tugeta for 47 year.” (1 Cor. 7:10, 11; 1 Pet. 3:1, 2) So waka hard for mekem marit partner luksavve iu faithful long hem. Talem and duim samting for showimaot long hasband or waef hem barava important long iu winim olketa fren and relative. Trae hard for no letem eniwan or eni samting spoelem wei wea iutufala faithful long each other. (Readim Proverbs 5:15-20.) Ron and Jeannette wea marit for winim 35 year sei: “From mitufala faithful for duim wanem God laekem, datwan mekem mitufala hapi and stap gud tugeta.”
Wan Mind Strongim Marit
11, 12. Wanem nao Aquila and Priscilla duim wea showimaot tufala waka tugeta (a) long haos, (b) waka for selen, and (c) long ministry?
11 Taem aposol Paul storyim tufala fren bilong hem Aquila and Priscilla, hem evritaem story abaotem tufala evriwan. Aquila and Priscilla showimaot gudfala example long wei for kamap “wanfala body nomoa.” (Gen. 2:24) Olketa waka tugeta long haos, waka for selen, and long ministry. Taem Paul kam long Corinth, Aquila and Priscilla invaetem hem for stap long haos bilong tufala, wea gogo hem nao main ples wea Paul savve stap. Bihaen, taem tufala stap long Ephesus, olketa iusim haos bilong tufala for olketa kongregeson meeting and tufala waka tugeta for helpem olketa niu wan for minim gud olketa tru teaching, olsem tufala duim long Apollos. (Acts 18:2, 18-26) Then tufala go long Rome and iusim haos bilong tufala moa for olketa kongregeson meeting. Bihaen, tufala go bak long Ephesus for strongim olketa brata.—Rom. 16:3-5.
12 Aquila and Priscilla tu waka witim Paul for wakem tent. Aquila and Priscilla waka tugeta and no laek winim each other or raoa. (Acts 18:3) From tufala waka tugeta for duim olketa samting for Jehovah, datwan mekem olketa hapi and stap gud. Nomata olketa stap long Corinth, Ephesus, or Rome, pipol savve tufala “duim waka bilong Christ Jesus.” (Rom. 16:3) Tufala waka tugeta for duim preaching waka long eni ples wea olketa stap.
13, 14. (a) Wanem samting nao savve spoelem wan mind insaed marit? (b) Wanem nao hasband and waef savve duim tugeta for strongim wei wea tufala “wanfala body nomoa”?
13 Tru tumas, wei for waka tugeta and garem olketa sem goal savve strongim marit. (Eccl. 4:9, 10) Bat sorre samting, plande hasband and waef no duim staka samting tugeta. Olketa waka ovataem and garem difren waka. Samfala hasband or waef iusim staka taem for travel long olketa nara ples for waka or go stap long nara province or kantri and sendem bak selen long famili. Nomata hasband and waef stap long haos, samfala no duim samting tugeta bikos olketa iusim staka taem for lukluk long television, Internet, pleim olketa video game, sports, or duim wanem olketa seleva laekem. Waswe, famili bilong iu olsem? Sapos olsem, waswe, iu savve changem samfala samting mekem iutufala duim moa samting tugeta? Waswe, iutufala savve kukim kaikai, wasim pleit, or klinim area tugeta? Waswe, iutufala savve waka tugeta for lukaftarem pikinini or dadi and mami wea olo?
14 Hem important tumas for hasband and waef duim olketa samting tugeta for worshipim Jehovah. Samting wea helpem famili for wan mind and garem sem goal hem for storyim text evriday and duim Famili Worship. Hem gud tu for waka tugeta long ministry. Sapos fitim, trae for pioneer tugeta nomata iu duim for wanfala month or wanfala year. (Readim 1 Corinthians 15:58.) Wanfala sista wea pioneer witim hasband sei: “Taem mitufala duim ministry mitufala garem taem tugeta and chance for story gud. From mitufala garem goal for helpem pipol fren witim God, mi feel olsem mitufala waka gud tugeta. Mi ting long hem no olsem hasband nomoa bat gudfala fren tu.” Taem hasband and waef waka tugeta for worshipim Jehovah, samting wea tufala interest long hem, important long tufala, and wei bilong tufala bae semsem. Olsem Aquila and Priscilla, tufala bae tingim and duim samting olsem “wanfala body nomoa.”
Duim Samting for God Firstaem
15. Wanem nao savve helpem marit for stap gud?
15 Jesus luksavve hem important for olketa wea marit duim samting for God firstaem. Jesus lukim taem wea Jehovah mekem Adam and Eve marit. Hem lukim Adam and Eve hapi taem tufala obeyim God, and hem lukim nogud samting wea olketa kasem taem olketa no duim datwan. So taem Jesus teachim pipol, hem talem moa toktok bilong Dadi bilong hem long Genesis 2:24. Hem talem diswan tu: “No eni man mas aotem samting wea God joinim finis.” (Matt. 19:6) So hem important for olketa wea marit for barava respectim Jehovah from datwan nao bae mekem olketa stap gud and hapi. Joseph and Mary showimaot nambawan example long diswan.
16. Wanem nao Joseph and Mary duim wea showimaot tufala tinghae long olketa spiritual samting?
16 Joseph kaen long Mary and respectim hem. Taem hem savve Mary babule, hem tingim hem and no laekem Mary for kasem shame nomata angel no talem hem wanem nao happen long Mary. (Matt. 1:18-20) Joseph and Mary obeyim olketa law wea King mekem and Law bilong Moses tu. (Luke 2:1-5, 21, 22) And nomata olketa man mas go long olketa bigfala hipap long Jerusalem, Joseph and Mary go evri year tu witim famili bilong olketa. (Deut. 16:16; Luke 2:41) Tufala barava tinghae long olketa spiritual samting and trae hard for mekem Jehovah hapi. Dastawe Jehovah chusim tufala for lukaftarem Son bilong hem taem hem stap long earth.
17, 18. (a) Wanem nao hasband and waef savve duim for tingim Jehovah firstaem? (b) Wanem gud samting nao bae tufala kasem?
17 Waswe, famili bilong iu tingim olketa spiritual samting firstaem? Olsem example, taem iu disaedem eni important samting, waswe, iu duim research long olketa Bible principle, prea abaotem datwan, and then askem advaes from olketa mature Christian? Or waswe, iu followim nomoa wanem iuseleva tingim or wanem famili and olketa fren talem for stretem problem? Waswe, iu trae hard for followim advaes wea wakaman wea faithful and wise talem abaotem marit and famili? Or waswe, iu followim kastom or advaes wea pipol long world givim? Waswe, famili bilong iu evritaem prea and study tugeta, markem olketa spiritual goal, and storyim olketa samting wea important long famili?
18 Ray wea marit for 50 year sei: “No enitaem mitufala kasem problem wea hard for mitufala winim bikos Jehovah hem ‘mek-thri string.’ ” (Readim Ecclesiastes 4:12.) Danny and Trina agree long datwan. Tufala sei: “Taem mitufala worshipim God tugeta datwan strongim marit bilong mitufala.” Tufala marit for winim 34 year. Sapos iu duim samting for Jehovah firstaem, hem bae strongim and blessim marit bilong iu.—Ps. 127:1.
Gohed Tinghae Long Present wea God Givim
19. Why nao God startim arrangement for marit?
19 Staka pipol wea marit distaem tingim nomoa wanem savve mekem olketa seleva hapi. Bat iumi wea worshipim Jehovah no ting olsem. Iumi savve marit hem present wea God givim for mekem plan bilong hem kamap tru. (Gen. 1:26-28) Sapos Adam and Eve tinghae long datfala present, bae earth hem paradaes and evriwan bae hapi, raeteous, and worshipim God.
20, 21. (a) Why nao iumi shud tingim marit hem holy samting? (b) Wanem nao bae iumi storyim next week?
20 Pipol bilong God luksavve marit savve givim praise long Jehovah. (Readim 1 Corinthians 10:31.) Iumi lanem taem hasband and waef faithful long each other, wan mind, and duim samting for God firstaem, datwan strongim marit and mekem Jehovah hapi. So sapos iumi redi for marit, laek strongim moa marit bilong iumi, or marit bilong iumi garem staka problem, iumi mas tingim marit hem holy samting wea God nao startim. Wei for duim datwan bae mekem iumi laek duim best for followim Bible taem iumi disaedem samting saed long marit. Datwan showimaot iumi tinghae long marit and respectim Jehovah God wea givim datfala present.
21 Bat iumi luksavve Jehovah givim olketa nara present tu wea mekem man hapi. Long next study, bae iumi storyim nara samting wea God givim, hem nao wei for stap singol.
Wanem Nao Ansa Bilong Iu?
• Wei for faithful shud mekem olketa Christian wea marit duim wanem?
• Why nao wei for waka tugeta and garem wan mind bae strongim marit?
• Wanem nao olketa wea marit savve duim for tingim Jehovah firstaem?
• Wanem nao iumi savve duim for respectim Jehovah wea startim marit?
[Piksa long page 15]
Hasband and waef wea waka tugeta bae wan mind