Duim Gud Samting Taem Iu Singol
“Sapos man hapi for stap singol olsem, hem gud nomoa.”—MATT. 19:12.
1, 2. (a) Wanem nao tingting bilong Jesus, Paul, and olketa narawan abaotem wei for singol? (b) Why nao maet samfala no ting long wei for singol olsem present?
MARIT hem wanfala long olketa nambawan present wea God givim iumi. (Prov. 19:14) Bat staka Christian wea singol tu hapi and satisfae long laef. Harold wea 95 year and no marit sei: “Nomata mi hapi taem mi stap witim olketa narawan and welkamim pipol, mi hapi taem mi stap seleva. For stap singol hem wanfala present wea God givim long mi.”
2 Jesus Christ and aposol Paul storyim wei for singol hem wanfala present tu wea God givim. (Readim Matthew 19:11, 12; 1 Corinthians 7:7.) Bat no evriwan wea singol plan for stap olsem. Maet hem no isi for faendem partner wea fitim. Or maet samfala wea marit gogo olketa divorce or partner bilong olketa dae and olketa singol moa. So hao nao wei for singol hem wanfala present? And hao nao olketa Christian savve iusim gud singol laef bilong olketa?
Spesol Present
3. Olketa Christian wea singol garem chance for duim wanem?
3 Plande taem man wea singol savve free for duim moa samting winim man wea marit. (1 Cor. 7:32-35) Hem savve garem chance for duim samfala samting moa long ministry, showimaot love long olketa narawan, and for fren gud witim Jehovah. Staka Christian luksavve and tinghae long gud samting wea olketa kasem taem olketa singol and olketa hapi nomoa for “stap singol” yet. Maet olketa narawan no plan for singol, bat taem living bilong olketa change, olketa prea abaotem datwan and luksavve Jehovah savve helpem olketa tu for hapi. So olketa hapi nomoa for stap singol nomata living bilong olketa change.—1 Cor. 7:37, 38.
4. Why nao olketa Christian wea singol savve God tinghae long worship bilong olketa?
4 Jehovah and organization bilong hem tinghae long evri brata and sista nomata sapos hem marit or singol. God lovem iumi wanwan. (Matt. 10:29-31) No eni samting savve stopem iumi for no kasem love bilong God. (Rom. 8:38, 39) Nomata iumi marit or singol, God tinghae long evriwan wea worshipim hem.
5. Sapos man laek kasem gud samting taem hem singol, wanem nao hem mas duim?
5 Sapos man laek kasem gud samting taem hem singol, hem mas waka hard. Nomata olketa Christian wea singol olketa young or olo, chus for stap singol, divorce, or marit partner hem dae, hao nao olketa savve iusim gud laef bilong olketa? Bae iumi storyim samfala naes example bilong olketa Christian bifor and wanem iumi savve lanem from olketa.
Singol Taem Iu Young
6, 7. (a) Wanem privilege nao olketa young gele bilong Philip kasem? (b) Wanem nao Timothy duim taem hem singol, and wanem gud samting nao hem kasem from hem willing for duim datwan?
6 Philip wea hem man for talemaot gud nius hem garem fofala young gele wea strong for duim datfala waka tu. (Acts 21:8, 9) Olketa young gele hia kasem holy spirit from God for talem profesi and datwan mekem toktok long Joel 2:28, 29 kamap tru.
7 Timothy iusim gud singol laef bilong hem taem hem young. From taem hem baby yet, mami bilong hem Eunice and grani bilong hem Lois teachim hem “olketa Holy Raeting.” (2 Tim. 1:5; 3:14, 15) Bat luk olsem olketa kamap Christian long firstfala taem wea Paul visitim hom bilong olketa long Lystra long samting olsem 47 C.E. Tufala year bihaen, long mek-tu taem wea Paul visitim Lystra, maet Timothy hem gogo for 20 year or winim datwan. Nomata hem young and niu long truth, olketa elder long Lystra and Iconium “talem olketa gud samting abaotem” hem. (Acts 16:1, 2) So Paul invaetem Timothy for go witim hem long olketa ples wea hem go. (1 Tim. 1:18; 4:14) Iumi no savve sapos Timothy marit or nomoa. Bat iumi savve taem hem young, hem willing for waka witim Paul, and for staka year hem gohed elder and duim missionary waka taem hem singol.—Phil. 2:20-22.
8. Wanem nao mekem John Mark for garem olketa spiritual goal, and wanem nao olketa blessing wea hem kasem?
8 John Mark tu iusim gud singol laef bilong hem taem hem young. Hem and mami bilong hem Mary witim kasin bilong hem Barnabas, olketa long kongregeson long Jerusalem. Luk olsem famili bilong John Mark garem gudfala living from olketa garem haos long Jerusalem and haosgele tu. (Acts 12:12, 13) Nomata hem garem gudfala living taem hem young, hem no tingim hemseleva or duim wanem hemseleva laekem. Hem no tingting for marit, garem famili, or haos. From taem hem young yet, hem kaban witim olketa aposol and luk olsem datwan mekem hem for laek duim missionary waka. Hem hapi tumas for helpem Paul and Barnabas long firstfala missionary gogo bilong tufala. (Acts 13:5) Bihaen, hem waka witim Barnabas and then hem waka witim Peter long Babylon. (Acts 15:39; 1 Pet. 5:13) Iumi no savve sapos John Mark marit bihaen or nomoa. Bat staka pipol tinghae long hem bikos hem willing for helpem narawan and laek duim plande samting for God.
9, 10. Olketa wanem samting nao olketa young wan wea singol savve duim? Storyim example.
9 Staka young wan long kongregeson distaem tu iusim singol laef bilong olketa for duim moa samting for God. Olsem John Mark and Timothy duim, plande “gohed duim waka bilong Lord and no busy long eni nara samting.” (1 Cor. 7:35) Olketa wea singol garem chance for duim staka difren samting for Jehovah. Olketa savve pioneer, go long ples wea garem need, lanem nara languis, waka long Kingdom Hall construction, branch construction, attendim Ministerial Training Skul, or waka long Bethel. Sapos iu young and no marit, waswe, iu mekius long olketa chance wea iu garem for duim moa samting?
10 Wanfala brata wea nem bilong hem Mark start for pioneer taem hem teenager, attendim Ministerial Training Skul, and garem olketa assignment for go help long staka difren kantri. Taem hem ting go bak long 25 year wea hem duim full-taem service, hem sei: “Mi trae for encouragem evriwan long kongregeson, waka witim olketa long ministry, duim shepherding kol, invaetem olketa for kam kaikai long haos, and garem olketa hapitaem for strongim olketa. Mi barava hapi taem mi duim olketa samting hia.” Olsem Mark talem, wei for givim samting nao mekem man barava hapi, and wei for busy for worshipim Jehovah mekem iumi garem staka chance for duim datwan. (Acts 20:35) Iufala young wan, nomata wanem iu interest long hem or savve wea iu garem, plande difren samting stap for iufala duim long waka bilong Lord.—1 Cor. 15:58.
11. Wanem nao samfala gud samting wea iu savve kasem sapos iu no kwiktaem for marit?
11 Nomata staka young wan bae laek for marit, plande gud reason stap why hem gud for no kwiktaem marit. Paul encouragem olketa young wan for no marit taem olketa “young tumas” bikos feeling for laek duim sex hem strong long datfala taem. (1 Cor. 7:36) Taem iu young hem gud for savve long wanem iuseleva laekem firstaem and kasem savve wea bae helpem iu for chusim partner wea fitim. Promis wea man talem taem hem marit hem wanfala serious samting wea hem mas keepim for olowe.—Eccl. 5:2-5.
Singol Taem Iu Mature
12. (a) Taem living bilong Anna change, wanem nao hem duim? (b) Wanem privilege nao Anna kasem?
12 Gospel bilong Luke story abaotem Anna wea hasband bilong hem dae bihaen tufala marit for sevenfala year nomoa. Luk olsem hem sorre tumas taem datwan happen. Iumi no savve sapos tufala garem pikinini or sapos Anna tingting for marit moa. Bat Bible sei taem Anna 84 year, hem widow yet. Wanem Bible talem abaotem Anna showimaot nomata hasband bilong hem dae, hem gohed fren gud witim Jehovah. “Hem savve go for worship long temple evri day and evri naet. Evritaem hem savve barava prea strong and markem samfala taem for no kaikai.” (Luke 2:36, 37) So wei for worshipim God nao first samting long laef bilong Anna. Hem waka hard for duim datwan and hem kasem bigfala blessing. Hem garem privilege for lukim Jesus taem hem smol pikinini and for talem narawan wanem Messiah bae klosap duim.—Luke 2:38.
13. (a) Wanem nao showimaot Dorcas waka hard long kongregeson? (b) Wanem gud samting nao Dorcas kasem from hem kaen and helpem pipol?
13 Wanfala woman wea nem bilong Dorcas, wea nara nem bilong hem tu Tabitha, hem stap long Joppa wanfala taon long saedsea northwest long Jerusalem. Luk olsem hem no marit long datfala taem from Bible no storyim sapos hem garem hasband. Dorcas “evritaem helpem pipol and duim gud samting for pipol wea poor.” Hem sewim staka kaleko for olketa widow and olketa narawan and wanem hem duim mekem olketa for barava lovem hem. So taem Dorcas sik and seknomoa hem dae, kongregeson sendem tufala man for askem Peter for kam kwiktaem and mekem sista bilong olketa laef bak moa. Taem evriwan long Joppa herem Dorcas hem laef bak, staka biliv long Lord. (Acts 9:36-42) Maet Dorcas tu helpem samfala long olketa hia.
14. Wanem nao mekem olketa Christian wea singol for fren gud witim Jehovah?
14 Staka distaem tu olsem Anna and Dorcas. Maet samfala no faendem marit partner wea fitim. Olketa narawan divorce or widow distaem. Olketa Christian wea singol savve lane for depend moa long Jehovah from olketa no garem marit partner. (Prov. 16:3) Silvia, wanfala singol sista wea waka long Bethel for winim 38 year sei diswan hem wanfala blessing. Hem sei: “Samfala taem mi feel olsem mi needim narawan nao for strongim mi and mi savve ting olsem, ‘Hu nao bae encouragem mi?’ ” Bat then hem sei: “Mi trustim Jehovah bikos hem savve wanem mi needim, and datwan helpem mi for fren gud witim hem. Staka taem mi kasem encouragement from samwan or samting wea mi no tingim.” Taem iumi fren gud witim Jehovah, hem evritaem kaen and strongim iumi.
15. Wanem nao olketa singol Christian savve duim for lovem olketa difren long kongregeson?
15 Taem man singol hem garem chance for showimaot hem lovem olketa difren wan insaed kongregeson. (Readim 2 Corinthians 6:11-13.) Jolene wanfala singol sista wea duim full-taem service for 34 year sei: “Mi trae hard for fren gud witim evriwan and no witim olketa wea sem age nomoa. Taem man singol, hem savve duim staka samting for Jehovah, famili, olketa brata and sista, and olketa narawan. Nomata mi start for olo, mi hapi nomoa for stap singol.” Olketa wea olo, young, sik, famili wea garem dadi or mami nomoa, and olketa narawan long kongregeson tinghae long wanem olketa singol Christian duim for helpem olketa. Tru tumas, taem iumi showimaot love long narawan, datwan mekem iumi hapi. Waswe, iu tu savve showimaot love olketa difren wan olsem?
Singol for Full Laef
16. (a) Why nao Jesus stap singol for full laef bilong hem? (b) Wanem nao Paul duim from hem singol?
16 Jesus no marit bikos hem mas redi and duim gud ministry bilong hem. Hem travel long staka ples, waka from early morning go kasem naet, and gogo hem givim laef bilong hem for sevem pipol. From Jesus stap singol, datwan mekem hem fit for duim olketa samting hia. Aposol Paul travel long olketa farawe ples and kasem olketa hard taem, taem hem duim ministry. (2 Cor. 11:23-27) Iumi no savve sapos Paul marit bifor, bat taem hem kamap aposol hem chus for stap singol. (1 Cor. 7:7; 9:5) Jesus and Paul encouragem olketa narawan for followim example bilong olketa mekem olketa tu savve duim ministry. Bat no enitaem tufala stopem olketa wea worshipim God for no marit.—1 Tim. 4:1-3.
17. Wanem nao samfala duim distaem for followim example bilong Jesus and Paul? Why nao iumi savve Jehovah tinghae long olketa hia?
17 Distaem tu samfala chus for stap singol mekem olketa savve duim moa samting long ministry. Harold wea iumi storyim finis, hem waka long Bethel for winim 56 year. Hem sei: “Bihaen mi stap long Bethel for tenfala year, mi lukim staka wea marit mas lusim Bethel bikos olketa sik or mas lukaftarem dadi and mami wea olo. Dadi and mami bilong mi dae finis. From mi barava laek for stap long Bethel, mi no laek marit bikos mi savve sapos mi marit maet mi lusim Bethel.” Staka year go finis, Margaret wea pioneer for longfala taem sei: “Mi garem chance for marit, bat from mi duim staka interesting samting long pioneer waka, mi no marit. Mi iusim taem bilong mi for busy long ministry, and diswan mekem mi barava hapi.” Jehovah bae nating forgetim eniwan wea willing for sakrifaesim samting for tru worship.—Readim Isaiah 56:4, 5.
Duim Gud Samting Taem Iu Singol
18. Wanem nao olketa narawan savve duim for encouragem and sapotim olketa Christian wea singol?
18 Hem fitim for iumi praisem and encouragem olketa Christian wea singol wea duim best bilong olketa for worshipim Jehovah. Iumi lovem olketa wanwan, luksavve long gudfala wei bilong olketa, and tinghae long wanem olketa duim long kongregeson. Bae olketa nating feel olsem olketa stap seleva sapos iumi kamap olketa spiritual ‘brata, sista, mami, or pikinini’ bilong olketa.—Readim Mark 10:28-30.
19. Wanem nao best samting for iu duim taem iu singol?
19 Nomata sapos iu chus for stap singol or iu singol bikos samfala samting change long laef, mifala hope olketa example wea iumi storyim bae helpem iu for hapi and duim gud samting long laef bilong iu. Wei for singol hem olsem wanfala present wea samfala expectim, bat olketa narawan no expectim datwan. Samfala present wea iumi kasem, iumi kwiktaem for tinghae long hem, bat maet olketa nara present iumi no tinghae long hem stretawe. So for acceptim present wea iu kasem bae depend long hao iu ting long datwan. Wanem nao best samting for iu duim taem iu singol? Fren gud witim Jehovah, busy for duim waka for hem, and duim samting for showimaot iu lovem olketa narawan. Olsem man wea marit, olketa wea singol savve hapi and satisfae tu sapos olketa garem tingting bilong God abaotem datwan and iusim gud datfala present wea God givim.
Waswe, Iu Tingim Yet?
• Hao nao wei for singol hem wanfala present?
• Hao nao wei for singol hem wanfala blessing taem iu young?
• Wanem nao olketa Christian wea singol savve duim mekem olketa fren gud witim Jehovah and lovem narawan?
[Piksa long page 18]
Waswe, iu mekius long olketa chance wea iu garem for duim moa samting for God?