Lanem Pikinini for Showimaot Respect

WANFALA Napali toktok sei: “Sapos iu duim gud samting long olketa narawan, bae olketa duim gud samting long iu.” Datwan minim taem iumi showimaot gudfala wei, nara pipol bae laek for kaen long iumi and laekem iumi.

Hem barava gud tumas taem olketa young wan showimaot gudfala wei! Wanfala circuit overseer long Honduras wea waka witim staka pablisa sei: “Taem olketa pikinini showimaot respect and garem gudfala wei, plande taem mi lukim olketa haosholder willing for lisin long olketa winim wanem mi storyim.”

Distaem staka pipol no savve showimaot respect, dastawe hem important for savve hao for showimaot datwan. Iumi bae kasem gud samting taem iumi duim olsem. Bible sei tu: “Iufala mas mek sure wei bilong iufala hem fitim datfala gud nius abaotem Christ.” (Phil. 1:​27; 2 Tim. 3:​1-5) Hem barava important for teachim olketa pikinini bilong iumi for respectim nara pipol. Wanem nao iumi savve duim for lanem olketa no for garem gudfala wei nomoa bat for showimaot respect tu?a

Example Bilong Iumi Helpem Pikinini for Garem Gudfala Wei

Olketa pikinini lane taem olketa lukluk long wanem narawan duim. So wanfala important wei wea dadi and mami savve helpem pikinini for garem gudfala wei, hem for olketa seleva showimaot datwan. (Deut. 6:​6, 7) Hem important for storyim long pikinini why hem mas garem gudfala wei, bat dadi and mami need for duim moa samting. Olketa need for showimaot gudfala example long pikinini.

Tingim Paula,b wea big insaed famili wea mami nomoa stap. Hem wei bilong Paula for respectim narawan. Why nao olsem? Paula sei: “Mami nao showimaot gudfala example, so wei for respectim narawan hem kamap wei bilong mifala pikinini tu.” Wanfala brata wea nem bilong Walter lanem olketa boy bilong hem for respectim mami bilong olketa wea no Witness. Hem sei: “Mi showimaot example long olketa boy for respectim mami bilong olketa long wei for no talem olketa nogud toktok long waef bilong mi.” Walter gohed for lanem olketa boy bilong hem long Bible, and hem prea long Jehovah for helpem hem. Wanfala boy bilong hem waka long branch office bilong Olketa Jehovah’s Witness, and narawan hem pioneer. Tufala lovem and respectim dadi and mami bilong olketa.

Bible sei: “God hem no laekem evri samting for olobaot, bat hem laekem iumi for stap gud tugeta.” (1 Cor. 14:33) Evri samting wea Jehovah duim hem no olobaot. Iumi olketa Christian shud trae hard for followim disfala wei bilong God and keepim haos bilong iumi klin. Samfala dadi and mami lanem pikinini for stretem bed bifor olketa go long skul, putim kaleko long ples bilong hem, and for help for duim olketa waka long haos. Sapos pikinini lukim evri samting long haos hem klin and no olobaot, datwan bae mekem hem tu for laek duim sem samting.

Wanem nao tingting bilong pikinini bilong iu abaotem samting wea hem lanem long skul? Waswe, hem tinghae long wanem teacher duim for hem? Sapos iu dadi or mami, waswe, iu talem teacher iu tinghae long wanem hem duim for pikinini bilong iu? Sapos iu tinghae long skul waka bilong pikinini and respectim teacher, bae pikinini duim sem samting tu. Hem gud for encouragem pikinini for talem thankiu long teacher. Wei for sei thankiu long olketa teacher, doctor, stoakeeper, and olketa narawan hem nambawan wei for showimaot respect. (Luke 17:15, 16) Iumi shud praisem olketa young wan wea showimaot gudfala wei long skul.

Evriwan long Christian kongregeson shud showimaot gudfala wei. Hem naes tumas for lukim olketa young wan long kongregeson showimaot gudfala wei taem olketa sei “plis” and “thankiu”! Olketa bigman tu savve showimaot olketa respectim Jehovah taem olketa lisin gud long taem bilong meeting. Diswan savve encouragem olketa young wan for followim example bilong olketa. Taem olketa pikinini lukim olketa long kongregeson showimaot gudfala wei, datwan savve helpem olketa tu for showimaot respect long olketa neiba. Tingim, nomata Andrew hem foa year nomoa, hem lane for sei “Excuse” taem hem go pas long olketa bigman.

Wanem moa dadi and mami savve duim for helpem pikinini garem gudfala wei? Dadi and mami shud markem taem for lanem olketa abaotem staka example wea stap long Bible.​—Rom. 15:4.

Storyim Olketa Example Long Bible

Mami bilong Samuel lanem hem firstaem for showimaot respect long wei for baodaon long Hae Priest Eli. Taem hem tekem Samuel long tabernacle hem samting olsem thri or foa year nomoa. (1 Sam. 1:​28) Waswe, iu savve practice witim pikinini for sei “morning,” “aftanun,” or “evening” taem olketa meetim samwan? Olsem Samuel, taem pikinini bilong iu showimaot gudfala wei olsem, “Jehovah and olketa man [bae] barava hapi long hem” tu.​—1 Sam. 2:​26.

Hem gud for iusim olketa story long Bible for showimaot wanem hem minim for respectim narawan and no respectim narawan! Tingim King Ahaziah, wanfala king wea no faithful. From hem laek for lukim profet Elijah, hem sendem ‘wanfala komanda witim fifti soldia bilong hem’ for tekem kam Elijah. Datfala komanda tok strong long profet Elijah for go witim hem. Datwan hem no stret wei for story long man wea waka for God. Wanem nao Elijah talem? Hem sei: “Sapos mi man bilong tru God, fire bae kam daon from skae and killim dae iu witim fifti soldia bilong iu.” And hem nao wanem hem happen. “Fire hem kam daon from skae and killim dae datfala komanda and fifti soldia bilong hem.”​—2 Ki. 1:​9, 10.

Then king hem sendem nara komanda witim 50 soldia moa. Hem tu trae for forcem Elijah for go witim hem. Fire kam daon from skae and killim dae olketa tu. Bat then, nara komanda witim 50 soldia bilong hem kam long Elijah. Hem showimaot respect long Elijah. Datfala komanda nildaon long Elijah and sei: “Man bilong tru God, plis iu tinghae long laef bilong mi and bilong fifti soldia bilong mi. Tufala komanda witim olketa soldia bilong tufala dae taem fire kam daon from skae, bat plis iu tinghae long laef bilong mi.” Waswe, bae profet Elijah talem fire for kam daon from skae for killim dae datfala man wea barava showimaot respect? Hard tumas for Elijah duim olsem! Angel bilong God talem Elijah for go witim datfala komanda. (2 Ki. 1:​11-​15) Datfala example showimaot hem barava important for respectim narawan!

Taem olketa soldia bilong Rome kasholem aposol Paul long temple, Paul savve hem no garem raet for toktok. Long wei wea showimaot respect, hem askem komanda: “Hao, mi savve talem iu wanfala samting?” From datwan, Paul garem chance for story.​—Acts 21:37-​40.

Taem olketa bigman tekem Jesus long kot, wanfala policeman hitim feis bilong hem. Nomata olsem, hem savve wanem for talem. Hem sei: “Sapos mi tok rong, iu talem kam, bat sapos nomoa, iu hitim mi for wanem ia?” No eniwan savve faendem eni rong samting long wanem Jesus talem.​—John 18:22, 23.

Bible storyim olketa example tu wea helpem iumi for savve wanem for duim taem samwan kaonselem iumi and hao for talemaot sin bilong iumi long wei wea showimaot respect. (Gen. 41:​9-​13; Acts 8:​20-​24) Olsem example, Abigail sei sorre for nogud samting wea hasband bilong hem Nabal duim long David. Hem givim tu staka kaikai for David. David barava tinghae long wanem Abigail duim dastawe bihaen Nabal dae, David chusim Abigail for kamap waef bilong hem.​—1 Sam. 25:23-​41.

Nomata samfala taem hem no isi for showimaot respect or for garem gudfala wei, iumi mas teachim pikinini for respectim narawan. ‘Sapos iumi letem olketa man lukim laet bilong iumi’ long wei olsem, ‘diswan bae mekem olketa for praisem Dadi bilong iumi long heven.’​—Matt. 5:​16.

[Footnotes]