Kwestin From Reader

Why nao Moses kros long Eleazar and Ithamar, tufala son bilong Aaron, bihaen tufala brata bilong tufala Nadab and Abihu dae? And wanem nao mekem Moses for no gohed kros?​—Lev. 10:16-​20.

No longtaem bihaen datfala ceremony for anointim olketa priest, Jehovah killim dae tufala son bilong Aaron, Nadab and Abihu bikos tufala mekem fire wea Jehovah no talem tufala for duim. (Lev. 10:​1, 2) Moses talem olketa nara son bilong Aaron for mas no sorre long tufala brata bilong olketa wea dae. No longtaem bihaen, Moses kros long Eleazar and Ithamar bikos tufala no kaikaim goat wea olketa sakrifaesim for sin. (Lev. 9:3) Why nao Moses kros long tufala?

Olketa law wea Jehovah givim long Moses sei priest wea mekem sakrifaes for sin bilong olketa Israelite mas kaikaim part bilong datfala sakrifaes long courtyard bilong tabernacle. Wei for duim olsem showimaot hem givim ansa for olketa sin bilong olketa wea givim datfala sakrifaes. Bat sapos hae priest tekem samfala blood bilong sakrifaes long Holy Ples wea hem nao firstfala rum long tabernacle, no eniwan savve kaikaim datfala sakrifaes bat mas bonem.​—Lev. 6:​24-​26, 30.

Bihaen olketa nogud samting wea happen, Moses laek mek sure evri samting followim wanem Jehovah talem. Taem hem savve olketa priest bonem finis goat wea olketa sakrifaesim for sin, hem kros tumas long Eleazar and Ithamar and askem tufala why nao olketa no kaikaim datfala goat olsem olketa shud duim. Hem ask olsem bikos no eni blood hem stap long Holy Ples for Jehovah and datwan showimaot olketa shud kaikaim part bilong datfala goat.​—Lev. 10:17, 18.

Aaron ansarem kwestin bilong Moses bikos luk olsem Eleazar and Ithamar duim samting wea Aaron nao talem tufala for duim. From Jehovah killim dae tufala nara son bilong hem, maet long tingting bilong Aaron hem bae no stret for eni priest kaikaim sakrifaes wea olketa mekem long datfala day. Maet hem tingse sapos olketa kaikaim, Jehovah bae no hapi long olketa, nomata olketa no mekem Nadab and Abihu for sin.​—Lev. 10:19.

Maet Aaron garem tingting olsem bikos hem firstaem for olketa son bilong hem duim waka olsem priest and olketa shud mek sure olketa duim evri sismol samting wea God talem for mekem God hapi. Bat samting wea Nadab and Abihu duim spoelem nem bilong Jehovah, and datwan mekem God kros and killim tufala dae. So maet Aaron tingse from olketa long famili bilong hem nao duim sin, olketa narawan long famili shud no kaikaim datfala sakrifaes wea holy.

Luk olsem Moses acceptim ansa wea Aaron talem bikos Bible sei: “Taem Moses herem datwan, luk olsem hem agree.” (Lev. 10:20) Luk olsem Jehovah tu agree long wanem Aaron talem.