Waswe, Iu Heitim Wei for No Obey?
“Iu [ Jesus] heitim wei for no obey.”—HEB. 1:9.
1. Wanem nao Jesus teachim abaotem wei for showimaot love?
JESUS CHRIST mekhae long wei for garem love taem hem sei long olketa disaepol: “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.” (John 13:34, 35) Jesus talem olketa wea followim hem for mas lovem each other. Datwan bae showimaot olketa nao tru Christian. Jesus sei tu: “Gohed lovem olketa enemy bilong iufala and for prea for olketa wea spoelem iufala.”—Matt. 5:44.
2. Olketa tru Christian mas heitim wanem?
2 Jesus no teachim olketa disaepol for lovem narawan nomoa bat hem teachim olketa abaotem wanem for heitim tu. Bible story olsem abaotem Jesus: “Iu laekem tumas samting wea raeteous and iu heitim wei for no obey [heitim olketa nogud samting].” (Heb. 1:9; Ps. 45:7) Diswan showimaot iumi mas laekem tumas samting wea raeteous and heitim sin tu, wea hem nao wei for no obey. Aposol John sei: “Eniwan wea gohed for duim sin hem brekem law, so sin hem wei for brekem law.”—1 John 3:4.
3. Wanem nao bae iumi storyim long disfala study?
3 Iumi olketa tru Christian shud tingim diswan, ‘Waswe, mi heitim wei for no obey?’ Bae iumi storyim fofala samting wea iumi savve showimaot iumi heitim nogud samting: (1) tingting bilong iumi abaotem wei for drinkim tumas alcohol, (2) hao iumi ting long samting wea join witim devildevil, (3) tingting bilong iumi abaotem wei for durong, and (4) tingting bilong iumi abaotem olketa wea no obey.
No Ova Tumas Long Alcohol
4. Why nao Jesus feel free for givim kaonsel abaotem wei for ova tumas long alcohol?
4 Samfala taem, Jesus drinkim wine bikos hem luksavve datwan hem present from God. (Ps. 104:14, 15) Nomata olsem, hem no ova tumas long wei for drink. (Prov. 23:29-33) Jesus feel free for givim kaonsel abaotem datwan. (Readim Luke 21:34.) Sapos man ova tumas long alcohol datwan savve mekem hem for duim olketa nara big sin. Dastawe aposol Paul sei: “Iufala mas no drunk long wine, wea bae mekem iufala duim olketa rabis samting, bat iufala mas gohed for kasem holy spirit.” (Eph. 5:18) Hem talem olketa woman long kongregeson wea olo tu for “no drinkim tumas wine.”—Titus 2:3.
5. Sapos iu chus for drinkim alcohol, olketa wanem kwestin nao hem gud for ting raonem?
5 Sapos iu chus for drinkim alcohol, tingim diswan: ‘Waswe, mi garem sem tingting olsem Jesus abaotem wei for drink tumas? Sapos mi mas kaonselem narawan abaotem diswan, waswe, mi feel free for duim datwan? Waswe, mi drink for mekem mi forgetim wari or hevi wea mi kasem? Haomas alcohol nao mi drinkim evri week? Wanem nao mi duim taem samwan talem mi, mi drink tumas? Waswe, mi tok bak long olketa or kros long olketa?’ Wei for drinkim tumas alcohol savve mekem iumi for no tingting gud and no disaedem stret samting. Olketa Christian evritaem laek for garem gudfala tingting.—Prov. 3:21, 22.
Stap Klia Long Samting wea Join Witim Devildevil
6, 7. (a) Hao nao Jesus deal witim Satan and olketa demon? (b) Why nao datwan kamap big distaem?
6 Taem Jesus stap long earth, hem barava againstim Satan and olketa demon. Hem faithful nomata Satan traem hem. (Luke 4:1-13) Hem luksavve long olketa kleva trik bilong Satan tu wea savve spoelem tingting and wei bilong hem and hem againstim olketa. (Matt. 16:21-23) Jesus helpem pipol wea hambol taem hem talem olketa demon for go aot from olketa.—Mark 5:2, 8, 12-15; 9:20, 25-27.
7 Bihaen Jesus kamap King long 1914, hem aotem Satan and olketa demon from heven. Distaem Satan trae hard for “giamanim olketa man long full earth” winim enitaem bifor. (Rev. 12:9, 10) Iumi shud no sapraes hao staka pipol long world distaem interest long olketa samting wea join witim devildevil. Wanem nao iumi savve duim for protectim iumiseleva?
8. Wanem nao iumi need for tingim taem iumi chusim hapitaem?
8 Bible warnim iumi long olketa nogud samting wea man savve kasem sapos hem duim samting wea join witim devildevil. (Readim Deuteronomy 18:10-12.) Distaem Satan and olketa demon iusim olketa movie, buk, and video game wea mekhae long samting wea join witim devildevil for spoelem tingting bilong pipol. So taem iumi chusim hapitaem, hem gud for tingim diswan: ‘Long olketa month wea go pas, waswe, mi lukim olketa movie, TV program, pleim olketa video game, or readim olketa buk wea mekhae long datwan? Waswe, mi luksavve hem important for againstim samting wea join witim devildevil, or waswe, mi tingse datwan bae no spoelem mi? Waswe, mi tingim tu tingting bilong Jehovah long olketa hapitaem wea mi chusim? Sapos mi duim eni samting wea join witim devildevil, waswe, love wea mi garem for Jehovah and olketa raeteous principle bilong hem bae mekem mi for duim stret samting and lusim datwan?’—Acts 19:19, 20.
Obeyim Warning Bilong Jesus Abaotem Samting wea No Stret
9. Wanem nao showimaot man start for garem wei for no obey?
9 Jesus mekhae long standard bilong Jehovah abaotem wei for no durong. Hem sei: “Hao, iufala no readim finis? Start kam long taem wea God wakem olketa man, hem wakem man and woman and hem sei, ‘Dastawe, man bae lusim dadi and mami bilong hem and hem bae stap olowe witim waef bilong hem. Datfala man and woman bae kamap wanfala body nomoa.’ Diswan minim tufala hia no tufala body, bat wanfala nomoa. So no eni man mas aotem samting wea God joinim finis.” (Matt. 19:4-6) Jesus savve samting wea iumi lukim savve affectim heart bilong iumi. Dastawe long Sermon long Maunten Jesus sei: “Iufala herem hao olketa sei, ‘Iu mas no duim adultery.’ Bat mi talem iufala distaem, eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” (Matt. 5:27, 28) Olketa wea les for herem warning bilong Jesus showimaot olketa start for garem wei for no obey.
10. Storyim experience wea showimaot man savve lusim wei for lukluk long olketa rabis piksa.
10 Satan iusim olketa rabis piksa for mekhae long wei for durong. World distaem fulap witim datwan. Hem hard for olketa wea lukluk long olketa rabis piksa for kwiktaem forgetim wanem olketa lukim. Maet gogo hem kamap wei bilong olketa for lukluk evritaem long olketa rabis piksa. Tingim samting wea happen long wanfala brata. Hem sei: “Mi start for lukluk haed long olketa rabis piksa. Mi tingse samting wea mi duim haed bae no affectim wei wea mi worshipim Jehovah. Mi savve wanem mi duim hem rong bat mi tingse God still acceptim worship bilong mi.” Wanem nao changem tingting bilong brata hia? Hem sei: “Mi disaed for talem olketa elder abaotem problem hia, nomata hem no isi for mi storyim datwan long olketa.” Gogo brata hia lusim wei for lukluk long kaen rabis samting olsem. Hem sei: “Taem mi lusim datwan, mi garem gudfala konsens.” Pipol wea heitim wei for no obey mas lane for heitim wei for lukluk long olketa rabis piksa.
11, 12. Wanem nao showimaot iumi heitim wei for no obey taem iumi chusim music?
11 Music and olketa toktok insaed savve affectim feeling and heart bilong iumi. Music hem present from God and for longtaem finis music hem part bilong tru worship. (Ex. 15:20, 21; Eph. 5:19) Bat staka music long world distaem mekhae long wei for durong. (1 John 5:19) Hao nao bae iu savve sapos music wea iu lisin long hem, hem spoelem iu or nomoa?
12 Hem gud for tingim diswan: ‘Waswe, olketa singsing wea mi lisin long hem mekhae long wei for durong, killim man dae, duim adultery, or for talem nogud toktok? Sapos mi readim toktok long olketa singsing hia long narawan, waswe, bae hem luksavve mi heitim wei for no obey, or bae hem showimaot mi garem nogud tingting?’ Hem hard for iumi sei iumi heitim wei for no obey bat long semtaem iumi lisin long music wea mekhae long wei for no obey. Jesus sei: “Olketa samting wea kamaot from mouth hem samting wea stap long tingting bilong man and datwan nao mekem hem for no klin. Olketa samting hia nao hem rabis tingting, wei for killim man dae, adultery, wei for durong and olketa nara samting saed long sex wea no fitim, wei for steal, laea, and talem olketa nogud toktok.”—Matt. 15:18, 19; markem witim James 3:10, 11.
Garem Tingting Bilong Jesus Abaotem Olketa wea No Obey
13. Wanem nao tingting bilong Jesus abaotem olketa wea gohed for duim sin?
13 Jesus sei hem kam for talem pipol wea sin, wea hem nao olketa wea no obey, for repent. (Luke 5:30-32) Bat wanem nao tingting bilong Jesus abaotem olketa wea gohed for duim sin? Jesus tok strong againstim wei for kaban witim pipol olsem. (Matt. 23:15, 23-26) Hem sei tu: “No evriwan wea sei long mi, ‘Lord, Lord,’ bae go insaed long kingdom bilong God bat man wea duim wanem Dadi bilong mi long heven laekem nao, bae go insaed. Long datfala day [taem God judgem pipol], staka pipol bae sei long mi, ‘Lord, Lord, mifala duim plande samting for iu finis, and iu savve long datwan. Mifala talemaot olketa toktok bilong God, raosem olketa demon, and duim olketa mirakol?’ ” Bat Jesus bae sei long olketa wea gohed sin and no repent: “Iufala go from mi.” (Matt. 7:21-23) Why nao bae olketa kasem judgment olsem? Hem bikos olketa no respectim God and olketa nogud samting wea olketa duim spoelem nara pipol.
14. Why nao olketa wea duim sin and no repent mas aot from kongregeson?
14 Bible sei olketa wea duim sin and no repent mas aot from kongregeson. (Readim 1 Corinthians 5:9-13.) Thrifala reason stap why hem important for duim diswan: (1) mekem pipol no tok daonem nem bilong Jehovah, (2) for protectim kongregeson, and (3) for helpem man wea duim sin for repent.
15. Sapos iumi laek faithful long Jehovah, olketa wanem kwestin nao iumi shud tingim?
15 Waswe, iumi garem sem tingting olsem Jesus abaotem olketa wea gohed for duim sin? Iumi need for tingim olketa kwestin hia: ‘Waswe, mi laek for kaban witim eniwan wea disfellowship or man wea disassociatem hemseleva from Christian kongregeson? Waswe sapos hem wanfala klos relative wea no stap witim iumi long haos?’ Taem samting olsem kamap, datwan savve testim iumi sapos iumi laek faithful long God and laekem samting wea raeteous, or nomoa.a
16, 17. Wanem hard taem nao wanfala sista kasem, and wanem nao helpem hem followim arrangement for disfellowshipim olketa wea no repent?
16 Tingim experience bilong wanfala sista wea garem son wea big finis and hem lovem Jehovah. Bat gogo son hia duim nogud samting and no repent. Datwan mekem hem disfellowship from kongregeson. Hem no isi for datfala sista followim wanem Bible talem for no story and no kaban witim son bilong hem bikos hem lovem Jehovah bat long semtaem hem lovem son bilong hem tu.
17 Wanem advaes nao bae iu givim long datfala sista? Wanfala elder helpem sista hia for luksavve Jehovah hem minim sorre wea hem kasem. Datfala elder helpem hem for tingim wei wea Jehovah feel sorre taem samfala angel no obey. Hem storyim hao nomata Jehovah savve diswan mekem hem sorre tumas, Jehovah talem long Bible olketa wea sin and no repent mas disfellowship. Datfala sista tinghae long wanem elder hia talem and hem faithful for followim arrangement for disfellowshipim olketa wea no repent.b Wei for faithful olsem mekem Jehovah hapi.—Prov. 27:11.
18, 19. (a) Taem iumi no story and no kaban witim olketa wea disfellowship, datwan showimaot iumi heitim wanem? (b) Wanem gud samting nao savve happen taem iumi faithful long God and followim arrangement bilong hem?
18 Sapos iu kasem sem samting, hem gud for tingim Jehovah minim hard taem wea iu kasem. Taem iu no story and no kaban witim olketa wea disfellowship or wea disassociate, datwan showimaot iu heitim wanem olketa duim wea mekem olketa aot from kongregeson. Hem showimaot tu iu lovem olketa and laekem olketa for kasem gud samting. Wei wea iu faithful long Jehovah maet mekem man wea kasem discipline for repent and laek for worshipim Jehovah moa.
19 Wanfala sista wea disfellowship and bihaen hem reinstate sei: “Mi hapi bikos Jehovah lovem pipol bilong hem dastawe hem mek sure organization bilong hem mas klin. Pipol wea no worshipim Jehovah maet tingse datwan no kaenfala samting for duim, bat hem showimaot love and hem stret samting for duim.” Waswe, iu tingse sista hia bae luksavve long datwan sapos olketa long kongregeson and famili bilong hem gohed for story and kaban witim hem taem hem disfellowship? Taem iumi followim arrangement long Bible for disfellowshipim olketa wea no repent, datwan showimaot iumi laekem samting wea raeteous and luksavve Jehovah nomoa fit for markem standard for iumi followim.
“Heitim Nogud Samting”
20, 21. Why nao hem important for heitim wei for no obey?
20 Aposol Peter sei: “Iufala mas gohed for garem gudfala tingting and gohed for lukaot.” Why nao olsem? Bikos “Devil, wea hem enemy bilong iufala, hem raraon olsem wanfala lion wea singaot big and hem laekem tumas for kaikaim eniwan.” (1 Pet. 5:8) Iumi mas heitim wei for no obey mekem Satan no kaikaim iumi!
21 Hem no isi for heitim nogud samting. Iumi evriwan sin and stap insaed world wea mekhae long samting wea body laekem. (1 John 2:15-17) Bat taem iumi followim example bilong Jesus Christ and strongim love wea iumi garem for Jehovah God, datwan bae helpem iumi for heitim wei for no obey. Iumi mas disaed strong for “heitim nogud samting” and barava trustim wei wea Jehovah bae “protectim . . . olketa wea faithful long hem. Hem bae sevem olketa from pipol wea duim nogud samting.”—Ps. 97:10.
[Footnotes]
a For savve moa abaotem diswan, lukim Wastaoa, December 15, 2007, page 26-31.
b Lukim tu The Watchtower, January 15, 2007, page 17-20.
Wanem Nao Ansa Bilong Iu?
• Wanem nao bae helpem iumi luksavve long tingting bilong iumi abaotem alcohol?
• Wanem nao iumi savve duim for againstim samting wea join witim devildevil?
• Why nao wei for lukluk long olketa rabis piksa bae spoelem iumi?
• Taem samwan wea iumi lovem hem disfellowship, hao nao iumi showimaot iumi heitim wei for no obey?
[Piksa long page 29]
Sapos iu disaed for drinkim alcohol, wanem nao iu shud tingim?
[Piksa long page 30]
Keakea long hapitaem wea join witim devildevil
[Piksa long page 31]
Man wea lukluk long olketa rabis piksa showimaot hem laekem wanem?