Waswe, Olketa Young Wan Shud Baptaes?

CARLOS,a wanfala Christian dadi long Philippines sei: “Mi hapi tumas gele bilong mi disaed for worshipim Jehovah. Mi savve hem hapi for duim datwan tu.” Wanfala dadi from Greece raet olsem: “Mi and waef bilong mi hapi tumas thrifala pikinini bilong mitufala baptaes and kamap Olketa Jehovah’s Witness taem olketa teenager. Olketa gohed gud long spiritual wei and hapi for worshipim Jehovah.”

Olketa Christian dadi and mami savve hapi tumas taem pikinini bilong olketa baptaes, bat samfala taem olketa wari tu. Wanfala mami sei: “Mi barava hapi bat mi wari tu.” Why nao mami hia feel olsem? Hem sei: “Mi luksavve son bilong mi mas ansa long Jehovah for wanem hem duim.”

For baptaes and worshipim Jehovah hem wanfala goal wea evri young wan shud garem. Nomata olsem, maet olketa dadi and mami tingting olsem: ‘Mi savve pikinini bilong mi gohed gud long spiritual wei, bat waswe, bae hem fit for againstim olketa test for no duim olketa nogud samting and gohed garem olketa gudfala wei wea Jehovah laekem?’ Maet narawan ting olsem: ‘Taem pikinini bilong mi kasem test for laek garem staka material samting, waswe, bae hem gohed strong for worshipim Jehovah and hapi?’ Wanem toktok long Bible nao savve helpem dadi and mami for luksavve sapos pikinini redi for baptaes?

Man Mas Firstaem Kamap Disaepol Bilong Christ Bifor Hem Baptaes

Bible no talem wanem age nao man savve baptaes, bat hem storyim olketa fasin wea man shud garem mekem hem fit for baptaes. Jesus talem olketa disaepol olsem: ‘Teachim pipol long evri kantri for kamap disaepol bilong mi and baptaesim olketa.’ (Matt. 28:19) Tru tumas, olketa wea kamap disaepol bilong Christ nomoa savve baptaes.

Wanem nao hem minim for kamap disaepol? Long buk Insight on the Scriptures, hem sei: “Disfala word disaepol hem minim evriwan wea bilivim teaching bilong Christ and followim datwan.” Waswe, olketa young wan fit for kamap trufala disaepol bilong Christ? Wanfala sista wea missionary long Latin America for winim 40 year raet olsem abaotem hem and tufala sista bilong hem: “Nomata mifala young, mifala savve mifala laek for worshipim Jehovah and stap long Paradaes. Wei for dedicate long Jehovah nao helpem mifala gohed strong long olketa test wea olketa young wan kasem. Mifala no sorre from mifala disaed for dedicate long God nomata mifala young.”

Hao nao dadi and mami bae luksavve sapos pikinini kamap disaepol bilong Christ? Bible sei: “Wanem pikinini duim showimaot wei bilong hem. Taem wei bilong hem gud and stret, bae iu savve nomoa.” (Prov. 20:11) Tingim samfala samting wea young wan savve duim ‘mekem evriwan lukim wei wea hem gohed for kamap strongfala’ disaepol.—1 Tim. 4:15.

Pruv wea Showimaot Young Wan Hem Disaepol Bilong Christ

Waswe, pikinini obeyim iu? (Col. 3:20) Waswe, hem duim waka long haos wea iu givim for hem duim? Bible sei olsem abaotem Jesus taem hem 12 year: “Hem gohed for obeyim [dadi and mami bilong hem].” (Luke 2:51) Hem tru, hem no isi for pikinini obeyim evri samting wea dadi and mami talem. Bat olketa tru Christian mas “barava followim gud [example bilong Jesus].” So olketa young wan wea laek for baptaes mas obeyim dadi and mami.—1 Pet. 2:21.

Tingim olketa kwestin hia: Waswe, pikinini bilong iu showimaot ‘kingdom hem first samting’ long laef bilong hem long wei for duim ministry? (Matt. 6:33) Waswe, hem willing for talemaot gud nius long narawan, or iu evritaem mas encouragem hem for duim preaching waka and story long pipol? Waswe, hem luksavve long responsibility wea hem garem from hem anbaptaes pablisa? Waswe, hem willing for duim return visit long olketa wea interest? Waswe, hem no fraet for talem olketa skul fren and teacher hem wanfala Jehovah’s Witness?

Waswe, hem tinghae long wei for go long olketa kongregeson meeting? (Ps. 122:1) Waswe, hem hapi for koment long Wastaoa Study and Kongregeson Bible Study? Waswe, hem tekpart long Theocratic Ministry Skul?​—Heb. 10:24, 25.

Waswe, pikinini bilong iu trae hard for garem olketa gudfala wei, long wei for no garem olketa nogud fren long skul and long nara ples? (Prov. 13:20) Olketa wanem kaen music, movie, TV program, and video game nao hem laekem? Wanem samting long Internet nao hem laek lukim? Waswe, samting wea hem talem or duim showimaot hem laek for followim olketa standard long Bible?

Waswe, pikinini savve gud long Bible? Waswe, hem savve storyim wanem hem lanem long Famili Worship? Waswe, hem savve explainim olketa main teaching long Bible? (Prov. 2:6-9) Waswe, hem interest for readim Bible and studyim olketa buk wea wakaman wea faithful and wise provaedem? (Matt. 24:45) Waswe, hem askem kwestin abaotem olketa teaching long Bible and olketa scripture?

Olketa kwestin hia bae helpem iu for luksavve sapos pikinini gohed gud long spiritual wei. Bihaen iu ting raonem olketa kwestin hia, maet iu luksavve pikinini bilong iu need for duim samfala samting bifor hem baptaes. Bat sapos hem showimaot hem wanfala disaepol and dedicatem laef bilong hem long God finis, maet iu disaed for letem hem for baptaes.

Olketa Young Wan Savve Praisem Jehovah

Staka wea worshipim Jehovah showimaot olketa faithful taem olketa teenager or taem olketa smol. Tingim Joseph, Samuel, Josiah, and Jesus. (Gen. 37:2; 39:1-3; 1 Sam. 1:24-28; 2:18-20; 2 Chron. 34:1-3; Luke 2:42-49) And tingim fofala young gele bilong Philip wea savve talem profesi. Luk olsem dadi and mami trainim olketa gud taem olketa smol yet.​—Acts 21:8, 9.

Wanfala brata long Greece sei: “Mi baptaes taem mi 12 year. Mi nating sorre long wanem mi disaedem. Long 24 year wea go pas, 23 year nao mi enjoyim wei for duim full-taem service. Love wea mi garem for Jehovah helpem mi for winim olketa test wea olketa young wan kasem. Taem mi 12 year, mi nating savve long staka samting long Bible olsem distaem. Bat mi savve mi lovem Jehovah and laek worshipim hem for olowe. Mi hapi bikos hem helpem mi for gohed worshipim hem.”

Nomata man hem young or olo, hem shud baptaes sapos hem showimaot hem tru disaepol bilong Christ. Aposol Paul sei: “For man hem raeteous, hem mas showimaot faith long heart bilong hem, and for hem sev, hem mas iusim mouth bilong hem for talemaot datfala message.” (Rom. 10:10) Taem young wan disaed for baptaes, hem and dadi and mami bilong hem kasem wanfala nambawan samting. So no letem eni samting stopem iu or pikinini bilong iu for kasem hapi wea kamaot from datwan.

[Footnote]

[Box long page 5]

Garem Stretfala Tingting Abaotem Wei for Baptaes

Samfala dadi and mami ting long wei wea pikinini baptaes hem gud samting bat olketa wari nogud pikinini kasem nogud samting bihaen. Bat waswe, wei for baptaes and worshipim Jehovah mekem man kasem nogud samting long future? Bible no talem datwan. Proverbs 10:22 sei: “Blessing wea kam from Jehovah nao hem mekem man hem rich, and hem no addim eni pain witim datwan.” Aposol Paul raet olsem long Timothy taem hem young: “Iumi savve kasem barava gud samting from wei for faithful long God sapos iumi satisfae nomoa long wanem iumi garem.”​—1 Tim. 6:6.

Tru tumas, hem no isi for worshipim Jehovah. Taem Jeremiah duim waka olsem profet, hem tu kasem staka hard taem. Bat hem sei olsem abaotem worship bilong hem for tru God: “ Taem mi herem toktok bilong iu, mi barava ting strong long hem. Toktok bilong iu hem mekem mi barava hapi bikos pipol kolem mi long nem bilong iu, Jehovah.” (Jer. 15:16) Jeremiah savve wei for worshipim God mekem hem hapi. Olketa samting long world bilong Satan savve mekem man kasem hard taem. Olketa dadi and mami need for helpem olketa pikinini luksavve long datwan.​—Jer. 1:19.

[Box\Piksa long page 6]

Waswe, Pikinini Bilong Mi Shud Weit Firstaem Bifor Hem Baptaes?

Taem pikinini laek for baptaes and fit for duim datwan, maet dadi and mami disaed for hem weit firstaem. Wanem nao maet mekem dadi and mami for duim olsem?

Mi fraet nogud pikinini bilong mi baptaes and bihaen hem duim big sin wea mekem hem disfellowship. Waswe, hem stret for tingse young wan wea no baptaes bae no ansa long God for wanem hem duim? Solomon talem disfala kaonsel for olketa young wan: “Iu mas savve hao long evri samting [wea iu duim] trufala God bae judgem iu.” (Eccl. 11:9) Paul talem disfala kaonsel for evriwan: “Iumi evriwan bae ansa long God for samting wea iumi duim and talem.”​—Rom. 14:12.

Nomata sapos iumi baptaes or nomoa, iumi evriwan bae ansa long God for wanem iumi duim. Iumi mas tingim, Jehovah evritaem protectim olketa wea worshipim hem. Hem bae ‘no letem samting for switim olketa wea olketa no fit for winim.’ (1 Cor. 10:13) Sapos olketa “gohed for garem gudfala tingting” and againstim olketa samting wea traem olketa, Jehovah bae evritaem sapotim olketa. (1 Pet. 5:6-9) Wanfala Christian mami sei: “Olketa young wan wea baptaes no laek for duim olketa nogud samting long world. Son bilong mi wea baptaes taem hem 15 year, luksavve hao datwan protectim hem. Hem sei: ‘Mi no laek for duim olketa samting wea againstim Law bilong Jehovah.’ Wei for baptaes strongim man for duim stret samting.”

Sapos iu teachim pikinini bilong iu for obeyim Jehovah, iu savve trustim hao pikinini savve gohed duim sem samting bihaen hem baptaes. Proverbs 20:7 sei: “Man wea raeteous hem evritaem faithful. Olketa son bilong hem wea followim hem bae hapi.”

Mi laekem pikinini bilong mi for markem and kasem samfala goal firstaem. Olketa young wan shud lane for waka mekem taem olketa big, olketa no need for depend long dadi and mami for lukaftarem olketa long material wei. Bat hem danger samting for encouragem young wan for aftarem hae education and for kasem staka selen winim wei for mekem worship bilong olketa for Jehovah hem main samting long laef. Jesus story abaotem wanfala “seed” wea hem nao message abaotem kingdom wea hem no grow. Hem sei: “Datfala seed wea foldaon long ples wea garem nila grass, hem man wea herem message abaotem kingdom, bat olketa samting long laef wea man savve wari abaotem, and riches wea savve switim man hem satem datfala message, gogo hem no garem eni frut.” (Matt. 13:22) Sapos dadi and mami encouragem young wan for aftarem samting long world firstaem, datwan savve mekem young wan for no tinghae long wei wea hem fren witim Jehovah and for no interest tumas for worshipim Jehovah.

Wanfala mature elder story olsem abaotem olketa young wan wea fit for baptaes bat wea dadi and mami talem olketa for weit firstaem. Hem sei: “Wei for stopem olketa young wan for baptaes savve mekem olketa for no gohed gud long spiritual wei and wikdaon.” Wanfala traveling overseer sei tu: “Olketa young wan savve wari and feel olsem olketa no duim staka spiritual samting. Datwan maet mekem olketa for aftarem samting long world for mekem olketa hapi.”

[Piksa]

Waswe, wei for go long university nao shud first samting long laef bilong iu?

[Piksa long page 3]

Young wan savve showimaot hem disaepol bilong Christ

[Piksa long page 3]

Prepare and tekpart long olketa meeting

[Piksa long page 4]

Obeyim dadi and mami

[Piksa long page 4]

Duim ministry

[Piksa long page 4]

Prea seleva