Jehovah Nao Lukaftarem Mi

“Bae iufala no kasem eni pis land long land wea mi bae givim long olketa son bilong Israel bikos mi nao bae lukaftarem iufala.”​—NUM. 18:20

1, 2. (a) Wanem nao happen long olketa Levite taem Jehovah givim land long olketa nara tribe? (b) Wanem nao Jehovah promisim long olketa Levite?

BIHAEN olketa Israelite winim staka ples long Promis Land, Joshua witim Hae Priest Eleazar and olketa leader bilong olketa tribe divaedem land fitim each tribe. (Num. 34:13-29) Jehovah givim land long evri tribe bat hem no givim eni pis land long olketa Levite. (Josh. 14:1-5) Why nao olsem? Waswe, Jehovah forgetim olketa?

² Iumi savve kasem ansa long wanem Jehovah talem long olketa Levite. Jehovah promis hem bae no lusim olketa. Hem sei: “Bae iufala no kasem eni pis land long land wea mi bae givim long olketa son bilong Israel bikos mi nao bae lukaftarem iufala.” (Num. 18:20) Jehovah promisim nambawan samting taem hem sei: “Mi nao bae lukaftarem iufala”! Wanem nao tingting bilong iu sapos Jehovah talem datwan long iu? Maet firstaem iu ting olsem, ‘Waswe, bae Jehovah sei olsem long mi tu? Mi man wea no perfect!’ Hem important for iu and famili for tingim olketa kwestin hia. Bae iumi storyim wanem nao Jehovah minim taem hem sei hem bae lukaftarem olketa Levite. Datwan bae helpem iumi for minim hao hem savve lukaftarem iumi distaem. Jehovah savve lukaftarem iu nomata iu garem hope for go long heven or laef olowe long paradaes earth.

Jehovah Lukaftarem Olketa Levite

3. Wanem nao happen wea mekem God chusim olketa Levite for waka for hem?

³ Bifor Jehovah givim Law long olketa Israelite, hed long famili nao waka olsem priest for famili bilong hem. Bat taem Jehovah givim Law, hem chusim samfala long tribe bilong Levi for waka olsem priest and samfala for helpem olketa priest. Hao nao Jehovah duim datwan? Taem Jehovah killim dae olketa firstborn son bilong olketa long Egypt, hem mekem olketa firstborn son bilong olketa Israelite for kamap holy. Datwan minim olketa bilong Jehovah and hem chusim olketa for waka for hem. Bat then Jehovah disaedem difren samting. Hem laekem olketa Levite nomoa for waka for hem winim wei for “evri firstborn son bilong olketa Israelite” for duim datwan. Bat from olketa firstborn son bilong olketa nara tribe staka winim olketa man long tribe bilong Levi, olketa nara tribe hia mas givim selen long olketa Levite. (Num. 3, 41, 46, 47) Then olketa Levite savve startim waka bilong olketa for God.

4, 5. (a) Wanem nao Jehovah minim taem hem sei hem bae lukaftarem olketa Levite? (b) Long wanem wei nao Jehovah lukaftarem olketa?

⁴ Taem Jehovah chusim olketa Levite for waka for hem, hao nao hem lukaftarem olketa? Hem no givim pis land long olketa bat hem givim important waka for olketa duim. Olketa bae “waka olsem priest for Jehovah.” (Josh. 18:7) Numbers chapter 18 helpem iumi for luksavve Jehovah bae provaedem material samting wea olketa Levite needim. (Readim Numbers 18:19, 21, 24.) Olketa Levite kasem “smol haf bilong evri samting wea pipol bilong Israel garem for helpem olketa duim waka bilong olketa.” Diswan minim olketa Israelite mas givim smol haf long kaikai wea olketa harvestim and smol haf long olketa animal wea olketa garem. Then olketa Levite mas givim smol haf long “best samting wea olketa kasem” for helpem olketa wea waka olsem priest.a (Num. 18:25-29) Olketa priest kasem tu “olketa present wea holy” wea olketa Israelite givim long God long ples for worship. So olketa priest savve trustim Jehovah bae provaedem wanem olketa needim.

⁵ Luk olsem Law bilong Moses talem evri famili long Israel for givim nara smol haf long wanem olketa garem for peim kaikai, drink, and nara samting wea olketa laekem for iusim long taem bilong olketa holy convention wea kamap evri year. (Deut. 14:22-27) Bat Law talem olketa for iusim disfala smol haf for nara samting tu. Olketa Israelite celebratem Sabbath year long evri mek-seven year. Long end bilong evri mek-thri year and mek-six year long datfala seven year, olketa Israelite iusim datwan for helpem olketa wea poor and olketa Levite. Why nao Law sei olketa Levite tu mas kasem datwan? Hem bikos olketa no kasem “eni pis land.”—Deut. 14:28, 29.

6. Nomata olketa Levite no garem eni pis land, wea nao olketa stap?

⁶ From olketa Levite no garem eni pis land, wea nao olketa stap? God nao lukaftarem olketa. Hem givim 48 taon long olketa Levite and area wea stap raonem. Sixfala long olketa taon hia Jehovah markem for man haed long hem sapos hem no min for killim man dae. (Num. 35:6-8) So olketa Levite garem ples for stap taem olketa no waka long temple bilong God. Jehovah barava lukaftarem olketa wea duim waka bilong hem. Tru tumas, olketa Levite trustim Jehovah bae provaedem wanem olketa needim.

7. Olketa Levite need for showimaot wanem?

⁷ Sapos olketa Israelite no givim smol haf long wanem olketa garem for olketa Levite, no eni Law stap for panisim olketa. Bat samting wea olketa duim mekem olketa priest and Levite for no kasem wanem olketa needim. Hem nao samting wea happen long taem bilong Nehemiah. Olketa Levite no kasem wanem olketa needim so olketa mas waka long garden. Datwan mekem olketa no duim waka bilong olketa long temple. (Readim Nehemiah 13:10.) Olketa Levite savve kasem wanem olketa needim sapos olketa Israelite obeyim Law bilong Jehovah. Olketa priest and Levite need for showimaot faith long Jehovah and wei wea hem lukaftarem olketa.

Jehovah Lukaftarem Tu Man Wanwan

8. Wanem nao mekem Asaph feel nogud?

⁸ Jehovah lukaftarem full tribe bilong olketa Levite. Bat samfala Levite iusim datfala toktok “Jehovah nao lukaftarem mi” taem olketa storyim wei wea olketa fren gud witim God and trustim hem. (Lam. 3:24) Olsem example, Bible story abaotem wanfala Levite wea savve singsing and raetem olketa song. Maet hem Asaph or samwan long famili bilong Asaph wea hem nao main wan for singsing long taem bilong King David. (1 Chron. 6:31-43) Psalm 73 storyim wei wea Asaph feel nogud long pipol wea duim nogud samting bikos luk olsem olketa garem gudfala laef. Hem sei: “Hem iusles nomoa for mi tingim olketa gud samting and duim stret samting.” Luk olsem Asaph start for no tinghae long spesol waka wea Jehovah givim hem. Hem no trustim wei wea Jehovah bae lukaftarem hem. Hem feel nogud go kasem taem hem “go insaed long holy temple bilong God.”​—Ps. 73:2, 3, 12, 13, 17.

9, 10. Why nao Asaph sei ‘God bae lukaftarem hem for olowe’?

⁹ Long temple, Asaph start for changem tingting bilong hem. Maet iu tu kasem sem samting. Maet samfala taem iu start for no tinghae long privilege wea iu garem for worshipim Jehovah and start for tingim nomoa olketa material samting wea iu laek garem. Bat taem iu studyim Bible and go long olketa meeting, iu start for garem sem tingting olsem Jehovah. Asaph luksavve wanem bae happen long pipol wea duim nogud samting. Hem tingim gud samting wea hem kasem from hem worshipim Jehovah and hem olsem Jehovah holem hand bilong hem and leadim hem. Dastawe hem sei long Jehovah: “From iu nao God bilong mi, mi no laekem eni samting moa long disfala earth.” (Ps. 73:23, 25) Asaph sei Jehovah nao bae lukaftarem hem. (Readim Psalm 73:26.) Hem sei nomata ‘body and heart bilong hem wik, hem trustim God bae lukaftarem hem for olowe.’ Hem savve Jehovah bae tingim hem olsem fren bilong hem and no forgetim wei wea hem faithful. (Eccl. 7:1) Luk olsem datwan barava strongim Asaph! Hem singsing olsem: “Hem gud tumas for fren gud witim God. Jehovah, iu nao Lord bilong evri samting and olsem ples bilong mi for stap sef.”​—Ps. 73:28.

¹⁰ Taem Asaph sei God lukaftarem hem, hem no storyim olketa material samting nomoa. Main samting hem tingim hem privilege wea hem garem and wei wea hem fren witim Barava Haefala God. (Jas. 2:21-23) For gohed fren witim Jehovah, Asaph mas garem faith and trustim Jehovah. Hem mas trustim hao sapos hem obeyim Jehovah, Jehovah bae blessim hem. Jehovah savve duim sem samting for iu tu sapos iu trustim hem.

11. Wanem nao Jeremiah askem long Jehovah, and hao nao Jehovah ansarem hem?

¹¹ Nara Levite wea sei Jehovah lukaftarem hem, hem profet Jeremiah. Hem stap long Anathoth, wanfala taon bilong olketa Levite klosap long Jerusalem. (Jer. 1:1) Jeremiah tu askem Jehovah why nao pipol wea duim gud samting safa bat pipol wea duim nogud samting garem gudfala laef. (Jer. 12:1) Hem komplen long Jehovah abaotem olketa nogud samting wea hem lukim long Jerusalem and Judah. Jeremiah savve Jehovah hem raeteous. Jehovah herem wanem Jeremiah talem. Hem talem Jeremiah for warnim evriwan hem bae finisim olketa nogud pipol. Jehovah mekem datfala profesi kamap tru. Olketa wea obeyim Jehovah stap laef, bat pipol wea no followim datfala warning, olketa dae.​—Jer. 21:9.

12, 13. (a) Wanem nao happen wea mekem Jeremiah for sei: “Jehovah nao lukaftarem mi”? (b) Wanem nao Jeremiah duim, and why nao evri Israelite mas duim sem samting?

¹² Gogo Jeremiah feel olsem hem wakabaot long darkness taem hem lukim enemy spoelem Jerusalem. Hem feel olsem Jehovah mekem hem for “olsem man wea dae for longtaem finis.” (Lam. 1:1, 16; 3:6) Jeremiah talem olketa Israelite for fren bak witim Jehovah, bat olketa gohed for duim nogud samting. So Jehovah finisim Jerusalem and Judah. Nomata Jeremiah duim stret samting, hem sorre tumas long wanem hem happen. Bat Jeremiah tingim mercy bilong God and hem sei: “Jehovah mekem iumi stap laef.” Tru tumas, Jehovah garem bigfala mercy! Jeremiah tingim olketa samting hia and hem sei: “Jehovah nao lukaftarem mi.” Jeremiah gohed duim waka bilong hem olsem profet.​—Readim Lamentations 3:22-24.

¹³ For 70 year, no eni Israelite stap long Jerusalem and Judah. (Jer. 25:11) Bat Jeremiah trustim Jehovah bae lukaftarem hem. Hem patient and “weitim” Jehovah for duim samting. Evri tribe bilong Israel lusim land bilong olketa, so olketa Israelite tu need for garem sem wei olsem Jeremiah. Jehovah nomoa savve helpem olketa. Bihaen 70 year, olketa Israelite go bak long hom bilong olketa and worshipim Jehovah moa.​—2 Chron. 36:20-23.

Olketa Narawan wea Trustim Jehovah

14, 15. Hu nao narawan wea trustim Jehovah for lukaftarem hem, and why nao olsem?

¹⁴ Asaph and Jeremiah kam from tribe bilong Levi, bat Jehovah lukaftarem tu olketa narawan from difren tribe. Taem David young, hem sei God nao “helpem hem long laef.” (Readim Psalm 142:1, 5.) Taem David raetem datfala psalm, hem no stap long eni haos or long haos bilong king tu. Hem haed from olketa enemy bilong hem long wanfala cave. Tufala taem nao hem duim datwan. Hem haed long cave klosap long Adullam and narawan long wilderness bilong En-gedi. Maet hem raetem Psalm 142 taem hem stap long wanfala long olketa cave hia.

¹⁵ Luk olsem David duim datwan bikos hem haed from King Saul. Saul laek killim hem dae, so hem mas ranawe long cave wea hard for man kasem. (1 Sam. 22:1, 4) From David stap long ples olsem, maet hem tingse hem no garem eni fren nao for helpem hem. (Ps. 142:4) So long datfala taem David askem God for helpem hem.

16, 17. (a) Why nao David feel olsem no eniwan stap for helpem hem? (b) Hu nao David savve askem for helpem hem?

¹⁶ Bifor David raetem Psalm 142, maet hem herem samting wea happen long Hae Priest Ahimelech. Ahimelech helpem David, nomata hem no savve David ranawe from Saul. From Saul jealous, hem talem olketa man for killim dae Ahimelech and famili bilong hem. (1 Sam. 22:11, 18, 19) David feel nogud long samting wea happen. Hem feel olsem hem nao killim dae priest wea helpem hem. Sapos samting olsem kasem iu, waswe, bae iu feel olsem David tu? David feel taed tu bikos Saul gohed for ronem hem.

¹⁷ Gogo profet Samuel wea anointim David for kamap king, hem dae. (1 Sam. 25:1) Datwan mekem David feel olsem no eniwan stap for helpem hem. Bat hem savve Jehovah bae helpem hem. David no garem sem privilege olsem olketa Levite, bat Jehovah chusim hem for duim difren waka, wea hem nao for kamap king bilong olketa Israelite. (1 Sam. 16:1, 13) So David talem Jehovah evri samting wea stap long heart bilong hem and hem gohed for trustim Jehovah. Iu tu savve trustim Jehovah for lukaftarem iu taem iu traem best for worshipim hem.

18. Long wanem wei nao Jehovah lukaftarem olketa wea iumi storyim?

¹⁸ Olketa wea iumi storyim long disfala study kasem assignment from Jehovah and olketa trustim Jehovah bae provaedem wanem olketa needim. Olketa Israelite from olketa nara tribe, olsem David, savve trustim God for lukaftarem olketa tu. Waswe, iu trustim Jehovah for lukaftarem iu? Bae iumi storyim datwan long next study.

[Footnote]

Wanem Nao Ansa Bilong Iu?

• Long wanem wei nao Jehovah lukaftarem olketa Levite?

• Wanem nao Asaph, Jeremiah, and David duim wea showimaot olketa trustim Jehovah?

• Wanem fasin nao iu need for garem for showimaot iu trustim God?

[Blurb long page 8]

Olketa Levite no kasem eni pis land. Nomata olsem, Jehovah lukaftarem olketa bikos hem givim waka for olketa duim

[Piksa long page 7]

Long wanem wei nao Jehovah lukaftarem olketa priest and Levite?

[Piksa long page 9]

Wanem nao helpem Asaph for gohed trustim Jehovah?