Waswe, Iu Olsem Phinehas Taem Hard Samting Kamap?

HEM privilege for kamap elder long kongregeson. Nomata olsem, Bible sei olketa elder savve kasem samfala hard samting. Samfala taem olketa elder mas ‘judge for Jehovah’ taem samwan duim bigfala sin. (2 Chron. 19:6) Or maet wanfala elder kasem assignment wea hem tingse hem no fit for duim. Moses tu ting olsem. Hem sei long God: “Mi man nating nomoa! Mi no fit for go long Pharaoh.”​—Ex. 3:11.

God iusim holy spirit for helpem olketa man raetem Bible. Hem iusim holy spirit tu for markem olketa man for elder. So Bible garem staka information for helpem olketa elder duim waka bilong olketa taem hard samting kamap. Phinehas hem son bilong Eleazar and hem granson bilong Aaron, so hem bae kamap hae priest tu. Tingim thrifala samting wea Phinehas duim wea bae helpem olketa elder for no fraet, garem fasin for luksavve, and depend long Jehovah taem hard samting kamap.

“Semtaem Nomoa Hem Getap”

Phinehas hem young taem olketa Israelite stap long flat ples long Moab. Bible sei: “Olketa pipol start for durong witim olketa gele long Moab. . . . Olketa start for kaikaim kaikai wea olketa sakrifaesim for olketa god bilong olketa and worshipim olketa god hia.” (Num. 25:1, 2) Jehovah mekem olketa wea duim nogud samting for kasem nogud sik and dae. Hao nao nogud samting wea olketa Israelite duim and sik wea kamap affectim Phinehas?

Bible sei: “Then wanfala Israelite man tekem kam wanfala Midianite woman long tent bilong hem front long Moses and front long olketa son bilong Israel taem olketa krae front long tent bilong meeting.” (Num. 25:6) From Phinehas wanfala priest, wanem nao hem duim? Phinehas hem young bat datfala Israelite man wea duim nogud samting hem wanfala chief wea garem responsibility for helpem olketa Israelite worshipim Jehovah.​—Num. 25:14.

Phinehas no fraetem olketa man. Hem fraet long Jehovah. Taem hem lukim tufala, semtaem nomoa hem tekem spia and go bihaenem tufala long tent and spiarim tufala. Hao nao Jehovah ting long wei wea Phinehas no fraet and kwiktaem disaed for duim samting? Stretawe Jehovah finisim datfala sik. Hem promisim Phinehas hao olketa wea born kam from laen bilong hem bae waka olsem priest “for olowe.”​—Num. 25:7-13.

Hem tru, olketa elder no raf long eniwan. Bat olsem Phinehas, olketa mas disaedem samting and no fraet. Tingim Guilherme. Hem elder for tu-thri month finis and olketa elder askem hem for help long wanfala judicial komiti. Brata wea duim bigfala sin hem wanfala elder wea helpem Guilherme taem hem young. Guilherme sei: “Mi no mas feel gud for duim datwan. Long naet, mi no savve sleep gud. Mi tingim olowe wanem nao mi mas duim for followim standard bilong Jehovah winim wei for disaedem samting followim feeling bilong mi. Staka day nao mi prea abaotem datwan and duim research.” Datwan helpem Guilherme for no fraet for deal witim problem hia and for helpem datfala brata long spiritual wei.​—1 Tim. 4:11, 12.

Taem problem kamap long kongregeson and olketa elder no fraet for kwiktaem mekem disison, datwan showimaot olketa garem faith and duim wanem Jehovah laekem. Olketa nara Christian tu mas no fraet for reportim bigfala sin wea narawan duim. Semsem tu, iumi mas faithful long Jehovah and no gohed story or kaban witim fren or relative wea disfellowship.​—1 Cor. 5:11-13.

Fasin for Luksavve Stopem Problem

Hem wei bilong olketa young wan for kwiktaem duim samting and no tingting firstaem, bat Phinehas no olsem. Tingim wei wea Phinehas garem fasin for luksavve taem hem herem nara samting wea olketa Israelite duim. Tribe bilong Reuben and Gad and haf tribe bilong Manasseh wakem wanfala altar klosap long Jordan River. Olketa nara Israelite redi for go faetem olketa bikos olketa tingse wanem olketa duim hem join witim false worship.​—Josh. 22:11, 12.

Wanem nao Phinehas duim? Phinehas witim olketa chief bilong Israel go story witim olketa. Olketa tribe wea wakem altar talem hao datfala altar hem for “worshipim Jehovah.” Datwan stopem big problem for kamap.​—Josh. 22:13-34.

Sapos wanfala Christian herem nogud samting abaotem samwan wea worshipim Jehovah, hem gud for followim example bilong Phinehas! Fasin for luksavve bae mekem iumi for no kwiktaem feel nogud long wanfala brata or talem nogud samting abaotem hem.​—Prov. 19:11.

Hao nao fasin for luksavve savve helpem olketa elder for followim example bilong Phinehas? Jaime, wea elder for winim ten year sei: “Taem wanfala pablisa storyim long mi hao hem feel nogud long narawan, mi kwiktaem askem Jehovah for helpem mi for no saedem eniwan bat for iusim Bible for helpem hem. Wantaem wanfala sista talem mi wanfala mature brata long nara kongregeson mekem hem feel nogud. Datfala brata hem fren bilong mi, and hem bae isi nomoa for mi story witim hem. Nomata olsem, mi storyim olketa Bible principle witim datfala sista and hem agree for story firstaem witim brata hia. (Matt. 5:23, 24) Bat problem no kwiktaem finis. So mi encouragem hem for tingim olketa nara Bible principle. Sista disaed for prea abaotem problem and traem best for forgivim hem.”

Wanem nao happen? Jaime sei: “Samfala month bihaen, datfala sista kam story long mi moa. Hem sei datfala brata sorre long wanem hem talem. Hem askem sista for tufala preach tugeta and hem talem datfala sista hem tinghae long wanem hem duim. Tufala stretem datfala problem. From mi no story witim fren bilong mi abaotem datfala problem, datwan mekem tufala seleva nao for stretem. Mi no saedem eniwan!” Bible sei: “No hariap for go long kot for talemaot samting wea iu lukim.” (Prov. 25:8) Olketa elder wea garem fasin for luksavve encouragem olketa wea garem problem witim narawan for followim olketa Bible principle for mek peace.

Phinehas Prea Long Jehovah

Phinehas garem privilege for waka olsem priest for pipol bilong God. Olsem iumi storyim finis, nomata hem young hem garem fasin for luksavve and no fraet. Nomata olsem, hem need for trustim Jehovah taem hem deal witim hard samting.

Taem olketa man long Gibeah wea kam from tribe bilong Benjamin rapem and killim dae concubine bilong wanfala Levite, olketa nara tribe go for faetem tribe bilong Benjamin. (Judg. 20:1-11) Bifor olketa go faet, olketa prea long Jehovah for helpem olketa. Bat tufala taem olketa lus and staka pipol dae. (Judg. 20:14-25) Waswe, olketa tingse Jehovah no herem prea bilong olketa? Waswe, Jehovah interest for lukim wei wea olketa trae for stretem problem?

Long datfala taem, Phinehas hem hae priest long Israel, and samting wea hem duim showimaot hem no fraet. Hem prea long God: “Waswe, mifala shud go for faetem moa olketa son bilong Benjamin wea olketa nao brata bilong mifala or nomoa?” Jehovah helpem olketa for winim tribe bilong Benjamin and olketa bonem datfala taon Gibeah.​—Judg. 20:27-48.

Wanem nao iumi lanem from datwan? Samfala problem wea kamap long kongregeson maet gohed nomata olketa elder waka hard for stretem and prea staka taem. Sapos datwan happen, olketa elder savve tingim toktok bilong Jesus: “Gohed for ask [or prea] and iufala bae kasem samting wea iufala ask for hem. Gohed for lukaotem samting and iufala bae faendem datwan. Gohed for noknok long door and bae hem open for iufala.” (Luke 11:9) Nomata sapos hem luk olsem Jehovah no kwiktaem ansarem prea, olketa elder savve trustim Jehovah bae duim samting long taem wea hem markem.

Olsem example, wanfala kongregeson long Ireland barava needim niu Kingdom Hall, bat planning officer long datfala ples stopem. Hem no acceptim eni plan wea olketa brata givim. Bat nara man wea savve appruvim plan for buildim Kingdom Hall hem chief planning officer bilong full kantri. Sapos olketa brata prea abaotem datwan, waswe, bae Jehovah helpem olketa olsem hem helpem Phinehas?

Wanfala elder long there sei: “Mifala prea staka taem abaotem datwan. Bihaen, mifala go long main planning office. Olketa long there sei mifala mas weit for staka week bifor mifala savve lukim chief officer. Nomata olsem, long datfala day mifala garem chance for story witim hem for 5 minute. Bihaen hem lukim olketa niu plan wea mifala mekem, hem talem mifala for gohed wakem Kingdom Hall. Datfala planning officer wea againstim mifala firstaem hem start for helpem mifala. Mifala luksavve prea savve barava helpem iumi.” Tru tumas, Jehovah bae ansarem prea bilong olketa elder wea depend long hem.

Phinehas garem bigfala waka for duim long Israel bifor. Nomata olsem, hem no fraet, hem garem fasin for luksavve, and depend long Jehovah for helpem hem taem hard samting kamap. Jehovah hapi long wanem Phinehas duim for lukaftarem pipol bilong hem. Samting olsem 1,000 year bihaen, Ezra sei: “Phinehas wea hem son bilong Eleazar, hem leader bilong olketa bifor and Jehovah helpem hem.” (1 Chron. 9:20) Iumi laekem Jehovah for duim sem samting for olketa wea leadim waka long kongregeson and for evri Christian wea faithful for worshipim hem.