Iu Savve Hapi Nomata Samfala Long Famili No Worshipim Jehovah

“Iu no savve sapos iu bae sevem [marit partner] bilong iu or nomoa.” —1 COR. 7:16.

WASWE, IU SAVVE FAENDEM ANSA?

Wanem nao wanfala Christian savve duim for helpem famili garem peace nomata samfala no worshipim Jehovah?

Wanem nao wanfala Christian savve duim for helpem famili for acceptim truth?

Wanem nao iumi savve duim for helpem brata or sista wea samfala long famili bilong hem no worshipim Jehovah?

1. Taem samwan acceptim truth, datwan savve affectim famili long wanem wei?

TAEM Jesus sendem olketa aposol for preach, hem sei: “Taem iufala go, iufala preach and sei: ‘Kingdom bilong God hem kam klosap nao.’” (Matt. 10:1, 7) Olketa wea tinghae long disfala gud nius and acceptim, bae hapi and garem peace. Bat Jesus warnim olketa aposol staka pipol bae againstim preaching waka wea olketa duim. (Matt. 10:16-23) Taem samwan long famili againstim iumi, datwan hem hard samting for deal witim.​—Readim Matthew 10:34-36.

2. Waswe, olketa Christian wea famili no worshipim Jehovah savve hapi, and why nao olsem?

² Waswe, datwan minim iumi no savve hapi sapos samfala long famili no worshipim Jehovah? Nomoa! Hem tru, samfala Christian kasem hard taem from famili againstim olketa. Bat datwan no kasem evri Christian wea famili no insaed truth, and maet hard taem wea samfala Christian kasem from famili no savve gohed for olowe. Nara samting tu, taem eniwan long famili againstim iumi or no interest long truth, iumi savve hapi sapos iumi duim stret samting. Jehovah helpem olketa wea faithful for gohed hapi nomata olketa kasem hard taem. Tufala nara samting wea savve mekem olketa Christian for hapi hem for traem best for helpem famili garem peace and helpem famili for acceptim truth.

TRAEM BEST FOR GAREM PEACE LONG FAMILI

3. Why nao wanfala Christian shud waka hard for helpem famili garem peace?

³ Sapos famili garem peace, maet datwan savve helpem olketa for acceptim truth. (Readim James 3:18.) Nomata sapos samfala long famili no worshipim Jehovah yet, wanfala Christian mas waka hard for helpem famili garem peace. Wanem nao hem savve duim?

4. Wanem nao savve helpem iumi for gohed garem peace?

⁴ Olketa Christian mas gohed for garem peace. For duim olsem, iumi need for prea mekem iumi garem “peace bilong God wea winim nao wanem man savve minim.” (Phil. 4:6, 7) Iumi savve hapi and garem peace taem iumi lane abaotem Jehovah and followim olketa Bible principle. (Isa. 54:13) Sapos iumi laek for hapi and garem peace, iumi need for tekpart tu long olketa meeting and strong for duim ministry. Olketa wea famili no insaed truth savve duim olketa important samting hia tu. Tingim Enza, wea hasband bilong hem barava againstim hem.a Enza savve go preach bihaen hem duim evri waka long haos. Hem sei: “Evritaem mi go preach, Jehovah blessim mi.” Datwan mekem Enza hapi, satisfae, and garem peace.

5. (a) Wanem nao samfala test wea savve kasem Christian wea famili no insaed truth? (b) Wanem nao savve helpem hem?

⁵ Iumi mas waka hard for garem peace witim evriwan long famili wea no worshipim Jehovah. Maet diswan hem no isi bikos maet samfala taem olketa laekem iumi for duim samting wea againstim Bible principle. Maet samfala kros taem iumi faithful for followim Bible. Nomata olsem, iumi shud gohed duim stret samting and gogo maet iumi garem peace long famili. Bat sapos famili laekem iumi for duim samting wea no againstim Bible principle, iumi shud traem best for sapotim olketa. Datwan savve helpem evriwan for garem peace. (Readim Proverbs 16:7.) Taem iumi kasem eni test, hem important for iumi lukaotem advaes long olketa pablikeson wea wakaman wea faithful and wise provaedem, and story long olketa elder.—Prov. 11:14.

6, 7. (a) Taem samwan start for studyim Bible, why nao samfala long famili againstim hem? (b) Wanem nao wanfala Witness or samwan wea studyim Bible shud duim taem famili againstim hem?

⁶ Iumi savve garem peace long famili sapos iumi trustim Jehovah and trae for minim tingting bilong narawan wea no worshipim Jehovah. (Prov. 16:20) Olketa Bible study tu savve trae for duim datwan. Samfala hasband or waef wea no worshipim Jehovah maet no againstim marit partner wea studyim Bible. Maet hem sei datwan hem gud samting for helpem famili. Bat maet samfala hasband or waef barava againstim marit partner wea study. Esther wea distaem hem wanfala Witness storyim hem kros tumas taem hasband bilong hem start studyim Bible witim Olketa Jehovah’s Witness. Esther sei: “Mi savve torowem or bonem olketa buk bilong hem.” Tingim tu Howard wea againstim waef bilong hem taem hem start for studyim Bible. Hem sei: “Staka hasband wari nogud waef bilong olketa joinim religion wea laea long olketa. From hasband no savve hao for deal witim datwan, maet hem talem or duim samting wea raf.”

⁷ Iumi shud helpem Bible study for luksavve hem no need for stop for studyim Bible nomata marit partner againstim hem. Wei for kaen and showimaot respect savve helpem marit partner for no againstim hem. (1 Pet. 3:15) Howard sei: “Mi hapi tumas long wei wea waef bilong mi no kros and kaen long mi!” Waef bilong hem sei: “Howard talem mi for stop for studyim Bible. Hem sei olketa Witness laea long mi. Winim wei for argue, mi sei maet wanem hem talem hem tru, bat miseleva no savve hao nao olketa duim datwan. So mi askem hem for readim buk wea mi studyim. Hem readim datfala buk and hem agree witim evri samting wea buk talem. Hem tinghae long wanem hem readim.” Hem gud for tingim maet marit partner wea no worshipim Jehovah savve feel lonely or tingse eni samting bae spoelem marit bilong tufala taem hasband or waef go long olketa meeting or preaching. Bat wei for story long kaenfala wei and showimaot love long marit partner bae helpem hem for no wari.

HELPEM OLKETA FOR ACCEPTIM TRUTH

8. Wanem kaonsel nao aposol Paul givim long olketa Christian wea marit partner no worshipim Jehovah?

⁸ Aposol Paul sei hem no stret for Christian lusim marit partner bikos hem no wanfala Witness.b (Readim 1 Corinthians 7:12-16.) Wanfala Christian savve gohed for hapi sapos hem tingim hao marit partner maet acceptim truth long future. Bat hem mas careful tu taem hem trae for helpem marit partner for minim olketa tru samting long Bible. Tingim samfala experience.

9. Wanem nao wanfala Christian shud no duim taem hem explainim truth long famili?

⁹ Tingim Jason. Hem hapi tumas taem hem lanem tru samting long Bible. Hem sei: “Mi laek for talem evriwan wanem mi lanem!” Taem wanfala Bible study luksavve hem lanem tru samting long Bible, maet datwan mekem hem hapi tumas and laek storyim datwan evritaem. Maet hem tingse famili bae kwiktaem acceptim truth, bat maet olketa no agree witim hem. Wanem nao tingting bilong waef bilong Jason? Hem sei hem savve taed bikos Jason storyim Bible evritaem. Wanfala woman wea acceptim truth 18 year bihaen hasband bilong hem lanem truth sei: “Hem tek taem for mi lanem truth.” Maet iu study witim samwan wea marit partner bilong hem no interest long truth. Maet iu savve helpem Bible study for explainim truth long wei wea bae no mekem marit partner feel nogud. Moses sei: “Teaching bilong mi bae isisi foldaon olsem rain, toktok bilong mi bae olsem dew, and olsem rain wea mekem grass grow gud.” (Deut. 32:2) Taem iumi explainim truth long marit partner wea no Witness, maet hem gud for no storyim staka samting wantaem, bat storyim tu-thri samting nomoa long taem wea fitim.

10-12. (a) Wanem advaes nao Peter talem for olketa Christian wea marit partner no worshipim Jehovah? (b)Wanem nao helpem wanfala Bible study for followim kaonsel long 1 Peter 3:1, 2?

¹⁰ Aposol Peter givim gudfala kaonsel long olketa Christian waef wea hasband bilong olketa no worshipim Jehovah. Hem sei: “Iufala olketa waef mas stap anda long hasband bilong iufala. Then nomata sapos eniwan long olketa no obeyim toktok bilong God, gudfala wei bilong waef nao bae mekem olketa biliv nomata waef no talem eni samting. Diswan hem bikos olketa lukim gudfala wei bilong iufala and lukim iufala showimaot bigfala respect.” (1 Pet. 3:1, 2) Taem waef hambol and showimaot bigfala respect long hasband, datwan savve helpem hasband for acceptim truth nomata hasband againstim hem. Hasband wea worshipim Jehovah shud lukaftarem waef long wei wea God laekem and leadim famili long wei wea showimaot love, nomata waef againstim hem.—1 Pet. 3:7-9.

¹¹ Staka wea worshipim Jehovah distaem kasem gud samting taem olketa followim advaes wea Peter talem. Tingim Selma. Taem hem start for studyim Bible witim Olketa Jehovah’s Witness, hasband bilong hem, Steve no hapi. Steve sei hem kros, jealous, and wari. Selma sei nomata bifor hem lanem truth, hem no isi for stap witim Steve. Selma mas careful long evri samting wea hem talem and duim. Selma sei Steve hem man for kros and datwan kamap worse taem Selma start for studyim Bible. Wanem nao helpem Selma?

¹² Selma tingim wanfala samting wea hem lanem from sista wea study witim hem. Hem sei: “Long wanfala day, mi no laek for study. Long naet bifor, mitufala Steve raoa and hem killim mi, and datwan mekem mi sorre. Bihaen mi talem sista hia wanem hem happen and tingting bilong mi, hem askem mi for readim 1 Corinthians 13:4-7. Datwan mekem mi ting olsem: ‘Steve nating savve duim eni samting olsem for showimaot hem lovem mi.’ Bat kwestin wea sista askem mekem mi for changem tingting bilong mi. Hem sei: ‘Which wan long olketa samting hia nao iu duim for showimaot iu lovem hasband bilong iu?’ Mi sei: ‘Mi nating duim eni samting, bikos wei bilong hem nogud.’ Sista hia tok kaen olsem: ‘Selma, hu long iutufala nao trae for followim wei bilong tru Christian, iu or Steve?’” Selma luksavve hem need for changem tingting bilong hem. Hem sei: “Mi prea long Jehovah for helpem mi for showimaot love long Steve. Gogo, Steve changem wei bilong hem.” Bihaen 17 year, Steve acceptim truth.

WANEM NARAWAN SAVVE DUIM

13, 14. Wanem nao iumi savve duim for helpem brata or sista wea samfala long famili no worshipim Jehovah?

¹³ Tingim diswan. Rain wea isisi foldaon and tuwetem graon hem mekem olketa plant for grow gud. Long sem wei, taem evriwan long kongregeson duim kaenfala samting nomata hem smol, datwan helpem olketa wea famili no worshipim Jehovah for gohed hapi. Elvina wea stap long Brazil sei: “Love wea olketa brata and sista showimaot nao helpem mi for gohed faithful.”

¹⁴ Taem olketa brata and sista long kongregeson kaen and showimaot interest long olketa long famili wea no worshipim Jehovah, datwan savve mekem olketa for interest long truth. Wanfala brata long Nigeria wea acceptim truth 13 year bihaen waef kamap Witness sei: “Wanfala taem mi travel witim wanfala Witness, gogo trak bilong hem nogud. Hem lukaotem olketa Witness wea stap long vilij klosap and long naet olketa letem mifala for stap witim olketa. Olketa lukaftarem mifala gud olsem mifala savve long olketa from taem mifala smol. Long datfala taem, mi luksavve wanem waef bilong mi evritaem talem abaotem wei wea olketa Witness showimaot love hem tru.” Wanfala sista long England wea acceptim truth 18 year bihaen hasband kamap Witness sei: “Olketa Witness savve invaetem mitufala for kaikai witim olketa. Evritaem olketa welkamim mi.”c Wanfala man from England wea hem tu kamap Witness sei: “Olketa brata and sista savve visitim mifala or invaetem mifala for go long haos bilong olketa, and olketa showimaot olketa tingim mifala. Mi luksavve long datwan tu taem mi stap long hospital bikos staka kam visitim mi.” Wanem nao iu savve duim for showimaot iu interest long famili bilong brata or sista wea hemseleva nomoa worshipim Jehovah?

15, 16. Wanem nao savve helpem brata or sista wea hemseleva nomoa worshipim Jehovah for gohed hapi?

¹⁵ Hem tru, nomata for staka year iumi duim stret samting and trae helpem olketa long famili for lanem truth, maet no evriwan bae disaed for worshipim Jehovah. Samfala bae no interest or gohed for againstim iumi. (Matt. 10:35-37) Bat iumi savve kasem gud samting sapos iumi showimaot wei bilong tru Christian. Wanfala hasband wea acceptim truth bihaen waef kamap Witness sei: “Maet iu no savve hao olketa gudfala wei wea iu showimaot hem affectim tingting bilong marit partner bilong iu wea no worshipim Jehovah. So no givap and tingse marit partner bae hard for acceptim truth.”

¹⁶ Iu savve hapi nomata samfala long famili no worshipim Jehovah. Wanfala sista trae helpem hasband bilong hem for lanem truth for 21 year, bat hasband no acceptim truth. Hem sei: “Mi gohed for hapi bikos mi traem best for mekem Jehovah hapi, mi gohed faithful, and duim samting for strongim wei wea mi fren gud witim Jehovah. Mi busy for duim olketa spiritual samting olsem wei for study seleva, go long olketa meeting, duim preaching waka, and helpem narawan long kongregeson. Wei for duim olketa samting hia helpem mi fren gud witim Jehovah and gohed faithful.”—Prov. 4:23.

NO GIVAP!

17, 18. Wanem nao savve helpem Christian for no givap nomata samfala long famili no worshipim Jehovah?

¹⁷ Sapos samfala long famili bilong iu no acceptim truth, no givap for helpem olketa and gohed faithful for worshipim Jehovah. Jehovah bae no lusim pipol bilong hem. (1 Sam. 12:22) Jehovah bae fren gud witim iu sapos iu fren gud witim hem. (Readim 2 Chronicles 15:2.) Gohed lane abaotem Jehovah and “depend long hem.” (Ps. 37:4, 5) “Gohed for prea and no givap,” and trustim Jehovah bae helpem iu winim eni hard taem wea iu kasem.—Rom. 12:12.

¹⁸ Prea long Jehovah and askem hem for givim holy spirit for helpem iu stap gud witim famili. (Heb. 12:14) Maet datwan helpem olketa long famili wea no worshipim Jehovah for interest long truth. Iu bae hapi and garem peace taem iu ‘duim evri samting for givim glory long God.’ (1 Cor. 10:31) Olketa brata and sista long kongregeson tu bae sapotim iu taem iu traem best for duim olketa samting hia.

[Olketa Footnote]

[Piksa long page 28]

Chusim gudfala taem for explainim biliv bilong iu

[Piksa long page 29]

Showim interest long marit partner wea no worshipim Jehovah