Gohed Servem Jehovah Long Full Heart
“Son bilong mi, iu mas savve long God bilong dadi bilong iu, and iu mas . . . servem hem long full heart bilong iu.”—1 CHRON. 28:9.
FAENDEM ANSA FOR OLKETA KWESTIN HIA:
Wanem nao tokpiksa heart?
Wanem nao wanfala wei for luksavve sapos iumi servem God long full heart?
Wanem nao iumi mas duim mekem iumi gohed servem Jehovah long full heart?
1, 2. (a) Wanem part long body nao Bible storyim staka taem long tokpiksa wei? (b) Why nao hem important for iumi savve long mining bilong tokpiksa heart?
PLANDE taem Bible storyim olketa difren part long body long tokpiksa wei. Olsem example, King Solomon hem sei: “Wanfala gud report hem mekem olketa bon fat.” Jehovah sei long Ezekiel: “Mi mekem forhed bilong iu . . . strong winim wanfala ston.” And Jesus hem sei: “Sapos eye bilong iu mekem iu for sin, aotem datwan and torowem.”—Prov. 15:30; Ezek. 3:9; Matt. 18:9.
2 Bible storyim wanfala part long body long tokpiksa wei staka taem winim eni nara part. Hem nao heart. Hannah wea faithful storyim tokpiksa heart long prea bilong hem. Hem sei: “Heart bilong mi hem barava hapi long Jehovah.” (1 Sam. 2:1) Olketa man wea raetem Bible story abaotem heart klosap wan thousand taem, and klosap evritaem hem long tokpiksa wei. Hem important tumas for iumi savve long mining bilong tokpiksa heart, bikos Bible sei iumi mas protectim datwan.—Readim Proverbs 4:23.
WANEM NAO TOKPIKSA HEART?
3. Hao nao Bible helpem iumi for savve long mining bilong tokpiksa heart? Storyim example.
3 Nomata Bible no olsem wanfala dictionary wea talemaot mining bilong tokpiksa heart, hem helpem iumi for luksavve long mining bilong datwan. Hao nao olsem? For minim diswan, tingim wanfala big piksa wea luk naes wea olketa iusim staka smol kalakala ston for wakem long hem. For lukim klia datfala full piksa iumi mas standap farawe lelebet. Olsem tu, for savve long mining bilong datfala word “heart,” iumi mas lukluk long olketa verse long Bible wea datfala word hem stap insaed, and olketa difren wei wea Bible iusim datfala word. Taem iumi duim datwan, hem olsem iumi lukim full piksa nao. So wanem nao mining bilong tokpiksa heart?
4. (a) Wanem nao mining bilong tokpiksa heart? (b) Wanem nao toktok bilong Jesus long Matthew 22:37 hem minim?
4 Bible iusim datfala word “heart” for piksarem wanem kaen man nao iumi. Datwan minim samting iumi laekem, tingting and wei bilong iumi, samting wea iumi fit for duim, and olketa goal bilong iumi. (Readim Deuteronomy 15:7; Proverbs 16:9; Matthew 5:8.) Bat samfala taem “heart” hem minim wan or tufala long olketa samting hia nomoa. Olsem example, Jesus sei: “Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.” (Matt. 22:37) Long disfala scripture, “heart” hem minim nomoa samting iumi laekem and feeling bilong iumi. Jesus storyim heart, soul, and mind long disfala scripture for strongim wanfala point. Hem for strongim wei wea iumi mas showimaot love for God no long feeling bilong iumi nomoa, bat long wanem iumi duim long laef and long tingting bilong iumi tu. (John 17:3; Eph. 6:6) Bat taem Bible storyim “heart” seleva, hem piksarem wanem kaen man nao iumi.
WHY IUMI MAS PROTECTIM HEART
5. Why nao iumi laek for duim best bilong iumi for servem Jehovah long full heart?
5 King David sei long Solomon: “Son bilong mi, iu mas savve long God bilong dadi bilong iu, and iu mas hapi for servem hem long full heart bilong iu, bikos Jehovah hem lukluk gud insaed long heart bilong evri man, and hem savve long evri tingting bilong olketa.” (1 Chron. 28:9) Jehovah lukluk gud long heart bilong iumi evri man. (Prov. 17:3; 21:2) For iumi fren witim Jehovah and garem gudfala future, hem mas hapi long wanem hem lukim insaed long heart bilong iumi. Dastawe iumi laek for followim advaes bilong David and duim best bilong iumi for servem Jehovah “long full heart” bilong iumi.
6. Nomata iumi strong for servem Jehovah, wanem nao iumi mas luksavve long hem?
6 Wei wea iumi Olketa Jehovah’s Witness waka hard for duim wanem God laekem showimaot iumi laek for servem hem long full heart bilong iumi. Nomata olsem, iumi luksavve nogud world bilong Satan and samting wea body laekem savve affectim iumi and mekem iumi no strong for servem Jehovah long full heart. (Jer. 17:9; Eph. 2:2) For mekem iumi gohed strong for servem Jehovah iumi mas chekim gud heart bilong iumi evritaem. Hao nao iumi savve duim datwan?
7. Hao nao bae iumi savve wanem nao insaed heart bilong iumi?
7 No eni man savve lukim wanem nao insaed heart bilong iumi, olsem no eniwan savve lukim insaed bilong wanfala tree. Nomata olsem, long Sermon long Maunten, Jesus sei long sem wei wea frut bilong wanfala tree hem showimaot sapos insaed bilong tree hia hem gud or nomoa, samting wea iumi duim tu showimaot wanem nao insaed heart bilong iumi. (Matt. 7:17-20) Bae iumi storyim wanfala samting wea showimaot wanem nao insaed heart bilong iumi.
WANFALA WEI FOR LUKSAVVE WANEM NAO INSAED HEART
8. Olsem Jesus talem long Matthew 6:33, hao nao iumi savve showimaot wanem nao insaed heart bilong iumi?
8 Long datfala Sermon long Maunten, Jesus storyim tu wanem iumi mas duim for showimaot iumi laek servem Jehovah long full heart. Hem sei: “So evritaem Kingdom and olketa samting wea God sei hem stret mas first samting long laef bilong iufala. Sapos olsem, God bae givim iufala olketa samting hia wea iufala needim.” (Matt. 6:33) Samting wea hem first long laef bilong iumi hem showimaot wanem iumi laekem, tingim, and planim insaed long heart bilong iumi. So wanfala wei for luksavve sapos iumi servem God long full heart hem for ting raonem wanem nao first samting long laef bilong iumi.
9. (a) Wanem nao Jesus askem samfala man for duim? (b) Samting wea olketa man hia talem long Jesus hem showimaot wanem?
9 Bae iumi storyim wanfala samting wea happen no longtaem bihaen Jesus talem olketa disaepol bilong hem for evritaem putim Kingdom olsem first samting long laef. Diswan helpem iumi for luksavve samting wea man putim olsem first samting long laef, hem showimaot wanem nao insaed heart bilong hem. Luke hem sei Jesus “barava tingting strong for hem mas go long Jerusalem” nomata hem savve hem bae safa long there. Taem Jesus and olketa aposol gogo long road for Jerusalem, Jesus askem samfala man wea olketa meetim for kamap disaepol bilong hem. Olketa man hia willing bat olketa laek duim samfala samting firstaem. Wanfala man sei: “Letem mi go firstaem for berem Dadi bilong mi.” Narawan sei: “Lord, mi laek followim iu, bat letem mi go sekhand firstaem long famili bilong mi.” (Luke 9:51, 57-61) Wei wea Jesus barava tingting strong for duim wanem God laekem, hem difren tumas from olketa man hia wea no tingting strong for duim wanem Jesus askem. From olketa putim samting wea olketa seleva laekem olsem first samting long laef, diswan showimaot olketa no willing for servem God long full heart.
10. (a) Hao nao iumi difren from olketa man wea Jesus askem for kamap disaepol bilong hem? (b) Wanem tokpiksa nao Jesus talem?
10 Iumi no olsem olketa man hia, bat iumi hapi for kamap olketa disaepol bilong Jesus and gohed servem Jehovah evriday. Diswan showimaot iumi lovem Jehovah long heart bilong iumi. Bat nomata iumi busy for servem Jehovah, iumi mas luksavve long wanfala danger samting wea savve spoelem heart bilong iumi. Wanem nao datwan? Iumi kasem ansa from samting wea Jesus talem long olketa wea hem askem for kamap disaepol. Hem talem disfala warning long olketa: “Eni man wea iusim hou and lukluk long olketa samting bihaen long hem bae no fit for go insaed long Kingdom bilong God.” (Luke 9:62) Wanem nao iumi lanem from disfala tokpiksa?
WASWE, IUMI “HOL STRONG LONG SAMTING WEA HEM STRET”?
11. Long tokpiksa bilong Jesus, man wea hou long planteison hem waka hao?
11 Bae iumi storyim go moa disfala tokpiksa bilong Jesus for lukim wanem iumi savve lanem. Wanfala wakaman hem hou long wanfala planteison. Bat taem hem gohed for hou hem tingim nomoa haos bilong hem. Long there hem savve stap witim famili and olketa fren, and enjoyim kaikai, music, hapitaem, and stap long shade. Hem laekem tumas olketa samting hia. Bihaen hem hou for longtaem lelebet, feeling for laekem olketa samting hia hem kamap big tumas, gogo hem tane raon for “lukluk long olketa samting bihaen long hem,” wea minim olketa samting long haos bilong hem. Nomata hem garem staka waka for duim yet, mind bilong hem go difren and hem no duim gud waka bilong hem. Boss no hapi bikos datfala man no gohed strong long waka bilong hem.
12. Wanem nao savve happen long wanfala Christian wea semsem witim wakaman long tokpiksa bilong Jesus?
12 Tingim samting wea savve happen distaem wea semsem. Datfala wakaman savve piksarem wanfala Christian wea luk olsem hem strong long spiritual wei, bat heart bilong hem stap long danger. Olsem example, tingim wanfala brata wea kam long evri meeting and duim preaching waka evritaem. Nomata hem duim olsem, hem evri taem tingim tu samfala samting long world, and insaed long heart bilong hem, hem laekem tumas olketa samting hia. Bihaen hem servem God for samfala year, disfala feeling bilong hem for laekem olketa samting long world hem kamap strong tumas, and gogo hem tane raon and “lukluk long olketa samting bihaen long hem.” Nomata staka waka hem stap for duim long ministry, mind bilong hem go difren and hem no strong for servem God nao olsem hem duim bifor. (Phil. 2:16) Jehovah, wea hem “man wea ownim planteison” hem feel sorre taem wanfala wakaman bilong hem no gohed strong.—Luke 10:2.
13. For servem Jehovah long full heart hem minim wanem?
13 Wanem nao iumi lanem from diswan? For servem Jehovah long full heart hem no minim nomoa for go long evri meeting and duim preaching waka evritaem. (2 Chron. 25:1, 2, 27) Sapos heart bilong wanfala Christian hem gohed for laekem tumas “olketa samting bihaen long hem,” wea minim olketa samting wea pipol long world aftarem, datwan savve spoelem wei wea hem fren witim Jehovah. (Luke 17:32) So for servem God long full heart, iumi mas “heitim olketa rabis samting and hol strong long samting wea hem stret.” (Rom. 12:9; Luke 9:62) Nomata maet hem luk olsem samfala samting long world bilong Satan savve helpem iumi, iumi mas no letem eni samting stopem iumi for servem Jehovah long full heart.—2 Cor. 11:14; readim Philippi 3:13, 14.
GOHED FOR LUKLUK GUD!
14, 15. (a) Wanem nao Satan iusim for mekem iumi no strong for servem God? (b) Storyim wanfala example for showimaot hao Satan hem trae for trikim iumi.
14 Iumi dedicate long Jehovah bikos iumi lovem hem. For longtaem finis, staka long iumi showimaot iumi disaed strong for servem Jehovah long full heart. Nomata olsem, Satan hem gohed yet for trae spoelem iumi. Main samting hem laek spoelem nao hem heart bilong iumi. (Eph. 6:12) Hem savve bae iumi no seknomoa stop for servem Jehovah. So Satan iusim “olketa samting long laef,” wea minim olketa samting long disfala world, for isisi mekem iumi no strong for servem God. (Readim Mark 4:18, 19.) Why nao Satan win long disfala wei for trikim pipol?
15 For helpem iumi ansarem datfala kwestin, tingim diswan. Iu read long naet then seknomoa laet bilong iu hem nogud. Iu savve laet bulb bilong iu hem bone bikos rum bilong iu hem full dark. So iu changem witim niufala laet bulb, and iu savve lukluk nao. Long next naet iu iusim datfala laet for read moa. Bat samting iu no savve nao, wanfala man hem aotem niu laet bulb bilong iu and changem witim nara laet bulb wea no shaen braet tumas olsem niu wan bilong iu. So iu no luksavve nara laet bulb hia hem difren wan. And long naet bihaen, hem changem moa nara laet bulb hia witim mek-thri laet bulb wea no shaen braet tumas. Maet iu no luksavve long datwan tu. Why nao olsem? Bikos laet hia hem isisi go daon. Long sem wei olketa samting long world bilong Satan savve isisi mekem iumi no strong for servem Jehovah. Sapos wanfala Christian no gohed for lukluk gud, bae hem no luksavve long disfala trik bilong Satan, and bae Satan hem win nao.—Matt. 24:42; 1 Pet. 5:8.
HEM IMPORTANT FOR IUMI PREA
16. Wanem nao iumi savve duim for protectim iumiseleva from Satan?
16 Wanem nao iumi savve duim for protectim iumiseleva from Satan, and gohed for servem Jehovah long full heart? (2 Cor. 2:11) Hem important for iumi prea. Bihaen Paul encouragem olketa Christian for “againstim olketa kleva trik bilong Devil,” hem talem olketa for “gohed evritaem for talem olketa difren kaen prea witim wei for barava prea strong tu.”—Eph. 6:11, 18; 1 Pet. 4:7.
17. Wanem samting nao iumi lanem from olketa prea bilong Jesus?
17 Samting wea bae helpem iumi for gohed faithful hem nao for followim example bilong Jesus. Hem barava laek for servem Jehovah long full heart bilong hem. Luke storyim wei wea Jesus hem prea long naet bifor hem dae. Hem sei: “From hem wari fogud hem barava prea strong go moa.” (Luke 22:44) Diswan hem no firstaem wea Jesus barava prea strong, bat long datfala naet hem klosap for kasem test wea winim eni nara test wea hem kasem long earth. Dastawe hem “barava prea strong go moa,” and Jehovah ansarem prea bilong hem. Disfala samting wea Jesus duim showimaot samfala taem iumi savve prea moa strong winim olketa narataem. So taem olketa test wea iumi kasem hem gohed for kamap moa big and Satan hem gohed for spoelem iumi, iumi shud prea moa strong long Jehovah for protectim iumi.
18. (a) Wanem nao iumi shud tingim saed long olketa prea bilong iumi, and why nao olsem? (b) Wanem nao samfala samting wea savve helpem heart bilong iumi? (Lukim box long page 16.)
18 Wanem nao bae iumi kasem taem iumi prea strong olsem? Paul sei: “Long eni samting wea iufala needim, askem God for datwan long wei for prea long hem witim wei for barava askem help bilong hem and for talem thankiu tu. Taem iufala duim olsem, peace bilong God wea winim nao wanem man savve minim bae gaedem heart . . . bilong iufala.” (Phil. 4:6, 7) Sapos iumi laek servem Jehovah long full heart, iumi mas prea strong and prea evritaem. (Luke 6:12) So tingim diswan: ‘Waswe, mi savve prea strong and mi prea evritaem?’ (Matt. 7:7; Rom. 12:12) Ansa bilong iu long kwestin hia showimaot sapos iu barava laek for servem God long full heart bilong iu.
19. Wanem nao bae iu duim for gohed servem Jehovah long full heart?
19 Olsem iumi storyim finis, wanfala wei for chekim heart bilong iumi hem for ting raonem wanem nao first samting long laef bilong iumi. Iumi no laekem olketa samting bihaen long iumi, and olketa trik bilong Satan, for mekem iumi no gohed strong for servem Jehovah long full heart. (Readim Luke 21:19, 34-36.) Iumi laek for prea olsem David and gohed askem Jehovah for helpem iumi for servem hem “long full heart” bilong iumi.—Ps. 86:11.
[Box long page 16]
THRIFALA SAMTING WEA SAVVE HELPEM HEART BILONG IUMI
Iumi savve duim samfala samting for mekem really heart bilong iumi healthy. Long sem wei, iumi savve duim samfala samting for mekem tokpiksa heart bilong iumi healthy long spiritual wei. Tingim thrifala important samting wea iumi savve duim:
1 Kaikai: Iumi mas kaikaim plande healthy kaikai mekem really heart bilong iumi hem healthy. Long sem wei, for mekem tokpiksa heart bilong iumi healthy, iumi mas evritaem kaikaim plande spiritual kaikai long wei for study seleva, ting raonem wanem iumi studyim, and go long olketa meeting.—Ps. 1:1, 2; Prov. 15:28; Heb. 10:24, 25.
2 Exercise: Iumi mas exercise mekem really heart bilong iumi hem healthy. Long sem wei, wei for strong long ministry, and maet for duim moa samting long ministry, hem savve mekem tokpiksa heart bilong iumi healthy. —Luke 13:24; Phil. 3:12.
3 Pipol wea Iumi Stap Witim: Pipol wea iumi stap witim wea no obeyim God savve mekem iumi kasem hevi wea affectim really heart and tokpiksa heart bilong iumi. Bat iumi savve daonem kaen hevi olsem taem iumi hipap evritaem witim olketa spiritual brata and sista bilong iumi wea lovem iumi, and wea servem God long full heart.—Ps. 119:63; Prov. 13:20.