“Holy Spirit Nao Leadim Olketa”

“No eni profesi wea man talem hem followim tingting bilong hemseleva, bat holy spirit nao leadim olketa man for talemaot toktok wea kam from God.”—2 PET. 1:21.

SAMFALA POINT FOR TING RAONEM

Hao nao God iusim holy spirit for mekem olketa man wea raetem Bible for savve wanem for raetem?

Wanem nao samfala pruv wea showimaot Bible hem kam from God?

Wanem nao iumi savve duim evriday for showimaot iumi tinghae long Bible?

1. Why nao iumi olketa man needim Bible?

PIPOL evriwea long world garem olketa kaen kwestin olsem: Hao nao iumi olketa man start? Why nao iumi laef? Wanem nao future bilong iumi? Why nao disfala world hem nogud tumas? Wanem nao happen long iumi taem iumi dae? Sapos iumi no garem Bible, hard for iumi savve long ansa bilong olketa kwestin hia and bilong olketa nara important kwestin tu. Sapos Bible no stap iumi mas depend long savve bilong iumiseleva nomoa for kasem ansa for olketa kwestin hia. Bat sapos iumi depend long savve bilong iumiseleva bae iumi no garem sem feeling olsem man wea raetem psalm wea barava tinghae long “law bilong Jehovah.”—Readim Psalm 19:7.

2. Wanem nao bae helpem iumi for gohed tinghae long Bible?

² Samfala lovem olketa tru teaching from Bible long firstaem, bat sorre tumas, distaem datfala love hem nomoa nao. (Comparem Revelation 2:4.) Distaem olketa no duim wanem Jehovah hem laekem. (Isa. 30:21) Iumi no laek for olsem olketa. Iumi shud duim samting wea bae helpem iumi for gohed tinghae long Bible and olketa Bible teaching. Bible hem nambawan present from Creator bilong iumi. (Jas. 1:17) Wanem nao savve helpem iumi for tinghae go moa long “toktok bilong God”? Samting wea savve barava helpem iumi hem for ting raonem hao nao God hem iusim holy spirit for leadim olketa man for raetem Bible, and ting raonem olketa pruv wea showimaot Bible hem kam from God. Datwan shud mekem iumi laek for readim Bible evriday and followim wanem hem talem.—Heb. 4:12.

HAO NAO ‘HOLY SPIRIT LEADIM OLKETA’?

3. Wanem nao mining bilong datfala toktok ‘holy spirit leadim olketa’?

³ Samting olsem 40-fala man nao raetem Bible insaed 1,610 year start long 1513 B.C.E. go kasem 98 C.E. Samfala long olketa man hia profet and Bible sei “holy spirit nao leadim olketa.” (Readim 2 Peter 1:20, 21.) Long disfala verse, Greek toktok wea iumi transleitim “leadim,” savve minim wei for muvim, karem go, or for letem narawan leadim iu. Long Acts 27:15, Bible iusim datfala toktok for storyim wanfala boat wea wind hem pushim or muvim. Taem Bible sei “holy spirit nao leadim” olketa profet and olketa nara man wea raetem Bible, hem minim God iusim holy spirit for helpem olketa savve long tingting bilong hem, and for leadim tingting bilong olketa tu. So samting wea olketa raetem hem no tingting bilong olketa seleva, bat hem tingting bilong God. Samfala taem olketa hia no savve long mining bilong olketa profesi or nara samting wea olketa raetem. (Dan. 12:8, 9) Tru tumas, “evri toktok insaed long olketa Holy Raeting hem kam from God” and hem no followim tingting bilong olketa man.—2 Tim. 3:16.

4-6. Hao nao Jehovah iusim holy spirit for mekem olketa man wea raetem Bible for savve wanem for raetem? Storyim example.

⁴ Bat hao nao God iusim holy spirit for mekem olketa man wea raetem Bible for savve wanem for raetem? Waswe, God talem evri word wea olketa mas raetem, or hem putim idea insaed long mind bilong olketa and olketa nao raetem datwan long toktok bilong olketa seleva? Tingim wanfala bisnisman wea laek for raetem wanfala leta. Samfala taem hemseleva nao raetem datfala leta or hem talem long secretary bilong hem barava word for putim insaed long datfala leta. Bihaen secretary typem datwan, bisnisman hia saenem datfala leta. Long olketa narataem, datfala bisnisman talem olketa main idea wea secretary mas raetem, and secretary nao raetem datwan long toktok bilong hemseleva. Then bisnisman hia maet chekim datfala leta and talem secretary for stretem eni samting wea hem laek for changem. Datfala bisnisman bae saenem tu disfala leta bikos leta hia kam from hem.

⁵ Olsem tu, God seleva givim kam samfala part long Bible. (Ex. 31:18) Samfala taem Jehovah talem barava word for olketa man mas raetem. Olsem example, long Exodus 34:27 hem sei: “Jehovah sei long Moses: ‘Iu raetem olketa toktok hia, bikos long faondeson bilong olketa toktok hia nao mi mekem wanfala agreement witim iu and pipol long Israel.’” Jehovah sei tu long profet Jeremiah: “Iu raetem long wanfala buk evri toktok wea mi bae talem long iu.”—Jer. 30:2.

⁶ Bat staka taem, God no talem barava word for olketa man raetem. God putim olketa idea insaed long mind bilong olketa man wea raetem Bible, and olketa nao raetem datwan long toktok bilong olketa seleva. Ecclesiastes 12:10 hem sei: “Man for hipimap and teachim pipol hem trae for faendem olketa naesfala toktok and for raetem olketa toktok wea tru.” Luke hem sei: “Mi chekim gud evri story abaotem diswan, and mi tu mi disaed for raet abaotem olketa samting hia followim taem wea olketa happen.” (Luke 1:3) God iusim holy spirit bilong hem for mek sure olketa man wea no perfect no changem message bilong hem.

7. Hao nao wei wea God iusim olketa man for raetem Bible showimaot hem barava wise?

⁷ Wei wea God iusim olketa man for raetem Bible showimaot hem barava wise. Samting wea man raetem savve showimaot feeling bilong hem. Bat waswe sapos Jehovah iusim olketa angel for raetem Bible? Waswe, bae olketa savve storyim olketa feeling bilong olketa man olsem wei for fraet, sorre, and wei for feel wikdaon? From God letem olketa man raetem message bilong hem long toktok bilong olketa seleva, datfala message hem kasem heart bilong iumi.

PRUV WEA SHOWIMAOT BIBLE KAM FROM GOD

8. Why nao Bible hem difren from eni nara buk bilong religion?

⁸ Staka pruv stap wea showimaot Bible hem kam from God. From Bible hem helpem iumi for savve long trufala God, hem difren from eni nara buk bilong religion. Olsem example, olketa buk bilong Hindu religion storyim olketa ceremony, teaching, kastom story, and olketa rul wea olketa mas followim long living bilong olketa. Olketa buk bilong Buddhist religion storyim olketa rul wea olketa monk and nun mas followim. Olketa storyim tu teaching bilong Buddhist religion and olketa samting wea Buddha talem. Buddha no sei hem wanfala god, and hem no talem staka samting abaotem God tu. Olketa buk bilong Confucian religion storyim olketa samting wea happen long bifor, olketa rul wea olketa mas followim long living, magic, and olketa singsing. Buk bilong Muslim religion hem sei wanfala God nomoa hem stap wea savve long evri samting and hem savve long future, bat datfala buk no talem nem bilong God, Jehovah, wea stap staka thousand taem insaed long Bible.

9, 10. Bible teachim iumi olketa wanem samting abaotem God?

⁹ Klosap evri buk bilong religion no storyim staka samting abaotem God. Bat Bible helpem iumi savve long Jehovah God and evri samting wea hem duim. Hem helpem iumi for savve long olketa wei bilong hem. Bible sei God hem wise, garem bigfala paoa, and evritaem duim stret samting. Hem sei tu God hem lovem iumi. (Readim John 3:16; 1 John 4:19.) And tu, Bible hem sei: “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.” (Acts 10:34, 35) Bible hem stap long staka difren languis wea datwan hem wanfala samting wea showimaot God no favorim eniwan. Olketa man wea studyim languis sei pipol raonem full world iusim samting olsem 6,700 languis. Klosap 90 percent long pipol long world iusim nomoa samting olsem 100 long olketa languis hia. Full Bible or samfala part bilong hem stap long winim 2,400 languis. So klosap evriwan long full world savve readim Bible or samfala part bilong hem long languis bilong olketa.

¹⁰ Jesus hem sei: “Dadi bilong mi hem gohed waka kam kasem distaem, and mi tu gohed waka.” (John 5:17) Bible storyim ‘Jehovah nao hem God wea stap for olowe finis and bae gohed stap for olowe.’ So diswan minim Jehovah hem duim staka samting! (Ps. 90:2) Bible nomoa storyim samting wea God duim bifor, samting wea hem duim distaem, and samting wea hem bae duim long future. Bible talem iumi tu samting wea mekem God hapi and no hapi, and hao for “fren gud witim God.” (Jas. 4:8) Iumi mas no letem samting wea iumi interest long hem or olketa problem bilong iumi for mekem iumi lusim Jehovah.

11. Wanem gudfala advaes nao hem stap insaed long Bible?

¹¹ Narafala pruv wea showimaot Bible hem kam from God hem bikos hem garem staka wise toktok insaed. Aposol Paul hem sei: “No eniwan hem savve long tingting bilong Jehovah mekem hem savve teachim hem.” (1 Cor. 2:16) Long datfala verse Paul hem storyim toktok bilong profet Isaiah, wea askem disfala kwestin: “Hu nao fit for minim spirit bilong Jehovah, and hu nao savve talem hem wanem for duim or savve teachim hem?” (Isa. 40:13) No eniwan fit for duim datwan bikos no eniwan hem garem savve wea winim Jehovah. Dastawe iumi kasem gud samting taem iumi followim advaes long Bible abaotem wei for waka hard, marit, pikinini, hapitaem, wei for honest, wanem hem stret and no stret, and abaotem pipol wea iumi chus for fren witim. No eni advaes long Bible hem nogud. Bat olketa man no fit for givim advaes wea savve helpem man evritaem. (Jer. 10:23) Staka taem olketa man savve changem advaes wea olketa talem taem olketa luksavve datwan hem no stret. Bible hem sei ‘tingting bilong olketa man hem olsem samting nating nomoa.’—Ps. 94:11.

12. Wanem nao pipol duim for trae for distroem Bible?

¹² Samting wea happen long bifor tu hem showimaot Bible hem kam from trufala God. Long bifor staka pipol trae for distroem message bilong God. Long 168 B.C.E., King Antiochus IV bilong Syria, givim order for pipol mas faendem evri buk bilong Law bilong Moses and bonem olketa. Long 303 C.E, Diocletian wea hem king bilong Rome, hem givim order for distroem olketa ples wea olketa Christian hipap and bonem olketa Holy Raeting bilong olketa. Diswan hem gohed for samting olsem tenfala year. For plande handred year, olketa pope trae for stopem pipol for no transleitim Bible long olketa difren languis bikos olketa no laekem pipol for minim Bible. Nomata Satan and pipol wea sapotim hem trae for distroem Bible, Bible hem stap kam kasem distaem. Jehovah no letem eniwan distroem disfala present wea hem givim long olketa man.

PRUV WEA MEKEM STAKA BILIV

13. Wanem nao samfala pruv wea showimaot Bible hem kam from God?

¹³ Samfala nara pruv stap tu wea showimaot Bible hem kam from God. Evri buk long Bible hem agree witim each other, hem stret witim science, olketa profesi bilong hem kam tru, and olketa man wea raetem Bible olketa honest evritaem. And tu, Bible savve changem laef bilong pipol, hem stret witim history, and hem savve ansarem olketa kwestin long paragraf 1. Bae iumi storyim wanem nao helpem samfala for bilivim Bible hem kam from God.

14-16. (a) Wanem nao mekem thrifala from difren religion for bilivim Bible hem kam from God? (b) Wanem pruv nao iu savve iusim long ministry for helpem pipol bilivim Bible hem kam from God?

¹⁴ Anwara hem from wanfala kantri long Middle East and taem hem growap hem wanfala Muslim. Taem hem stap long North America, Olketa Jehovah’s Witness kam preach long hem long haos. Anwar hem sei: ‘Mi nating laekem olketa Christian religion bikos long olketa nogud samting wea olketa duim long bifor. Bat mi man wea laekem tumas for lanem olketa niu samting, so mi agree for studyim Bible.’ No longtaem bihaen datwan, Anwar go bak long hom bilong hem bat hem no savve faendem olketa Witness. Staka year bihaen, hem go stap long Europe and hem start moa for studyim Bible. Hem sei olsem: ‘Mi bilivim Bible hem kam from God bikos olketa profesi long Bible kam tru, evri buk long Bible storyim wanfala theme nomoa and agree witim each other, and pipol wea worshipim Jehovah lovem each other.’ Anwar hem baptaes long 1998.

¹⁵ Asha hem wanfala gele wea 16 year and famili bilong hem Hindu. Hem sei: ‘Mi savve prea nomoa taem mi go long temple or taem mi garem problem. Bat taem mi no garem eni problem, mi nating savve tingim God. Then wanday Olketa Jehovah’s Witness kam long haos, and laef bilong mi barava change nao.’ Asha studyim Bible, and hem start for fren witim God. Wanem nao mekem Asha bilivim Bible hem kam from God? Hem sei: ‘Bible ansarem evri kwestin wea mi garem. Bible helpem mi for garem faith, and helpem mi for luksavve mi no need for go long temple and baodaon long idol for garem faith.’

¹⁶ Famili bilong Paula olketa Catholic. Bat taem hem kamap young gele hem no sure sapos God hem stap or nomoa. Then wanfala samting nao happen. Paula sei: ‘Taem mi young staka pipol garem long hair and iusim drug. Wantaem, mi lukim wanfala fren wea mi no lukim for staka month. Bat fren bilong mi hem change. Hem shavem beard bilong hem, katem hair bilong hem, and hem luk hapi. So mi askem hem wanem nao mekem hem change and wanem nao hem duim distaem. Hem sei hem studyim Bible witim Olketa Jehovah’s Witness and then hem preach long mi.’ Paula tinghae long wei wea Bible helpem fren bilong hem, and datwan mekem hem interest long Bible and gogo hem bilivim Bible hem kam from God.

“TOKTOK BILONG IU HEM WANFALA LAMP FOR LEG BILONG MI”

17. Wanem gud samting nao iu savve kasem sapos iu readim Bible evriday and ting raonem wanem iu readim?

¹⁷ Bible hem nambawan present from Jehovah, wea hem iusim holy spirit for givim kam long iumi. Sapos iu readim Bible evriday love bilong iu for God and Bible bae kamap moa big. (Ps. 1:1, 2) Bifor iu readim Bible, prea firstaem and askem God for givim holy spirit long iu mekem iu savve minim wanem iu readim. (Luke 11:13) Tingting bilong God nao stap insaed long Bible, so wei for ting raonem wanem iu readim savve helpem iu for garem sem tingting olsem God.

18. Why nao iu laek for gohed readim and ting raonem samting wea Bible hem talem?

¹⁸ Gohed for lanem tru samting long Bible and followim wanem iu lanem. (Readim Psalm 119:105.) Taem iu readim Bible hem olsem iu lukluk insaed long wanfala mirror. So sapos iu luksavve iu need for changem samfala samting, iu mas duim datwan. (Jas. 1:23-25) Bible hem olsem wanfala sword wea iu savve iusim for ansarem eniwan wea askem kwestin abaotem biliv bilong iu, and for aotem tu olketa laea teaching from heart bilong pipol wea hambol. (Eph. 6:17) Taem iu duim evri samting hia iu savve thankiu long God from hem iusim ‘holy spirit for leadim’ olketa profet and olketa man wea raetem Bible.

[Footnote]

[Blurb long page 29]

Sapos iu readim Bible evriday love bilong iu for God bae kamap moa big

[Piksa long page 26]

Leta hem kam from man wea saenem datwan