“Mi Stap Witim Iufala”

“Plande pipol bae lukluk gud insaed long [olketa Holy Raeting] and stretfala savve bae hem staka.”—DAN. 12:4.

WANEM NAO ANSA BILONG IU?

Long taem bilong iumi, hao nao profesi bilong Daniel wea sei pipol bae kasem “stretfala savve” hem kam tru?

Hao nao profesi bilong Daniel wea sei “plande pipol” bae lanem tru samting hem kam tru?

Hao nao profesi bilong Daniel wea sei stretfala savve “bae hem staka” hem kam tru?

1, 2. (a) Wanem nao mekem iumi sure Jesus stap witim iumi distaem, and bae stap witim iumi long future? (b) Wanem nao Daniel 12:4 showimaot bae happen taem samfala studyim gud olketa Scripture?

TINGIM sapos iu long Paradaes. Evri morning taem iu wekap, iu feel gud and luk forward long samting wea iu bae duim long datfala day. Body bilong iu no soa and iu no garem eni sik. Eye bilong iu hem gud, and iu savve herehere gud. Wei wea iu savve tasim, smelem, and teistim samting hem waka gud tu. Body bilong iu strong, iu enjoyim waka bilong iu, iu garem staka fren, and iu no warim eni samting. Iu savve kasem olketa nambawan blessing hia taem Kingdom bilong God hem rul ovarem earth. King bilong iumi, Jesus Christ nao bae givim olketa blessing hia, and bae teachim evriwan long earth abaotem Jehovah.

² Long datfala taem, God and Son bilong hem bae helpem olketa faithful wan for teachim pipol abaotem Jehovah. For staka year finis, Jehovah and Jesus helpem olketa faithful Christian for teachim pipol. Bifor Jesus go bak long heven, hem sei olsem long olketa disaepol bilong hem: “Mi stap witim iufala.” Datwan minim hem bae gohed for helpem olketa. (Readim Matthew 28:19, 20.) For strongim faith bilong iumi long disfala promis bilong Jesus, bae iumi storyim wanfala profesi wea Daniel raetem long Babylon winim 2,500 year go finis. Hem story abaotem samting wea bae happen long taem bilong iumi. Hem sei: “Plande pipol bae lukluk gud insaed long [olketa Holy Raeting] and stretfala savve bae hem staka.” (Dan. 12:4) For “lukluk gud insaed long Bible,” hem minim for studyim gud. Olketa wea studyim gud olketa Scripture bae kasem nambawan blessing. Olketa bae kasem stretfala savve abaotem Word bilong God. Datfala profesi sei tu “stretfala savve bae hem staka.” Olketa wea faendem disfala stretfala savve bae acceptim and teachim long nara pipol. And tu, pipol long evri ples bae garem chance for lanem olketa samting hia. Distaem bae iumi storyim wei wea disfala profesi hem kam tru. Diswan bae mekem iumi barava sure Jesus hem stap witim olketa disaepol bilong hem distaem, and evri samting wea Jehovah promisim for future bae kam tru.

OLKETA TRU CHRISTIAN KASEM “STRETFALA SAVVE”

3. Wanem nao happen bihaen olketa aposol dae?

³ Datfala wei for apostate wea aposol Paul storyim hem start bihaen olketa aposol dae and hem kwiktaem go kasem staka ples. (Acts 20:28-30; 2 Thess. 2:1-3) For staka handred year pipol no garem “stretfala savve,” nomata olketa wea sei olketa Christian tu. Olketa bigman bilong religion sei olketa bilivim wanem Bible talem bat olketa lanem olketa “teaching bilong olketa demon” long pipol, and olketa laea teaching hia spoelem God. (1 Tim. 4:1) Dastawe staka pipol no savve long tru samting abaotem God. Samfala laea wea olketa bigman hia teachim nao olketa sei God hem wanfala Trinity, soul no savve dae, and samfala soul bone long hell for olowe.

4. Wanem nao samfala Christian duim start long 1870 for lukaotem stretfala savve insaed long Bible?

⁴ Bat start long 1870, wea hem 40 year bifor “olketa last day” start, wanfala samting hem happen. Wanfala smol grup bilong olketa Christian long Pennsylvania, long America, olketa hipap tugeta for studyim gud Bible and for lukaotem stretfala savve. (2 Tim. 3:1) Nem wea olketa iusim hem Olketa Bible Student. Olketa hia no pipol wea “wise and skul gud” wea Jesus sei God bae haedem stretfala savve from olketa. (Matt. 11:25) Bat Olketa Bible Student hia pipol wea hambol and barava laek for duim wanem God laekem. Olketa readim gud, story raonem, and ting raonem olketa Scripture, and prea for God leadim olketa. Olketa comparem tu olketa difren scripture long Bible, and studyim samfala buk wea olketa narawan wea lukaotem truth olketa raetem. Gogo Olketa Bible Student hia lanem olketa tru samting wea staka pipol no savve long hem for plande handred year finis.

5. Why nao Olketa Bible Student printim olketa tract wea garem title The Old Theology?

⁵ Olketa Bible Student hapi tumas long wanem olketa lanem, bat datfala savve no mekem olketa kamap praod. Olketa savve olketa tru samting hia stap finis insaed long Bible, so olketa no sei wanem olketa lanem hem niu. (1 Cor. 8:1) Olketa printim olketa tract wea garem title The Old Theology for helpem pipol lanem tru samting insaed long Bible. Olketa firstfala tract wea olketa printim helpem pipol for studyim Bible mekem olketa savve rejectim “evri laea teaching bilong olketa man,” and acceptim olketa tru teaching bilong Jesus and olketa aposol.—The Old Theology, No. 1, April 1889, p. 32.

6, 7. (a) Wanem nao samfala tru samting wea Olketa Jehovah’s Witness lanem start kam long 1870? (b) Wanem nao samfala tru samting wea iu tinghae long hem?

⁶ Start kam long 1870, Olketa Jehovah’s Witness lanem staka nambawan tru samting!a Taem iumi studyim olketa tru samting hia, iumi no kasem information nomoa. Iumi lanem olketa gud samting wea helpem iumi long laef, wea mekem iumi hapi, and givim iumi hope for future. Iumi lanem olketa samting wea helpem iumi for savve gud long God wea lovem iumi, Jehovah, and for minim wanem hem laekem. Iumi lanem hu nao Jesus, why nao hem kam long earth and dae, and wanem nao hem duim distaem. Olketa nambawan tru samting hia helpem iumi for minim why nao God letem olketa nogud samting for happen, why nao iumi dae, hao iumi shud prea, and wanem bae mekem iumi kasem trufala hapi.

⁷ Distaem iumi minim olketa profesi wea pipol no minim for longfala taem, wea gohed for kam tru long disfala taem bilong end. (Dan. 12:9) Olketa Gospel and buk bilong Revelation nao storyim staka profesi hia. Olsem example, Jehovah helpem iumi for minim olketa samting wea happen long heven wea no eni man savve lukim. Iumi savve Jesus hem rul olsem King finis, wanfala war hem happen bifor long heven, and olketa torowem Satan kam daon long earth. (Rev. 12:7-12) God helpem iumi tu for savve long mining bilong samfala samting wea iumi savve lukim. Iumi minim why nao olketa war, earthquake, sik, and bigfala hangre kamap, and why nao pipol duim olketa nogud samting wea mekem laef hem “hard tumas” distaem.—2 Tim. 3:1-5; Luke 21:10, 11.

8. Hu nao helpem iumi for minim olketa tru samting?

⁸ Jesus sei olsem long olketa disaepol: “Iufala hapi bikos eye bilong iufala lukim olketa samting hia. Iu savve, Plande profet and plande king laekem tumas for lukim olketa samting wea iufala lukim and herem olketa samting wea iufala herem, bat olketa no savve lukim and herem olketa samting hia.” (Luke 10:23, 24) Iumi tu hapi long olketa samting wea iumi lanem distaem. Jehovah God nao helpem iumi for “lukim” and “herem,” or minim olketa tru samting long Bible. Iumi tinghae long wei wea hem iusim holy spirit bilong hem for helpem iumi for barava minim gud olketa tru samting! (Readim John 16:7, 13.) Iumi mas evritaem tinghae long olketa tru samting and duim best for helpem nara pipol for lanem tu.

“PLANDE PIPOL” KASEM “STRETFALA SAVVE”

9. Wanem invitation nao stap insaed long April 1881 Watch Tower?

⁹ Long Watch Tower April 1881, olketa printim wanfala article wea garem title, “Mifala Laekem 1,000 Man for Preach.” Diswan hem tufala year nomoa bihaen olketa start for printim Watch Tower magasin. Article hia invaetem olketa wea savve spendem samting olsem thri or fofala day evri week long preaching waka for kamap olketa colporteur, wea minim pioneer. Datfala article encouragem olketa for lukaotem and teachim tru samting abaotem God and Bible long pipol wea lovem God bat no garem stretfala savve.

10. Wanem nao staka laek for duim bihaen olketa readim article wea sei, “Mifala Laekem 1,000 Man for Preach”?

¹⁰ Olketa Bible Student invaetem pipol for preach bikos olketa luksavve olketa tru Christian mas preachim gud nius. Long datfala taem tu-thri handred pipol nomoa attendim olketa meeting bilong Olketa Bible Student, so no staka nomoa acceptim datfala invitation. Bat staka pipol wea readim samfala tract or magasin luksavve olketa faendem truth, and olketa laek for helpem nara pipol. Olsem example, long 1882, wanfala man from London long England wea readim wanfala Watch Tower magasin and wanfala buklet wea Olketa Bible Student pablisim, hem sei: “Plis, iufala lanem mi hao for preach, and wanem storyim mekem mi savve duim disfala nambawan waka wea God laekem iumi for duim.”

11, 12. (a) Wanem nao goal bilong olketa colporteur? (b) Hao nao olketa colporteur startim olketa niu kongregeson?

¹¹ Long 1885, samting olsem 300 pipol nao duim colporteur waka. Goal bilong olketa hem semsem witim goal bilong iumi distaem. Olketa laek for teachim pipol for kamap disaepol bilong Jesus Christ. Bat hao olketa helpem pipol for kamap disaepol hem difren from hao iumi duim datwan distaem. Iumi savve studyim Bible witim man wanwan. Then iumi invaetem datfala Bible study for kam long olketa meeting bilong kongregeson. Bat olketa colporteur study witim olketa grup pipol. Firstaem olketa bae givim buk long pipol wea interest, then olketa invaetem pipol hia for hipap tugeta for studyim Bible. Hem nao hao olketa colporteur startim olketa niu kongregeson, wea olketa kolem “olketa class.”

¹² Olsem example, long 1907, wanfala grup bilong olketa colporteur go long wanfala taon for faendem pipol wea garem finis olketa Millennial Dawn buk (wea nara title bilong hem Studies in the Scriptures). Then olketa colporteur invaetem pipol hia for kam long wanfala meeting long Sunday long haos bilong wanfala wea interest. Long datfala Sunday, wanfala colporteur story for full day abaotem plan bilong God for olketa man. Then long Sunday bihaen, hem encouragem evriwan wea kam for gohed hipap tugeta evritaem. Long 1911, olketa brata traem difren wei moa for helpem pipol kamap disaepol. Fifti-eit brata go long olketa difren area long America and Canada for givim olketa pablik tok. Bihaen, olketa bae raetem nem bilong pipol wea kam long olketa meeting hia, and ples wea olketa stap. Then olketa arrangem olketa wea interest for hipap long olketa grup long haos bilong eniwan long olketa. Hem nao hao olketa startim olketa niu kongregeson. Long 1914, Olketa Bible Student hipap long 1,200 kongregeson raonem world.

13. Wanem nao showimaot Jehovah hem blessim datfala preaching waka?

¹³ Distaem, iumi garem samting olsem 109,400 kongregeson evriwea long world, and samting olsem 895,800 brata and sista nao pioneer. Klosap eit million pipol nao acceptim “stretfala savve” and followim datwan long laef bilong olketa. (Readim Isaiah 60:22.)b Olketa namba hia mekem iumi sapraes bikos Jesus sei staka pipol bae heitim olketa disaepol bilong hem, persecutim olketa, putim olketa long prison, and killim samfala dae tu. (Luke 21:12-17) Nomata Satan, olketa demon bilong hem, and staka man trae for stopem preaching waka, pipol bilong Jehovah gohed for helpem staka pipol kamap olketa disaepol. Distaem olketa preach long “evri ples long world” nomata long ples wea barava hot, ples wea cold tumas, long olketa maunten, long desert, long olketa big taon, and long ples wea no staka pipol stap tu. (Matt. 24:14) Hard for olketa duim disfala waka sapos God no helpem olketa.

“STRETFALA SAVVE” BAE “HEM STAKA”

14. Long wanem wei nao olketa pablikeson bilong iumi mekem stretfala savve hem staka?

¹⁴ Wanfala samting wea mekem stretfala savve hem staka hem bikos plande pipol nao preachim gud nius. Olketa pablikeson olsem olketa buk and magasin tu mekem stretfala savve hem staka. Long July 1879, Olketa Bible Student pablisim firstfala Wastaoa magasin. Long datfala taem, hem garem nem Zion’s Watch Tower and Herald of Christ’s Presence. Olketa Bible Student peim wanfala company for printim 6,000 copy bilong datfala first magasin long English languis. Charles Taze Russell, wea hem 27 year long datfala taem nao hem editor bilong datfala magasin, and faevfala nara mature brata evritaem raetem olketa article for datfala magasin. Distaem organization bilong Jehovah printim 42,182,000 copy bilong each Wastaoa magasin long 195 languis. Staka pipol kasem disfala magasin winim eni nara magasin long world. Mek-tu long diswan hem Awake! magasin. Distaem olketa printim 41,042,000 copy bilong each Awake! magasin long 84 languis. And tu, organization printim samting olsem 100 million buk and Bible evri year.

15. Hao nao iumi kasem selen for printim olketa pablikeson bilong iumi?

¹⁵ Olketa donation wea pipol givim nao sapotim disfala waka. (Readim Matthew 10:8.) Pipol wea waka long olketa printing company savve sapraes tumas long diswan bikos olketa savve hem barava expensive for peim machine, pepa, ink, and olketa nara samting for duim printing. Wanfala brata long Bethel wea waka bilong hem for peim olketa samting for duim printing hem sei taem pipol long olketa printing company visitim Bethel, olketa barava sapraes long wei wea olketa donation nomoa sapotim staka samting wea iumi duim. Olketa sapraes bikos iumi fit for peim olketa niu kaen printing press wea savve printim staka pablikeson. Olketa sapraes tu for lukim staka young wan nao waka long Bethel, and evriwan wea waka long there olketa hapi.

EARTH BAE FULAP WITIM SAVVE BILONG GOD

16. Why nao Jehovah mekem “stretfala savve” kamap staka?

¹⁶ Jehovah mekem “stretfala savve” kamap staka bikos “hem laekem tumas for evri difren kaen man mas sev and for garem stretfala savve abaotem olketa tru teaching.” (1 Tim. 2:3, 4) Jehovah laekem pipol for savve long olketa tru samting mekem olketa savve worshipim hem long stretfala wei and kasem blessing bilong hem. Hem iusim preaching waka for hipimap olketa anointed Christian wea faithful. Hem gohed for hipimap tu “wanfala big crowd” from “evri kantri and tribe and pipol and languis” wea garem hope for laef olowe long earth.—Rev. 7:9.

17. Wei wea olketa wea worshipim tru God kamap staka hem showimaot wanem samting?

¹⁷ Insaed long 130 year wea go pas, namba bilong olketa wea worshipim tru God hem kamap big. Diswan showimaot Jehovah and King wea hem markem, Jesus Christ, tufala stap witim pipol bilong God long earth long wei for leadim, protectim, organizem, and teachim olketa. Jehovah hem duim wanem hem promisim for helpem staka pipol faendem truth long disfala taem bilong iumi, so iumi barava sure hem bae duim wanem hem promisim long future tu. Bible hem sei: “Olsem sea hem fulap long wata, earth bae fulap witim savve bilong Jehovah.” (Isa. 11:9) Tingim olketa nambawan blessing wea olketa man bae kasem long datfala taem!

[Olketa Footnote]

[Piksa long page 6]

Olketa Bible Student hambol and laek for duim wanem God laekem

[Piksa long page 7]

Jehovah tinghae long samting wea iu duim for helpem pipol kasem “stretfala savve” abaotem God