Iumi Mas Evritaem Willing for Forgivim Narawan
“Sapos eniwan long iufala hem feel nogud long narawan, hem mas no kros bat mas evritaem forgivim hem.”—COL. 3:13.
1, 2. Why nao hem gud for iu ting raonem sapos iu willing for forgivim narawan?
BIBLE helpem iumi for savve long tingting bilong Jehovah abaotem sin, and wanem hem duim taem iumi sin. Bible storyim plande samting tu wea showimaot Jehovah hem willing for forgivim iumi. Long study bifor diswan, iumi lanem why Jehovah forgivim David and Manasseh. Tufala barava sorre long wanem tufala duim, talemaot sin bilong tufala long Jehovah, and disaed strong for no duim datwan moa. Tufala barava repent, so Jehovah hapi for fren moa witim tufala.
2 Disfala study bae helpem iumi for ting raonem sapos iumi willing for forgivim narawan. Olsem example, hao nao bae iu feel sapos wanfala relative bilong iu dae from wanem Manasseh duim? Waswe, bae iu willing for forgivim Manasseh? Distaem pipol long world duim staka nogud samting, olketa raf, and selfish. Why nao iumi mas lane for forgivim narawan? Sapos narawan duim nogud samting long iu, wanem nao savve helpem iu for kontrolem feeling bilong iu, duim wanem Jehovah laekem, and showimaot iu willing for forgive?
WHY IUMI MAS FORGIVIM NARAWAN
3-5. (a) Wanem story nao Jesus talem for helpem iumi luksavve iumi mas forgivim narawan? (b) Wanem nao iumi lanem from datfala story long Matthew 18:21-35?
3 Iumi mas willing for forgivim olketa wea mekem iumi feel nogud, nomata olketa insaed long kongregeson or nomoa. Datwan bae helpem iumi stap gud witim olketa relative, fren, and nara pipol, and bae iumi fren gud witim Jehovah tu. Bible showimaot iumi mas forgivim olketa narawan nomata maet olketa mekem iumi feel nogud plande taem. For helpem iumi luksavve why iumi mas forgivim narawan, Jesus talem story abaotem wanfala wakaman wea garem bigfala kaon.
4 Datfala wakaman kaonem bigfala selen long king. Hem bae need for waka for 60 million day for kasem inaf selen for changem bak datfala kaon. Nomata olsem, king sorre long hem and sei hem no need for changem bak datfala kaon. Bihaen datwan, datfala wakaman hem go faendem nara wakaman wea kaonem smol selen nomoa long hem. Selen hia man savve kasem sapos hem waka for 100 day nomoa. Datfala wakaman no sorre long nara wakaman hia bat hem sei hem mas changem bak datfala kaon. Nara wakaman askem hem for weit lelebet mekem hem savve changem bak datfala kaon, bat first wakaman talem olketa man for putim hem long prison. King hem barava kros taem hem herem datwan. Hem sei long first wakaman: “Mi showimaot mercy long iu ia. Hao nao iu no showimaot mercy long datfala man?” So king putim datfala wakaman long prison go kasem taem hem changem bak evri selen wea hem kaonem long hem.—Matt. 18:21-34.
5 Wanem nao Jesus laekem iumi for lanem from disfala story? Hem sei: “Dadi bilong mi long heven bae duim olsem long iufala tu sapos iufala no barava forgivim brata bilong iufala.” (Matt. 18:35) Iumi no perfect and iumi sin staka taem, so iumi no savve obeyim Jehovah long perfect wei. Nomata olsem, hem willing for forgivim and forgetim olketa sin wea iumi duim. So sapos iumi laek for fren gud witim Jehovah, iumi mas forgivim narawan. Dastawe long Sermon long Maunten, Jesus sei: “Sapos iufala forgivim nara pipol wea sin againstim iufala, Dadi bilong iufala long heven bae forgivim iufala tu. Bat sapos iufala no forgivim nara pipol wea sin againstim iufala, Dadi bilong iufala bae no forgivim sin bilong iufala.”—Matt. 6:14, 15.
6. Why nao staka taem hem no isi for iumi forgivim narawan?
6 Maet iu luksavve hem stret for forgivim narawan, bat maet datwan hem no isi for iu duim. Datwan hem bikos taem samwan mekem iumi feel nogud maet iumi savve feel kros or feel olsem iumi no savve trustim datfala man. Maet iumi tingse hem shud kasem panis for samting wea hem duim, or iumi laek mekem hem safa olsem iumi. Maet iumi feel olsem hem hard tumas for iumi forgivim hem. Sapos iu feel olsem, wanem nao iu savve duim mekem iu willing for forgivim narawan, olsem Jehovah askem iumi for duim?
TING RAONEM WHY IU FEEL NOGUD
7, 8. Sapos samwan mekem iu feel nogud, wanem nao savve helpem iu for forgivim hem?
7 Taem man duim nogud samting long iumi, or iumi tingse hem duim nogud samting long iumi, datwan savve mekem iumi barava feel nogud. Wanfala young man story abaotem wanfala taem wea hem barava kros. Hem sei: ‘Mi lusim haos and mi sei bae mi nating go bak. Mi wakabaot go long ples wea kwaet and wea luk naes tumas, and hem barava naes day. Gogo, kros bilong mi start for katdaon. Bihaen, mi go bak long haos, and mi sorre from mi luksavve mi shud no kros olsem.’ Disfala experience showimaot sapos iu kros hem gud for iu duim samting for mekem kros bilong iu katdaon. Datwan bae helpem iu for garem stretfala tingting and no duim samting wea iu bae sorre long hem bihaen.—Ps. 4:4; Prov. 14:29; Jas. 1:19, 20.
8 Bat waswe sapos iu gohed feel nogud? Ting raonem why iu feel olsem. Waswe, hem bikos samting wea happen hem no stret, or bikos samwan hem no kaen long iu? Or waswe, iu tingse datfala man hem min for mekem iu feel nogud? Waswe, hem duim barava nogud samting or hem smol samting nomoa? Sapos iu trae for ting raonem why iu feel nogud, datwan bae helpem iu for tingim olketa Bible principle wea bae helpem iu for duim wanem Jehovah laekem. (Readim Proverbs 15:28; 17:27.) Wei for ting raonem why iu feel nogud bae helpem iu for forgivim narawan. Nomata hem no isi for duim datwan, Bible savve helpem iu for luksavve long “tingting bilong [iu], and samting wea heart hem laekem” and helpem iu for followim example bilong Jehovah wea willing for forgivim narawan.—Heb. 4:12.
WASWE, HEM FITIM FOR IU FEEL NOGUD?
9, 10. (a) Wanem nao iumi shud duim sapos narawan mekem iumi feel nogud? (b) Sapos iu willing for forgive and no kwiktaem for feel nogud, bae iu feel hao?
9 Staka samting savve mekem iumi kros. Olsem example, maet taem iu draevem car, nara car klosap bangam iu. Wanem nao bae iu duim? Samfala pipol savve kros tumas and laek killim nara draeva. Bat wanfala Christian bae no duim datwan.
10 Hem gud for tingting firstaem bifor iu duim eni samting. Maet iu tu duim rong samting wea mekem narawan klosap bangam iu. Or maet nara draeva garem problem witim car bilong hem. Sapos narawan duim mistek, thrifala samting hia bae helpem iumi for no feel nogud tumas: Iumi shud trae for minim why nao datwan happen, luksavve maet iumi no minim evri reason why datwan happen, and iumi shud willing for forgive. Ecclesiastes 7:9 hem sei: “No kwiktaem for feel nogud long narawan, bikos datwan hem wei bilong olketa wea krangge.” Iumi shud no kwiktaem for kros. Taem narawan duim samting wea mekem iumi feel nogud, maet plande taem iumi tingse hem min for duim datwan. Bat maet samting wea hem duim hem mistek from hem no perfect, and hem no min for mekem iumi feel nogud. Or maet iumi minim hem rong. So hem gud for luksavve maet iumi no savve long evri reason why samwan duim or talem samting. Iumi mas willing for showimaot love long hem and forgivim hem. Bae iu hapi sapos iu duim datwan.—Readim 1 Peter 4:8.
‘KEEPIM PEACE BILONG IU’
11. Nomata pipol tok nogud long iumi taem iumi duim preaching waka, iumi mas hao?
11 Wanem nao savve helpem iu for kontrolem seleva sapos samwan tok nogud long iu taem iu duim preaching waka? Taem Jesus sendem 70 disaepol for preach, hem talem olketa for sei long pipol: “Mifala kam for helpem iufala garem peace witim God.” Then hem sei moa: “Sapos man long datfala haos no laek garem peace witim God, keepim peace bilong iufala. Bat sapos hem laekem datwan, peace bilong iufala bae stap witim hem.” (Luke 10:1, 5, 6) Iumi hapi taem pipol acceptim gud nius, bikos datwan bae helpem olketa. Bat samfala taem pipol laek raoa witim iumi. Sapos olsem, wanem nao iumi shud duim? Jesus sei iumi shud ‘keepim peace bilong iumi.’ Taem iumi lusim haosholder, iumi mas garem peace long heart bilong iumi, nomata wanem nao hem duim or talem. Sapos iumi kros bikos haosholder hem no kaen, iumi bae no garem peace wea Jesus story abaotem.
12. Wanem kaonsel nao Paul talem long Ephesus 4:31, 32?
12 Traem best for keepim peace evritaem, no long ministry nomoa. Nomata iu mas willing for forgivim narawan, datwan no minim iu mas tingse samting wea hem duim hem olraet nomoa. Bat taem iu forgivim narawan, iu mas no gohed feel nogud long rong samting wea hem duim. Iu mas traem best for garem peace long heart bilong iu. Samfala pipol evritaem tingim nogud samting wea happen long olketa, and feel nogud olowe. Iumi mas no duim datwan. Hard for iu hapi sapos iu gohed kros long narawan. Dastawe iumi mas willing for forgive!—Readim Ephesus 4:31, 32.
DUIM SAMTING WEA JEHOVAH HAPI LONG HEM
13. (a) Hao nao Christian savve “hipimap olketa hot sakol long hed” bilong enemy? (b) Wanem nao savve happen taem iumi kaen long man wea no kaen long iumi?
13 Sapos samwan wea no Christian duim samting wea mekem iu feel nogud, maet iu savve duim samting for mekem hem interest long Bible. Aposol Paul sei: “‘Sapos enemy bilong iufala hem hangre, givim kaikai long hem. Sapos hem laek drink, givim wata long hem. Diswan bae hem olsem iufala hipimap olketa hot sakol long hed bilong hem.’ No letem nogud samting for spoelem iufala, bat gohed for duim gud samting mekem iufala savve winim datwan.” (Rom. 12:20, 21) Sapos iu kaen long man wea kros long iu, maet datwan changem tingting bilong hem and mekem hem kaen long iu. Sapos iu kaen and tingim feeling bilong man wea no kaen long iu, maet datwan mekem hem laek for lane abaotem Bible. Nomata sapos hem no changem wei bilong hem, hem bae luksavve long gudfala wei bilong iu.—1 Pet. 2:12; 3:16.
14. Why nao iu mas willing for forgive nomata narawan duim barava nogud samting long iu?
14 Hem no fitim for iumi fren witim samfala pipol. Olsem example, iumi shud no fren witim samwan wea disfellowship. Hem disfellowship bikos hem duim bigfala sin and no repent. Sapos hem duim bigfala sin wea spoelem iu, maet hem no isi for iu forgivim hem. Nomata sapos hem repent, maet iu gohed feel nogud. Sapos datwan happen long iu, iu shud gohed askem Jehovah for helpem iu forgivim hem. Diswan hem important bikos iu no savve wanem nao insaed long heart bilong narawan. Bat Jehovah savve wanem nao insaed long heart, and hem patient witim man wea duim sin. (Ps. 7:9; Prov. 17:3) Dastawe Bible sei: “Sapos eniwan duim nogud samting long iufala, iufala no changem bak. Samting wea evriwan sei hem gud nao iufala mas duim. Traem best bilong iufala for stap gud witim olketa narawan. Iufala mas no changem bak nogud samting wea narawan duim, bat letem God nao for judgem olketa, bikos olketa Holy Raeting talem finis: ‘Jehovah hem sei, mi nao bae changem bak nogud samting. Mi nomoa savve duim diswan.’” (Rom. 12:17-19) Iumi no savve long evri samting wea Jehovah savve long hem, and Bible sei iumi mas no judgem narawan. (Matt. 7:1, 2) Bat iu savve trustim Jehovah bae judge long stretfala wei.
15. Wanem nao savve helpem iumi for no gohed kros long narawan wea duim nogud samting long iumi?
15 Sapos iu faendem hem no isi for forgivim samwan wea duim nogud samting long iu nomata hem repent finis, hem gud for tingim hao hem tu no perfect. Maet datwan helpem iu for forgivim hem. (Rom. 3:23) Jehovah hem sorre long evri man bikos evri man no perfect. So iumi shud prea for man wea mekem iumi feel nogud. Hard for iumi gohed kros long man wea iumi prea for hem. Samting wea Jesus talem showimaot klia iumi mas no gohed kros long narawan, nomata olketa duim nogud samting long iumi. Hem sei: “Gohed lovem olketa enemy bilong iufala and for prea for olketa wea spoelem iufala.”—Matt. 5:44.
16, 17. Wanem nao iu shud duim taem olketa elder disaed man hem repent, and why nao olsem?
16 Jehovah markem olketa elder for disaed sapos man wea duim bigfala sin hem repent or nomoa. Olketa elder no garem sem savve olsem God abaotem wanem hem happen, bat taem olketa mekem disison olketa traem best for followim wanem Bible talem and letem holy spirit leadim olketa. So from olketa prea long Jehovah for helpem olketa, wanem olketa disaedem hem followim tingting bilong Jehovah.—Matt. 18:18.
17 Taem samting olsem happen, iumi mas faithful long Jehovah. Iumi shud trustim Jehovah and acceptim disison bilong olketa elder. Taem olketa elder disaed man hem repent, waswe, bae iu forgivim hem and showimaot iu lovem hem? (2 Cor. 2:5-8) Maet datwan hem no isi, especially sapos samting wea hem duim hem spoelem iu or samwan long famili. Bat sapos iu trustim Jehovah and arrangement bilong hem for deal witim olketa problem long kongregeson, iu bae duim stret samting. Iu bae showimaot iu willing for forgivim narawan.—Prov. 3:5, 6.
18. Wanem blessing nao bae iu kasem sapos iu willing for forgivim narawan?
18 Sapos iumi no willing for forgive, datwan savve mekem iumi sik and wari, and bae iumi no stap gud witim narawan. Bat iumi bae kasem staka blessing sapos iumi willing for forgivim narawan. Hem helpem iumi for hapi bikos iumi no kros or sorre, and hem helpem iumi for stap gud witim narawan. And nambawan blessing wea iumi kasem sapos iumi willing for forgivim narawan, hem wei for fren gud witim Dadi bilong iumi long heven, Jehovah.—Readim Colossae 3:12-14.