Iumi “Olketa Stranger” Long Disfala World

1, 2. Hu nao olketa wea “God chusim,” and why nao Peter kolem olketa hia “olketa stranger”?

SAMTING olsem 30 year bihaen Jesus go bak long heven, aposol Peter raetem leta long olketa wea stap long “Pontus, Galatia, Cappadocia, Asia, and Bithynia.” Hem kolem olketa hia “olketa stranger.” Hem sei olketa hia olketa wea “God chusim.” (1 Pet 1:1) Peter raet long olketa anointed Christian, wea “born moa” and wea garem hope for rul witim Christ long heven. (Readim 1 Peter 1:3, 4.) Bat why nao hem kolem olketa hia “pipol bilong difren kantri and olketa stranger”? (1 Pet. 2:11) And why nao iumi evriwan shud interest long diswan nomata namba bilong olketa anointed Christian long earth distaem no staka?

² Hem fitim for Peter kolem olketa anointed Christian long first century, “olketa stranger.” Olketa anointed Christian bae no stap for olowe long earth. Aposol Paul, wea hem wanfala long datfala “smol sekson” bilong olketa anointed Christian, hem sei olketa bae stap long heven. Hem sei: “Hom bilong iumi hem long heven. Iumi weitim nao Lord Jesus Christ wea stap long heven, for sevem iumi.” (Luke 12:32; Phil. 3:20) Diswan minim taem olketa anointed wan dae, olketa lusim disfala earth wea Satan rulim and olketa laef long heven and no savve dae. (Readim Philippi 1:21-23.) From olketa stap long earth for lelebet taem nomoa, olketa olsem “olketa stranger.”

3. Iumi mas ansarem wanem kwestin abaotem “olketa nara sheepsheep”?

³ Waswe long “olketa nara sheepsheep”? (John 10:16) Bible sei olketa hope for stap olowe long earth. Bat why nao hem stret for iumi sei olketa tu olsem stranger?

“EVRI SAMTING WEA GOD WAKEM GOHED FOR KRAE LONG HEART”

4. Politik, science, and selen no savve stopem wanem samting?

⁴ Evriwan, and olketa Christian tu, bae gohed for safa from wei wea Satan hem againstim Jehovah, go kasem taem wea Jehovah bae finisim disfala nogud world bilong Satan. Rome 8:22 hem sei: “Iumi savve evri samting wea God wakem gohed for krae long heart and safa tugeta kam kasem distaem.” Samfala pipol laek iusim politik, science, or selen for helpem olketa man for garem gudfala laef, bat olketa no savve stopem wei for safa.

5. Start kam long 1914, plande million pipol disaed for duim wanem samting, and why nao olsem?

⁵ Start kam long 1914, plande million pipol chus for stap anda long Jesus Christ, wea God markem hem for King. Olketa no laek for sapotim world bilong Satan, bat for iusim laef bilong olketa and samting wea olketa garem for sapotim Kingdom bilong God.—Rome 14:7, 8.

6. Long wanem wei nao Olketa Jehovah’s Witness olsem stranger long disfala world?

⁶ Olketa Jehovah’s Witness stap long winim 200 kantri, and olketa gudfala citizen bilong kantri. Nomata olsem, olketa olsem stranger long kantri wea olketa stap. Olketa no join insaed long politik or trae for stretem olketa problem bilong kantri. Long tingting bilong olketa, olketa citizen finis bilong datfala niu world wea God promisim. Olketa hapi from olketa savve olketa bae stranger for lelebet taem nomoa long disfala nogud world.

7. Wanem nao bae Jesus Christ duim for mekem pipol bilong God stap olowe long earth?

⁷ Klosap nao, Jesus Christ bae finisim disfala nogud world bilong Satan. Perfect gavman bilong Christ bae finisim sin and wei for safa. Bae hem finisim tu eniwan wea bighed againstim rul bilong Jehovah. Then olketa wea faithful long God bae garem chance for stap olowe long Paradaes long earth. (Readim Revelation 21:1-5.) Long datfala taem, no eniwan bae safa moa and evriwan “bae free olsem olketa pikinini bilong God, wea datwan hem nambawan samting.”—Rome 8:21.

OLKETA TRU CHRISTIAN MAS STAP KLIA LONG WANEM?

8, 9. Peter encouragem iumi for stap klia long wanem samting, and why nao olsem?

⁸ Peter sei olsem abaotem olketa Christian: “Olketa brata wea mi lovem, iufala olsem pipol bilong difren kantri and olketa stranger. Mi encouragem iufala for stap klia long olketa nogud samting wea body laekem wea faet againstim iufala.” (1 Pet. 2:11) Hem talem disfala kaonsel long olketa anointed Christian, bat olketa nara sheepsheep bilong Jesus tu mas followim datwan.

⁹ Samfala samting wea body laekem hem no rong and savve mekem iumi hapi taem iumi satisfaem long wei wea fitim tingting bilong God. Olsem example, hem no rong for iumi laekem naesfala kaikai and drink. Iumi enjoyim hapitaem and wei for story witim olketa fren. Hem normal tu for hasband and waef laek sleep tugeta. (1 Cor. 7:3-5) Bat Peter hem story abaotem “olketa nogud samting wea body laekem,” wea ‘faet againstim iumi.’ Jehovah talem iumi finis wanem hem laekem iumi for duim and hao for satisfaem olketa need bilong iumi. Iumi mas no letem wei for satisfaem diswan for spoelem wei wea iumi fren witim God. Sapos iumi satisfaem olketa need hia long wei wea no stret, maet laef bilong iumi stap long danger.

10. Wanem nao Satan iusim for trae mekem iumi followim pipol long world?

¹⁰ Goal bilong Satan hem for mekem iumi forget iumi “olketa stranger” long disfala world. Hem laekem iumi for aftarem olketa material samting, for durong, laek garem bignem, mista mi, and for mekhae long kantri bilong iumi. Bat iumi mas luksavve evri samting hia hem olketa trap bilong Satan. Iumi showimaot klia iumi no laek for join witim nogud world bilong Satan taem iumi disaed strong for no foldaon insaed olketa trap hia. Iumi showimaot iumi “olketa stranger” long disfala world. Samting wea iumi barava laekem nao hem for laef olowe long raeteous niu world bilong God, and iumi traem best for kasem datwan.

SHOWIMAOT GUDFALA WEI

11, 12. (a) Wanem nao tingting bilong samfala pipol abaotem olketa stranger? (b) Wanem nao tingting bilong samfala pipol abaotem Olketa Jehovah’s Witness?

¹¹ Long verse 12, Peter gohed for explainim wanem nao olketa Christian wea olsem stranger long disfala world mas duim. Hem sei: “Iufala mas evritaem showimaot gudfala wei mekem pipol long world savve lukim datwan. Taem iufala duim olsem, olketa wea accusim iufala long nogud samting bae lukim gudfala samting wea iufala duim and praisem God long taem bilong hem for lukluk gud long olketa man.” Olketa stranger hem pipol wea no stap long kantri bilong olketa seleva. Samfala taem pipol tok againstim olketa stranger bikos olketa difren, and samfala tingse olketa hia nogud pipol. Toktok bilong olketa, samting olketa duim, kaleko and lukluk bilong olketa savve difren from nara pipol. Bat taem olketa stranger hia showimaot gudfala wei datwan mekem pipol luksavve hem no stret for sei olketa nogud pipol.

¹² Olketa tru Christian tu savve difren from pipol wea stap raonem olketa. Maet samting olketa story abaotem or hapitaem wea olketa chusim hem savve difren. Kaleko and lukluk bilong olketa mekem pipol luksavve olketa Christian. Maet diswan mekem samfala pipol “tok againstim” olketa Witness. Bat samfala moa praisem olketa Witness bikos long gudfala wei bilong olketa.

13, 14. Wanem nao samfala example wea showimaot samting wea Matthew 11:19 talem hem tru?

¹³ Gudfala wei bilong iumi savve helpem nara pipol for luksavve no eniting for accusim iumi long hem. Jesus nomoa man wea obeyim God long perfect wei. Nomata olsem, pipol sei Jesus duim olketa nogud samting. Samfala sei hem man for kaikai and man for drink tumas and olketa fren bilong hem pipol for duim sin. Bat gudfala wei bilong hem showimaot datwan hem no tru. Jesus sei: “Gudfala samting wea man duim nao showimaot hem garem gudfala tingting.” (Matt. 11:19) Datfala toktok hem fitim distaem tu. Olsem example, samfala pipol wea stap klosap long Bethel long Selters, Germany, tingse living bilong olketa long Bethel hem difren tumas from nara pipol. Bat bigman long datfala community hem sei: “Hem tru, olketa Witness wea waka long there garem living wea difren, bat datwan no disturbim nara pipol long community.”

¹⁴ Nara example hem long Moscow, Russia. Samfala pipol long there sei Olketa Jehovah’s Witness duim samfala nogud samting. Olketa sei olketa Witness mekem olketa famili no stap gud tugeta, encouragem pipol for suisaed, and olketa no acceptim medical treatment. Bat long June 2010, European Court of Human Rights long Strasbourg, France, sei hem no stret for taon council long Moscow trae stopem Olketa Jehovah’s Witness for no worship, and olketa no garem raet for tambuim meeting bilong olketa. Hem sei olketa kot long Russia no garem eni pruv for sei olketa Witness duim nogud samting. Hem sei olketa kot hia mekius long olketa strict law bilong Moscow for spoelem Olketa Jehovah’s Witness.

IUMI MAS STAP ANDA LONG GAVMAN

15. Wanem Bible principle nao evri tru Christian followim?

¹⁵ Olketa Jehovah’s Witness evriwea long world duim narafala samting wea Peter sei olketa Christian mas duim. Hem sei iumi mas “stap anda long evriwan wea garem paoa,” wea minim olketa king and olketa bigman tu. (1 Pet. 2:13, 14) Nomata iumi no olsem pipol long disfala nogud world, iumi followim toktok bilong Paul taem iumi willing for obeyim olketa law bilong gavman wea no againstim law bilong God from ‘God nao givim paoa long olketa.’—Readim Rome 13:1, 5-7.

16, 17. (a) Wanem nao showimaot iumi no laek for againstim gavman? (b) Wanem nao samfala bigman bilong gavman talem?

¹⁶ Nomata Olketa Jehovah’s Witness olsem “stranger” long disfala world, datwan no minim olketa laek for againstim gavman, or showimaot olketa no agree witim tingting and living bilong nara pipol. And tu, olketa luksavve nara pipol garem tingting bilong olketa seleva abaotem hu nao shud insaed long gavman, or hao for stretem olketa problem long world. Samfala religion join insaed long politik bat Olketa Jehovah’s Witness no duim datwan. Olketa no trae for forcem olketa bigman long politik for changem wei wea olketa ranem gavman. Olketa Jehovah’s Witness no garem eni tingting for laek againstim gavman or for mekem nara pipol duim datwan.

¹⁷ Peter sei olketa Christian mas “showimaot respect for king.” So for showimaot respect long olketa bigman bilong gavman, iumi obeyim olketa. (1 Pet. 2:17) Samfala bigman bilong gavman sei no eni reason stap for pipol tingse Olketa Jehovah’s Witness nogud pipol. Olsem example, Steffen Reiche, wea hem member bilong parliament long Germany, hem sei Olketa Jehovah’s Witness showimaot gudfala wei taem olketa Nazi spoelem olketa. Hem sei nomata gavman spoelem olketa, olketa no changem biliv bilong olketa, and olketa kaen long olketa narawan wea stap long prison witim olketa. Hem sei hem important for pipol long Germany and olketa nara kantri tu for garem olketa gudfala wei olsem, bikos pipol distaem nating kaen long pipol from nara kantri, or long pipol wea garem difren biliv or difren tingting saed long politik.

IUMI SHUD LOVEM OLKETA BRATA

18. (a) Wanem nao mekem iumi lovem evri brata and sista long world? (b) Wanem nao samfala pipol talem abaotem Olketa Jehovah’s Witness?

¹⁸ Aposol Peter sei tu: “Lovem evri brata bilong iufala, [and] fraet long God.” (1 Pet. 2:17) Olketa Jehovah’s Witness fraet long God, wea minim olketa no laek for duim eni samting wea mekem hem for no hapi. Wei for respectim God olsem hem mekem olketa strong for duim wanem hem laekem. Olketa hapi for join tugeta witim staka spiritual brata and sista evriwea long world for worshipim Jehovah. Olketa ‘lovem evri brata and sista bilong olketa.’ No staka pipol long world distaem garem love for narawan. Dastawe samfala taem, olketa wea no Jehovah’s Witness sapraes for lukim love wea iumi garem. Olsem example, wanfala woman wea waka bilong hem for helpem tourist hem barava sapraes for lukim love bilong olketa brata bilong iumi long wanfala international convention long Germany long 2009. Olketa Witness long Germany showimaot love and helpem olketa brata wea visit kam. Datfala woman sei no enitaem bifor hem lukim wanfala grup wea olsem Olketa Jehovah’s Witness. Waswe, enitaem iu herem pipol long community talem kaen toktok olsem abaotem Olketa Jehovah’s Witness long wanfala convention?

19. Wanem nao iumi mas disaed strong for duim, and why nao olsem?

¹⁹ Olsem iumi lanem finis, long plande difren wei Olketa Jehovah’s Witness showimaot olketa barava olsem “stranger” long disfala world bilong Satan. Olketa hapi for olsem and olketa disaed strong for gohed olsem “stranger.” Olketa garem gudfala reason for bilivim klosap nao bae olketa no stranger bat bae olketa stap olowe long datfala raeteous niu world bilong God. Waswe, iu luk forward for stap insaed datfala niu world?