“Distaem nao mi barava free”

LAEF BILONG MI BIFOR:

Mi born long Moundsville, wanfala smol taon wea stap saed long Ohio River long north saed long West Virginia America. Mi garem tufala brata and wanfala sista. Mi nao second born. Laef no boring bikos thrifala boy nao long haos. Parents bilong mi pipol for waka, tufala honest and kaen long pipol. Nomata mifala no garem staka selen, evritaem mifala garem wanem mifala needim. Dadi and mami bilong mi tufala Jehovah’s Witness, so tufala traem best for teachim mifala olketa Bible principle start taem mifala smol yet.

Bat taem mi kamap teenager mi no laek followim wanem mami and dadi teachim mi. Mi daotem sapos olketa Bible principle savve helpem mi for garem gudfala laef. Mi tingse bae mi hapi sapos mi free for duim eni samting wea mi laekem. Gogo, from mi garem olketa kaen tingting olsem mi no go nao long olketa meeting bilong Olketa Jehovah’s Witness. Wanfala brata and sista bilong mi tu duim sem samting. Parents bilong mifala traem best for helpem mifala bat mifala no laekem.

Long datfala taem mi no luksavve freedom wea mi laekem bae mekem mi slave long staka nogud samting. Wanday, taem mi wakabaot go bak long haos from skul, wanfala fren givim wanfala cigarette long mi. Mi acceptim datfala cigarette. Start long datfala taem mi duim staka nogud samting wea spoelem laef bilong mi. Gogo, mi tekem drug, drinkim tumas alcohol and duim olketa rabis samting. Long olketa year bihaen mi isisi tekem olketa strong drug wea savve spoelem man, and taem mi tekem mi no savve lusim. From mi insaed disfala laef wea mi hard for lusim, mi start for salem drug for sapotim datwan.

Evritaem konsens bilong mi pokem mi for samting wea mi duim. Bat mi tingse hem hard nao for changem laef bilong mi. Nomata mi stap witim staka pipol long olketa party and olketa concert, mi savve feel lonely and sorre. Samfala taem mi savve tingim hao nao laef bilong mi hem olsem taem parents bilong mi olketa kaen and gud tumas.

BIBLE CHANGEM LAEF BILONG MI:

Nomata mi tingse mi no savve changem nao wei bilong mi, olketa narawan no givap for helpem mi. Long year 2000 dadi and mami invaetem mi for go long wanfala distrik convention bilong Olketa Jehovah’s Witness. Mi no really laek for go bat mi go nomoa. Mi sapraes for lukim brata and sista bilong mi tu kam long datfala convention.

Taem mi long datfala convention, mi luksavve mi kam long wanfala concert long disfala sem ples long year bifor. Mi tinghae tumas long wanem mi lukim long convention wea barava difren from concert. Long concert, ples hem dirty long rabis and fulap witim pipol wea smoke. Staka wea kam long concert olketa raf, and toktok insaed olketa song hem barava nogud. Bat long convention mi stap witim pipol wea hapi. Olketa welkamim mi nomata olketa no lukim mi for staka year finis. Ples hem klin and mifala herem gudfala message abaotem future. Taem mi lukim wei wea truth long Bible helpem pipol for garem gudfala laef, datwan mekem mi tingim why nao mi no laek followim Bible.—Isaiah 48:17, 18.

Stretawe bihaen convention mi disaed for go bak long olketa meeting bilong Olketa Jehovah’s Witness. Brata and sista bilong mi tu tinghae long wanem tufala lukim long convention and tufala disaed for go bak long olketa meeting. Mifala evriwan agree for Olketa Jehovah’s Witness studyim Bible witim mifala.

Scripture wea barava helpem mi hem James 4:8 wea sei: “Fren gud witim God and bae hem fren gud witim iufala.” Mi luksavve sapos mi laek for fren gud witim God, mi mas changem laef bilong mi. Samfala samting wea mi mas changem hem for stop smoke, no tekem drug and no drinkim tumas alcohol.—2 Corinth 7:1.

Mi lusim olketa fren bilong mi bifor and mi garem olketa niu fren wea worshipim Jehovah. Wanfala elder long kongregeson wea studyim Bible witim mi hem barava helpem mi. Hem savve ringim mi evritaem and kam lukim mi. Kam kasem distaem hem nao gud fren bilong mi.

Long 2001, mi witim brata and sista bilong mi, mifala baptaes for showimaot mifala dedicate long God. Mami and dadi, and last born brata bilong mi barava hapi tumas taem olketa lukim famili bilong mifala worshipim Jehovah tugeta.

GUD SAMTING WEA MI KASEM:

Bifor mi tingse wei for followim olketa Bible principle hem stopem mi for duim olketa samting wea mi laek duim, bat distaem mi luksavve datwan barava protectim mi. Taem mi followim olketa Bible principle, datwan strongim mi for lusim and no salem drug, and hem helpem mi for duim olketa gud samting.

Mi hapi for joinim olketa wea worshipim Jehovah evriwea long world wea olsem wanfala famili. Olketa hia lovem olketa evriwan and worshipim God witim wan mind. (John 13:34, 35) Gogo mi meetim waef bilong mi, Adrianne, wea hem tu wanfala Jehovah’s Witness. Mi lovem hem tumas and mitufala hapi for worshipim God tugeta.

Distaem mi no duim wanem miseleva nomoa laekem, bat mi duim volunteer waka for teachim pipol hao olketa tu savve kasem gud samting from Bible. Disfala waka mekem mi hapi tumas. Mi barava bilivim Bible nao changem laef bilong mi. Distaem nao mi barava free.