No Lus Hope!

Samfala experience from Britain bae helpem iu for luksavve why iu shud no lus hope. Bae iu lukim tu hao iu savve “torowem go bred bilong iu antap long wata,” wea piksarem olketa samting wea iu savve duim for helpem olketa wea no kam insaed truth yet.—Eccl. 11:1.

HEM BARAVA IMPORTANT FOR NO GIVAP

Hem barava important for iu no givap. Iu mas gohed strong long truth and hol strong long Jehovah. (Deut. 10:20) Hem nao samting wea Georgina duim. Taem Georgina start for studyim Bible witim Olketa Jehovah’s Witness long 1970, hasband bilong hem, Kyriacos, hem kros fogud. Hem trae for stopem study bilong Georgina, hem no letem olketa Witness kam long haos, and sapos hem faendem eni buk bilong olketa, hem tekem.

Taem Georgina start for attendim olketa meeting, Kyriacos hem kros go moa. Wantaem hem go long Kingdom Hall for raoa witim olketa. Wanfala sista hem luksavve Kyriacos hem no minim gud English so hem ringim wanfala Greek brata for kam story witim Kyriacos, bikos languis bilong Kyriacos hem Greek. From datfala brata hem kaen, Kyriacos hem no raoa nao, and for tu-thri month hem studyim Bible witim datfala brata. Bat then Kyriacos hem stop for study.

For thrifala year moa Kyriacos hem againstim Georgina. Kyriacos sei bae hem lusim Georgina sapos hem baptaes. Long day wea Georgina redi for baptaes, hem prea strong long Jehovah for Kyriacos no lusim hem. Taem olketa Witness kam long haos for tekem hem go long assembly, Kyriacos hem sei long olketa: “Iufala go firstaem. Bae mifala kam bihaen long car bilong mifala.” Hem attendim morning session bilong datfala assembly and lukim waef bilong hem baptaes!

Bihaen, Kyriacos no againstim waef bilong hem olsem bifor, and hem isisi changem samfala wei bilong hem. Klosap 40 year bihaen Georgina meetim olketa Witness, hem lukim hasband bilong hem baptaes! Wanem nao helpem Kyriacos for change? Hem sei: “Mi hapi tumas bikos Georgina no letem eni samting stopem hem for worshipim Jehovah.” Georgina sei: “Nomata hasband bilong mi againstim mi, hard tumas for mi no worshipim God bilong mi. Mi prea long Jehovah olowe, and mi no lus hope.”

GUDFALA WEI HEM IMPORTANT TUMAS

Nara samting wea iu savve duim for helpem marit partner bilong iu hem for garem gudfala wei wea fitim olketa Christian. Aposol Peter hem sei olsem long olketa Christian waef: “Iufala olketa waef mas stap anda long hasband bilong iufala. Then nomata sapos eniwan long olketa no obeyim toktok bilong God, gudfala wei bilong waef nao bae mekem olketa biliv nomata waef no talem eni samting.” (1 Pet. 3:1) Christine hem followim datfala advaes bilong Peter. Nomata olsem, staka year go pas bifor hasband bilong hem kamap Witness. Taem Christine kamap Witness winim 20 year go finis, hasband bilong hem, John, no biliv long God. Nomata John no interest long religion, hem luksavve religion bilong Christine barava important long hem. Hem sei: “Mi luksavve datwan mekem Christine hapi. Hem kamap strong and mi savve depend long hem, wea diswan barava helpem mi taem mi feisim samfala hard taem.”

No enitaem Christine forcem hasband for acceptim religion bilong hem. Hasband bilong hem sei: “Christine luksavve best samting hem for no story long mi abaotem olketa biliv bilong hem. Hem patient for letem mi lanem samting seleva taem mi redi.” Taem Christine lukim eni article insaed long Wastaoa or Awake! magasin wea storyim topic wea hem savve John bae interest long hem, olsem science or nature, hem savve showim long John and sei: “Maet iu bae interest for readim diswan.”

Gogo John hem retire and hem duim lelebet waka long garden bilong nara pipol. From hem no busy tumas hem garem moa taem for tingting abaotem laef. Hem laek savve sapos samwan wakem iumi and sapos hem garem reason for duim datwan, or iumi kamap seleva nomoa. Wanday, taem John hem story witim wanfala brata, datfala brata askem hem sapos hem laek for study. John hem sei: “From mi start for biliv long God, mi agree for study witim hem.”

Christine hem kasem gud samting from hem no lus hope! Bihaen Christine hem prea for 20 year for John hem acceptim truth, hem baptaes nao. Distaem tufala strong for servem Jehovah tugeta. John storyim tufala samting wea mekem hem acceptim truth. Wanfala hem wei wea olketa Witness kaen and story gud witim hem. And mek-tu hem example bilong waef bilong hem. Hem sei: “Taem iu maritim wanfala Jehovah’s Witness, iu garem partner wea hem faithful, wea iu savve depend long hem, and wea no selfish.” Tru nao, Christine hem followim toktok long 1 Peter 3:1 and hem kasem gud samting!

OLKETA SEED SAVVE GROW BIHAEN STAKA YEAR

Waswe long olketa Bible study bilong iumi wea no gohed for study? King Solomon hem sei: “Iu mas plantim olketa seed start long morning go kasem evening, bikos iu no savve which wan long olketa nao bae grow. Maet evri seed grow gud, or maet samfala nomoa grow bat olketa narawan no grow.” (Eccl. 11:6) Samfala taem hem savve tek longtaem bifor truth hem start for grow insaed heart bilong man. Nomata olsem, maet gogo hem luksavve why hem important for fren gud witim God. (Jas. 4:8) Iu no savve, maet wanday iu kasem naesfala sapraes.

Tingim Alice wea lusim India and go stap long England. Long 1974 hem start for studyim Bible. Hem savve story long Hindi languis bat hem laek for savve long English. Hem gohed study for samfala year and attendim tu-thri meeting long English languis kongregeson tu. Hem savve samting wea hem studyim hem tru, bat hem no ting long datwan olsem hem important. And tu, hem interest tumas for kasem selen and go long olketa party. Gogo Alice no study nao.

Klosap 30 year bihaen, Stella, wea study witim Alice bifor, kasem wanfala leta from hem. Datfala leta hem sei: “Mi sure iu bae hapi for savve Bible study wea iu study witim hem long 1974 hem baptaes long distrik convention wea just finis. Iu helpem mi for duim important samting long laef bilong mi. Iu nao plantim seed bilong truth insaed long mi, and nomata long datfala taem mi no redi yet for dedicate long God, datfala seed bilong truth hem stap insaed tingting and heart bilong mi.”

Wanem nao mekem hem interest moa? Alice sei hem barava sorre tumas bihaen hasband bilong hem dae long 1997. Hem prea long God. Tenfala minute bihaen hem prea, tufala Witness wea story long Punjabi languis kam long haos bilong hem and givim hem datfala tract Wanem Hope for Olketa Wea Yumi Love-im Wea Dae Finis? Long tingting bilong Alice, God ansarem prea bilong hem and hem disaed for contactim Olketa Jehovah’s Witness. Bat hao nao bae hem faendem olketa? Hem faendem old address buk bilong hem and insaed hem lukim address bilong Punjabi languis kongregeson wea Stella givim long hem bifor. Alice hem go long Kingdom Hall and olketa brata and sista barava welkamim hem. Alice hem sei: “Nomata bihaen mi lusim Kingdom Hall, mi tingim yet love wea olketa showim long mi and datwan helpem mi for no sorre tumas.”

Hem start for study moa and attendim olketa meeting, and hem lane tu for readim and story gud long Punjabi languis. Long 2003 hem baptaes. Long end long leta wea Alice raetem, hem sei long Stella: “Mi laek for thankiu long iu from iu plantim olketa seed hia 29 year bifor and from iu showimaot gudfala example for mi followim.”

Wanem nao iu savve lanem from olketa experience hia? Maet hem tek longtaem lelebet, bat sapos man hem honest, hem hambol, and hem laek for savve long God, Jehovah bae helpem hem for minim and acceptim truth. Tingim samting wea Jesus talem long end bilong wanfala tokpiksa bilong hem. Hem sei: “Olketa seed start for grow and kamap big. Hem [man wea plantim datwan] no savve tu hao nao olketa seed hia grow. Graon nao mekem olketa seed grow, gogo olketa garem frut. First samting for kamap hem leaf, then hem garem flaoa, gogo hem garem frut.” (Mark 4:27, 28) Seed hia hem isisi grow insaed long graon and man no lukim. Iumi wea preachim gud nius tu no savve hao olketa seed bilong truth grow insaed olketa wea iumi study witim. So gohed for plantim staka seed. Maet wanday iu harvestim staka samting.

No forget prea hem barava important. Georgina and Christine gohed for prea long Jehovah. Sapos iu “gohed for prea and no givap” and no lus hope, “nomata longfala bihaen” maet iu faendem moa datfala “bred” wea iu torowem antap long wata.—Rome 12:12; Eccl. 11:1.