FREN GUD WITIM GOD
“Gohed for Ask and Iufala Bae Kasem Samting wea Iufala Ask for Hem”
“Lord, teachim mifala for prea.” (Luke 11:1) Wanfala disaepol hem askem diswan long Jesus. For ansarem hem, Jesus storyim tufala tokpiksa wea teachim iumi hao for prea mekem God herem prea bilong iumi. Sapos iu no sure God herem olketa prea bilong iu, bae iu interest for savve long ansa bilong Jesus.—Readim Luke 11:5-13.
Long firstfala tokpiksa, Jesus helpem iumi for ting raonem hao for prea. (Luke 11:5-8) Long tokpiksa hia, wanfala guest kam long haos bilong wanfala man long midolnaet bat man hia no garem kaikai for givim long hem. For givim kaikai long guest hem important samting long datfala man. Nomata hem midolnaet finis datfala man go long haos bilong fren bilong hem for askem bred. Firstaem datfala fren no laek getap bikos full famili bilong hem sleep finis. Bat datfala man no shame for gohed askem fren bilong hem go kasem taem hem getap and givim kaikai long hem.a
Wanem nao iumi lanem abaotem prea long disfala tokpiksa? Jesus sei iumi mas gohed for ask, gohed for lukaotem samting and gohed for noknok. So Jesus teachim iumi for gohed prea. (Luke 11:9, 10) Waswe, Jesus minim God no laek herem prea bilong iumi? Nomoa. Jesus laekem iumi for savve God hem no olsem datfala man wea no laek getap for openem door, bat God laekem tumas for ansarem prea bilong olketa wea showimaot faith long hem. Iumi showimaot iumi garem faith taem iumi gohed prea. Taem iumi gohed askem samting, iumi showimaot iumi barava needim wanem iumi askem and iumi bilivim God bae ansarem prea bilong iumi, sapos datwan followim tingting bilong hem.—Mark 11:24; 1 John 5:14.
Mek-tu tokpiksa teachim iumi samting abaotem Jehovah wea herem olketa prea bilong iumi. (Psalm 65:2) Jesus sei: “Waswe iufala olketa dadi? Sapos son bilong iu hem ask for wanfala fish, bae iu givim hem wanfala snek? Or sapos hem askem iu for wanfala egg, bae iu givim hem wanfala skopion?” No eni dadi wea lovem pikinini bilong hem bae givim samting wea savve spoelem pikinini. Then Jesus explainim datfala tokpiksa olsem: Olketa dadi wea sin “givim olketa gudfala samting” long olketa pikinini. “Sapos olsem, Dadi bilong iufala long heven bae barava givim holy spirit” long olketa wea askem hem!—Luke 11:11-13; Matthew 7:11.
God laekem tumas for ansarem prea bilong olketa wea showimaot faith long hem
Wanem nao iumi lanem abaotem Jehovah long disfala tokpiksa? Jesus laekem iumi for savve Jehovah hem Dadi wea laekem tumas for givim wanem olketa pikinini bilong hem needim. So olketa wea worshipim Jehovah savve askem eni samting wea olketa needim. And from olketa savve Jehovah laekem olketa for kasem gud samting, olketa hapi long ansa Jehovah givim, nomata maet hem no samting wea olketa expectim.b
Bible Reading wea Iu Savve Duim
a Datfala tokpiksa bilong Jesus storyim wei bilong pipol long datfala taem. Hem important samting long olketa Jew for welkamim pipol. Famili savve wakem bred for fitim wanfala day nomoa and sapos bred finis, olketa savve askem narawan. And tu, olketa famili wea poor, evriwan savve sleep long wanfala rum nomoa.
b For savve moa abaotem hao for prea mekem God herem prea bilong iu, lukim chapter 17 long buk Wanem Nao Really Samting wea Bible Teachim? wea Olketa Jehovah’s Witness pablisim.