“Goal bilong mi hem for kamap priest”

LAEF BILONG MI BIFOR:

Mi born long Texcoco, wanfala smol taon long Mexico. Long datfala taem, olketa no wakem gud olketa road and hem dust tumas. Staka taem pipol from olketa nara vilij savve kam long taon. Olketa leadim kam donkey bilong olketa wea karem staka samting for olketa salem. Long famili bilong mi, mifala naenfala pikinini and mi mek-seven. Famili bilong mifala poor and dadi hem fixim olketa sandol (guaraches) for kasem selen for sapotim mifala. Dadi dae taem mi seven year nomoa. Start long datfala taem, mami mas waka hard for kasem selen for baem kaikai for mifala.

Grandadi bilong mi savve pleim violin and hem leadim wanfala orchestra wea pleim lotu music. Klosap evriwan long famili savve hao for pleim music instrument. Mami hem joinim choir bilong church, and uncle bilong mi hem opera singer and savve pleim piano tu. Famili bilong mi olketa strongfala Catholic. Mi altar boy, and mi laek for kamap missionary bilong Catholic. Bat mi laekem tu olketa movie abaotem karate. Taem mi gohed lukluk long olketa movie hia datwan mekem mi barava raf.

Mi go long wanfala skul long Puebla. Datfala skul hem trainim olketa man for kamap priest long Catholic wea hem nao goal bilong mi. Long lastfala year bilong mi long skul wanfala nun hem trae for switim mi for durong witim hem. Mi winim datfala temptation, bat datwan mekem mi luksavve mi no laek stap singol for olowe. Nara samting tu, mi lukim samfala priest no duim wanem olketa preach abaotem. Olketa samting hia mekem mi feel nogud long Catholic Church so mi no laek kamap priest nao.

Mi disaed for studyim music long National Conservatory of Music, wea hem wanfala music skul long Mexico City. Bihaen mi graduate, mi marit and gogo mi garem fofala pikinini. Mi singsing long choir bilong Catholic Church for kasem selen for sapotim famili.

Start long taem mi and waef bilong mi marit mitufala nating stap gud and savve raoa olowe bikos mitufala jealous long mitufala. Firstaem mitufala talem olketa nogud toktok and gogo mitufala savve killim each other. Gogo, bihaen 13 year mitufala disaed for separate and then mitufala divorce.

BIBLE CHANGEM LAEF BILONG MI:

Mi meetim Olketa Jehovah’s Witness bifor mi and waef bilong mi separate. Tufala Witness kam long haos bilong mi and laek for storyim Bible witim mi. Mi tingse mi savve staka samting abaotem religion, so mi laek for pruvim tufala rong. Mi askem staka kwestin wea mi tingse tufala bae hard for ansarem. Bat mi sapraes bikos evritaem tufala kam for story tufala iusim Bible for ansarem evri kwestin bilong mi. Datwan mekem mi luksavve mi no savve staka samting. Waef bilong mi hem treatim nogud olketa Witness and mi busy tumas, so olketa stop for kam.

Faevfala year bihaen mitufala separate, mi meetim Olketa Jehovah’s Witness moa and long datfala taem mi stap witim nara woman, wea nem bilong hem Elvira. Elvira no againstim olketa Witness, so datwan mekem hem isi for olketa studyim Bible witim mi evri week. Nomata olsem, hem tekem tu-thri year for mi changem olketa nogud wei bilong mi.

Mi luksavve sapos mi laek for worshipim Jehovah long wei wea hem acceptim, mi mas mekem samfala big change. Mi mas lusim waka bilong mi for singsing long choir bilong Catholic Church. Datwan minim mi mas faendem nara waka for sapotim famili. (Revelation 18:4) And tu, mi mas registerim marit bilong mitufala Elvira.

Bat wanfala samting wea hem no isi for mi changem, hem nao for kontrolem kros bilong mi. Tufala scripture nao barava helpem mi. Wanfala hem Psalm 11:5, wea showimaot Jehovah hem heitim wei for raf. Nara scripture hem 1 Peter 3:7, wea helpem mi for luksavve mi mas respectim waef bilong mi mekem Jehovah herem prea bilong mi. Taem mi ting raonem olketa verse hia and prea for Jehovah helpem mi, isisi mi start for kontrolem kros bilong mi.

GUD SAMTING WEA MI KASEM:

Distaem mi and famili bilong mi hapi. Mi traem best for fren gud witim olketa son bilong mi long first marit bilong mi and for strongim faith bilong Elvira and olketa pikinini bilong mitufala.

Taem mi pikinini, mi tingse goal bilong mi for kamap priest and for helpem pipol bae mekem mi hapi. Bat distaem nao mi hapi and satisfae long laef bilong mi. Mi teachim music for kasem selen for sapotim famili bilong mi. Mi hapi tumas Jehovah hem patient witim mi and givim mi chance for changem laef bilong mi and for duim olketa gud samting!