Waswe, Jehovah Tingim Iu?

Wanfala woman hem tingse hem no duim eni gud samting wea bae mekem Jehovah tingim hem. Hem sei: “Mi barava feel iusles and datwan mekem mi feel olsem mi no savve fren gud witim God.” Waswe, iu savve feel olsem tu? Sapos olsem maet iu laek for savve, ‘Waswe, Jehovah tingim man wea worshipim hem?’ Ia! Toktok bilong Jesus hem helpem iumi for luksavve Jehovah tingim man wanwan.—Readim John 6:44.

Jesus savve gud long wei bilong Jehovah and wanem hem laekem winim eni nara man. (Luke 10:22) Wanem nao hem sei long John 6:44? Jesus hem sei: “Hard for eniwan kam long mi sapos Dadi wea sendem mi kam hem no leadim hem kam long mi firstaem.” Sapos Jehovah no leadim iumi kam long hem firstaem, hard for iumi worshipim hem and for iumi kamap disaepol bilong Christ. (2 Thessalonica 2:13) Diswan showimaot klia Jehovah tingim iumi man wanwan.

Taem Jesus sei ‘Jehovah leadim man kam,’ wanem nao datwan minim? Jehovah no forcem iumi for worshipim hem, bat hem laekem iumi for disaedem datwan long heart bilong iumi. (Deuteronomy 30:19, 20) Jehovah hem lukluk gud long heart bilong staka billion pipol long world for faendem man wea lukaotem hem. (1 Chronicles 28:9) Taem hem faendem kaen man olsem, hem barava willing for helpem hem. Hao nao hem duim datwan?

Jehovah hem isisi leadim kam long hem ‘man wea showimaot hem laekem laef.’ (Acts 13:48) For duim datwan, Jehovah iusim gud nius from Bible wea savve kasem heart bilong man and hem iusim holy spirit bilong hem. Taem Jehovah luksavve man hem interest long truth wea stap long Bible, hem iusim spirit bilong hem for helpem datfala man for minim and followim wanem Bible talem. (1 Corinth 2:11, 12) Iumi no savve worshipim Jehovah or kamap disaepol bilong Jesus sapos Jehovah no helpem iumi.

So wanem nao iumi savve lanem abaotem Jehovah God from toktok bilong Jesus long John 6:44? Jehovah leadim kam pipol bikos hem tingim olketa wanwan and hem lukim gud samting long heart bilong olketa. Datfala woman wea iumi storyim long start hem kasem comfort taem hem savve long diswan. Hem sei: “Hem nambawan privilege for worshipim Jehovah. And from Jehovah chusim mi for wakaman bilong hem mi luksavve Jehovah tinghae long mi.” Waswe long iu? Taem iu savve Jehovah tingim man wea worshipim hem, waswe, datwan mekem iu laek for fren gud witim hem?