ANSA FOR OLKETA BIBLE KWESTIN
Why nao world no garem peace?
Bible storyim tufala reason. Firstfala reason, nomata olketa man savve tumas hao for duim staka samting, olketa no fit for rulim olketa seleva. Mek-tu reason, olketa plan bilong man no savve win bikos “full world hem stap long paoa bilong Satan.” Dastawe nomata man traem best for mekem world for garem peace hem no savve duim datwan.—Readim Jeremiah 10:23; 1 John 5:19.
World hem no savve garem peace tu bikos olketa man tingim olketa seleva nomoa. Gavman wea teachim pipol evriwea long world for duim stret samting and for tingim narawan, hem nomoa savve mekem world for garem peace.—Readim Isaiah 32:17; 48:18, 22.
Hu nao bae mekem world for garem peace?
Olmaeti God hem promisim iumi hem bae garem wanfala gavman wea bae rul ovarem olketa man. Datfala gavman bae changem evri gavman long world. (Daniel 2:44) Son bilong God, Jesus, bae rul olsem Prince bilong Peace. Hem bae finisim olketa nogud samting long disfala world and bae teachim pipol for garem peace.—Readim Isaiah 9:6, 7; 11:4, 9.
Nomata distaem, staka million pipol evriwea long world followim direction bilong Jesus for teachim pipol wanem Bible talem abaotem hao for garem peace witim narawan. Klosap nao full world bae garem peace.—Readim Isaiah 2:3, 4; 54:13.