Letem Discipline From Jehovah Stretem Iu
“Kaonsel bilong iu bae leadim mi, and bihaen bae iu mekem mi for kasem glory.”—PS. 73:24.
1, 2. (a) Wanem nao iumi mas duim for fren gud witim Jehovah? (b) Hao nao example bilong samfala long Bible wea kasem discipline from God savve helpem iumi?
“TAEM mi fren gud witim God, mi kasem gud samting. Jehovah, wea hem Lord bilong evri samting, hem nao sef ples bilong mi.” (Ps. 73:28) Wanem nao mekem man wea raetem psalm hem talem datfala toktok? Long firstaem, hem savve feel nogud taem hem lukim nogud pipol stap gud. Hem sei: “Hem iusles nomoa for mi klinim heart bilong mi, and for mi wasim hand bilong mi for showimaot mi no guilty.” (Ps. 73:2, 3, 13, 21) Bat taem hem go insaed long “datfala nambawan temple bilong God,” datwan helpem hem for stretem tingting bilong hem and gohed fren gud witim God. (Ps. 73:16-18) Important samting wea hem lanem nao, sapos man laek fren gud witim Jehovah, hem mas stap witim pipol bilong God, and acceptim and followim kaonsel.—Ps. 73:24.
2 Iumi tu laek for fren gud witim trufala God. So hem barava important for iumi acceptim kaonsel and discipline bilong hem. Jehovah givim iumi kaonsel and discipline for stretem iumi mekem iumi savve kamap man wea hem hapi long hem. Long bifor, God showimaot mercy long wei for givim chance long samfala man wanwan and long samfala full nation for acceptim discipline bilong hem. Bible storyim olketa example hia “for teachim iumi” and “for warnim iumi” long olketa last day distaem. (Rome 15:4; 1 Cor. 10:11) Long disfala study bae iumi storyim samfala example hia. Diswan bae helpem iumi for luksavve long tingting bilong Jehovah, and gud samting wea iumi savve kasem taem iumi letem hem for stretem iumi.
JEHOVAH STRETEM MAN OLSEM MAN WEA WAKEM SAMTING LONG CLAY
3. Wanem nao Isaiah 64:8 and Jeremiah 18:1-6 talem abaotem paoa wea Jehovah garem ovarem pipol? (Lukim piksa long start bilong disfala study.)
3 Bible sei Jehovah hem olsem man wea wakem samting long clay bikos hem garem paoa ovarem pipol and olketa nation. Isaiah 64:8 sei: “Jehovah, iu nao Dadi bilong mifala. Mifala nao clay, and iu nao man wea wakem samting long clay, and iu wakem mifala evriwan.” Man savve wakem enikaen samting long clay. Clay no savve talem man wanem hem mas wakem. Hem semsem tu witim olketa man. Iumi no garem raet for talem God wanem nao for duim long iumi, olsem clay no savve talem man wanem kaen pot or dish nao hem mas wakem.—Readim Jeremiah 18:1-6.
4. Waswe, Jehovah forcem pipol or olketa nation for obeyim hem? Explainim.
4 Jehovah stretem nation bilong Israel olsem man wea wakem samting long clay hem savve sheipim datfala clay. Bat hao nao Jehovah hem difren from man wea wakem samting long clay? Man wea wakem samting long clay savve disaed for iusim datfala clay for wakem eni samting wea hem laekem. Bat Jehovah letem olketa man and olketa nation disaed seleva wanem olketa bae duim, and hem no mekem samfala gud and samfala nogud. Olketa man seleva nao mas disaed sapos olketa bae letem Creator bilong olketa, Jehovah, for stretem olketa or nomoa.—Readim Jeremiah 18:7-10.
5. Taem olketa man les for Jehovah stretem olketa, wanem nao Jehovah duim?
5 Waswe sapos wanfala man hem bighed and hem les for Jehovah stretem hem? Bae wanem nao Jehovah hem duim? Taem man wea wakem samting long clay no savve sheipim datfala clay for followim wanem hem laekem, hem savve disaed for wakem difren samting, or hem savve torowem datfala clay. Plande taem diswan savve happen bikos datfala man nao no sheipim gud datfala clay. Bat Jehovah hem no olsem. (Deut. 32:4) Taem man no letem Jehovah stretem hem, man hia nao hem rong, no Jehovah. Taem pipol obeyim Jehovah, hem savve iusim olketa for duim gud samting. Olsem example, olketa anointed Christian savve olsem ‘olketa pot for putim gud samting insaed.’ Bat olketa wea les for followim kaonsel bilong God olketa olsem ‘olketa pot for putim rabis samting insaed,’ wea olketa fit for finis nomoa.—Rome 9:19-23.
6, 7. Wanem nao King David and King Saul duim taem Jehovah kaonselem tufala?
6 Wanfala wei wea Jehovah stretem pipol hem taem hem givim kaonsel or disciplinem olketa. Olsem example, tingim wanem Jehovah duim for stretem tufala first king long Israel, Saul and David. Taem King David durong witim Bath-sheba, tufala and olketa narawan tu kasem nogud samting. Nomata David hem king, Jehovah givim hem strongfala discipline. God sendem profet bilong hem Nathan for givim strongfala kaonsel long David. (2 Sam. 12:1-12) Wanem nao David duim? Hem barava sorre tumas long samting wea hem duim, and God showimaot mercy long David bikos hem repent.—Readim 2 Samuel 12:13.
7 King Saul hem no olsem. Hem les for herem kaonsel. Jehovah sendem Samuel for talem King Saul hem mas killim dae evri Amalekite and olketa animal bilong olketa. Bat Saul no obeyim Jehovah. Hem no killim dae King Agag, and hem keepim tu olketa best animal. (1 Sam. 15:1-3, 7-9, 12) So Jehovah sendem Samuel for kaonselem Saul. Hem fitim for Saul herem datfala kaonsel and acceptim wei wea Jehovah stretem hem. Bat Saul hem les for change. Hem tingse hem garem gudfala reason for samting wea hem duim. Hem sei bae hem sakrifaesim olketa animal hia long Jehovah. God sei hem no acceptim Saul for king nao, and no enitaem moa Saul hem fren gud witim God.—Readim 1 Samuel 15:13-15, 20-23.
GOD NO FAVORIM ENIWAN
8. Wanem nao iumi savve lanem from samting wea nation bilong Israel duim taem Jehovah trae for stretem olketa?
8 Jehovah givim chance tu long samfala full nation for obeyim hem. Bihaen Jehovah mekem olketa Israelite kamap free from Egypt long 1513 B.C.E., olketa kamap spesol pipol bilong hem. God sei bae hem stretem olketa. Bat olketa no acceptim datwan and olketa gohed duim olketa nogud samting. Olketa worshipim tu olketa laea god bilong olketa nation wea stap klosap long olketa. Plande taem, Jehovah sendem olketa profet for helpem olketa Israelite change bat olketa no laek herem kaonsel bilong olketa profet hia. (Jer. 35:12-15) From olketa no obeyim Jehovah, hem givim strongfala discipline long olketa. Olketa bilong Assyria finisim kingdom bilong Israel long north. Bihaen, olketa bilong Babylon tekova long kingdom bilong Judah long south. Iumi lanem barava important samting from diswan. For iumi kasem gud samting taem Jehovah stretem iumi, iumi mas lisin and obey.
9, 10. Wanem nao pipol bilong Nineveh duim taem olketa herem warning bilong Jehovah?
9 Jehovah givim chance tu long pipol bilong Nineveh for obeyim warning bilong hem. Jehovah sei long Jonah: “Iu go long datfala big taon, Nineveh, and talem pipol long there mi savve long nogud samting wea olketa duim.” Jehovah disaed for finisim Nineveh bikos wei bilong pipol long there barava nogud.—Jonah 1:1, 2; 3:1-4.
10 Taem Jonah talem pipol bilong Nineveh wanem God talem, olketa “biliv long God.” Olketa laek for showimaot olketa repent so olketa no kaikai, and olketa werem kaleko wea showimaot olketa sorre. Nomata king tu “hem getap and aotem spesol kaleko wea hem werem. Hem werem kaleko wea showimaot hem sorre, and hem sidaon long asis.” Pipol bilong Nineveh letem Jehovah stretem olketa and olketa repent. So Jehovah no finisim datfala taon.—Jonah 3:5-10.
11. Wanem nao iumi lanem from hao Jehovah deal witim olketa Israelite and pipol bilong Nineveh?
11 Nomata olketa Israelite spesol pipol bilong Jehovah, hem mas disciplinem olketa. Pipol bilong Nineveh no spesol pipol bilong God, bat olketa lisin and obey taem God stretem olketa. So Jehovah showimaot mercy long olketa and hem disaed for no finisim olketa. Tufala example hia barava showimaot Jehovah “no favorim eniwan”!—Deut. 10:17.
JEHOVAH SAVVE CHANGEM DISISON BILONG HEM
12, 13. (a) Wanem nao savve mekem God willing for changem wanem hem disaed for duim? (b) Taem Bible sei Jehovah hem “sorre,” wanem nao datwan savve minim?
12 Jehovah savve changem wanem hem disaed for duim long pipol sapos olketa changem wei bilong olketa. Olsem example, Bible sei Jehovah hem sorre from hem mekem Saul king bilong Israel. (1 Sam. 15:11) And taem pipol bilong Nineveh repent and finis for duim olketa nogud samting, Bible sei: “Trufala God . . . hem sorre from hem sei hem bae finisim olketa, and hem no duim datwan nao.”—Jonah 3:10.
13 Long samfala taem wea Bible sei Jehovah hem “sorre,” datwan minim hem changem tingting bilong hem abaotem wanfala man or hem changem wanem hem disaed for duim. Long firstaem, Jehovah hem hapi long Saul. Bat taem Saul no obey, God no acceptim hem for king nao. Diswan hem no bikos Jehovah hem mistek taem hem chusim Saul for king, bat hem bikos Saul nao no obeyim hem. And taem pipol bilong Nineveh repent, Jehovah willing for changem wanem hem disaed for duim and hem no finisim olketa. Iumi hapi for savve Jehovah hem kaen and showimaot mercy and hem willing for changem wanem hem disaed for duim taem pipol changem wei bilong olketa!
NO TING SMOL LONG DISCIPLINE BILONG JEHOVAH
14. (a) Wanem nao Jehovah iusim for stretem iumi distaem? (b) Wanem nao iumi shud duim taem God stretem iumi?
14 Distaem Jehovah iusim Bible and organization bilong hem for stretem iumi. (2 Tim. 3:16, 17) Iumi shud hapi for acceptim eni kaonsel or discipline wea iumi kasem. Nomata iumi baptaes for longtaem finis or iumi garem staka privilege long kongregeson, iumi shud gohed obeyim kaonsel bilong Jehovah. Sapos iumi lisin and obey taem Jehovah stretem iumi, iumi savve kamap man wea hem hapi long hem.
15, 16. (a) Taem man lusim olketa privilege long kongregeson, maet hao nao hem feel? Storyim example. (b) Wanem nao savve helpem iumi for winim wei for feel shame taem iumi kasem discipline?
15 Hao nao Jehovah disciplinem iumi? Hem teachim iumi wanem hem laekem iumi for duim, and hem stretem tingting bilong iumi. Maet samfala taem iumi needim strongfala discipline bikos iumi duim bigfala rong. And maet iumi lusim samfala privilege long kongregeson. Tingim example bilong Dennis,a wea hem wanfala elder. Hem kasem strongfala kaonsel bikos hem duim samting saed long bisnis wea no stret. Long naet bilong meeting wea olketa announcem Dennis hem go daon from elder, hao nao hem feel? Hem sei hem feel iusles. Hem sei tu: “Long 30 year wea go pas, mi kasem staka privilege. Mi regular pioneer, mi waka long Bethel, mi ministerial servant, and then mi elder. Mi just kasem privilege tu for givim wanfala tok long distrik convention. Seknomoa, mi no garem eni privilege nao.” Dennis hem feel shame and hem no savve sapos bae hem fit for duim eni samting moa long organization bilong Jehovah.
16 Dennis mas no duim moa datfala samting wea no stret. Bat wanem nao helpem hem for winim wei for feel shame? Hem strong for gohed studyim Bible, evritaem duim ministry, and attendim olketa meeting. Hem tinghae long encouragement wea hem kasem from olketa brata and sista and long olketa pablikeson. Hem sei: “Datfala article ‘Waswe, Iu Garem Waka Bifor? Waswe, Iu Savve Duim Moa?’ long Wastaoa, August 15, 2009, hem olsem wanfala leta from Jehovah wea ansarem prea bilong mi.” Datfala article helpem Dennis for luksavve hem savve iusim taem bilong hem for strongim wei wea hem fren witim Jehovah. Datfala discipline helpem hem, and bihaen tu-thri year hem ministerial servant moa.
17. Hao nao wei for disfellowshipim man wea duim sin savve helpem hem? Storyim example.
17 Narafala wei Jehovah givim discipline hem for disfellowshipim man. Diswan protectim kongregeson from nogud wei bilong datfala man wea duim sin, and hem savve helpem hem for repent. (1 Cor. 5:6, 7, 11) Robert hem disfellowship for klosap 16 year. Taem hem disfellowship, mami and dadi, and olketa brata bilong hem followim toktok long Bible and no associate witim hem, nomata for sei hello long hem tu. Robert hem reinstate for samfala year finis and hem gohed gud long truth. Hem sei wanfala reason why hem kam bak long truth nomata hem disfellowship for longfala taem, hem bikos famili bilong hem no associate witim hem. Hem sei tu sapos famili story lelebet nomoa witim hem or askem hem sapos hem stap olraet bae hem no barava misstim olketa. From olketa no duim olsem, datwan nao helpem hem for laek fren bak witim Jehovah and pipol bilong Hem.
18. Wanem nao iumi mas duim taem God stretem iumi?
18 Maet iumi no needim kaen strongfala discipline olsem. Bat iumi mas ting raonem wanem iumi bae duim taem God stretem and disciplinem iumi. Waswe, bae iumi acceptim kaonsel olsem David, or bae iumi rejectim kaonsel olsem Saul? Jehovah, wea olsem man for wakem samting long clay, hem nao Dadi bilong iumi. No forget, “Jehovah hem stretem man wea hem lovem, olsem wanfala dadi hem stretem son wea hem lovem.” So evritaem acceptim discipline wea iu kasem from Jehovah.—Prov. 3:11, 12.
a Mifala changem olketa nem long disfala study.